စစ်ကောင်စီတပ်လေကြောင်းတိုက်ခိုက်မှုမှာ တပ်ဖွဲ့ဝင် ၆ ဦးကျဆုံးတယ်လို့ အေအေပြော

တိုက်ရိုက် ထုတ်လွှင့်ချက်

1. ၂၇ ဇွန် ၂၀၂၂မရာနယ်မြေမှာပြုလုပ်တဲ့ ပထမဆုံး ဆရာဖြစ်သင်တန်း

   

   ဓာတ်ပုံ ရင်းမြစ်, MEB

   ချင်းပြည်နယ်၊ မရာမျိုးနွယ်စုဒေသမှာ အခြေခံပညာဆရာဖြစ်သင်တန်းကို ပြီးခဲ့တဲ့ သီတင်းပတ်တွေအတွင်း ပြုလုပ်သွားပါတယ်။

   အဲဒီသင်တန်းကို မရာနယ်မြေအတွင်းက ကျေးရွာ ၅၀ ကျော်က သင်တန်းသား ၁၀၀ ကျော်ကို ပေးခဲ့တာဖြစ်ပါတယ်။

   မရာနယ်မြေအုပ်ချုပ်ရေးကောင်စီရဲ့ မရာနယ်မြေပညာရေးဘုတ်အဖွဲ့က ဦးဆောင်ပြီး အမျိုးသားညီညွတ်ရေးအစိုးရရဲ့ကျောင်းစာ သင်ရိုးများကို သင်ကြားပေးနိုင်ဖို့ ဒီဆရာဖြစ်သင်တန်းကို ကျင်းပခဲ့တာဖြစ်ပါတယ်။

   မရာနယ်မြေပညာရေးဘုတ်အဖွဲ့ဟာ ဒေသတွင်း တိုက်ပွဲတွေကြောင့် ထွက်ပြေးခဲ့ရတဲ့ ဒုက္ခသည်တွေအတွက် အိန္ဒိယနိုင်ငံ ဒုက္ခသည်စခန်းတွေမှာ ကျောင်းသားစာရင်းကောက်ယူတာ၊ ကျောင်းနေအရွယ် ကလေးတွေ ပညာဆက်သင်နိုင်ဖို့ ဆောင်ရွက်တာတွေ ပြုလုပ်နေတယ်လို့လည်း သိရပါတယ်။

2. ၂၇ ဇွန် ၂၀၂၂ညောင်လေးပင်ခရိုင်ထဲ ၂ရက်အတွင်းတိုက်ပွဲ ၃ကြိမ်ဖြစ်, စစ်ကောင်စီဘက်က သေဆုံးမှုရှိပြီး ဒေသခံသောင်းချီထွက်ပြေးနေရတယ်လို့ဆို

   ကေအဲန်ယူ -ကရင်အမျိုးသားအစည်းအရုံးလက်အောက် ညောင်လေးပင်ခရိုင်၊ကျောက်ကြီးမြို့နယ်ရှိ ထိန်းချုပ်နယ်မြေထဲမှာ စစ်ကောင်စီတပ်နဲ့ ကရင်အမျိုးသားလွတ်မြောက်ရေး တပ်မတော်တို့ကြား ၂ရက်အတွင်းတိုက်ပွဲ ၃ကြိမ်ဖြစ်ခဲ့တယ်လို့ ကေအဲန်ယူဗဟိုက ဒီကနေ့ဇွန်၂၇ရက်မှာ ထုတ်ပြန်လာပါတယ်။

   ညောင်လေးပင်နဲ့မုန်း မြို့နယ်ထဲက ၂ရက်တိုက်ပွဲမှာ စစ်ကောင်စီဘက်က ၁၉ ဦးသေဆုံးပြီး ကေအဲန်ယူဘက် က သေဆုံးမှုမရှိဘူးလို့ ထုတ်ပြန်ချက်ကဖော်ပြပါတယ်။ ဒီကနေ့ ဇွန်လ ၂၇ ရက် မှာလည်း စစ်ကောင်စီတပ်ဘက်ကနေ ညောင်လေးပင်ခရိုင်ထဲက တိုက်ပွဲဖြစ်ပွားတဲ့ကျေးရွာတွေအတွင်းလက်နက်ကြီးတွေနဲ့ပစ်ခတ်နေတယ်လို့ ဒေသခံအချို့က ပြောပါတယ်။

   မနေ့ ဇွန် ၂၆ရက်က ကျောက်ကြီးမြို့နယ်ထဲက နရွဲပင်ကျေးရွာနဲ့ ညောင်ကုန်းကျေးရွာကြားဖြစ်ပွားတဲ့ တိုက်ပွဲမှာ စစ်ကောင်စီဘက်က ၃ ဦးသေဆုံးခဲ့တယ်လို့ ထုတ်ပြန်ချက်ကဖော်ပြပါတယ်။ ဇွန်လ ၂၅ရက် ကဖြစ်တဲ့ ငဗြက်အင်းကျေးရွာ နဲ့ အင်းနက်ကျေးရွာကြားတိုက်ပွဲမှာတော့ စစ်ကောင်စီဘက်က ဗိုလ်ကြီးအဆင့်ရှိသူတစ်ဦး၊ တပ်ကြပ်ကြီးတစ်ဦး နဲ့ စစ်ကောင်စီခန့် နတ်သံကွင်းမြို့ အုပ်ချုပ်ရေးမှူး အပါအဝင် ၁၄ ဦးသေဆုံးခဲ့တာလို့ဆိုပါတယ်။ တခါ ကေအဲန်ယူ-ညောင်လေးပင်ခရိုင်၊ မုန်းမြို့နယ်ရှိ နောင်ကုန်းကျေးရွာအရှေ့ဘက်မှာဖြစ်တဲ့နှစ်ဖက်တိုက်ပွဲမှာလည်း စစ်ကောင်စီဘက်က ၂ဦးသေဆုံးခဲ့တယ်လို့ ဖော်ပြပါတယ်။

   အခုလိုထိပ်တိုက် တိုက်ပွဲဖြစ်ပွားရတာဟာ ကေအဲန်ယူ -ကရင်အမျိုးသားအစည်းအရုံး ရဲ့ စီမံအုပ်ချုပ်မှုနယ်မြေအတွင်း စစ်ကောင်စီတပ်ဘက်က နယ်မြေကျူးကျော် စစ်ရေးလှုပ်ရှားလာတာကြောင့်လို့ ကေအဲန်ယူ ဘက်ကပြောပါတယ်။ ကရင်အမျိုးသားအစည်းအရုံး KNU ဟာ NCA အပစ်ရပ်စာချုပ်မှာ လက်မှတ်ထိုးထားပေမယ့် အာဏာသိမ်းပြီတဲ့နောက် စစ်တပ်နဲ့တိုက်ပွဲတွေပြန်ဖြစ်နေသလို စစ်တပ်ကဖိတ်ခေါ်နေတဲ့ ငြိမ်းချမ်းရေးဆွေးနွေးပွဲတွေကိုလည်းငြင်းပယ်ထားတာပါ။ လက်ရှိKNU နဲ့စစ်ရေးတင်းမာမှုအခြေအနေတွေနဲ့ပတ်သက်လို့ စစ်ကောင်စီသတင်းထုတ်ပြန်ရေးအဖွဲ့ ကိုဆက်သွယ်မေးမြန်းဖို့ကြိုးစားနေပါတယ်။

   စစ်ကောင်စီတပ်ဖွဲ့ဝင်တွေ သေဆုံးတာရှိတယ်ဆိုတာနဲ့ ပတ်သက်လို့ စစ်ကောင်စီဘက်က ထုတ်ပြန်တာမရှိသလို ဘီဘီစီအနေနဲ့သီးခြားအတည်ပြုနိုင်တာမရှိသေးပါဘူး။ တိုက်ပွဲနဲ့ထိတွေ့မှုတွေကြောင့် ‌ကျေးရွာပေါင်း ၁၀ရွာကျော်က အိမ်ခြေ လူဦးရေ ၁သောင်းကျော်က ဘေးလွတ်ရာကိုတိမ်းရှောင်နေကြရတယ်လို့ဆိုပါတယ်။

