၂ ခြောက်လုံးသပိတ်တွေလုပ်တဲ့နေ့မှာ စစ်ကောင်စီ လုံခြုံရေးတင်းကျပ်, သပိတ်စစ်ကြောင်းထွက်သူတွေနဲ့ပြည်သူတချို့ဖမ်းဆီးခံရတာတွေရှိနေ
နိုင်ငံတဝန်းမှာ ဒီကနေ့ဖေဖော်ဝါရီ ၂၂ ရက်နေ့ ၂ ခြောက်လုံးနေ့အဖြစ် စစ်အာဏာသိမ်းတာကိုဆန့်ကျင်တဲ့ လှုပ်ရှားမှုတွေလုပ်ဖို့တော်လှန်ရေးအင်အားစုတွေက နှိုးဆော်ထားချိန်မှာစစ်ကောင်စီဘက်က လုံခြုံရေးတင်းကျပ်စစ်ဆေးတာတွေလုပ်နေပြီး ဖမ်းဆီးခံရသူတွေလည်းရှိနေတယ်လို့ဒေသခံတွေကပြောပါတယ်။
ရန်ကုန်၊ မန္တလေးအပါအဝင်မြို့ကြီးတွေမှာလည်း စစ်ကောင်စီတပ်ကားတွေအရင်နေ့တွေထက် ပိုပြီး လှည့်လှည်နေသလို လမ်းသွားလမ်းလာတွေကိုစောင့်ကြည့်နေတဲ့အနေအထားရှိတယ်လို့ဒေသခံတွေကပြောပါတယ်။
ရန်ကုန်တိုင်းဒေသကြီးထဲက ခရမ်းမြို့နယ်က မြို့အဝင်အထွက် ဂိတ်တွေမှာ သနပ်ခါးလိမ်းလာတဲ့ပြည်သူတချို့ကို တားဆီးပြီးမျက်နှာသစ်ခိုင်းတာတွေလုပ်နေတယ်လို့ဒေသခံတွေကပြောပါတယ်။
အလားတူ စစ်ကိုင်းတိုင်း မုံရွာမြို့နယ်ထဲမှာလည်း ဒီကနေ့မနက်ပိုင်းမှာ သပိတ်စစ်ကြောင်းတစ်ခုကိုစစ်ကောင်စီက ပစ်ခတ်ဖမ်းဆီးတာတွေလုပ်ခဲ့ပြီးသပိတ်မှာပါဝင်သူတွေအပါအဝင် ဒေသခံ ၈ ဦးထက်မနည်းဖမ်းဆီးခံရတယ်လို့ဒေသခံတွေကပြောပါတယ်။
‘'မနက်ကသပိတ်ထွက်ကာနီးကားတိုက်ဖြိုတာ၊ ပြေးတဲ့လူတွေလည်းပြေးတယ်။ အိမ်ထဲဝင်ပုန်းဖို့လုပ်တဲ့လူတွေကိုလည်းအဝင်မခံခိုင်းကြဘူး။ ဆိုင်ကယ်တစ်စီးပေါ်တက်ပြေးတဲ့လူလည်း နှင်းဆီပန်းကိုင်ထားလို့မတက်ခိုင်းဘူး။ တွန်းချခံရတယ်။၈ယောက်လောက်အဖမ်းခံရတယ်။ တယောက်ကတော့ပေါင်ကိုကျည်ထိသွားတယ်"လို့ ဒေသခံတစ်ဦးက ဘီဘီစီကိုပြောပါတယ်။
ပြည်တွင်းမှာ စစ်အာဏာသိမ်းပြီးတဲ့နောက် စစ်အာဏာသိမ်းတာကိုဆန့်ကျင်တဲ့ သပိတ်စစ်ကြောင်းတွေ နေ့စဉ်မပျက်ရှိခဲ့ပြီး အွန်လိုင်းဒစ်ဂျစ်တယ်လှုပ်ရှားမှုတွေနဲ့ငြိမ်သက်ခြင်းနဲ့ဆန္ဒထုတ်ဖော်တဲ့လှုပ်ရှားမှုစတာတွေမှာပါဝင်ဖို့တော်လှန်ရေးအင်အားစုတွေက နှိုးဆော်တာတွေလုပ်ခဲ့ကြပါတယ်။
တဖက်မှာလည်း စစ်ကောင်စီဘက်က ဒီလှုပ်ရှားမှုမှာပါဝင်တဲ့ ဒေသခံပြည်သူတွေကို ပုံစံမျိုးစုံနဲ့ဖိအားပေးဖမ်းဆီးတာတွေဆက်ဖြစ်နေပါတယ်။