ဒေါ်အောင်ဆန်းစုကြည် တရားခွင်မှာ ကိုယ်တိုင်သက်သေထွက်

တိုက်ရိုက် ထုတ်လွှင့်ချက်

1. ၂၁ အောက်တိုဘာ ၂၀၂၁စစ်ကိုင်း၊ ရွာသစ်ကြီးတိုက်နယ်မှာ လပြည့်ညအသံဗုံးဖောက်တယ်လို့ စွပ်စွဲခံရပြီး လူငယ်တွေဖမ်းဆီးခံရ

   စစ်ကိုင်းတိုင်းဒေသကြီး၊ စစ်ကိုင်းမြို့နယ်၊ ရွာသစ်ကြီးတိုက်နယ်မှာ မနေ့ အောက်တိုဘာလ ၂၀ ရက် သီတင်းကျွတ်လပြည့်ညက အသံဗုံးဖောက်တယ်လို့ စွပ်စွဲခံရပြီး လူငယ် ၆ဦး ဖမ်းဆီးခံထားရတယ်လို့ ကျေးရွာဒေသခံတွေကပြောပါတယ်။

   "ရဲစခန်းကို တိုင်လို့ လာဖမ်းသွားတာ။ အဖမ်းခံရတဲ့လူငယ်တွေက အနောက်ဘုရားဝင်းအတွင်းက စကားဝိုင်းဖွဲ့နေတဲ့ ညငှက်ထိုးသမားတွေ။ အဲဒီထဲက ၂ ယောက်က ညအပြင်ထွက်တဲ့ ကလေးတွေ"လို့ ပြည်တော်သာရွာဒေသခံကျေးရွာသားတယောက်က ပြောပါတယ်။

   အောက်တိုဘာ ၂၀ရက်နေ့ဟာ သီတင်းကျွတ်လပြည့်နေ့ဖြစ်လို့ ဗျောက်ဖောက်တာ၊ မီးပန်းလွှတ်တင်တာတွေလည်း ရှိခဲ့ပါတယ်။ လပြည့်ညမှာပဲ အသံဗုံးပေါက်ကွဲမှုဖြစ်ခဲ့ပြီး ကျေးရွာဒေသခံတချို့ အဖမ်းခံရတာဖြစ်ပါတယ်။

   ဖမ်းဆီးခံရတဲ့တဲ့လူငယ်တွေဟာ စစ်ကိုင်းမြို့နယ်အတွင်း ငါ့တရော်ရွာက ၂ဦး၊ ပြည်တော်သာရွာက ၂ဦးဖြစ်ပြီး ညမထွက်ရအမိန့်ပုဒ်မ ၁၄၄ နဲ့အမှုဖွင့်ခံထားရပါတယ်။

   ကျန်၂ဦးကတော့ ဒေသကာကွယ်ရေးတပ်(PDF)က လို့စွပ်စွဲခံရပြီး အကြမ်းဖက်ပုဒ်မနဲ့ ပုဒ်မတပ်ထားခံထားရတယ်လို့ ဒေသခံတွေက ဆိုပါတယ်။

   ပြည်သာယာရွာအုပ်ချုပ်ရေးမှူးရဲ့ဇနီးက တိုင်တန်းခဲ့တာကြောင့် ဒီလူငယ်တွေ အဖမ်းခံခဲ့ရတယ်လို့ ရွာခံတွေက စွပ်စွဲပြောပေမဲ့ ဒီပြောဆိုချက်နဲ့ပတ်သက်လို့ ဘီဘီစီအနေနဲ့ သီးခြားအတည်မပြုနိုင်ပါဘူး။

   စစ်ကိုင်းမြို့မှာတော့ အောက်တိုဘာလဆန်းကစပြီး နေ့ခင်းပိုင်းရော ညအခါတွေမှာပါ ပေါက်ကွဲမှုတွေ ဆက်တိုက်ဖြစ်ပေါ်နေပါတယ်။

   

   ဓာတ်ပုံ ရင်းမြစ်, CJ

2. ၂၁ အောက်တိုဘာ ၂၀၂၁စစ်ကောင်စီလက်ထက် အကျဉ်းထောင်ကနေ ပြန်လည်လွတ်မြောက်လာတဲ့ လူငယ်အမျိုးသမီးတစ်ဦးရဲ့ပြောပြချက်

   မရွှေရူပါလင်းဟာ ရန်ကုန်မြို့၊ အလုံမြို့နယ်ထဲက ကွင်းကျောင်းလမ်းမှာ ဧပြီလ ၁၇ ရက်တုန်းက ဖမ်းဆီးခံရတဲ့ တက္ကသိုလ်ကျောင်းသားဟောင်းများ အင်အားစုက လူငယ် ၄ ဦးထဲက တစ်ဦးအပါအဝင်ဖြစ်ပါတယ်။

   အခုတော့ စစ်ကောင်စီရဲ့လွတ်ငြိမ်းခွင့်နဲ့ပြန်လွတ်လာပြီးတဲ့နောက် စစ်ကြောရေးနဲ့ထောင်တွင်းအတွေ့အကြုံတွေကို ပြန်လည်ပြောပြထားပါတယ်။ ရုပ်သံမှာ ရှုစားနိုင်ပါပြီ။

3. ၂၁ အောက်တိုဘာ ၂၀၂၁ပြည်ပဘဏ္ဍာရေးပိုင်ဆိုင်မှုတွေကို စစ်ကောင်စီဘက်က မသုံးနိုင်အောင် ကန့်သတ်ဖို့ ကန်နိုင်ငံခြားရေးအကြံပေးဆွေးနွေး

   