   

   ဓာတ်ပုံ ရင်းမြစ်, KNU

3. ၂၇ ဇွန် ၂၀၂၂လောင်းလုံး မှာ သက်ကြီးပိုင်း ၃ဦး စစ်ကောင်စီတပ်ဖွဲ့ဝင်တွေရဲ့ ပစ်ခတ်သတ်ခံရ

   တနင်္သာရီတိုင်း၊ ထားဝယ်ခရိုင်၊ လောင်းလုံးမြို့နယ်၊ ကဒက်ကြီးကျေးရွာ မှာ စစ်ကောင်စီတပ်ဖွဲ့ဝင်တွေက မနေ့ ဇွန် ၂၆ ရက်၊ ညပိုင်း၁၁ နာရီခွဲခန့်က အသက် ၆၀ကျော်အရွယ် ဇနီးမောင်နှံ ၂ဦး ကို လက်ပြန်ကြိုးတုပ်ပြီး ပစ်ခတ်သတ်ခဲ့တယ်လို့ ထားဝယ်ခရိုင်သပိတ်ကော်မတီက ဓါတ်ပုံနဲ့တကွ ဒီကနေ့ဇွန် ၂၇ ရက်မှာ ထုတ်ပြန်လာပါတယ်။

   စစ်ကောင်စီတပ်သား အင်အား ဆယ်ချီဟာ ကားနှစ်စီးလာရောက်ခဲ့ပြီးနောက် ပစ်ခတ်သတ်ခဲ့သလို နေအိမ် ၅လုံးကိုလည်း ဝင်ရောက်စီးနင်းဖျက်ဆီးခဲ့တယ်လို့ဆိုပါတယ်။ ပစ်ခတ်သတ်ခံရသူနှစ်ဦးဟာ ဦးသောင်းဝင်း နဲ့ ဒေါ်ဝင်းအေး တို့ဖြစ်ပြီး ဦးခေါင်း၊ ဝမ်းဗိုက်၊ ခါး နဲ့ မျက်လုံးတို့ကို အနီးကပ်ပစ်ခတ်ခံခဲ့ရတာလို့ပြောပါတယ်။

   ရွာအတွင်းဝင်ရောက်စီးနင်းရှာဖွေချိန်မှာလည်း နေအိမ်ကပစ္စည်းအချို့ကို ဖျက်ဆီးခဲ့တာအပြင်တန်ဖိုးကြီး ပစ္စည်းအချို့ နဲ့ ‌ငွေအချို့ကိုလည်းယူဆောင်သွားခဲ့တယ်လို့ ‌ဆိုပါတယ်။ တခါ လောင်းလုံးမြို့နယ်၊ ဂေါ့အင်းကျေးရွာမှာလည်း အသက် ၅၀ကျော်အရွယ် ဦးဆန်းဝင်းကိုနေအိမ်ရှေ့မှာ အနီးကပ် ပစ်သတ်ခဲ့ပြီး နေအိမ်ရှိ ပိုက်ဆံ၊ ရွှေထည်တချို့နဲ့ ဆိုင်ကယ်တစီးကိုပါ ယူဆောင်သွားခဲ့တယ်လို့ ဖော်ပြပါတယ်။

   စစ်ကောင်စီတပ်ဖွဲ့ဝင်တွေနဲ့ အရပ်အခေါ် ပျူစောထီးအဖွဲ့ဝင်တွေရဲ့ ပစ်ခတ်သတ်ဖြတ်တာတွေကြောင့် လောင်းလုံးမြို့နယ်အတွင်း ဇွန်လ ၁၆ ရက်ကနေ ၂၆ ရက်အထိ ပြည်သူ ၆ ဦးသေဆုံးခဲ့ပြီး ၂ ဦး အပြင်းအထန်ဒဏ်ရာ ရရှိထားတယ်လို့ ထားဝယ်ခရိုင်သပိတ်ကော်မတီ ရဲ့စာရင်းတွေအရသိရပါတယ်။

   

   ဓာတ်ပုံ ရင်းမြစ်, ထားဝယ်ခရိုင်သပိတ်ကော်မတီ

4. ၂၆ ဇွန် ၂၀၂၂စစ်တွေမြို့ကနေ ပြေးဆွဲနေတဲ့ ရေယာဉ်လိုင်းအချို့ကို စစ်ကောင်စီပိတ်ထား

5. ၂၆ ဇွန် ၂၀၂၂တရိပ်ရိပ်တက်နေတဲ့ ကုန်စျေးနှုန်း၊ ဒီအတိုင်းသွားရင် လယ်တွေပြုတ်တော့မယ်နဲ့ ရိတ်သိမ်းသူမရှိတဲ့ ပဲခင်းများ

6. ၂၆ ဇွန် ၂၀၂၂နိုင်ငံတကာမူးယစ်ဆေးဝါးတိုက်ဖျက်ရေးနေ့မှာ တိုင်းရင်းသားအဖွဲ့တွေလည်း မူးယစ်ဆေးဝါးတွေ မီးရှို့ဖျက်ဆီး

   

   ဓာတ်ပုံ ရင်းမြစ်, ထုတ်ပြန်ချက်

   ဒီနေ့မှာ ကျရောက်တဲ့ နိုင်ငံတကာမူးယစ်ဆေးဝါးတိုက်ဖျက်ရေးနေ့မှာ စစ်ကောင်စီက မူးယစ်‌ဆေးဝါးမီးရှို့ ဖျက်ဆီးတာတွေကို ရန်ကုန်၊ မန္တလေးနဲ့ တောင်ကြီးမြို့တွေမှာ ပြုလုပ်သွားသလို တိုင်းရင်းသားလက်နက်ကိုင်အဖွဲ့တွေကလည်း သူတို့ရဲ့ နယ်မြေတွေမှာ ပြုလုပ်သွားပါတယ်။

   နိုင်ငံထဲမှာ အင်အားအကြီးဆုံးလို့ ဆိုနိုင်တဲ့ 'ဝ'တပ်ဖွဲ့က 'ဝ'ပြည်တောင်ပိုင်း စစ်ဒေသ ၁၇၁ မှာရှိတဲ့ ရှမ်းပြည်နယ်အရှေ့ပိုင်း၊ မိုင်းတုံမြို့နယ်ထဲမှာပြုလုပ်သွားပါတယ်။ ဒီအခမ်းအနားကို ကိုဗစ်ကပ်ဘေးကြောင့် ၂၀၁၉ ခုနှစ်ကတည်းက ရပ်နားခဲ့ပြီး အခုနှစ်မှပြန်လုပ်တာဖြစ်ပါတယ်။

   နောက် ရှမ်းပြည်နယ်ထဲမှာပဲ ရှမ်းမြောက်အဖွဲ့လို့ သိကြတဲ့ သျှမ်းပြည်တိုးတက်ရေးပါတီ(SSPP/SSA)၊ ရှမ်းတောင်အဖွဲ့လို့ သိကြတဲ့ သျှမ်းပြည်ထူထောင်ရေးကောင်စီ(RCSS/SSA)တို့ကလည်း မူးယစ်ဆေးဝါး ဖျက်ဆီးတဲ့အခမ်းအနားတွေကို ဒီနေ့မှာ ပြုလုပ်သွားပါတယ်။

   စစ်ကောင်စီဘက်ကတော့ ဒီနေ့မှာ တနိုင်ငံလုံးမှာ အမေရိကန်ဒေါ်လာ သန်းပေါင်း ၆၄၀ ကျော်တဲ့ ဖမ်းမိ မူးယစ်ဆေးဝါးတွေကို မီးရှို့ခဲ့တယ်လို့ ပြောထားပါတယ်။

