Cyn-Brif Weinidog Cymru: 'Ddim yn gweld sut gall Starmer ennill'
Y disgwyl ydi y bydd Syr Keir Starmer yn cael ei herio am yr arweinyddiaeth gan Andy Burnham, wrth i Mr Burnham ddychwelyd i Dŷ'r Cyffredin ar ôl ennill is-etholiad Makerfield
- Cyhoeddwyd
Mae cyn-Brif Weinidog Cymru wedi dweud nad ydi o'n gweld "sut gall Keir Starmer ennill ar hyn o bryd" yn erbyn Andy Burnham mewn unrhyw ras am arweinyddiaeth y Blaid Lafur.
Roedd Carwyn Jones yn ymateb ar raglen Dros Frecwast fore Gwener, wedi i Andy Burnham ennill is-etholiad Makerfield dros nos gyda mwyafrif sylweddol.
Y disgwyl ydi y bydd cyn-faer Manceinion yn herio Prif Weinidog y DU am arweinyddiaeth y Blaid Lafur.
Mae Syr Keir Starmer wedi dweud fore Gwener y bydd yn sefyll mewn unrhyw ornest am yr arweinyddiaeth, os bydd un yn cael ei chynnal yn dilyn buddugoliaeth Andy Burnham yn yr is-etholiad.
Fe enillodd Andy Burnham is-etholiad Makerfield yn gyfforddus gyda 55% o'r bleidlais
Cyn iddo wneud y sylwadau rheiny, dywedodd Carwyn Jones:
"Wrth gwrs mae pobl yn mynd i ddweud yn y byd gwleidyddol 'dwi'n mynd i ymladd', mae'n rhaid iddo.
"Dyna yw natur gwleidyddion.
"A bydd ei farn e'n newid?
"Anodd i wybod ac i ddweud bydd yn newid yn y dyddiau nesaf, yr orie nesaf heb sôn am yr wythnosau nesa."
Carwyn Jones: 'Ddim yn gweld sut y gallai Keir Starmer ennill yn erbyn Andy Burnham'
Wrth ymateb i gwestiwn ynglŷn ag ai Andy Burnham fydd yn cymryd lle Sir Keir Starmer dywedodd Carwyn Jones bod hynny'n "holl bosib".
"Ar hyn o bryd, gyda fe mae'r momentwm os mae e eisiau herio Keir Starmer bydd eitha lot o pobl yn ei gefnogi.
"Y ffaith ei fod wedi bod mor llwyddiannus fel Maer Manceinion, ei fod yn boblogaidd iawn a'r ffaith ei fod wedi curo'r is-etholiad hyn gyda mwyafrif mor fawr.
"Felly i fi, mae'n rhaid i bethau newid o rhan y Llywodraeth Llafur yn San Steffan."
'Yr ysgrifen ar y mur'
Dywedodd AS Llafur Gorllewin Casnewydd ac Islwyn, Ruth Jones wrth BBC Cymru ei bod eisiau i bethau gael eu gwneud mewn modd "trefnus a llyfn."
"Dwi eisiau gweld trosglwyddiad, ac mae hynny'n golygu Keir Starmer yn camu i'r naill ochr, os oes etholiad i ddigwydd, i adael i bethau symud ymlaen.
"Ond dwi'n meddwl bod angen i rywun ddweud hynny wrth Keir, bod yr ysgrifen ar y mur iddo."
Mae Syr Keir Starmer wedi dweud y bydd yn sefyll mewn unrhyw ornest am yr arweinyddiaeth
Mae arweinydd dros-dro Llafur Cymru, Ken Skates AS wedi llongyfarch Andy Burnham ar "ganlyniad gwych" yn is-etholiad Makerfield.
"Roedd yn wych ymuno â chymaint o aelodau ar stepen y drws a chlywed y negeseuon o obaith a hyder dros yr ychydig wythnosau diwethaf," meddai.
Straeon Perthnasol
Dim cyfarfod rhwng y prif weinidogion y mis hwn wedi'r cyfan
- Cyhoeddwyd1 diwrnod yn ôl
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.