   ဓာတ်ပုံ ရင်းမြစ်, Getty Images

   မြန်မာစစ်ကောင်စီအနေနဲ့ ပြည်ပမှာရှိတဲ့ဘဏ္ဍာရေးပိုင်ဆိုင်မှုတွေကို ရယူသုံးစွဲနိုင်တဲ့အခြေအနေ အကန့်အသတ်ဖြစ်လာအောင်လုပ်မယ့် နည်းလမ်းတွေကို စင်ကာပူနိုင်ငံနဲ့ဆွေးနွေးထားတယ်ဆိုပြီး အမေရိကန် နိုင်ငံခြားရေးဝန်ကြီးဌာန မူဝါဒဆိုင်ရာ အကြံပေးဖြစ်သူ ဒဲရက်ရှလေးက ပြောလာပါတယ်။

   သူ့ရဲ့စင်ကာပူနိုင်ငံခရီးစဉ်မှာ စင်ကာပူငွေကြေးအာဏာပိုင်အဖွဲ့ဒုတိယစီမံညွှန်ကြားရေးမှူးနဲ့ အောက်တိုဘာလ ၂၀ ရက်မှာတွေ့ဆုံချိန် အခုလိုဆွေးနွေးတာလို့ဆိုပါတယ်။

   ဒီ့မတိုင်ခင်တုန်းကလည်း သူဟာ စင်ကာပူနိုင်ငံခြားရေးဝန်ကြီးနဲ့တွေ့ဆုံခဲ့ပြီး မြန်မာ့အရေးလို ဒေသတွင်း ကိစ္စတွေကို ဆွေးနွေးခဲ့တယ်လို့ ဆိုပါတယ်။

   အဲဒီလိုဆွေးနွေးချိန် အကြံပေးက လာမယ့်အာဆီယံထိပ်သီးဆွေးနွေးပွဲတွေနဲ့ ဆက်စပ်ဆွေးနွေးပွဲတွေအတွက် စစ်ခေါင်းဆောင်အစား နိုင်ငံရေးနဲ့မပတ်သက်သူ ကိုယ်စားလှယ်တစ်ဦးကို ဖိတ်ဖို့ အာဆီယံက ခက်ခက်ခဲခဲဆုံးဖြတ်ချက်ချခဲ့တာကို အမေရိကန်က ထောက်ခံတဲ့အကြောင်းလည်း ပြောထားပါတယ်။

   ကောင်ဆယ်လာရှလေးဟာ CRPH/NUG အဖွဲ့က တာဝန်ရှိသူတွေနဲ့ ထိတွေ့ဆက်ဆံဆွေးနွေးနေတဲ့ အမေရိကန် ထိပ်တန်းအရာရှိတစ်ယောက်ဖြစ်ပြီး သူ့ရာထူးဟာ ဒုဝန်ကြီးအဆင့်နဲ့ညီမျှတဲ့ထိပ်တန်းရာထူးတာဝန်ဖြစ်ပါတယ်။

4. ၂၁ အောက်တိုဘာ ၂၀၂၁မုံရွာက လပြည့်ညဖောက်ခွဲမှုတွေမှာ စစ်ကောင်စီတပ်ဖွဲ့ဝင် ၂ ဦးသေဆုံးတယ်လို့ ဒေသကာကွယ်ရေးတပ်ပြော

   စစ်ကိုင်းတိုင်းဒေသကြီး၊ မုံရွာမြို့မှာ မနေ့ အောက်တိုဘာလ ၂၀ရက်၊ သီတင်းကျွတ်လပြည့်ညပိုင်းတုန်းက မြို့အတွင်းဖောက်ခွဲမှု ၆ကြိမ်လုပ်ခဲ့ပြီး စစ်ကောင်စီတပ်သား ၂ ဦးသေဆုံးခဲ့တယ်လို့ ဒေသကာကွယ်ရေးတပ်တွေကသတင်းထုတ်ပြန်လာပါတယ်။

   မနေ့ညပိုင်းက မုံရွာအမှတ် ၁ ရဲစခန်းနဲ့ အမှတ် ၂ ရဲစခန်းကို ညပိုင်း ၁၂ နာရီဝန်းကျင်မှာ ဖောက်ခွဲမှုလုပ်ခဲ့ရာမှာ ရဲစခန်းရှေ့ကင်းစောင့်နေတဲ စစ်ကောင်စီတပ်သား ၂ဦး သေဆုံးခဲ့တယ်လို့ဒေသကာကွယ်ရေးတပ်တွေဘက်ကပြောပါတယ်။

   “ဖောက်ခွဲမှုက ၆ ကြိမ်လုပ်ခဲ့တာပါ။ ၃ခုကတော့ သူတို့ဘက်က အင်အားများတော့ မအောင်မြင်ခဲ့ဘူး။ အမှတ် ၁ ရဲစခန်းနဲ့ အမှတ် ၂ ရဲစခန်းမှာတော့ စစ်ကောင်စီတပ်သား၂ ဦးသေဆုံးတာကို မြင်ခဲ့ရတယ်။ နောက်ထပ်ဖောက်ခွဲမှု ၁ ခုအနေနဲ့ သတိပေးပြီးသား မုံရွာအကောက်ခွန်ရုံးကိုဖောက်ခွဲတာပါ။ ရုံးနံရံတချို့ပျက်စီးခဲ့တယ်'' လို့မုံရွာဒေသကာကွယ်ရေးဘက်က ပြောပါတယ်။

   ဒီဖောက်ခွဲမှုတွေကို PDF-South Monywa နဲ့ Monywa Heroes Gdoup(MHG) တို့က ပူးပေါင်းပြုလုပ်တာဖြစ်ပြီး ဒေသကာကွယ်ရေးတပ်တွေဘက်က ထိခိုက်မှုမရှိဘူးလို့လည်း သတင်းထုတ်ပြန်ပါတယ်။

   မုံရွာမြို့အတွင်းက ရဲစခန်းတွေကို ဒေသကာကွယ်ရေးဘက်တွေက တိုက်ခိုက်တဲ့ဖြစ်စဉ်နဲ့ပတ်သက်ပြီး မုံရွာမြို့နယ်ရဲစခန်းတွေကို ဘီဘီစီကဆက်သွယ်မေးမြန်းဖို့ကြိုးစားပေမဲ့ ဆက်သွယ်လို့မရခဲ့ပါဘူး။