7. ၂၆ ဇွန် ၂၀၂၂Park Jong Cheol လူ့အခွင့်အရေးအထူးဆုဒေါက်တာတေဇာဆန်းရရှိ

   

   ဓာတ်ပုံ ရင်းမြစ်, Tay Zar San (FB)

   ဒီနှစ်အတွက် တောင်ကိုရီးယားနိုင်ငံရဲ့ ၁၈ကြိမ်မြောက် Park Jong-cheol လူ့အခွင့်အရေးဆုအတွက် စစ်အာဏာသိမ်းပြီးနောက် မြန်မာ့ဒီမိုကရေစီအရေးအတွက် ဦးဆောင်လှုပ်ရှားနေတဲ့ ဒေါက်တာတေဇာဆန်းကို အထူးဆုချီးမြှင့်တယ်လို့ ဆုအကဲဖြတ်ကော်မတီကနေ သတင်းထုတ်ပြန်ပါတယ်။

   ဒီနှစ် Park Jong -cheol လူ့အခွင့်အရေးဆုဟာ စည်းလုံးညီညွတ်မှုအတွက် ပေးအပ်တဲ့ ဆုဖြစ်ပြီး ပြင်းထန်တဲ့ တော်လှန်ရေးကို ဆင်နွှဲရင်း ရင်ဆိုင်နေရတဲ့ ဒုက္ခဆိုးတွေနဲ့ ခါးသီးတဲ့အခြေအနေတွေကနေ လွတ်မြောက်နိုင်ဖို့အတွက် တောင်ကိုရီးယားနိုင်ငံအနေနဲ့ အချင်းချင်း အားအင်ဝေမျှရင်း ကူညီသွားမယ်ဆိုပြီး ကတိပြုတဲ့အဓိပ္ပာယ်ကို ကိုယ်စားပြုတယ်လို့လည်း ဆိုပါတယ်။

   လာမယ့်ဇွန် ၂၉ရက်မှာ ဆုချီးမြှင့်ပွဲအခမ်းအနားပြုလုပ်ဖို့ရှိပြီး တောင်ကိုရီးယားနိုင်ငံရဲ့ ဆိုးလ်အမျိုးသားတက္ကသိုလ်မှာ ပြုလုပ်မယ်လို့ သိရပါတယ်။

   ပြီးခဲ့တဲ့နှစ် Park Jong -cheol လူ့အခွင့်အရေးဆုကိုလည်း ဒီမိုကရေစီအတွက် စစ်တပ်နဲ့ ရင်ဆိုင်တိုက်ပွဲဝင်နေကြရတဲ့ မြန်မာပြည်သားအားလုံးကို ပေးအပ်ခဲ့ပါတယ်။

   ဒီဆုဟာ ၂၀၀၃ခုနှစ်ကစပြီး ဒီမိုကရေစီနဲ့လူ့အခွင့်အရေးမြှင့်တင်ဖို့ ကြိုးစားလုပ်ဆောင်ခဲ့ကြတဲ့ လူပုဂ္ဂိုလ်တွေနဲ့ အဖွဲ့အစည်းတွေကို နှစ်စဉ်ဆုပေးအပ်နေတာဖြစ်ပါတယ်။

   Park Jong -cheol ဆိုတာဟာ ဆိုးလ်အမျိုးသားတက္ကသိုလ်က ကျောင်းသားတစ်ဦးဖြစ်ပြီး ဒီမိုကရေစီအရေးလှုပ်ရှားမှုလုပ်ခဲ့တာကြောင့် ရဲတွေရဲ့ စစ်ဆေးမေးမြန်းမှုအတွင်း ၁၉၈၇ခုနှစ်၊ အသက် ၂၁နှစ်အရွယ်မှာ သေဆုံးခဲ့တာလို့ တောင်ကိုရီးယားသတင်းတွေမှာဖော်ပြထားပါတယ်။

8. ၂၆ ဇွန် ၂၀၂၂ဥုကရိက စခန်းသိမ်းတိုက်ပွဲ - KNLA ပူးပေါင်းအဖွဲ့နဲ့ စစ်ကောင်စီ စစ်ကူအဖွဲ့တို့ ထိတွေ့တိုက်ပွဲဆက်ဖြစ်နေ

   

   ဓာတ်ပုံ ရင်းမြစ်, CJ

   ကရင်ပြည်နယ်၊ မြဝတီမြို့တောင်ဘက် ဝေါလေမြိုင်မြို့နယ်ခွဲက စစ်ကောင်စီတပ်ရဲ့ ဥုကရိထစခန်းကို ကရင်အမျိုးသားကာကွယ်ရေးတပ်(KNLA)နဲ့ ပူးပေါင်းအဖွဲ့တွေက သိမ်းပိုက်ပြီးနောက်မှာပဲ စစ်ကူလာတဲ့စစ်ကောင်စီတပ်တွေနဲ့ KNLA ပူးပေါင်းအဖွဲ့တွေကြားတိုက်ပွဲတွေဆက်ဖြစ်နေတယ်လို့ ဒေသခံသတင်းရင်းမြစ်ကပြောပါတယ်။

   ဒီနေ့ ဇွန်လ ၂၆ ရက် မွန်းလွဲပိုင်းအထိ ထိတွေ့တိုက်ပွဲဆက်ဖြစ်နေတာပါ။

   စုကလိ့ - ဝေါလေလမ်းဆုံမှာရှိတဲ့ အဲဒီစစ်စခန်းကို KNLA ဆင်ဖြူစစ်ကြောင်းပူးပေါင်းအဖွဲ့တွေက ဒီနေ့ မနက်အစောပိုင်းမှာသိမ်းပြီး‌နောက် နယ်မြေရှင်းလင်းဖို့ ပြင်ဆင်နေချိန်မှာ တိုက်ပွဲဆက်ဖြစ်နေတာလို့ သိရပါတယ်။

   တိုက်ပွဲဆက်ဖြစ်နေတာကြောင့် နှစ်ဖက် ထိခိုက်ကျဆုံးမှုအခြေအနေကို မသိရသေးပါဘူး။

   ‘‘မနက်က စခန်းသိမ်းဖို့ ရှင်းလင်းရေး စလုပ်နေချိန်မှာ ဝေါလေဗျူဟာက စစ်ကောင်စီ စစ်ကူစစ်ကြောင်းနဲ့ စခန်းဆုတ်ခွာတဲ့ ဥုကရိထစခန်းကစစ်သားတွေ ပြန်ပေါင်းပြီး ကရင်အဖွဲ့တွေနဲ့တိုက်ပွဲပြန်ဖြစ်တာ။ စစ်ကောင်စီဘက်က တခြားနေရာတွေကနေ လက်နက်ကြီးပစ်လို့ ၂ ဖက် ထိခိုက်ကျဆုံးတာတွေရှိနေတယ်။ ဥုကရိထရွာခံ မိသားစုတချို့လည်း တိုက်ပွဲထဲ ပိတ်မိနေတယ်။ နေ့လယ်ပိုင်းက လေယာဉ်တစ်ခေါက် လာပစ်တယ်။ အခုထိ ဆက်ပစ်နေတယ်’’လို့ အဲဒီသတင်းရင်းမြစ်ကပြောပါတယ်။

   ဝေါလေမြိုင်မြို့နယ်ခွဲအတွင်းမှာ ဝေါလေစစ်ဗျူဟာအပြင် ဥုကရိထ၊ တနော်ထ၊ စုကလိ၊ ၊ မော်ခီး၊ ထီးသဲဘလယ်၊ ကနဲလေး၊ စခန်းသစ်၊ ကလော့ထော်ဒေသဘက်အထိ စစ်ကောင်စီအခြေချ စစ်စခန်းတွေရှိနေပါတယ်။

