Dangos drama Gymraeg yn un o ardaloedd theatr 'mwyaf dylanwadol y byd'

Bydd drama Gymraeg gan Brifardd o Bwllheli yn cael ei pherfformio yn Efrog Newydd fis nesaf - a hynny yn un o ardaloedd theatr "mwyaf dylanwadol y byd".

Wedi'i hysgrifennu gan Gruffudd Owen a'i chynhyrchu gan Theatr Cymru, bydd Parti Priodas yn ymddangos 'Off-Broadway' yn Theatr Judith O. Rubin ar 5 Medi.

Enillodd y ddrama Wobr Theatr y DU am Ragoriaeth mewn Teithio yn 2024 a bydd y perfformiad yma yn dilyn ymddangosiad yng Ngŵyl Cymru Gogledd America yn gynharach yn yr wythnos.

Yn ôl Theatr Cymru, dyma fydd y perfformiad cwbl Gymraeg cyntaf erioed i fod yn brif berfformiad yn yr ŵyl - sy'n cael ei chynnal yn Springfield, Massachusetts eleni.

Dywedodd y dramodydd Gruffudd Owen na fyddai "fyth wedi medru dychmygu" y byddai'r ddrama yn cael ei pherfformio ar lwyfan yn Efrog Newydd.

"Mae hi wedi bod yn goblyn o daith," meddai'r gŵr o Ben Llŷn.

Disgrifiodd Theatr Cymru y perfformiad fel "archwiliad doniol a theimladwy o densiynau teuluol, newidiadau cymdeithasol yng nghefn gwlad a'r ymdeimlad o berthyn".

Esboniodd yr awdur fod ei daid, Solomon Owen, wedi ymfudo i Efrog Newydd yn 1928 am gyfnod, "cyn i'r Dirwasgiad Mawr ei orfodi i hwylio'n ôl i Lŷn".

"Diolch byth iddo fo ddod adref achos tasa fo heb, fyddai Parti Priodas ddim yn bodoli a fyddai Theatr Cymru ddim yn gallu danfon drama ei ŵyr bach gwirion i ddinas enwoca'r byd am un parti olaf!"

"Cychwynnodd taith Parti Priodas yn 2019 fel dau air wedi ei sgriblo mewn llyfr nodiadau yn ystod cwrs Dramodwyr Newydd Theatr Cymru," medd Gruffudd.

"Faswn i fyth wedi medru dychmygu bryd hynny y byddai hanes 'priodas gymysg rhwng mab fferm o Gymro a Saesnes o Lŷn' yn cael ei rhannu ar lwyfan yn Efrog Newydd rhyw ddydd.

"Mae hi wedi bod yn goblyn o daith.

"Hoffwn i ddiolch o galon i Theatr Cymru am ddangos ffydd mewn awdur newydd ac am gastio dau actor mor wych i ddod â'r ddrama'n fyw," ychwanegodd.

Mae'r ddrama wedi'i chyfarwyddo gan Steffan Donnelly ac mae Mared Llywelyn a Mark Henry-Davies yn actio cymeriadau 'Lowri' ac 'Idris'.

Mae'r tîm cynhyrchu yn cynnwys Alice Eklund fel cyfarwyddwr cyswllt, Luned Gwawr fel cynllunydd set a gwisgoedd, Jane Lalljee fel cynllunydd goleuo, Sam Humphreys fel cyfansoddwr a Cêt Haf fel cyfarwyddwr symud.

Bydd Te Angladd, y dilyniant gan Gruffudd Owen i Parti Priodas, ar daith ledled Cymru yng ngwanwyn 2027 ac yn cael ei chyflwyno gan Theatr Cymru.

Bydd Parti Priodas yn teithio i Ganolfan Cymry Llundain hefyd ar 27-28 Awst, a Gŵyl Cymru Gogledd America ar 2 Medi.

Eglurodd y cyfarwyddwr Steffan Donnelly, sydd hefyd yn gyfarwyddwr artistig i Theatr Cymru, fod y foment yn un "hanesyddol i'n cwmni".

"Mae teithio drama arobryn Gruffudd Owen, sy'n ddarlun doniol a thwymgalon o fywyd cefn gwlad Cymru, o gaeau Pen Llŷn i ganol dinas Efrog Newydd yn freuddwyd go iawn - gan brofi bod gan ein straeon lleol apêl eang.

"Un o nodau Theatr Cymru yw cysylltu Cymru â'r byd ac yn dilyn ein perfformiad yng Ngŵyl Cymru Gogledd America, rydym yn gyffrous i ddathlu lleisiau cyfoes Cymru yn un o leoliadau theatr mwyaf eiconig y byd.

"Rydym methu aros i gynulleidfaoedd America fwynhau profi ein hiaith ac adlais diwylliannol dwfn y cynhyrchiad arbennig hwn," ychwanegodd y cyfarwyddwr.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.