   စစ်ကောင်စီဘက်ကလည်း ဒီဖြစ်စဉ်တွေနဲ့ပတ်သက်ပြီး သတင်းထုတ်ပြန်ခြင်းမရှိသေးပါဘူး။

   

   ဓာတ်ပုံ ရင်းမြစ်, CJ

5. ၂၁ အောက်တိုဘာ ၂၀၂၁ထားဝယ်က NLD ပါတီရုံးမှာ အဆောက်အအုံတစ်ခုလုံးပြိုကျတဲ့အထိ ပေါက်ကွဲမှုဖြစ်

   တနင်္သာရီတိုင်း၊ ထားဝယ်မြို့မှာရှိတဲ့ အမျိုးသားဒီမိုကရေစီအဖွဲ့ချုပ်ပါတီ(NLD)ရုံးမှာ ဒီနေ့ အောက်တိုဘာလ ၂၁ ရက်မနက်အစောပိုင်းမှာ ပေါက်ကွဲမှုဖြစ်ခဲ့လို့ အဆာက်အအုံတစ်ခုလုံးပြိုကျ ပျက်စီးသွားတယ်လို့ ဒေသခံတွေက ပြောပါတယ်။

   ပေါက်ကွဲမှုဖြစ်ခဲ့တဲ့ရုံးဟာ ထားဝယ်မြို့၊ ကရပ်ပြင်ရပ်မှာရှိတဲ့ NLD ပါတီရဲ့ တနင်္သာရီတိုင်းရုံးဖြစ်တယ်လို့ သိရပါတယ်။

   ဒီနေ့မနက် ၂ နာရီဝန်းကျင်မှာဖြစ်တဲ့အဲဒီပေါက်ကွဲမှုဟာ မြေကြီးတုန်ခါတဲ့အထိ အားပြင်းခဲ့တယ်ဆိုပြီး ဒေသခံတွေကို ကိုးကားကာ ထားဝယ်အခြေစိုက်သတင်းဌာန Dawei Watch က ရေးပါတယ်။

   အခုဖြစ်ရပ်ဟာ တနင်္သာရီတိုင်းထဲက NLD ပါတီရုံးတွေမှာ ၂ ရက်ဆက်တိုက် ပေါက်ကွဲမှုဖြစ်ဖြစ်ပြီး မနေ့ အောက်တိုဘာလ ၂၀ ရက်တုန်းကလည်း မြိတ်မြို့က NLD ပါတီရုံးမှာ ပေါက်ကွဲမှုဖြစ်ခဲ့လို့ ရုံးအပြင်ပိုင်း ပျက်စီးခဲ့ပါတယ်။

   

   ဓာတ်ပုံ ရင်းမြစ်, CJ

6. ၂၁ အောက်တိုဘာ ၂၀၂၁ချင်းမြောက်တိုက်ပွဲကြောင့် ထွက်ပြေးနေရတဲ့ဒေသခံထောင်ချီအတွက် စစ်ရှောင်စခန်းဖွင့်ဖို့ ပြင်နေ

   ချင်းပြည်နယ်မြောက်ပိုင်း ဖလမ်း-ဟားခါးလမ်းပေါ်မှာ စစ်ကောင်စီတပ်တွေနဲ့ဒေသခံပူးပေါင်းကာကွယ်ရေးတပ်တွေ တိုက်ပွဲဖြစ်ခဲ့ပြီးတဲ့နောက် ထွက်ပြေးတိမ်းရှောင်နေရတဲ့ဒေသခံ ထောင်ချီအတွက် စစ်ရှောင်စခန်း(IDP)ဖွင့်ဖို့ ပြင်နေတယ်လို့ သိရပါတယ်။

   ကလေးမြို့ကနေ အောက်တိုဘာလ ၁၁ ရက်ကတည်းက ချင်းပြည်နယ်ဘက်ကို တက်လာတဲ့ စစ်ကောင်စီတပ်တွေနဲ့ ချင်းကာကွယ်ရေးတပ်တွေဟာ ဖလမ်း-ဟားခါးလမ်းပိုင်းမှာ တိုက်ပွဲဖြစ်ခဲ့ပါတယ်။

   အောက်တိုဘာလ ၁၉ ရက်နေ့တုန်းကဖြစ်တဲ့တိုက်ပွဲအပြီး စစ်ကောင်စီဘက်က လက်နက်ကြီးတွေနဲ့ ပစ်ခတ်တာတွေကြောင့် တိုက်ပွဲအနီးနားက တားရ်၊ တလန်ဇာရ်နဲ့ ရမ်ထလို ရွာတွေအပါအဝင် ရိဒ်ရေကန်ကိုသွားတဲ့ဘက်က ရွာတွေပါ ရွာလုံးကျွတ်ထွက်ပြေးတိမ်းရှောင်နေရတယ်လို့ ဖလမ်းမြို့က စစ်ရှောင်တွေကို ကူညီပေးနေတဲ့ ဒေသခံတဦးက ပြောပါတယ်။

   ''လမ်းမကြီးပေါ်က လေးရွာက ခံရတယ်။ လေးရွာစလုံးထွက်ပြေးကြရတယ်။ တောထဲမှာ ကစဉ့်ကလျဲတွေဖြစ်လို့။ တောထဲမှာ မိုးကာလေးတွေနဲ့နေနေရတယ်။ ဒီလိုနေနေတာကို PDF တွေရဲ့စခန်းဆိုပြီး ယူဆခံရရင် တစ်ခုခုဖြစ်သွားမလားဆိုပြီး ကျွန်တော်တို့ စဉ်းစားတယ်။ လူဦးရေက ၃,၅၀၀ ဝန်းကျင်ရှိတယ်''လို့ဆိုပြီး စစ်ဘေးရှောင်စခန်းဖွင့်မယ့်အကြောင်းရင်းကို ပြောပြပါတယ်။

