Dynes yn ddieuog o berchen ar gi XL Bully a laddodd tad ei chymar

Chanel Fong yn cyrraedd y llys yn ystod yr achosAndrew Price

Fe blediodd Chanel Fong yn ddieuog i'r ddau gyhuddiad yn ei herbyn mewn cysylltiad â'r ymosodiad ci yn ei chartref ym mis Mai 2022

Mae dynes 33 oed o Wrecsam wedi ei chael yn ddieuog o berchen ar gi XL Bully a frathodd tad ei chymar gan achosi iddo waedu i farwolaeth.

Roedd Chanel Fong, 33, yn gwadu mai hi oedd piau'r ci o'r enw Cookie a ymosododd ar Keven Jones, oedd yn 62 oed ac o Gaer, ym mis Mai 2022.

Fe blediodd yn ddieuog hefyd i gyhuddiad mai hi oedd yn gyfrifol am y ci adeg yr ymosodiad tra roedd Mr Jones yn aros gyda'i fab, Joshua, a Ms Fong yn eu cartref yn Wrecsam.

Fe gymerodd y rheithgor yn Llys y Goron Caernarfon dair awr cyn dyfarnu'n unfrydol ei bod yn ddieuog o'r ddau gyhuddiad.

Fe griodd Ms Fong wrth glywed y dyfarniadau gan gofleidio perthnasau a ffrindiau ar ôl gadael y doc.

Keven JonesLlun teulu

Bu farw Keven Jones o ganlyniad colled gwaed sylweddol wedi i'r ci frathu ei goes

Clywodd y llys fod Keven Jones mewn iechyd gwael cyn yr ymosodiad ac wedi bod yn cymryd methadon a moddion teneuo'r gwaed.

Dywedodd Ms Fong mai Joshua Jones, nad oedd yn y tŷ adeg yr ymosodiad, oedd biau'r ci - roedd yr erlyniad yn honni bod y ci yn eiddo i'r ddau ohonyn nhw.

Clywodd yr achos fod yna gŵn eraill ar yr aelwyd, a bod Keven Jones wedi mynd i'r ardd, tua 11:30, i ddod â dau ohonyn nhw, gan gynnwys Cookie, i'r tŷ.

Clywodd Ms Fong Mr Jones yn gweiddi ar Cookie "dos oddi arna'i", a'i bod hithau wedi galw ar y ci hefyd cyn i Mr Jones ddod ati mewn cyflwr "sigledig".

Pwyntiodd at ei goes, oedd yn gwaedu'n ddrwg, gan ddweud bod y ci "wedi 'nghael i, yn fanna".

CookieChanel Fong

Cafodd y ci, Cookie, ei ddifa ar ôl yr ymosodiad, a ddigwyddodd cyn i'r brîd XL Bully ddod dan waharddiad yn y DU

Galwodd Ms Fong y gwasanaethau brys a cheisio rhoi cymorth cyntaf iddo, ond bu farw Mr Jones.

Cafodd y ci ei ddifa maes o law.

Yn ei thystiolaeth i'w llys, dywedodd Ms Fong mai ei chymar oedd wedi gwneud yr holl drefniadau o ran bridio a chofrestru cŵn.

Dywedodd ei bod wedi dod ymlaen "yn dda iawn" gyda Keven Jones, a fu'n berchen ar sawl ci dros y blynyddoedd gan gynnwys ci brîd Bully adeg ei farwolaeth.

Ond fe gyfaddefodd yn ystod yr achos ei bod wedi "tanystyried" y risg bosib y gallai Cookie achosi niwed.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Straeon perthnasol