ပို့ကုန်သွင်းကုန်ဥပဒေနဲ့ဆက်သွယ်ရေးဥပဒေ အမှု ၂ ခုအတွက်ဒေါ်အောင်ဆန်းစုကြည် ကိုယ်တိုင်သက်သေထွက်ဆို, သဘာဝဘေးစီမံပုဒ်မ အတွက် လာမယ့် ဒီဇင်ဘာ ၆ ရက်မှာ အပြီးသတ်အမိန့်ချဖို့ရှိ
အာဏာသိမ်းမှုဖြစ်ပြီးကတည်းက ဖမ်းဆီးထိန်းသိမ်းခံထားရတဲ့နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ သူ့အပေါ် စွပ်စွဲထားတဲ့အမှုတွေထဲက ပို့ကုန်သွင်းကုန်ဥပဒေနဲ့ ဆက်သွယ်ရေးဥပဒေ အမှု ၂ ခုအတွက် စွပ်စွဲခံရသူဘက်ကသက်သေအဖြစ် သူကိုယ်တိုင်ထွက်ဆိုခဲ့တယ်လို့ တရားရုံးနဲ့နီးစပ်တဲ့အသိုင်းအဝိုင်းကပြောပါတယ်။ ဒီကနေ့ နိုဝင်ဘာ ၂၂ရက် မှာ အပတ်စဉ်တနင်္လာနေ့တိုင်း နေပြည်တော်အထူးတရားရုံး မှာ စစ်ဆေးနေကျဖြစ်တဲ့ ပို့ကုန်သွင်းကုန်ဥပဒေနဲ့ ဆက်သွယ်ရေးဥပဒေပုဒ်မတွေ ၊နောက် သဘာဝဘေးအန္တရာယ်ဆိုင်ရာစီမံခန့်ခွဲမှုဥပဒေပုဒ်မတွေကိုစစ်ဆေးခဲ့တာဖြစ်ပါတယ်။ ပို့ကုန်သွင်းကုန်ဥပဒေနဲ့ ဆက်သွယ်ရေးဥပဒေ အမှု ၂ ခုအတွက် သူကိုယ်တိုင် ခံပြသက်သေအဖြစ်ထွက်ဆိုရာမှာ ဖေဖော်ဝါရီ ၁ရက် အာဏာသိမ်းတဲ့နေ့က သူ့ရဲ့အိမ်ကို လာရောက်တဲ့လုံခြုံရေးတပ်ဖွဲ့ဝင်တွေရဲ့ အခြေအနေနဲ့ အဲဒီနေ့က သူတွေ့ကြုံရတာတွေကို တရားသူကြီးရှေ့မှာ ထွက်ဆိုခဲ့တယ်လို့ဆိုပါတယ်။
အာဏာသိမ်းတဲ့ ဖေဖော်ဝါရီ ၁ ရက်က ဒေါ်အောင်ဆန်းစုကြည်နေထိုင်တဲ့ မြနန်းဘုံသာလမ်းနေအိမ်ကိုဝင်ရောက်ရှာဖွေရာမှာ တရားမဝင်စကားပြောစက် (၁၀)လုံး နဲ့ Jammer တစ်စုံ တွေ့လို့ ဆိုပြီး စွဲဆိုထားတဲ့အမှုနှစ်ခုဖြစ်ပါတယ်။ ဒီကနေ့ ထွက်ဆိုမှုမှာတော့ ဒေါ်အောင်ဆန်းစုကြည်က အဲဒီပစ္စည်းတွေကို သူမသုံးကြောင်းနဲ့ အဲဒီပစ္စည်းတွေအိမ်မှာတွေ့တယ်လို့သာပြောပေမယ့် သူမမြင်တွေ့ရကြောင်း ထွက်ဆိုတဲ့အထဲ ထည့်သွင်းပြောခဲ့တယ်လို့ အထူးတရားရုံးနဲ့ နီးစပ်တဲ့အသိုင်းအဝိုင်းက ပြောပါတယ်။
တရားလိုရှေ့နေဘက်က အပြန်အလှန်စစ်မေးတာတွေကိုလည်း ဒေါ်အောင်ဆန်းစုကြည်ကပြန်လည်ဖြေကြား ခဲ့တယ်လို့လည်းသိရပါတယ်။ လာမယ့် ဒီဇင်ဘာ ၆ရက်မှာ တော့ ပို့ကုန်သွင်းကုန်ဥပဒေနဲ့ ဆက်သွယ်ရေးဥပဒေ အမှု ၂ ခုအတွက် အပြီးသတ်လျှောက်လဲချက်ကြားနာဖို့ပြန်လည်ချိန်းဆိုထားတယ်လို့ဆိုပါတယ်။
တခါ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် နဲ့ သမ္မတဦးဝင်းမြင့်တို့ကို အပတ်စဉ်တနင်္လာနေ့တိုင်း စစ်ဆေးနေကျဖြစ်တဲ့ သဘာဝဘေးအန္တရာယ်ဆိုင်ရာစီမံခန့်ခွဲမှုဥပဒေပုဒ်မကိုလည်း စစ်ဆေးခဲ့ပါတယ်။ လာမယ့် ဒီဇင်ဘာ ၆ရက်မှာ အပြီးသတ်အမိန့်ချမှတ်ဖို့ရှိနေတဲ့ အဲဒီအမှုနဲ့ပတ်သက်ပြီး ဒေါ်အောင်ဆန်းစုကြည် နဲ့ ဦးဝင်းမြင့်တို့ နှစ်ဦးလုံးက သူတို့ရဲ့ အပြီးသတ်လျှောက်လဲချက်ကို ဒီကနေ့မှာ စာနဲ့ရေးသားပြီး တရားသူကြီးထံတင်ပြခဲ့ပါတယ်။ ဒီကနေ့မြင်တွေ့ရတဲ့ အခြေအနေအရ ဒေါ်အောင်ဆန်းစုကြည်နဲ့ဦးဝင်းမြင့် တို့ရဲ့ကျန်းမာရေးကောင်းမွန်တယ်လို့ လည်းတရားရုံးနဲ့နီးစပ်သူတွေကပြောပါတယ်။
ဓာတ်ပုံ ရင်းမြစ်, Getty Images
