Disgwyl cyhoeddiad am fws newydd fydd yn cysylltu'r gogledd a'r de

Mae disgwyl i'r Dirprwy Weinidog Trafnidiaeth wneud datganiad i'r Senedd yn ddiweddarach yn amlinellu cynlluniau ar gyfer gwasanaeth bws newydd sy'n cysylltu gogledd a de Cymru.

Roedd y cynlluniau yn ymrwymiad allweddol ym maniffesto Plaid Cymru yn ystod ymgyrch etholiad y Senedd yn ddiweddar.

Ar y pryd, dywedodd gweinidogion y byddai'r gwasanaeth yn gwella cysylltiadau rhwng cymunedau yng ngogledd a chanolbarth Cymru, gan ddarparu cysylltiadau cyflymach â gwell cysylltiadau rheilffordd i deithwyr sy'n mynd yn eu blaen i dde Cymru.

Gallai'r llwybr newydd fod 90 munud yn gyflymach na'r opsiynau trafnidiaeth gyhoeddus presennol, gyda'r gwasanaeth yn defnyddio amserlen arosfannau cyfyngedig a rhwydwaith cyfnewid gwell.

Roedd y maniffesto'n addo cyflwyno gwasanaeth bws newydd rhwng Caerfyrddin a Bangor fel rhan o gynlluniau i wella cysylltiadau rhwng y gogledd a'r de.

Mae'r cynnig yn rhan o gynlluniau ehangach Llywodraeth Cymru i greu rhwydwaith trafnidiaeth gyhoeddus fwy integredig, gyda thocynnau symlach a chydlynu agosach rhwng gwasanaethau bysiau a rheilffyrdd.

Yn Nolgellau, dywedodd teithwyr eu bod yn croesawu'r cynllun, ond bod rhai yn cwestiynu pa mor effeithiol fyddai'r gwasanaeth.

Dydy Dai Humphreys ddim yn dreifio, ac mae'n defnyddio llawer iawn ar y rhwydwaith fysiau lleol.

Meddai: "Mae'n cymryd hir i fynd trwy'r pentrefi bach a bob man, mae'n cymryd lot hirach na mynd mewn car, byse direct route yn rili handi.

"Dim ond stopio mewn llefydd mawr fel Aberystwyth, Abertawe, Caernarfon ac osgoi stopio yn y pentrefi bach.

"Hefyd, mae'r bysys yn gorffen yn rhy gynnar i bobl, byddai'n dda cael bws hwyrach."

Ag yntau'n teithio ar fws yn rheolaidd, dywedodd Paul Hill y byddai'n defnyddio'r llwybr newydd i ymweld â'i ferch, ond mae'n cwestiynu a fyddai eraill.

"Dydw i ddim yn meddwl y bydd yn gweithio oherwydd does dim digon o footfall, pobl i deithio ar y bysiau mewn gwirionedd, er mwyn iddo fod yn hyfyw.

"Mae angen iddo fod yn broffidiol.

"Ydy'r seilwaith yma i gefnogi hyn? Mae angen bysiau yn fwy aml a mwy o yrwyr i'w gefnogi. Oes digon o arian yno?"

Fe ddywedodd Beryl Norgrove fod cynyddu'r llwybrau bws yn gorfod bod yn beth da.

"Syniad ardderchog, dim pawb sydd yn gyrru ac mae mynd ar drafnidiaeth gyhoeddus lot haws.

"Does dim trên fan'ma chwaith wedyn mae gwella'r rhwydwaith mewn llefydd fel hyn yn syniad da iawn.

"Mae gena i deulu yn byw yn y de felly mi fyddai'n ei ddefnyddio fo'n sicr. Mae'n gyfleus, dwi'n meddwl bod y gwasanaeth yn dda iawn."

Nid oes manylion pellach wedi eu cyhoeddi eto, am brisiau, amserlenni na dyddiad lansio ond deallir na fydd teithwyr dros 60 yn cael teithio am ddim a bod hyd y daith rhwng pedair awr a hanner a phum awr.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.