Gwasanaeth ambiwlans yn cyhoeddi 'digwyddiad difrifol' wedi'r tywydd poeth

Gwasanaeth ambiwlansGetty Images

Mae nifer sylweddol o alwadau 999 yn aros am ambiwlans, gan gynnwys cleifion â chyflyrau difrifol a rhai sy'n peryglu bywyd, yn ôl y gwasanaeth

Mae'r gwasanaeth ambiwlans wedi cyhoeddi "digwyddiad difrifol" oherwydd pwysau ychwanegol yn ystod y tywydd poeth.

Dywedodd Gwasanaeth Ambiwlans Cymru eu bod wedi cyhoeddi'r statws am 12:00 ddydd Gwener.

Mae nifer sylweddol o alwadau 999 yn aros am ambiwlans, gan gynnwys cleifion â chyflyrau difrifol a rhai sy'n peryglu bywyd, medden nhw.

Mae'r datganiad yn golygu y bydd y gwasanaeth yn canolbwyntio ar yr achosion mwyaf difrifol a rhai sy'n peryglu bywyd.

Dywedodd y gwasanaeth eu bod wedi profi un o'u cyfnodau prysuraf o'r flwyddyn, gyda nifer y galwadau'r wythnos yma wedi cynyddu 31%.

'Ffonio 999 mewn argyfwng gwirioneddol yn unig'

Dywedodd Judith Bryce o'r gwasanaeth: "Drwy ddatgan digwyddiad difrifol, mae'n caniatáu i'n timau ganolbwyntio ein hymdrechion a'n hadnoddau ar gleifion sy'n profi'r argyfyngau mwyaf difrifol a bygythiadau i fywyd.

"Mae pobl sy'n cysylltu â ni gyda chyflyrau llai difrifol yn debygol o orfod aros yn hirach.

"Mewn rhai achosion, efallai y bydd cleifion yn cael eu hasesu'n glinigol a'u cynghori i geisio gofal amgen, yn hytrach na bod ambiwlans yn cael ei anfon.

"Rydym yn gofyn i'r cyhoedd ein cefnogi yn ystod y cyfnod yma drwy ffonio 999 mewn argyfwng gwirioneddol sy'n peryglu bywyd yn unig."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.