   စစ်ကောင်စီတပ်တွေဟာ လက်ရှိမှာ ဖလမ်းကနေ တဆင့် ပြည်နယ်မြို့တော် ဟားခါးကို မနေ့ အောက်တိုဘာလ ၂၀ ရက်ညနေပိုင်းကတည်းကရောက်နေပြီး ဖလမ်းနဲ့ဟားခါးလမ်းကြားက ကျေးရွာတချို့ကနေအိမ်တွေကို ဖျက်ဆီးတာတွေလုပ်ခဲ့တယ်လို့ ဒေသခံတွေက ပြောပါတယ်။

   

   ဓာတ်ပုံ ရင်းမြစ်, Zalen

7. ၂၀ အောက်တိုဘာ ၂၀၂၁တော်လှန်သီတင်းကျွတ် စစ်အာဏာရှင်စနစ် ဆန့်ကျင်လှုပ်ရှားမှုများ

8. ၂၀ အောက်တိုဘာ ၂၀၂၁သတင်းမီဒီယာသမား ၁၆ ဦး လွတ်မြောက်ခဲ့ပြီး ၃၅ ဦး ဖမ်းဆီးခံ ထားရဆဲ

   အောက်တိုဘာလ ၁၉ ရက်နေ့နဲ့ အောက်တိုဘာလ ၂၀ ရက်နေ့က စစ်ကောင်စီ ပြန်လွှတ်ပေးခဲ့သူတွေထဲမှာ မြန်မာနိုင်ငံတစ်ဝန်း သတင်းသမား စုစုပေါင်း ၁၆ ဦးလွတ်မြောက်လာခဲ့ပြီး ၃၅ ဦး ဆက် လက် ဖမ်းဆီးခံထားရဆဲဖြစ်ကြောင်း MPFI-D လို့ခေါ်တဲ့ Myanmar Press Freedom In-depth အဖွဲ့ကထုတ်ပြန်ပါတယ်။

   လွတ်မြောက်လာသူတွေထဲမှာ DVB ,Mizzima , Kachin Wave , 74 media စတဲ့ သတင်းဌာနတွေနဲ့ ဒေသအခြေစိုက်သတင်းထောက်တွေပါဝင်တယ်လို့ ထုတ်ပြန်ချက်အရသိရပါတယ်။

   MPFI-D က ပြုစုထားတဲ့ စာရင်းတွေအရ စစ်ကောင်စီက ဖမ်းဆီးထားတဲ့ သတင်းသမား ၅၁ ဦးရှိပြီး ၁၆ ဦးလွတ်မြောက်လာရာမှာ သတင်းသမား စုစုပေါင်း ၃၅ ဦး ဆက်လက် ဖမ်းဆီးခံနေရဆဲဖြစ်တယ်လို့ဆိုပါတယ်။

   စစ်ကောင်စီဘက်က သတင်းမီဒီယာတွေကို စတုတ္တမဏ္ဍိုင်အဖြစ် အသိအမှတ်ပြုပြီး သတင်းလွတ်လပ်ခွင့်နဲ့ ပတ်သက်လို့ ဥပဒေနဲ့ အညီ လုပ်မယ်လို့ ပြောထားခဲ့ပါသေးတယ်။

   သတင်းသမား တွေကို အဲဒီလိုဖမ်းဆီးပြီးတဲ့နောက် နိုင်ငံတော် အကြည်ညိုပျက်စေမှု ပုဒ်မ ၅၀၅ - ကအပြင် ပိုမိုကြီးလေးတဲ့ပုဒ်မတွေနဲ့ပါ တရားစွဲဆိုလာခဲ့ပါတယ်။

   အထူးသဖြင့် မတရားအသင်းဥပဒေ ပုဒ်မ၁၇(၁) အပါအဝင် နိုင်ငံတော် အကြည်အညိုပျက်စေမှု ၁၂၄ (က) နဲ့ပါ အချို့ကို တရားစွဲဆိုလာခဲ့တာတွေကို တွေ့ရပါတယ်။

   

   ဓာတ်ပုံ ရင်းမြစ်, Getty Images

9. ၂၀ အောက်တိုဘာ ၂၀၂၁ရွေးကောက်ပွဲ ပီအာစနစ် အပေါ် ရခိုင့်ဦးဆောင်ပါတီ သဘောထား

   အာဏာသိမ်း စစ်ကောင်စီက ရွေးကောက်ပွဲတစ်ရပ်ကျင်းပပေးမှာဖြစ်သလို အချိုးကျကိုယ်စားပြုစနစ် (PR) ကို ကျင့်သုံးသွားဖို့ရှိနေတယ်လို့ ပြည်ထောင်စုရွေးကောက်ပွဲကော်မရှင်ကနေ အောက်တိုဘာ ၁၄ ရက်နေ့က ထုတ်ပြန်ခဲ့ပါတယ်။

   ရွေးကောက်ပွဲစနစ်နဲ့ပတ်သက်လို့ ရွေးကောက်ပွဲကော်မရှင်ကနေဆုံးဖြတ်ရမှဖြစ်ပေမယ့် လက်ရှိတည်ဆဲဥပဒေတွေနဲ့ သင့်တင့်လျောက်ပတ်မှု ရှိမရှိဆိုတာကို ကြည့်ဖို့လိုအပ်တယ်လို့ ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာအေးမောင်က ပြောပါတယ်။

   AFP ပါတီအနေနဲ့ စစ်ကောင်စီဘက်က ကျင်းပပေးမယ့်ရွေးကောက်ပွဲကို ရိုးရှင်းပြီးတော့ အားလုံးသဘောပေါက်လွယ်တဲ့ စနစ်တစ်ခုဖြစ်စေချင်တယ်လို့ ပြောပါတယ်။