9. ၂၆ ဇွန် ၂၀၂၂ဆလိုင်းတင်မောင်ဦး ကြိုးပေးခံရမှုနှစ်ပတ်လည်နေ့မှာ လူငယ်တွေက စစ်အာဏာရှင်ဆန့်ကျင်ရေး ဆန္ဒဖော်ထုတ်

   

   ဓာတ်ပုံ ရင်းမြစ်, ချင်းတွင်းမြစ်အနောက်ဘက်ကမ်းသပိတ်ကော််မတီ

   ဒီကနေ့ ဇွန်လ ၂၆ရက်မှာကျရောက်တဲ့ ချင်းလူမျိုး ကျောင်းသားခေါင်းဆောင် ဆလိုင်းတင်မောင်ဦး ကြိုးပေးကွပ်မျက်ခံရတဲ့ ၄၆ နှစ်ပြည့်အဖြစ် ရန်ကုန်၊မန္တလေးနဲ့စစ်ကိုင်းတို့မှာ လူငယ်တွေနဲ့ဒေသခံတွေက စစ်အာဏာရှင်ဆန့်ကျင်ရေး လမ်းပေါ်တက် ဆန္ဒပြတာ၊ စာတန်းချိတ်ဆွဲတာ‌တွေ ပြုလုပ်ပြီး လမ်းပေါ်တက် ဆန္ဒပြခဲ့ကြပါတယ်။

   ဆလိုင်းတင်မောင်ဦးဟာ ဗိုလ်ချုပ်ကြီးနေဝင်းရဲ့ မြန်မာ့ဆိုရှယ်လစ်လမ်းစဥ်ပါခေတ်ဖြစ်တဲ့ ၁၉၇၆ ခုနှစ်၊ ဇွန်လ ၂၆ ရက်နေ့မှာ ကြိုးပေးကွပ်မျက်ခြင်းခံခဲ့ရသူဖြစ်ပါတယ်။

   သူ့ကို မြန်မာ့သမိုင်းတလျောက်မှာ ကြိုးပေးသတ်ဖြတ်ခံခဲ့ရတဲ့ တစ်ဦးတည်းသော ကျောင်းသားခေါင်းဆောင်အဖြစ် လူသိများပါတယ်။ ကြိုးပေးခံရချိန်မှာ သူဟာအသက် ၂၅နှစ်သာရှိပါသေးတယ်။

10. ၂၆ ဇွန် ၂၀၂၂မန္တလေးမှာ မူးယစ်ဆေး‌ဝါးတွေကို အိမ်ခြေတွေနဲ့ကပ်တဲ့နေရာမှာမီးရှို့ဖျက်ဆီး, ကြိုတင်အသိပေးတာမရှိလို့ မြို့ခံတွေစိုးရိမ်ခဲ့ကြ

    

    ဓာတ်ပုံ ရင်းမြစ်, Social Media

    ဒီကနေ့ ဇွန် ၂၆ရက် မူးယစ်ဆေးဝါးတိုက်ဖျက်ရေးနေ့အထိမ်းအမှတ်အဖြစ် ဖမ်းဆီးရမိတဲ့မူးယစ်ဆေးဝါးတွေကို မန္တ‌လေးမြို့၊ ချမ်းမြသာစည်လေယာဉ်ကွင်းဟောင်းမှာ စစ်ကောင်စီလက်အောက်အာဏာပိုင်အဖွဲ့တွေက မီးရှို့ဖျက်ဆီးတာတွေပြုလုပ်ခဲ့ပါတယ်။

    မြို့ခံတွေကို ကြိုတင်အသိမပေးဘဲ မြို့နဲ့နီးသလို အိမ်ခြေတွေနဲ့ကပ်နေတဲ့နေရာမှာ မီးရှို့ဖျက်ဆီးခဲ့လို့ မြို့ခံတွေစိုးရိမ်ထိတ်လန့်ခဲ့ရတယ်လို့ ဘီဘီစီကိုပြောကြပါတယ်။

    ဒီကနေ့ မနက် ၉နာရီကျော်မှာ မြို့တွင်းမီးခိုးလုံးတွေတွေ့ရတာကြောင့် မီးလောင်မြင်ကွင်းလို့ ထင်မှတ်ပြီး မြို့ခံတွေစိုးရိမ်ထိတ်လန့်ခဲ့ကြသလို မီးဘေးစိုးရိမ်ရကြောင်းကို မြို့ခံတွေရဲ့ လူမှုကွန်ရက်စာမျက်နှာတွေပေါ်မှာ ရေးသားဖော်ပြခဲ့ကြတာကိုတွေ့ရပါတယ်။

    ဒါကြောင့် မန္တလေးတိုင်း ဗဟိုမီးသတ်ဌာန တာဝန်ရှိသူက သူရဲ့လူမှုကွန်ရက်ကနေ ချမ်းမြသာစည်၊လေယာဉ်ကွင်းဟောင်းမှာ ဖမ်းဆီးမူးယစ်ဆေးဝါးတွေ မီးရှို့တာဖြစ်လို့ ပြည်သူတွေ ထိတ်လန့်မှုမဖြစ်စေဖို့ အသိပေးစာကို ဒီကနေ့မနက်ပိုင်းမှာပဲ ရေးသားဖော်ပြခဲ့ပါတယ်။

    ဒီမူးယစ်ဆေးဝါးမီးရှို့ဖျက်ဆီးတဲ့ လေယာဉ်ကွင်းဟောင်းဟာ အသွားအလာများတဲ့ သိပ္ပံလမ်း၊ ကညနရုံးနဲ့ ဈေးဝယ်စင်တာ၊ ဆင်ဖြူကန်ယာဉ်မောင်းလေ့ကျင့်ကွင်းအနီးမှာရှိပြီး မြို့နေအိမ်ခြေတွေနဲ့ နီးကပ်တယ်လို့ ဒေသခံတွေကပြောကြပါတယ်။

    

    ဓာတ်ပုံ ရင်းမြစ်, စစ်ကောင်စီသတင်းထုတ်ပြန်ရေး

    ဒီလိုဖမ်းဆီးရရှိတဲ့ မူးယစ်ဆေးဝါးတွေကို အရင်က လူနေအိမ်ခြေတွေနဲ့ ဝေးတဲ့မန္တလေးမြို့မြောက်ဘက် မန္တလေးတောင်ခြေအနီး ရွှေမန်းတောင် အားကစားကွင်းနဲ့ ကြာနီကန်တို့မှာ မီးရှို့တာတွေ ပြုလုပ်ခဲ့ကြတာဖြစ်ပါတယ်။

    အခုလိုမူးယစ်ဆေးဝါးမီးရှို့ပွဲကို ဘာကြောင့် မြို့တွင်းမှာ ပြောင်းလဲပြုလုပ်ရလဲ။ လူထုကို ကြိုတင်အသိပေး အကြောင်းကြားတာ ရှိမရှိဆိုတာနဲ့ပတ်သက်ပြီး မန္တလေးစည်ပင်သာယာရေးကော်မတီ ပြန်ကြားရေးဌာနကို ဆက်သွယ်ခဲ့ပေမယ့် ဖုန်းပြန်လည်ဖြေကြားတာမရှိပါဘူး။

    ဒီကနေ့ပြုလုပ်တဲ့ ၃၅ ကြိမ်မြောက် အပြည်ပြည်ဆိုင်ရာ မူးယစ်ဆေးဝါးအလွဲသုံးမှုနှင့် တရားမဝင် ရောင်းဝယ်မှုတိုက်ဖျက်ရေး အထိမ်းအမှတ်အဖြစ် တန်ဖိုး (၃၁၆.၇၇၈) ရှိ မူးယစ်ဆေးဝါးတွေကို မီးရှို့ဖျက်ဆီးခဲ့ပြီး ဆေးခြောက်၊ ဘိန်းဖြူ၊ စိတ်ကြွရူးသွပ်ဆေးပြားတွေ အပါအဝင် မူးယစ်အမျိုးစားပေါင်း ၂၅မျိုး ပါဝင်တယ်လို့ စစ်ကောင်စီသတင်းတွေမှာဖော်ပြထားပါတယ်။

