Gethin Jones, cyflwynydd Blue Peter
Tirlun Cymru, gan David Williams

Yn arferol, fy hoff lyfrau yn gyffredinol ydy llyfrau chwaraeon neu hunangofiannau.

Ond yn ddiweddar dw i wedi dod o hyd i lyfr o'r enw Tirlun Cymru gan David Williams

Mae'n llawn lluniau lliw ac mae'r testun dwyieithog yn sôn am dirlun a daearyddiaeth Cymru.

Llyfr perffaith, yn enwedig i beilot sy'n hoffi hedfan hyd a lled y wlad yn ei 'Cessna' bach!

Gwybodaeth pellach

Siân Thomas, cyflwynwraig Radio Cymru
Omlet, gan Nia Medi

Yn aml iawn, fy hoff lyfr i ydy'r ola' i mi ei ddarllen, gan ei fod yn ffres yn y cof, felly mae'r ffefryn yn newid yn gyson.

Ar ôl dweud hynny, ma' ambell lyfr yn fythgofiadwy, ac yn ffefryn parhaol.

Darllenais 'Tân ar y Comin' gan T.Llew Jones pan oeddwn i'n ifanc iawn - 'roeddwn wedi fy hudo, ac mae nofelau T.Llew Jones yn dal yn ffefrynnau hyd heddiw.

Nid llyfrau plant mohonynt, ond llyfrau sy'n apelio at y plentyn ym mhob un ohonom ni, ac mae hynny'n grefft arbennig iawn.

Beth am y ffefrynnau ar hyn o bryd? Mae 'Omlet' gan Nia Medi yn llyfr sy'n codi gwên a chodi'r ysbryd.

Mae hanes Angharad Austin, athrawes 33 oed, mor ddoniol fel y byddwch yn eich dyblau yn chwerthin o'r dechrau i'r diwedd. Ac un gair o rybudd. Os ydych chi'n ystyried cael triniaeth 'colonic irrigation' - darllenwch hwn yn gyntaf!

Gwybodaeth pellach

Huw Stephens, DJ Radio 1
Theleri Thŵp, gan Dewi 'Pws' Morris

Wnes i ddarllen hwn mewn bron iawn i un darlleniad. Mae mor ddoniol - chi'n debygol o chwerthin o leiaf unwaith ar ôl darllen pob tudalen.

Mae ffordd Dewi Pws o sgwennu yn debyg iawn i'r ffordd mae'n siarad - yn naturiol a syml ond yn disgrifio a chofio pethe doniol drwy'r amser.

Ar ôl ei weld e'n actio ac ar y teledu am flynyddoedd, roeddwn i'n ffan o Dewi Pws ers sbel, ond ddim yn gwybod llawer amdano. Ond mae'r llyfr yn ddiddorol tu hwnt, ac yn llawn storïau doniol a difyr!

Gwybodaeth pellach