   စစ်ကောင်စီက ကျင်းပမဲ့ ရွေးကောက်ပွဲနဲ့ပတ်သက်လို့ AFP ပါတီရဲ့သဘောထားက ဘယ်စနစ်နဲ့ ပဲဖြစ်ဖြစ် ဝင်ရောက်ယှာဥ်ပြိုင်မှာဖြစ်တယ်လို့ပြောပါတယ်။

   အချိုးကျကိုယ်စားပြုစနစ် (PR) ကို ကျင့်သုံးဖို့ ပြီးခဲ့တဲ့ ဒုတိယအကြိမ် ပြည်သူ့လွှတ်တော်မှာ တင်သွင်းခဲ့တုန်းက တိုင်းရင်းသားပါတီတွေအပါအဝင် ပါတီတော်တော်များများက ဆန့်ကျင်ဆွေးနွေးခဲ့ကြပါတယ်။

   အဲ့ဒီ အချိန်တုံး လက်ရှိကော်မရှင်ဥက္ကဋ္ဌ ဦးသိန်းစိုးဦးဆောင်တဲ့ ပြည်သူ့လွှတ်တော်ခုံရုံးအထိပို့ဆောင်ခဲ့ရပြီး အဲ့ဒီကနေ PR စနစ်ကိုကျင့်သုံးဖို့ မသင့်လျော်ဘူးဆိုးပြီး ပယ်ချခဲ့တာဖြစ်တယ်လို့ လွှတ်တော်ကိုယ်စားလှယ် ဟောင်းတွေက ပြောဆိုကြပါတယ်။

   အခုလို အချိုးကျကိုယ်စားပြုစနစ် (PR)ကို ပြန်ပြီးအသက်သွင်းဖို့ပြင်ဆင်တာဟာ ညွန့်ပေါင်းအစိုးရတစ်ရပ်ကိုဖန်တီးလိုက်တာဖြစ်ပြီး တပ်မတော်နဲ့မဟာမိတ်ဖြစ်တဲ့ ပါတီတွေအစိုးရဖွဲ့နိုင်ဖို့အတွက် ပြင်ဆင်တာဖြစ်တယ်လို့ လွှတ်တော်ကိုယ်စားလှယ်ဟောင်း ဦးဖေသန်းက ပြောပါတယ်။

   

10. ၂၀ အောက်တိုဘာ ၂၀၂၁လွတ်ငြိမ်းနဲ့ ပြန်လွတ်လာတဲ့ အဆိုတော်အီတိုး ပြန်ဖမ်းခံရ

    အဆိုတော် အီတိုးဟာ စစ်ကောင်စီရဲ့ လွတ်ငြိမ်းချမ်းသာခွင့်နဲ့မနေ့အောက်တိုဘာ ၁၉ရက်နေ့မှ ပြန်လွတ်လာခဲ့ပေမယ့် ဒီကနေ့အောက်တိုဘာ ၂၀ရက်နေ့မှာတော့ နေအိမ်မှာထပ်မံလာရောက်ဖမ်းဆီးသွားတယ်လို့မိသားစုနဲ့နီးစပ်သူတွေကအတည်ပြုပြောဆိုပါတယ်။

    “ မနေ့ညကနေပြန်လွတ်လာတယ်။ ဒီနေ့နေ့လယ်မှာပဲ အထက်ကမလွှတ်ခိုင်းသေးလို့ဆိုပြီးအင်းစိန်အကျဉ်းထောင်ကိုပြန်ခေါ်သွားတယ်။ အဖမ်းခံရတုန်းကတော့ ပုဒ်မ ၅၀၅-ကနဲ့ဆွဲထားတာပါ”လို့နီးစပ်သူတစ်ဦးကဘီဘီစီကိုပြောပါတယ်။အဆိုတော်အီတိုးပြန်လည်ဖမ်းဆီးခံရတာနဲ့ပတ်သက်လို့သက်ဆိုင်ရာမိသားစုဝင်တွေကလည်းလူမှုကွန်ယက်စာမျက်နှာတွေမှာ ရေးသားထားတာကိုတွေ့ရပါတယ်။

    ပြီးခဲ့တဲ့ စက်တင်ဘာ ၅ရက်နေ့ကရန်ကုန်တိုင်း၊ တောင်ဥက္ကလာပမြို့နယ်၊ (၅)ရပ်ကွက်မှာ လက်လုပ်မိုင်းပြုလုပ်တဲ့သူတွေကိုဖမ်းဆီးမိခဲ့ပြီး နောက်ဆက်တွဲဖမ်းဆီးရာကနေ မရမ်းကုန်းမြို့နယ်မှာ အဆိုတော်အီတိုးကို ထပ်မံ ဖမ်းဆီးခဲ့တာဖြစ်တယ်လို့ စစ်ကောင်စီဘက်ကသတင်းထုတ်ပြန်ထားခဲ့ပါတယ်။ပြန်လည်လွတ်မြောက်လာပြီးနောက်ပိုင်း ထပ်မံဖမ်းဆီးမှုအခြေအနေနဲ့ပတ်သက်ပြီးတော့စစ်ကောင်စီဘက်က ဒီကနေ့အောက်တိုဘာ ၂၀ရက်နေ့ညနေပိုင်းအထိသတင်းထုတ်ပြန်လာတာမရှိသေးပါဘူး။

    

    ဓာတ်ပုံ ရင်းမြစ်, Social Media

11. ၂၀ အောက်တိုဘာ ၂၀၂၁ဟားခါးမြို့ထဲကို စစ်ကောင်စီစစ်ကြောင်း ဝင်လာ

    ချင်းပြည်နယ်ရဲ့ မြို့တော် ဟားခါးကို ဖလမ်းဘက်ကနေ ချီတက်လာတဲ့ စစ်ကောင်စီတပ်နဲ့ သံချပ်ကာကားတွေဟာ ဒီကနေ့ ညနေ ၃ နာရီခွဲလောက်က ဝင်လာကြတယ်လို့ ဒေသခံတွေက တစ်ဆင့် သိရပါတယ်။

