Beth yw gobeithion clybiau Cymru cyn i'r tymor newydd ddechrau?

Mae tymor newydd y gynghrair bêl-droed yn Lloegr yn cychwyn y penwythnos yma.

Bydd tri chlwb o Gymru yn y Bencampwriaeth - Abertawe, Caerdydd a Wrecsam - tra y bydd Casnewydd yn chwarae yn Adran Dau unwaith eto.

Felly be' ydy gobeithion y pedwar clwb y tymor yma?

Dyrchafiad i Uwch Gynghrair Lloegr - dyna'r disgwyliadau ar y Cae Ras.

Doedd 'na ddim pedwerydd dyrchafiad yn olynol y tymor diwethaf ar ôl iddyn nhw golli allan ar le yn y gemau ail-gyfle ar y penwythnos olaf.

Os ydyn nhw am fynd gam yn well y tro hwn, maen nhw angen dechrau da - dim ond un fuddugoliaeth gafon nhw yn eu pum gêm gynghrair gyntaf y tymor diwethaf.

O hyn ymlaen bydd mwy o glybiau yn y gemau ail-gyfle, gyda'r nifer yn codi o bedwar i chwech.

Ond y targed i Phil Parkinson fydd gorffen yn y ddau safle uchaf, fyddai'n golygu dyrchafiad awtomatig.

Mae Parkinson yn barod wedi ychwanegu tri chwaraewr i'w garfan - y golwr Anthony Patterson, yr amddiffynnwr Danny Imray a'r chwaraewr canol cae Ben Whiteman.

Os allan nhw arwyddo ymosodwr o safon, yna dwi'n rhagweld y byddan nhw'n agos iawn at y ddau safle uchaf ar ddiwedd y tymor.

O safbwynt Abertawe mae 'na lot yn ddibynnol ar ddyfodol Zan Vipotnik.

Yr ymosodwr o Slofenia oedd prif sgoriwr y Bencampwriaeth y tymor diwethaf, ac yn sgil hynny mae sawl clwb wedi dangos diddordeb ynddo dros yr haf.

Mae'r Elyrch yn barod wedi gwrthod un cynnig gan Hull amdano - cawn weld a fydden nhw'n dod yn ôl gyda chynnig gwell.

Os fydd Vipotnik yn gadael, mae'r clwb wedi arwyddo ymosodwr gyda phrofiad o sgorio goliau yn y Bencampwriaeth yn Ross Stewart.

Yn gyn-chwaraewr i Southampton a Sunderland, roedd Stewart hefyd yn rhan o garfan Yr Alban yng Nghwpan y Byd dros yr haf.

Un o wendidau Abertawe y tymor diwethaf oedd y diffyg goliau gan asgellwyr, ac er mwyn ceisio datrys hynny maen nhw wedi arwyddo tri ohonyn nhw - Elijah Just, Joseph Opoku a Moussa Yeo.

Mae'n ymddangos fod Cameron Burgess wedi dioddef anaf difrifol i'w goes sy'n golygu bod angen amddiffynnwr canol newydd arnyn nhw.

Cadw Vipotnik a chryfhau'r amddiffyn, ac fe ddylen ni weld Yr Elyrch yn dod yn agos at le yn y gemau ail-gyfle.

Ar ôl un tymor yn unig yn Adran Un, mae Caerdydd yn ôl yn y Bencampwriaeth.

Fe wnaeth Brian Barry-Murphy yn wych yn ei dymor cyntaf wrth y llyw - sicrhau dyrchafiad, chwarae pêl-droed ymosodol a rhoi cyfle i chwaraewyr ifanc o'r academi.

Mae'n bosibl dadlau mai'r peth pwysicaf mae Caerdydd wedi ei wneud dros yr haf ydy perswadio Barry-Murphy i arwyddo cytundeb newydd - yn enwedig ar ôl iddo gael ei gysylltu gyda chlybiau fel Celtic.

Ar y cae, byddai gorffen yng nghanol y tabl, ac aros i ffwrdd o safleoedd y cwymp, yn cael ei gyfri' fel llwyddiant y tymor yma.

I hynny ddigwydd maen nhw'n sicr angen cryfhau'r garfan.

Mae'r golwr Nathan Trott wedi arwyddo'n barhaol ar ôl cyfnod llwyddiannus ar fenthyg, tra bod y chwaraewr canol cae Jack Moylan wedi ymuno o Lincoln.

Ond yn ddelfrydol mae angen mwy o ddyfnder yn y llinell flaen, ar yr esgyll ac yng nghanol cae.

Os fydd Yousef Salech yn llwyddo i sgorio'n rheolaidd y tymor yma, yna efallai y gwelwn ni Gaerdydd yn brwydro am le yn yr wyth uchaf.

Ond fel mae pethau'n sefyll, dwi'n gweld hynny'n annhebygol.

Mae hi wedi bod yn haf prysur ar Rodney Parade.

Ar ôl llwyddo i gadw Casnewydd yn Adran Dau y tymor diwethaf - fe benderfynodd Christian Fuchs ymddiswyddo fel rheolwr.

Fe gymrodd y clwb eu hamser cyn penodi cyn-chwaraewr West Ham a Portsmouth, Hayden Mullins fel olynydd.

Ond y broblem gyda hynny ydy nad yw wedi cael llawer o amser gyda'r garfan cyn i'r tymor newydd ddechrau.

Yn ogystal â Fuchs, mae'r capten Matt Baker a'r ymosodwr Bobby Kamwa wedi gadael ar ôl i'w cytundebau ddod i ben.

Heb os ac oni bai mae 'na waith anodd o flaen Mullins, ac mae'n anodd rhagweld unrhyw beth arall ond tymor hir i'r Alltudion, lle byddan nhw'n brwydro unwaith eto i aros yn y gynghrair bêl-droed.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.