Heb os Guto o Ysgol Bro Lleu ym Mhenygroes oedd un o'r sêr pennaf yn Eisteddfod yr Urdd Margam yn 2025 wrth i dros filiwn wylio'r adroddwr bach yn ei ddagrau.

Mae cryn edrych ymlaen at y cystadlu eleni - bydd y rhai ieuengaf yn cystadlu ddiwedd yr wythnos.

Mae "twf sylweddol wedi bod yn y cystadlu eleni ar Ynys Môn," meddai Prif Weithredwr yr Urdd, Sian Lewis.

"Y mwyaf erioed yn hanes Ynys Môn i gystadlu yn Eisteddfodau Cylch a Sir, a dyna'r fath o gyffro a diddordeb sy'n codi pan mae Eisteddfodau'n parhau i deithio ac yn mynd i ardaloedd gwahanol.

"Mae'n cael effaith bositif ar y Gymraeg yn y gymuned a gobeithio 'da ni'n tynnu pobl newydd i'r Gymraeg," meddai.

Mae Ffion, Tesni, Morgan ac Erin o Ysgol Syr Thomas Jones, Amlwch, yn edrych ymlaen i fod yn y Ganolfan Groeso drwy’r wythnos.

Ffynhonnell y llun, Urdd Gobaith Cymru

Cofiwch hefyd bod yr ap ar gael i'w lawrlwytho i'ch dyfeisiadau digidol.

Yno fe gewch chi bob math o fanylion am y cystadlaethau a'r canlyniadau, y gweithgareddau a sut mae gwylio'n fyw.

Ffynhonnell y llun, Urdd Gobaith Cymru

Mae Gwenno (pinc) ac Elin o Foelgastell yn edrych ymlaen i fod yma drwy’r wythnos!

Mae Cerian, Sophie a Mathew yn disgwyl i'r drysau agor er mwyn gwerthu paneidiau.

Maen nhw'n aros mewn pabell ar safle'r gweithwyr ac wrth eu bodd. Dywedodd Sophie: "Mae'n grêt. Dwi'n gallu rolio allan o'r gwely a dod yn syth i 'neud churros."

Paratoadau munud olaf gan Siôn, sydd wedi bod yn helpu un o'r stondinwyr.

Mae yna groeso cynnes iawn gydol yr wythnos yn yr 'ŵyl saith niwrnod gynta'' fel y noda Gareth Evans- Jones un o blant yr ynys yn ei gerdd groeso.

Ffynhonnell y llun, Llun cyfrannydd

Mae darn o dir sydd uwch y don

a'i gân yn famol, fodlon,

yn ynys nad yw'n unig,

yn llecyn glas i chwarae mig.

Dyma gartref hen chwedlau'n hoes,

lle plannodd Dwynwen gynt ei chroes,

lle crwydrodd Seiriol Wyn a Chybi Felyn

a chenedlaethau hyd bant a bryn.

Mae saith rhyfeddod byd a saith chyfandir hefyd,

ac ym Môn, bydd saith niwrnod o gelfyddyd.

Tyrd draw â'th gân â'th wên,

tyrd a'th liwiau i lywio llên,

tyrd am hufen iâ, tyrd am yr hwyl,

tyrd i groeso'r fam-ynys annwyl.

Cymer gam a chroesa'r Fenai,

dilyn llwybr aur y traethau,

a chofia, yn yr ŵyl saith niwrnod gynta',

cei hafan glyd yng Ngwlad y Medra.

Mae'r paratoadau i gyd wedi eu cwblhau meddai Prif Weithredwr yr Urdd, Sian Lewis a "'da ni gyd yn gyffrous iawn i wahodd a chroesawu holl drigolion Ynys Môn a hefyd plant a phobl ifanc ar draws Cyrmu yma i'r maes heddiw."

Gyda phwyslais ar ddysgwyr ar ddiwrnod cyntaf Eisteddfod yr Urdd eleni dywedodd: "'Da ni'n Urdd i bawb - felly mae'n bwysig sicrhau bod dysgwyr yn rhan allweddol o daith yr Urdd a’r Eisteddfod hefyd.”