    ချင်းပြည်နယ် ဟားခါးကို ဒီညနေ အောက်တိုဘာ ၂၀ မှာ ရောက်ရှိလာတဲ့ စစ်ကောင်စီတပ်တွေဟာ ကလေးမြို့ကနေ အောက်တိုဘာ ၁၁ ရက်နေ့မှာ စထွက်လာပြီး ဖလမ်းနဲ့ ဟားခါး လမ်းပိုင်းမှာတော့ ချင်းကာကွယ်ရေးတပ်တွေနဲ့ တိုက်ပွဲတွေ ဖြစ်ခဲ့ပါတယ်။

    အဲ့ဒီစစ်ကြောင်းဟာ မနေ့ည အောက်တိုဘာလ ၁၉ ရက်က ဖလမ်းမြို့နယ် ရမ်ထလိုကျေးရွာမှာ ညအိပ်ပြီး ဒီမနက်ပိုင်း ဟားခါးဘက်ကို ထွက်လာခဲ့တဲ့ စစ်ကြောင်းဖြစ်ပြီး ရမ်ထလိုကျေးရွာအကျော် ဒေါက်ထဲ့ရွာနဲ့ ချွန်ကျူံးရွာကြားမှာ ပစ်ခတ်မှု ဖြစ်ပွားခဲ့တယ်လို့သိရပါတယ်။

    ပြီးခဲ့တဲ့ရက်က ချင်းပြည်နယ်၊ ဖလမ်းမြို့နယ် ဖလမ်း-ဟားခါးလမ်းပေါ်ရှိ အိမ်ခြေ ၄၀ ရှိတဲ့ တားလ်ကျေးရွာ စစ်ကောင်စီတပ်က လူနေအိမ် ၄ လုံးမီးရှို့ကာ အိမ် ၃ လုံးလက်နက်ကြီးထိမှန်လို့ ပျက်စီးသွားတယ်လို့ ရွာသားတွေကပြောပါတယ်။

    စစ်ကောင်စီတပ်ဟာ တားလ်ကျေးရွာမှာ အောက်တိုဘာ ၁၇ ရက်ကနေ ၁၉ ရက်အထိ စခန်းချတပ်စွဲထားခဲ့ကြတာဖြစ်ပါတယ်။

    တိုက်ပွဲဖြစ်ခဲ့တဲ့ လမ်းကြောင်းတစ်လျှောက် ဖလမ်းမြို့နယ်ထဲက ရွာတွေက စစ်ဘေးရှောင် သုံးထောင်ကျော်ဟာ တောထဲကို ထွက်ပြေးပုန်းရှောင် နေရပြီး လတ်တလောမှာ အကူအညီတွေ လိုအပ်နေတယ်လို့ ဖလမ်းမြို့ ခံတစ်ဦးကပြောပါတယ်။

    ဒီသတင်းနဲ့ပတ်သက်လို့ စစ်ကောင်စီဘက်ကို ဆက်သွယ်အတည်ပြုနိုင်ခြင်းမရှိသေးပါဘူး။

    

    ဓာတ်ပုံ ရင်းမြစ်, CJ

12. ၂၀ အောက်တိုဘာ ၂၀၂၁ကလေးမြို့အနီးကျေးရွာတွေမှာ ရေကြီးနေ

    စစ်ကိုင်းတိုင်း ကလေးမြို့အနီးက ကျေးရွာတွေမှာ မြစ်ရေကြီးမှုဖြစ်နေပြီး ကျေးရွာအချို့ ရေဝင်နေကြောင်း ကလေးမြို့ခံတွေက ပြောပါတယ်။

    ရေဝင်နေတဲ့ ကျေးရွာအချို့ကတော့ ကလေးမြို့ အရှေ့ဘက်က အင်းယားကုန်း ကျေးရွာ နဲ့ ကလေးမြို့ မြောက်ဘက်က ဖောင်ကူးကျေးရွာတို့ဖြစ်တယ်လို့ ဒေသခံတွေက ပြောပါတယ်။

    ကလေးမြို့အရှေ့ဘက်မှာ ရှိတဲ့ မြစ်သာမြစ်ရေ တက်လာတာကြောင့် က‌လေးမြို့အရှေ့ဘက်က ရွာတွေ ရေကြီးနေတာဖြစ်ပြီးတော့ မြစ်သာမြစ် အထက်ပိုင်း ဂန့်‌ဂေါ မြို့နယ်မှာလည်း မြစ်သာမြစ်ရေတတွေတက်နေတယ်လို့ မြို့ခံတွေက ပြောပါတယ်။

    ကလေးမြို့မှာ ပြီးခဲ့တဲ့ ၂၀၁၅ ခုနှစ်က တစ်မြို့လုံးနေရာအများအပြားမှာ ရေကြီးခဲ့ပြီးတော့ ‌ရေဘေးဒဏ် ဆိုးရွားစွာခံစားရခဲ့ပါတယ်။

    မြို့အနီး ကျေးရွာတွေမြစ်ရေဝင်ပေမဲ့လို့ ကလေးမြို့ရဲ့မြစ်ရေကြီးမှု စိုးရိမ်ရေအမှတ်ကို မရောက်သေးဘူးလို့ဒေသခံတွေက ပြောပါတယ်။

    

    ဓာတ်ပုံ ရင်းမြစ်, Win Win Maw

    