11. ၂၆ ဇွန် ၂၀၂၂အကျဉ်းထောင်နဲ့ စစ်ကြောရေးမှာဖမ်းဆီးခံရတာကြောင့် သေဆုံးသူ ၉၅ဦးရှိ, စစ်ကောင်စီကိုနိုင်ငံရေးအရ ဖိအားပေးဖို့ အရပ်ဖက်အဖွဲ့ အစည်းတွေတောင်းဆို

    

    ဓာတ်ပုံ ရင်းမြစ်, Getty Images

    စစ်အာဏာသိမ်းတဲ့ ၂၀၂၁ခုနှစ်၊ ဖေဖော်ဝါရီ ၁ရက်ကနေ ဒီကနေ့ ၂၀၂၂ခုနှစ်၊ ဇွန် ၂၆ရက်အထိ တစ်နှစ်ကျော်ကာလအတွင်း စစ်ကြောရေးနဲ့ အကျဉ်းထောင်တွေမှာ သေဆုံးခဲ့ရသူ ၉၅ဦးရှိလာပြီလို့ နိုင်ငံရေးအကျဉ်းသားများကူညီစောင့်ရှောက်ရေးအသင်း AAPP နဲ့အတူ နိုင်ငံရေးစောင့်ကြည့်တဲ့အရပ်ဖက်အဖွဲ့အစည်းတွေက ဒီကနေ့ ဇွန် ၂၆ရက်၊ အပြည်ပြည်ဆိုင်ရာညှဉ်းပန်းနှိပ်စက်ခံရသူများကိုကူညီထောက်ပံ့ရေးနေ့မှာ သတင်းထုတ်ပြန်လာပါတယ်။

    ဒီသေဆုံးခဲ့သူ ၉၅ဦးဟာ နိုင်ငံရေးတက်ကြွလှုပ်ရှားသူနဲ့ စစ်ကောင်စီဆန့်ကျင်ရေးဆန္ဒထုတ်ဖော် သူတွေဖြစ်တယ်လို့ ‌ထုတ်ပြန်ချက်မှာဆိုထားပါတယ်။

    နိုင်ငံရေးအရ ဖမ်းဆီးခံရသူတိုင်းကို ရုပ်ပိုင်းဆိုင်ရာ သို့မဟုတ် စိတ်ပိုင်းဆိုင်ရာအရ ညှဉ်းပန်းနှိပ်စက်တာတွေလုပ်လေ့ရှိပြီး မျက်ကွယ်မှာ သတ်ဖြတ်တာ၊ အလောင်းကိုမိသားစုဆီပြန်မပေးဘဲ သင်္ဂြိုဟ်တာ၊ ပုံစံထိုင်ခိုင်းတာ၊ ကျား/မအခြေပြု ခြိမ်းခြောက်မှုတွေပြုလုပ်တာအပြင် အစာရေစာရက်ရှည်ဖြတ်တောက်တွေနဲ့ အိမ်သာသုံးရေကို သောက်သုံးစေတဲ့ စနစ်တကျတည်ဆောက်ထားတဲ့ ညှဉ်းပန်းနှိပ်စက်မှုပုံစံတွေနဲ့ စစ်ကောင်စီကို တော်လှန်ဆန့်ကျင်သူတိုင်းအပေါ် ကျူး‌လွန်ချိုးဖောက်နေတယ်လို့ ဒီအရပ်ဖက်အဖွဲ့တွေရဲ့ ထုတ်ပြန်ချက်မှာဖော်ပြပါတယ်။

    ဒါကြောင့် နိုင်ငံတကာနဲ့ဒေသတွင်းအဖွဲ့အစည်းတွေအနေနဲ့ စစ်ကောင်စီအပေါ် ထိရောက်မှုမရှိတဲ့ သတိပေးလုပ်ဆောင်ချက်တွေကို ရပ်တန့်ချိန်ရောက်ပြီဖြစ်တာကြောင့် နိုင်ငံရေးအရ ပိုမိုဖိအားပေးနိုင်ဖို့ "ဖြတ်သုံးဖြတ်ဗျူဟာ" နဲ့ ဆောင်ရွက်ကြဖို့ အရပ်ဖက်အဖွဲ့အစည်းတွေကနေ ဒီကနေ့ မှာ တောင်းဆိုလိုက်ပါတယ်။

    စစ်ကောင်စီကို တရားဝင်မှုဖြစ်စေတဲ့ ထိတွေ့ဆက်ဆံဆွေးနွေးမှုတွေကို ငြင်းပယ်ဖို့၊ ကမ္ဘာလုံးဆိုင်ရာ လက်နက်ပို့ဆောင်မှုကို ကျယ်ကျယ်ပြန့်ပြန့်အကောင်အထည်ဖော်ဖို့၊ စစ်ဘက်ဆိုင်ရာ စီးပွားရေးလုပ်ငန်းတွေကို ပစ်မှတ်ထားတဲ့ ဘဏ္ဍာရေးဒဏ်ခတ်ပိတ်ဆို့မှုတွေအကောင်အထည် ဖော်ဖို့နဲ့ မြန်မာနိုင်ငံဆိုင်ရာလွတ်လပ်တဲ့စုံစမ်းစစ်ဆေးရေးယန္တရားတွေကို ကူညီပံ့ပိုး‌ပြီး ညှဉ်းပန်းမှုကျူးလွန်သူတွေကို နိုင်ငံတကာ ရာဇ၀တ်ခုံရုံး (ICC) သို့ လွှဲပြောင်းနိုင်ဖို့ ကုလသမဂ္ဂ လုံခြုံရေးကောင်စီကနေ တောင်းဆိုဖို့ဆိုတဲ့ အချက်တွေကိုပါ အရပ်ဖက်အဖွဲ့အစည်းတွေက စုပေါင်းတောင်းဆိုထားကြတာဖြစ်ပါတယ်။

12. ၂၆ ဇွန် ၂၀၂၂မုံရွာမြို့ပေါ်ကို ဆားလင်းကြီးဒေသခံရာချီစစ်ဘေးရှောင်လာ, အကူအညီတွေလိုအပ်နေကြတယ်လို့ဆို

    

    ဓာတ်ပုံ ရင်းမြစ်, CJ

    ဒီရက်ပိုင်းအတွင်း စစ်ကောင်စီတပ်တွေစစ်ကြောင်းထိုးဝင်ရောက်နေတဲ့ စစ်ကိုင်းတိုင်း၊ ဆားလင်းကြီးမြို့နယ်၊ လက်ပံတောင်းတောင်ဒေသကဒေသခံရာနဲ့ချီဟာ ချင်းတွင်းမြစ်တစ်ဖက်ကမ်းက မုံရွာမြို့ပေါ်ကို စစ်တိမ်းရှောင်လာကြတယ်လို့ စစ်ရှောင်တွေနဲ့ မုံရွာမြို့ခံတွေက ‌ပြောပါတယ်။

    စစ်ရှောင်တွေဟာ မုံရွာမြို့ပေါ်က နီးစပ်ရာနေအိမ်နဲ့ ဘုန်းကြီးကျောင်းတွေမှာ ခိုလှုံနေကြရပြီး အစားအသောက်၊ နေရာအခက်အခဲတွေရှိနေတယ်လို့ ဆားလင်းကြီးစစ်ရှောင်တွေက ဘီဘီစီကိုပြောပါတယ်။

