ဒီပဲယင်းမှာ ဒေသကာကွယ်ရေးတပ်ဖွဲ့ဝင် ၈ ဦးအသတ်ခံရ
စစ်ကိုင်းတိုင်း၊ ဒီပဲယင်းမြို့နယ် ၊ မင်းဆွေနှစ်ကျေးရွာမှာ ဒီနေ့ မတ် ၄ ရက်နေ့ မနက်ပိုင်းက အိမ်စီးကားနဲ့ စစ်ကောင်စီတပ်တွေဝင်လာပြီးတဲ့နောက် ပြည်သူ့ကာကွယ်ရေးတပ်ဖွဲ့ဝင် ၈ဦး အသတ်ခံလိုက်ရတယ်လို့အဲဒီတပ်ဖွဲ့ဝင်တွေနဲ့ နီးစပ်သူတစ်ယောက်က ဘီဘီစီကို ပြောပါတယ်။
ရွာလုံခြုံရေး ကင်းစောင့်ပြီး နားနေတဲ့အချိန် မနက် ၆ နာရီလောက်မှာ စစ်ကောင်စီတပ်တွေက အိမ်စီးကားနဲ့ရောက်လာတဲ့အတွက် အများပြည်သူအသုံးပြုတဲ့ ယာဉ်လို့ ထင်မှတ်လိုက်တာကြောင့် ခုလို တိုက်ခိုက်ခံရတာဖြစ်တယ်လို့သူက ပြောပါတယ်။
“ညဘက်ဆို မီးထိုးပြီးကြွက်ရှာတဲ့ ဒေသခံတွေရှိတယ်။ ဝမ်းစာရေးဆိုတော့လည်း သူတို့က မပြောသာဘူးပေါ့။ မနက်ပိုင်း ကားမီးက ကြွက်ထိုးမီးလိုလုပ်လာတော့ ပြည်သူတွေလို့ပဲ ထင်လိုက်တယ်နဲ့တူပါတယ်။ အိပ်နေတဲ့ ၈ ယောက်လုံးကို သတ်ပြီး တဲနဲ့အတူ မီးရှို့သွားတာ။ သေနတ်သံကြားမှပဲ ရွာထဲကလူတွေ သိကြတာ။ ကားက လူနာတင်ကားလား၊ ဘုန်းကြီးကားလားတော့ မသေချာဘူး။ အရပ်သားကားပဲ သိလိုက်တယ်။ ညကတည်းက အင်တာနက်ဖြတ်ထားတော့ သတင်းအချက်လက်တွေလည်း မသိလိုက်ကြဘူးလေ” လို့ ဒေသခံတစ်ယောက်က ဘီဘီစီကို ပြောပါတယ်။
အသတ်ခံရသူတွေဟာ အသက် ၁၈ နှစ်ကနေ ၃၀ ဝန်းကျင်ရှိတဲ့ လူငယ်တွေဖြစ်ပြီး ရွာအပြင်မှာ လုံခြုံရေးယူထားကြတာလို့သိရပါတယ်။ အဲဒီလူငယ်တွေ သတ်ဖြတ်ခံရပြီးနောက် ရွာထဲကိုလည်း လက်နက်ကြီးတွေနဲ့ ပစ်ခတ်ခဲ့ပြီး စိုင်ပြင်ရွာဘက်ကို ပြန်ထွက်သွားကြတယ်လို့ ပြောပါတယ်။ လူငယ်တွေရဲ့ ရုပ်အလောင်းတွေဟာ ဘယ်သူဘယ်ဝါ ခွဲခြားဖို့ ခက်ခဲသွားတာကြောင့် အားလုံးကို ကောင်းကောင်းမွန်မွန် မီးသင်္ဂြိုဟ်လိုက်တယ်လို့ ဒေသခံတွေက ပြောပါတယ်။
ဒေသကာကွယ်ရေးတပ်တွေက ညဘက် အပြင်မထွက်ဖို့ ပြည်သူတွေကို သတိပေးထားပေမယ့် တချို့ပြည်သူတွေက မလိုက်နာတာတွေရှိတဲ့အကြောင်း၊ မှားယွင်း ပစ်ခတ်မိရင် ပြည်သူအန္တရာယ်ဖြစ်မှာစိုးလို့ ရှောင်ရှားရင်း အခုလို အသက်ပေးလိုက်ရတာဖြစ်တဲ့အတွက် ပြည်သူတွေကလည်း ပူးပေါင်းပေးကြဖို့ ဒေသကာကွယ်ရေးအဖွဲ့တွေက ထုတ်ပြန်ထားပါတယ်။ အခုဖြစ်စဉ်နဲ့ပတ်သက်လို့တော့ စစ်ကောင်စီဘက်က ထုတ်ပြန်တာမရှိသေးပါဘူး။
ဓာတ်ပုံ ရင်းမြစ်, ဒီပဲယင်းမြို့နယ်တော်လှန်ရေးစစ်ကြောင်းဦးဆောင်ကော်မတီ