    ဓာတ်ပုံ ရင်းမြစ်, Win Win Maw

13. ၂၀ အောက်တိုဘာ ၂၀၂၁အန်တီကြီးရဲ့ အင်းစိန်၊ သာယာဝတီ နေ့စွဲများ

14. ၂၀ အောက်တိုဘာ ၂၀၂၁မြိတ် NLD ရုံးမှာ ပေါက်ကွဲမှုဖြစ်

    မြိတ်မြို့တပ်ပြင်ရပ်ကွက်မှာရှိတဲ့ အမျိုးသားဒီမိုကရေစီအဖွဲ့ချုပ် NLD ပါတီရုံး မှာပေါက်ကွဲမှုဖြစ်ပွားခဲ့ကြောင်း ဒေသခံတွေက ပြောပါတယ်။

    အဲ့ဒီရုံးကို အောက်တိုဘာလ ၂၀ ရက်နေ့ မနက်အစောပိုင်းမှာ ပေါက်ကွဲခဲ့တာဖြစ်ပြီးတော့ အဲ့ဒီရုံးဟာ NLD ပါတီခရိုင်နဲ့ မြို့နယ်ရုံးစိုက်ရာဖြစ်တယ်လို့လည်း ဒေသခံတွေက ပြောပါတယ်။

    အဲ့ဒီ့ အဆောက်အအုံ ပေါက်ကွဲမှုကြောင့် ရုံးအောက်ထပ် အတွင်းပိုင်းနဲ့ အပေါ်ပိုင်းက မှန်တွေပါ ထိခိုက်ပျက်စီးမှုရှိခဲ့တယ်လို့ လည်း ‌မြိတ်ဒေသခံတွေကပြောတာကို ကိုးကားပြီး Dawei Watch ကရေးပါတယ်။

    ပေါက်ကွဲမှု အသံကျယ်ပြီးမြေကြီးတောင်တုန်သွားကြောင်းနဲ့ လက်လုပ်ဗုံး နဲ့ပစ်တာမျိုးမဟုတ်ဘဲ စနစ်တကျ ထောင်ပြီးဖောက်ခွဲတာလို့ ယူဆရကြောင်းလည်း မြို့ခံတွေက ယူဆနေကြပါတယ်။

    အောက်တိုဘာလ ၁၉ ရက်နေ့ကလည်း မြိတ်မြို့မှာ တပ်ထောက်ခံရေးဆန္ဒပြပွဲတွေမှာ ဦးဆောင်ပြီး စစ်ကောင်စီ သတင်းပေးလို့ စွပ်စွဲခံရတဲ့ ကြံခိုင်ရေးပါတီဝင် တစ်ဦး သေနတ်နဲ့ ပစ်သတ်ခံရတဲ့ ဖြစ်စဥ်ဖြစ်ပွားခဲ့ပါတယ်။

    

    ဓာတ်ပုံ ရင်းမြစ်, Social Media

    

    ဓာတ်ပုံ ရင်းမြစ်, Social Media

15. ၂၀ အောက်တိုဘာ ၂၀၂၁ပေါင်းတည်မှာ မိုင်တဲလ်တာဝါတိုင်စောင့် စစ်ကောင်စီတပ်ဖွဲ့ဝင်တချို့ တိုက်ခိုက်ခံရ, စစ်ကောင်စီတပ်ဖွဲ့ဝင် ၅ ဦးသေဆုံးလို့ ဒေသခံ PDF ပြော

    ပဲခူးတိုင်းဒေသကြီး၊ ပြည်ခရိုင်၊ ပေါင်းတည်မြို့က သစ်ပုတ်ကျေးရွာအနီးမှာရှိတဲ့ မိုင်တဲလ်(MyTel)ဖုန်းတာဝါတိုင်ကို လုံခြုံရေးယူထားတဲ့ စစ်ကောင်စီတပ်သားတွေကို ဒီနေ့ အောက်တိုဘာ ၂၀ရက်မှာ ဝင်ရောက်တိုက်ခိုက်ခဲ့တယ်လို့ ပဲခူးတိုင်းဒေသကာကွယ်ရေးတပ်က သတင်းထုတ်ပြန်ပါတယ်။

    သစ်ပုတ်ရွာအနီးက MyTel ဖုန်းတာဝါတိုင်ကို ပြီးခဲ့တဲ့အောက်တိုဘာ ၁၁ရက်မှာဒေသကာကွယ်ရေးတပ်တွေက ဖောက်ခွဲမှုလုပ်ဆောင်ခဲ့ပြီးနောက် စစ်ကောင်စီဘက်က တာဝါတိုင်ကိုပြန်လည်ပြင်ဆင်ပြီး လုံခြုံရေးတပ်သားတွေ အစောင့်ထားရှိတာဖြစ်တယ်လို့ဒေသကာကွယ်ရေးတပ်တွေရဲ့ပြောဆိုချက်အရသိရပါတယ်။

    “ဒီကနေ့မနက်ဖြစ်သွားတာတော့ မိုင်းခွဲတဲ့ပုံစံမဟုတ်ပါဘူး။ စစ်ကောင်စီတပ်သားတွေလုံခြုံရေးယူထားတဲ့ အိမ်ကိုဝင်ရောက်တိုက်ခိုက်ခဲ့တာဖြစ်ပါတယ်။ သူတို့ဘက်က ၅ဦးသေဆုံးပါတယ်။ ဒါကိုလည်းမျက်မြင်အတည်ပြုနိုင်ခဲ့ပါတယ်။ ဒီတိုက်ခိုက်မှုဟာ ဒီလထဲမှာ ၄ကြိမ်မြောက်ဖြစ်တယ်''လို့ ပဲခူးဒေသ PDF(Bago Region PDF)က ပြောပါတယ်။

    ပေါင်းတည်က သစ်ပုတ်ရွာအနီးမှာဖြစ်ခဲ့တဲ့ ဒီပစ်ခတ်မှုတွေကြောင့် ဒီကနေ့အောက်တိုဘာ ၂၀ရက်နေ့ မနက်ပိုင်းမှာပဲ စစ်ကောင်စီတပ်တွေက ကျေးရွာအတွင်းဝင်ရောက်စစ်ဆေးရှာဖွေတာတွေ လုံခြုံရေးတင်းကျပ်တာတွေလုပ်နေတယ်လို သိရပါတယ်။