    "အသိတွေဆီ တစ်အိမ်ကိုခုနှစ်ယောက်လောက်ဒါမျိုးပေါင်းနေရတာ။ မိသားစုလည်း တကွဲတပြားစီပဲ။ အခက်အခဲတွေကများလွန်းတော့ ဘာပြောရမလဲတောင်မသိဘူး။ ဒီလို တစ်ဖက်ကမ်းကူးလာတော့လည်း စစ်ကောင်စီစစ်ဆေး‌တဲ့ ညောင်ပင်ကြီး၊ ထန်းတောကြီး တို့ ဇက်ဆိပ်တို့ကနေ ကူးမလာရဲဘူး ၊ကွေ့ပတ်လာကြတာ" လို့ တုံကျေးရွာသားတစ်ဦးက ပြောပါတယ်။

    ဒီလိုမုံရွာမြို့ပေါ်ကို စစ်ဘေးရှောင်တွေရောက်ရှိလာကြပေမဲ့လည်း လူမှုကူညီ‌ရေးနဲ့ ပရဟိတအသင်းတွေဘက်ကနေ ကူညီဆောင်ရွက်မှုတွေမလုပ်ပေးရဲဘဲ စိုးရိမ်မှုတွေရှိနေကြတယ်လို့ မုံရွာမြို့ခံတွေကဆိုပါတယ်။

    

    ဓာတ်ပုံ ရင်းမြစ်, CJ

    စစ်ကောင်စီကတော့ ဒီစစ်တိမ်းရှောင်သူတွေကို စစ်ဆေးတာတွေမရှိသလို ကူညီဆောင်ရွက်ပေးမှုတွေလည်းမရှိကြဘူးလို့ ‌မျက်မြင်တွေကပြောစကားအရသိရပါတယ်။ အခုဇွန်လအတွင်းမှာတင် မုံရွာမြို့ပေါ်မှာ စစ်ကောင်စီ ဆန့်ကျင်ရေး လှုပ်ရှားသူတွေကို ဆက်တိုက်ဖမ်းဆီး‌‌နေသလို မြို့အဝင်အထွက် စစ်ဆေး‌ရေးတင်းကြပ်ထားတယ်လို့ ဆိုပါတယ်။

    ဆားလင်းကြီးမြို့နယ်၊ လက်ပံတောင်းတောင်ဒေသမှာတော့ တစ်ပတ်အတွင်း ရွာပေါင်း ၃၀ကျော်က ဒေသခံတွေစစ်တိမ်းရှောင်နေကြရပြီး မိုးကြိုးပြင်နဲ့ တုံစတဲ့ ကျေးရွာအုပ်စုတွေက နေအိမ်တွေ မီးရှို့ခံထားရပြီလို့ ဒေသခံတွေကဆိုပါတယ်။

    ဒီကနေ့မနက်မှာတော့ လက်ပံတောင်းတောင်ဒေသမှာ စစ်ကောင်စီနဲ့ ဒေသခံအကြား ထိတွေ့တိုက်ပွဲမရှိဘူးလို့ သိရပါတယ်။

13. ၂၆ ဇွန် ၂၀၂၂ဝေါလေဒေသ ဥုကရစ်ထ စစ်ကောင်စီ စစ်စခန်းကို KNLA/KNDO ပူးပေါင်းအဖွဲ့တွေသိမ်း

    

    ဓာတ်ပုံ ရင်းမြစ်, CJ

    ကရင်ပြည်နယ်ထဲက ‌ဝေါလေဒေသမှာရှိတဲ့ စစ်ကောင်စီတပ်ရဲ့ ဥုကရစ်ထ စခန်းကို ကရင်အမျိုးသားအစည်းအရုံး(ကေအဲန်ယူ)ရဲ့ KNLA/KNDO ပူးပေါင်းအဖွဲ့တွေက ဒီနေ့ ဇွန်လ ၂၆ ရက် မနက် ၈ နာရီကျော်မှာ သိမ်းပိုက်ခဲ့တယ်လို့ KNLA စစ်ရေးနယ်မြေ သတင်းအရင်းအမြစ်က ပြောပါတယ်။

    အခုတော့ နယ်မြေရှင်းလင်းရေး ဆက်လုပ်နေတာကြောင့် ဝေါလေမှာရှိတဲ့ စစ်ကောင်စီတပ်က စစ်ကူတက်လာတဲ့အဖွဲ့ နဲ့ ပစ်ခတ်တာတွေဆက်ဖြစ်နေဆဲပဲလို့ ကရင်အမျိုးသားကာကွယ်ရေးတပ် (KNLA)စစ်ရေးနယ်မြေသတင်းအရင်းအမြစ်က ပြောပါတယ်။

    ‘‘ညကတည်းက တိုက်ခိုက်မှု စပြီးလုပ်ခဲ့တယ်။ သူတို့ဘက်က လက်နက်ကြီး ပစ်ထုတ်တယ်။ ဝေါလေ စစ်ဗျူဟာ စစ်ကောင်စီကုန်းဘက်ကလည်း ပစ်ကူပေးတယ်။ အခု ၈ နာရီကျော်မှာ လက်နက်ကြီးပစ်တာ ရပ်သွားပြီးတော့ သူတို့ စခန်း စွန့်ပြီး ဆုတ်ပြေးတယ်။ ကျွန်တော်တို့ဘက်ကတော့ ရဲဘော် ၂ ယောက်ထိထားတယ်။ ၁ ယောက်ကျတယ်။ စစ်ကောင်စီဘက်က ၂၀ လောက် ထိထားတယ်’’လို့ KNLA စစ်ရေးနယ်မြေ သတင်းအရင်းအမြစ်က ပြောပါတယ်။

    အဲဒီ ဥုကရစ်ထ စစ်ကောင်စီစခန်းဟာ မြို့နယ်ခွဲအဝင် မုလအိ့၊ စုကလိ လမ်းခွဲ လမ်းဆုံနေရာမှာ တည်ရှိပြီး ထိုင်း-မြန်မာနယ်စပ် စစ်ဗျူဟာ လက်အောက်ခံ အခြေချ စစ်စခန်းတစ်ခု ဖြစ်ပါတယ်။

    အဲဒီစခန်းဟာ ကေအဲန်ယူ တပ်မဟာ ၆ နယ်မြေ၊ KNLA/KNDO စစ်ရေးနယ်မြေအတွင်း နှစ်ပေါင်း ၂၀ ကျော် တပ်စွဲထားတဲ့စစ်ကောင်စီစစ်စခန်းဖြစ်ပါတယ်။

14. ၂၆ ဇွန် ၂၀၂၂ကချင်ပြည်နယ် ရှမ်းနီစာပေနဲ့ရိုးရာယဉ်ကျေးမှုကော်မတီ နာယက ပစ်ခတ်ခံရပြီးသေဆုံး

    

    ဓာတ်ပုံ ရင်းမြစ်, ရှမ်းနီအသံ

    ကချင်ပြည်နယ်၊ ဖားကန့်မြို့နယ်၊ ဟောင်ပါးကျေးရွာအုပ်စုလုံးဆိုင်ရာ ရှမ်းနီစာပေနဲ့ရိုးရာယဉ်ကျေးမှုကော်မတီ နာယကတစ်ဦးဖြစ်သလို ကော်မတီရဲ့ ပြည်နယ်အဆင့် နာယက တစ်ဦးလည်းဖြစ်တဲ့ ဦးသန်းဖေဟာ မနေ့ ဇွန်လ ၂၅ ရက်ညပိုင်းက နေအိမ်မှာ သေနတ်ပစ်ခံရလို့သေဆုံးခဲ့တယ်လို့ ရှမ်းနီစာပေနဲ့ရိုးရာယဉ်ကျေးမှုကော်မတီ ဘက်က သိရပါတယ်။