Wrth siarad ar raglen Dros Frecwast ar BBC Radio Cymru esboniodd mai'r rheswm dros ymestyn yr Eisteddfod eleni oedd eu bod “isie dod â mwy o gystadlaethau i'r Eisteddfod".

"Ry'n wedi gwrando ar bobl ar hyd y blynyddoedd a gweld bod yna gyfle i ymestyn yr Eisteddfod a bod yna angen a galw am fwy o gystadlaethau."

Mae'r ddau yma wedi cyrraedd yn barod ac yn edrych ymlaen, a dyma beth oedd ganddyn nhw i ddweud cyn i'r maes agor yn swyddogol.

Osian Jones: “Oeddan ni’n disgwyl bod y tywydd am fod yn well, dyma 'di heatwave Ynys Môn?

Rhys Parry: “Dwi yma o adran gerdd Coleg Menai - mae gynnon ni lot o bethau yma, carioci, set dj, pobl yn canu, da ni’n annog pobl i ddod draw i’n gweld ni.”

Sut i gyrraedd yn y car?

O'r de:

• Dewch oddi ar yr A55 ar gyffordd 6
• Dilynwch yr arwyddion am Faes yr Eisteddfod
• Bydd arwyddion melyn yr Eisteddfod yn eich cyfeirio at y meysydd parcio

O'r gogledd:

• Dewch oddi ar yr A55 ar gyffordd 5
• Dilynwch yr arwyddion am Faes yr Eisteddfod
• Bydd arwyddion melyn yr Eisteddfod yn eich cyfeirio at y meysydd parcio

Os yn defnyddio Sat Nav - defnyddiwch y cod post LL65 4RW

Trafnidiaeth gyhoeddus

Trên

• Yr orsaf drenau agosaf yw Llanfairpwll, sydd tua naw milltir o'r Maes.

• Neu mae gorsaf Tŷ Croes, sy'n orsaf fach stopio ar gais, bum milltir o'r Maes.

Bws

• Y bws cyhoeddus sy'n pasio'r Maes yw'r A4 o Fangor i Gaergybi - mae Maes yr Eisteddfod gyferbyn â safle bws stad ddiwydiannol Mona

Beic

• Os ydych chi am ddod i'r Eisteddfod ar eich beic, mae 'na le parcio beics yn saff wrth ymyl y Ganolfan Groeso

Cerdded

• Nid yw'r Urdd yn argymell cerdded i'r Maes gan nad oes palmant yn arwain at Gae'r Sioe

Dyma sut oedd y maes yn edrych nos Wener - yn barod i groesawu Cymru benbaladr.

Yn ôl ein gohebydd ar y maes mae'n bwrw fymryn ar hyn o bryd ac yn llwydaidd ond mae tywydd gwell i ddod!

Bydd y gatiau yn agor toc cyn 10:00 bore 'ma a'r cystadlaethau cyntaf am 11:00 yw:

• Dawns Aml-Gyfrwng Bl. 6 ac iau yn y Pafiliwn Gwyrdd
• Dawns Unigol Bl. 10 a dan 19 oed mewn unrhyw arddull neu gyfuniad o arddulliau ac eithrio Dawnsio Gwerin yn y Pafiliwn Gwyn
• Llefaru Unigol Blwyddyn 2 ac iau i Ddysgwyr yn y Pafiliwn Coch

Pob hwyl i'r cystadleuwyr.

Mae'n ddiwrnod cyntaf Eisteddfod Genedlaethol yr Urdd - dydd Sadwrn eleni ac ydy mae'n eistedddfod sy'n para saith diwrnod.

Ydynt mae'r torfeydd yn heidio i Ynys Môn - yno hefyd mae gohebwyr Cymru Fyw.

Arhoswch gyda ni i gael y diweddaraf o'r maes ar Gae Sioe Môn ger Gwalchmai.

Croeso aton ni.

Ffynhonnell y llun, Ysgol Gynradd Bodedern