Diffyg ar yr haul mwyaf ers 1999 yn cael ei weld ar draws y wlad

Mae diffyg ar yr haul, neu eclips, mwyaf trawiadol y ganrif hyd yn hyn wedi cael ei weld yng Nghymru.

Ar ei anterth roedd mwy na 90% o wyneb yr haul yn cael ei orchuddio gan y lleuad, gyda'r cyfan yn digwydd rhwng tua 18:00 ac 20:00 nos Fercher.

Roedd gorllewin Cymru - Penrhyn Gŵyr, Abertawe a thraeth Rest Bay ym Mhorthcawl yn benodol - ymhlith y llefydd gorau yn y DU i weld yr eclips, yn ôl arbenigwyr.

Roedd Carol Barley wedi teithio o Tamworth yn Sir Staffordd i wylio'r eclips ar draeth Rest Bay ym Mhorthcawl.

"Dwi'n dod i'r rhan yma o'r arfordir yn aml oherwydd mae hi'n syfrdanol," meddai.

"Wnes i deithio yma neithiwr yn benodol ar gyfer yr eclips er mwyn gallu ei weld o'r traeth am y tro cyntaf yn fy mywyd.

"Dwi mor gyffrous ond dwi angen sbectol!"

Dywedodd Carol ei bod yn gweithio fel bydwraig yn ystod y diffyg ar yr haul trawiadol yn 1999 a'i bod wedi ei wylio gan ddefnyddio ffilm pelydr-x.

"Alla i ddim disgwyl. Dyma fydd fy nghyfle olaf i weld hyn felly dwi am wneud y mwyaf ohono," ychwanegodd.

Mae diffyg ar yr haul yn digwydd pan mae'r lleuad yn symud rhwng yr haul a'r Ddaear, gan rwystro golau yn rhannol neu'n llwyr.

Mae Cymru a gweddill y DU wedi gweld eclips rhannol, tra bod rhai rhannau o Sbaen a gwledydd eraill yn gweld eclips llwyr.

Dyma'r diffyg ar yr haul mwyaf trawiadol i'w weld o Brydain ers Awst 1999.

Ni fydd eclips solar mor fawr â hyn i'w weld o'r DU eto tan 2081, a bydd yr eclips solar llwyr nesaf yn y DU yn 2090.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.