    ပစ်ခတ်ခံရတာကြောင့် သေနတ်ဒဏ်ရာ ၄ ချက်နဲ့ နေရာမှာပဲသေဆုံးခဲ့တာလို့သိရပါတယ်။

    လူငယ်အရွယ် နှစ်ဦးက လာရောက်ပစ်ခတ်သွားတာဖြစ်ပြီး ဘယ်သူတွေဘယ်အဖွဲ့အစည်းကဆိုတာတော့ မသိရှိရသေးဘူးလို့ဆိုပါတယ်။

    ဦးသန်းဖေဟာ အသက် (၆၀) ကျော်အရွယ်ဖြစ်ပြီး အာဏာမသိမ်းခင် နှစ်များစွာကတည်းက ရှမ်းနီအရေးကိုသာ ဆောင်ရွက်နေသူဖြစ်သလို လွန်ခဲ့တဲ့ (၁၀) စုနှစ်ကျော်က ရပ်ကျေးအုပ်ချုပ်ရေးမှူးတာဝန်တွေကို ထမ်းဆောင်ခဲ့ဖူးသူဖြစ်တယ်လို့ ရှမ်းနီသတင်းတွေက ဖော်ပြပါတယ်။

    ဦးသန်းဖေပစ်ခတ်ခံရပြီးနောက် ဟောင်ပါးကျေးရွာအတွင်း စစ်ကောင်စီတပ်ဖွဲ့တွေက ပိတ်ဆို့စစ်ဆေးတာတွေကို လုပ်ဆောင်ခဲ့တယ်လို့သိရပါတယ်။

15. ၂၆ ဇွန် ၂၀၂၂ရခိုင်မှာ ၂ ရက်အတွင်း စစ်ကောင်စီတပ်ဖမ်းဆီးတာခံရတဲ့ ဒေသခံ ၂၁ ဦးရှိတယ်လို့ အေအေပြော

    

    ရခိုင်ပြည်နယ်အတွင်း ပြီးခဲ့တဲ့ ဇွန်လ ၂၃ ရက်နဲ့ ၂၄ ရက် ၂ရက်အတွင်းမှာ စစ်ကောင်စီတပ်ရဲ့ဖမ်းဆီးခံရတဲ့ ဒေသခံ အရပ်သား ၂၁ ဦးရှိတယ်ဆိုပြီး ရက္ခိုင့်တပ်တော်(အေအေ)ဘက်က သတင်းထုတ်ပြန်လာပါတယ်။

    အဖမ်းခံရတဲ့အရပ်သားတွေထဲမှာ အသက်မပြည့်သေးတဲ့ လူငယ် ၃ ဦး ပါဝင်တယ်လို့လည်း အေအေရဲ့ မနေ့ ဇွန်လ ၂၅ ရက် ထုတ်ပြန်ချက်ကဆိုပါတယ်။

    ဖမ်းဆီးခံရသူ အများစုဟာ စစ်တွေမြို့ခံအမျိုးသားတွေ အများဆုံးဖြစ်ပြီး ပေါက်‌တော၊ မင်းပြားနဲ့ မြောက်ဦးမြို့နယ်တို့က ဒေသခံတွေဖြစ်ပါတယ်။

    စစ်တပ်ဘက်က ဒီအရပ်သားတွေကို ဘာကြောင့် ဖမ်းဆီးတယ်ဆိုတာမျိုးတော့ နှစ်ဘက်လုံးက ထုတ်ပြန်တာမရှိသေးပါဘူး။

    ရခိုင်ပြည်နယ်၊ စစ်တွေမြို့မှာ ဇွန်လ ၂၃ ရက်က မြောက်ဦးမြို့ပေါ် စစ်ဘက်ရေးရာလုံခြုံရေးအဖွဲ့ဝင် တစ်ဦးနဲ့ သတင်းပေး သုံးဦးကို ရက္ခိုင့်တပ်တော်ဘက်က ဖမ်းဆီးခဲ့တယ်လို့ မြို့ခံတွေက အစောပိုင်းရက်တွေကပြောထားပါတယ်။

    ပြည်နယ်မြောက်ပိုင်းမြို့နယ်တွေဖြစ်တဲ့ စစ်တွေမြို့ အပါအဝင်စစ်တွေမြို့အပါအဝင် ၊ ပုဏ္ဏားကျွန်း၊ ကျောက်တော်၊ မြောက်ဦး စတဲ့ မြို့နယ်တွေထဲက စစ်သား ၅ ယောက်နဲ့ ရဲ ၄ ယောက်တို့ကို ဒီငါးရက်အတွင်း ဖမ်းဆီးခဲ့တယ်လို့ ဘီဘီစီရဲ့ သတင်းမှတ်တမ်းတွေအရ သိရပါတယ်။

    တစ်ဖက်မှာလည်းစစ်ကောင်စီတပ်တွေက ရခိုင်ပြည်နယ်တွင်းမြို့နယ်အများစုမှာ အရပ်သားနဲ့ လူမှုအဖွဲ့အစည်းတွေကိုဆက်တိုက် ဖမ်းဆီးစစ်ဆေးတာတွေရှိနေတာကြောင့် စစ်တွေမြို့လို့ မြို့ပေါ်နေရာတွေအထိ ရခိုင်တပ်တော် အေအေနဲ့ စစ်ကောင်စီအကြား စစ်ရေးတင်းမာတာတွေ ဖြစ်နိုင်တယ်လို့ နိုင်ငံရေးတက်ကြွလှုပ်ရှားသူတွေက သုံးသပ်နေကြပါတယ်။

16. ၂၆ ဇွန် ၂၀၂၂ဒီမောဆို၊ ဒေါ့ငံခါးရပ်ကွက်မှာ တိုက်ပွဲဖြစ်ပွားခဲ့

    

    ဓာတ်ပုံ ရင်းမြစ်, PDF Loikaw

    မနေ့ ဇွန် ၂၅ရက်၊ မနက် ၆နာရီဝန်းကျင်လောက်ကစပြီး နေ့လယ် ၂နာရီလောက်အထိ ကယား (ကရင်နီ) ပြည်နယ်၊ ဒေါ့ငံခါးရပ်ကွက်ထဲမှာ စစ်ကောင်စီနဲ့ ‌ဒေသကာကွယ်ရေးပူးပေါင်းအဖွဲ့ တွေအကြား နှစ်ဖက်ထိတွေ့တိုက်ပွဲဖြစ်ပွားခဲ့တယ်လို့ လွိုင်ကော် PDF က သတင်းထုတ်ပြန်ထားပါတယ်။

    ဒီတိုက်ပွဲဖြစ်ပွားတဲ့နေရာကဒေသခံတွေအကုန်လုံးနီးပါး စစ်တိမ်းရှောင်နေကြတာဖြစ်ပြီး မြို့ပေါ်ရပ်ကွက်တွေမှာ စစ်ကောင်စီဘက်က ခြေကုပ်ယူဖို့ ကြိုးစားနေတာလို့ ကရင်နီအမျိုးသားများကာကွယ်ရေးတပ် KNDF က ဘီဘီစီကိုပြောပါတယ်။

    "စစ်ကောင်စီဘက်က လက်နက်ကြီးနဲ့ပစ်တော့ လူနေအိမ်တွေထိမှာကတော့အသေအချာပါပဲ။ ကျွန်တော်တို့ဘက်ကရဲဘော်တချို့ဒဏ်ရာရတယ်၊ မစိုးရိမ်ရဘူး။ သူတို့ဘက်က အထိအခိုက် အသေအချာမသိရဘူး။ လေယာဉ်တွေတော့ တလျှောက်ဝဲနေတယ်" လို့ KNDF ပြန်ကြားရေးတာဝန်ခံက ပြောပါတယ်။

    အဲ့ဒီ ဒီမောဆိုမြို့ပေါ် ဒေါ့ငံခါးရပ်ကွက်မှာ စစ်ကောင်စီက နေရာယူထားတာတွေရှိသလို KNDF ဘက်ကလည်း နေရာယူထားတာတွေရှိနေတယ်လို့ ဆိုပါတယ်။

