Y Cymro fydd yn cefnogi Fiji yn erbyn y crysau cochion ddydd Sadwrn

Wrth i Gymru baratoi i wynebu Fiji ym Mhencampwriaeth y Cenhedloedd ddydd Sadwrn, mae un bachwr o Ben-y-bont wedi bod mewn mwy o benbleth na'r mwyafrif o Gymry am bwy i'w cefnogi.

Mae tad Dominiko Manasteitava, Tevita, yn dod o Fiji, ac mae ei fam, Emma, yn Gymraes.

Mae Dominiko yn 21 oed ac mae newydd orffen gradd mewn hyfforddiant chwaraeon ym Mhrifysgol Caerdydd.

Mae'n chwarae yn safle'r bachwr i dîm Pen-y-bont, ac mae rygbi yn ei waed, ag yntau'n dod o linach o chwaraewyr rygbi proffesiynol o Fiji.

Felly, pan fydd yn mynychu'r gêm yn Stadiwm Dinas Caerdydd ddydd Sadwrn, dywedodd y byddai'n cefnogi Fiji.

Symudodd Tevita Manaseitava i Gymru ddiwedd yr 1980au i chwarae i Glwb Rygbi Y Pîl, a bu hefyd yn chwarae i nifer o dimau eraill gan gynnwys Pen-y-bont Ravens a Dynfant.

Mae brawd Tevita, sydd â'r un enw a'i fab - Dominiko Manaseitava - wedi cynrychioli Fiji.

Mae Dominiko Waqaniburotu - capten Fiji ar gyfer Cwpan y Byd 2019 - yn un o'i berthnasau hefyd.

Ar raglen Dros Frecwast fore Gwener, dywedodd Dominiko, nad yw hi'n benderfyniad anodd o ran pwy y bydd yn eu cefnogi ddydd Sadwrn.

"Mae game day bob amser yn ddoniol yn y tŷ – bydda i, fy nhad, fy mrawd a'm chwaer mewn Fiji jerseys.

"Ac yna Mam a gweddill y teulu mewn rhai Cymru.

"Ond bob amser y bydd Fiji'n chwarae, fi'n gobeithio mai Fiji fydd yn ennill."

Dywedodd Dominiko, nad oedd yn siŵr pwy yw'r ffefrynnau ar gyfer dydd Sadwrn, ond bod carfan a thîm Fiji yn gryf.

"Mae'r rhai ma' nhw wedi ei roi at ei gilydd yn unigolion sy'n chwarae yn y top league yn Ffrainc a Lloegr

"'Dwi'n credu mai Fiji fydd yn ennill."

Mae Cymru eisoes wedi chwarae ac ennill yn erbyn y Barbariaid yr wythnos diwethaf, ac ar ôl gêm Fiji, bydd tîm Steve Tandy yn teithio i'r Ariannin a hefyd yn chwarae yn erbyn pencampwyr y byd De Affrica.

Wrth edrych ar dîm Cymru a dylanwad Steve Tandy, roedd Dominiko yn canmol Cymru, ond yn dweud byddai'n heriol i'r crysau cochion yn erbyn Fiji.

"Dwi'n credu y bydd yn gêm anhygoel. Mae'r ddau dîm yn dda iawn.

"Mae Cymru yn dod ar ôl ennill yn erbyn y Barbarians a bydd yn test mawr ddydd Sadwrn.

"Mae'r style o rygbi mae Fiji yn ei chwarae yn anhygoel i'w wylio, maen nhw yn fawr a chorfforol.

"Sut fydd Cymru'n delio gyda hynny? Dwi'm yn gwybod... ond mae bob amser yn wych i wylio Fiji."

Bydd modd gwrando ar sylwebaeth o'r gêm rhwng Cymru a Fiji ar Chwaraeon Radio Cymru, gyda'r rhaglen i ddechrau am 13:30.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.