    လက်ရှိ ကရင်နီဒေသမှာ စစ်ကောင်စီတပ်ဖွဲ့တွေအနေနဲ့ သူတို့တည်ရှိရာနေရာကလွဲပြီး သွားလာဖို့ မလွယ်ကူသလို အုပ်ချုပ်ရေးယန္တရားလည်း မတည်ဆောက်နိုင်ဘူးလို့ ဒေသကာကွယ်ရေးအဖွဲ့တွေက ပြောကြပါတယ်။

17. ၂၅ ဇွန် ၂၀၂၂ဝမ်ပေါင်ကုမ္ပဏီနဲ့ဆက်စပ်နေရာတွေ ဆက်တိုက် တိုက်ခိုက်ခံနေရ

18. ၂၅ ဇွန် ၂၀၂၂HIV ဂေဟာတာဝန်ခံကိုရာဇာကိုထောင်တွင်းအထူးတရားရုံးမှာရုံးထုတ်, တရားလိုနဲ့သက်သေကိုစစ်ဆေးပြီးဇူလိုင်၁ရက်နေ့ထပ်မံရုံးချိန်း

    အကြမ်းဖက်မှုဥပဒေအရတရားစွဲဆိုခံထားရတဲ့ HIV ဂေဟာတာဝန်ခံ ကိုရာဇာခေါ်ကိုစိုးရာဇာထွန်းကို ဇွန်လ ၂၄ရက်နေ့က အင်းစိန်ထောင်တွင်း အထူးတရားရုံးမှာ ရုံးထုတ်ခဲ့ပါတယ်။

    အဲဒီရုံးချိန်းမှာတရားလိုဖြစ်တဲ့ ဒုရဲအုပ်နဲ့သက်သေတို့ကို စစ်ဆေးခဲ့ပြီး လာမယ့်တပတ် ဇူလိုင်လ၁ရက်နေ့ကို နောက်ထပ်ရုံးချိန်းပေးလိုက်တယ်လို့ သူ့အမှုကို လိုက်ပါဆောင်ရွက်ပေးနေတဲ့ရှေ့နေက ပြောပါတယ်။

    တရားလိုအဖြစ် ရဲတွေနဲ့သက်သေအပါအဝင် စုစုပေါင်းယောက် စစ်မေးဖို့ရှိတယ်လို့လည်း ဆိုပါတယ်။

    တရားလိုနဲ့တရားလိုပြသက်သေတွေအားလုံး စစ်ဆေးပြီးရင် သူ့ကိုတရားစွဲထားတဲ့အမှုအတွက် စွဲချက်တင်သင့်မတင်သင့် အမိန့်ချမှတ်မှာ ဖြစ်ပါတယ်။

    HIV ဝေဒနာရှင်တွေကနဲ့ မိဘမဲ့ကလေးတွေကို စောင့်ရှောက်ပေးနေတဲ့ NCA ဂေဟာကနေ မတ်လ၂ရက်နေ့ က ကိုရာဇာကို ဖမ်းဆီးသွားခဲ့ပြီး ဒေါပုံမြို့နယ်မှာရှိတဲ့ ရန်ကုန်အရှေ့ပိုင်းခရိုင်တရားရုံးမှာ ဧပြီလ၁ရက်နေ့က အကြမ်းဖက်မှုဆိုင်ရာ ဥပဒေပုဒ်မ ၅၀ ညနဲ့တရားစွဲခဲ့ပါတယ်။

    သူ့ကိုအရှေ့ပိုင်းခရိုင်တရားရုံးမှာရုံးထုတ်နေခဲ့ရာကမေလ၃၀ရက်နေ့ကစပြီးအင်းစိန်အကျဉ်းထောင်တွင်းအထူးတရားရုံးမှာပဲ ရုံးထုတ်ခဲ့ပါတယ်။

    ကိုရာဇာရဲ့ကျန်းမာရေးလည်းကောင်းမွန်တယ်လို့သိရကြောင်းသူ့ရှေ့နေကပြောပါတယ်။

    

    ဓာတ်ပုံ ရင်းမြစ်, Ko Yarzar

19. ၂၅ ဇွန် ၂၀၂၂လူဖမ်းပွဲရဲ့ နောက်ဆက်တွဲ ရခိုင်မှာဘာဆက်ဖြစ်လာနိုင်လဲ

20. ၂၅ ဇွန် ၂၀၂၂မန္တလေး မဟာအောင်မြေမှာ ပစ်ခတ်မှုဖြစ်၊ အမျိုးသားတစ်ဦးသေဆုံး

    မန္တလေးမြို့ မဟာအောင်မြေမြို့နယ်မှာ ဒီနေ့ ဇွန် ၂၅ ရက် ညနေ ၃ နာရီကျော်က စစ်ကောင်စီတပ်တွေက လူငယ်သုံးဦးကို ဖမ်းဆီးရာကနေ အပြန်အလှန် ပစ်ခတ်မှုဖြစ်ပွားခဲ့လို့ လူငယ်အဖွဲ့ထဲက အမျိုးသားတစ်ဦး သေဆုံးကာ စစ်ကောင်စီဘက်က တစ်ဦး ဒဏ်ရာရရှိခဲ့တယ်လို့ အခင်းဖြစ်ရာ နီးစပ်တဲ့ဒေသခံတွေက ပြောပါတယ်။

    "၈၄ လမ်းပေါ်မှာ။ သူပစ်ကိုယ်ပစ် ပစ်တာ။ သေနတ်အချက်ပေါင်း ၁၀ ချက်ကျော်လောက်ရှိမယ် (ထိတာ)။ ရင်ဘတ်၊ ကျော၊ ခေါင်း အများကြီးပဲ။ စကစဘက်ကလည်း တစ်ယောက်ထိတယ်။ ဆိုင်ရှေ့မှာ လူငယ်တွေစီးတဲ့ ဘီးကြီးတစ်စီးကျန်ခဲ့တယ်"လို့ အခင်းဖြစ်ရာ မျက်မြင်တွေ့လိုက်ရတဲ့ ဒေသခံတစ်ဦးက ပြောပါတယ်။

    အခင်းဖြစ်ရာနေရာဟာ ၃၅ လမ်းနဲ့ ၃၆ လမ်းကြား ၈၄ လမ်းမှာရှိတဲ့ Lotteria ကြက်ကြော်ဆိုင်ရှေ့မှာ ဖြစ်ပြီး အဲဒီနေရာဟာ အမှတ် ၉ ရဲစခန်းနဲ့ စစ်တပ်တပ်စွဲထားရာ အနီးမှာရှိတာဖြစ်ပါတယ်။

    အခင်းဖြစ်စဥ်မှာ ဒီလူငယ်သုံးဦးဟာ မုန့်လာစားရာကနေ အရပ်ဝတ်နဲ့စစ်ကောင်စီတပ်ဖွဲ့တွေက သူတို့နောက်ကလိုက်လာရင်း ပစ်ခတ်မှုဖြစ်ပွားတာလို့ သိရပါတယ်။ မနေ့ညနဲ့ ဇွန် ၂၃ ရက်နေ့ ညမှာလည်း မဟာအောင်မြေမြို့နယ် ထွေအုပ်ရုံးမှာ တပ်စွဲထားတဲ့ စစ်ကောင်စီတပ်ကို မြို့ပြပြောက်ကျားတပ်ဖွဲ့ သုံးဖွဲ့က ပူးပေါင်းပြီး ပစ်ခတ်တိုက်ခိုက်ခဲ့တယ်လို့ မဟာမိတ်တပ်ပေါင်းစုအဖွဲ့က ထုတ်ပြန်ထားပါတယ်။

    

    ဓာတ်ပုံ ရင်းမြစ်, CJ