    စစ်ကောင်စီလက်အောက်ကတပ်သားတွေ၊ ရဲတပ်ဖွဲ့တွေနဲ့ဌာနဆိုင်ရာတွေမှာလုပ်ကိုင်နေသူတွေ၊ စစ်ကောင်စီတပ်တွေရဲ့လုပ်ငန်းတွေကို တင်ဒါယူလုပ်ကိုင်နေသူတွေကို သတိပေးမှုတွေလုပ်ခဲ့ပေမဲ့ သတ်မှတ်ထားတဲ့ရက်အထိ လိုက်နာတာမရှိတဲ့အတွက်အပြစ်ပေးဆောင်ရွက်တော့မယ်လို့ ပေါင်းတည်ဒေသကာကွယ်ရေးတပ်က ဒီကနေ့မှာပဲသတင်းထုတ်ပြန်ထားတာတွေ့ရပါတယ်။

    သစ်ပုတ်ရွာအနီးမှာဖြစ်ခဲ့တဲ့ဒီဖြစ်စဉ်နဲ့ပတ်သက်ပြီး စစ်ကောင်စီဘက်ကို ဘီဘီစီကဆက်သွယ်မေးမြန်းဖို့ကြိုးစားနေပါတယ်။

    

    ဓာတ်ပုံ ရင်းမြစ်, social media

16. ၂၀ အောက်တိုဘာ ၂၀၂၁သံအမတ်ကြီး ဦးကျော်မိုးထွန်း John McCain Freedom ဆုရယူ

    

    ဓာတ်ပုံ ရင်းမြစ်, Pho Kwar

    အမျိုးသားညီညွတ်ရေးအစိုးရ(NUG)က ကုလသမဂ္ဂဆိုင်ရာ မြန်မာအမြဲတမ်းသံအမတ်ကြီးအဖြစ် ခန့်အပ်ခံထားရတဲ့ ဦးကျော်မိုးထွန်းဟာ John McCain Freedom ဆုကို အမေရိကန်ပြည်ထောင်စု၊ ဝါရှင်တန်ဒီစီမြို့မှာ အောက်တိုဘာလ ၁၉ ရက်နေ့တုန်းက လက်ခံရယူလိုက်ပါတယ်။

    အမေရိကန်ပြည်ထောင်စုမှာရှိတဲ့ International Rebublican Institute (IRI) က ဒီမိုကရေစီလွတ်လပ်ခွင့်အတွက် ကြိုးပမ်းတဲ့လူပုဂ္ဂိုလ်တွေကို ဒီဆုကို နှစ်စဉ်ချီးမြှင့်တာဖြစ်ပါတယ်။

    ဒီနှစ်မှာတော့ သံအမတ်ကြီး ဦးကျော်မိုးထွန်းနဲ့ လစ်သူယေးနီးယားနိုင်ငံ ဝန်ကြီးချုပ်တို့အပြင် ဘယ်လာရုဇ်နဲ့ ကျူးဘားတို့က လူပုဂ္ဂိုလ်တွေရရှိသွားပါတယ်။

    ဒီဆုကို နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်လည်း ၁၉၉၆ ခုနှစ်မှာ ရရှိဖူးပါတယ်။

17. ၂၀ အောက်တိုဘာ ၂၀၂၁တောင်ပျောက်နယ်ရွာတွေရဲ့ရိက္ခာဝယ်လမ်းကြောင်းတွေ ထိန်းချုပ်ခံနေရ

18. ၂၀ အောက်တိုဘာ ၂၀၂၁နိုင်ငံတဝန်း လွတ်ငြိမ်းခွင့်နဲ့အမှုရုပ်သိမ်းခံရမှုတွေကြောင့် ၂ ရက်အတွင်း ပြန်လွတ်လာသူ ၂၆၀၀ နီးပါးရှိ

    

    ဓာတ်ပုံ ရင်းမြစ်, MPA

    ပြီးခဲ့တဲ့ ၂ ရက်အတွင်း စစ်ကောင်စီရဲ့လွတ်ငြိမ်းချမ်းသာခွင့်နဲ့ အမှုပြန်ရုပ်သိမ်းမှုတွေကြောင့် နိုင်ငံတဝန်းက အကျဉ်းထောင်၊ အချုပ်ထောင်တွေကနေ ပြန်လွတ်လာသူ လူပေါင်း ၂၆၀၀ နီးပါးအထိရှိနေပါတယ်။

    ဒီလူတွေဟာ စစ်တပ်ကအာဏာသိမ်းမှုအပြီး ဆန္ဒပြမှုတွေမှာ ပါဝင်တယ်ဆိုတဲ့အချက်နဲ့ ထောင်ဒဏ်ချမှတ်ခံရ၊ အချုပ်နဲ့အမှုရင်ဆိုင်နေရသူတွေ ဖြစ်ပြီး စစ်ကောင်စီက သီတင်းကျွတ်ကာလ လွတ်ငြိမ်းခွင့်ပေးတာ၊ အမှုရုပ်သိမ်းတာတွေကြောင့် ပြန်လွတ်လာတာ ဖြစ်ပါတယ်။

    ပြီးခဲ့တဲ့ ၂ ရက်အတွင်း အခုလို ပြန်လွတ်လာသူတွေထဲမှာ အင်းစိန်ဗဟိုအကျဉ်းထောင်ကနေ ပြန်လွတ်လာသူ ၁ ထောင်ကျော်ရှိပြီး လွတ်လာသူအများဆုံးဖြစ်သလို ဆက်လွှတ်ပေးဖို့ရှိနေတယ်လို့သိရပါတယ်။

    ၂ ရက်အတွင်း ဒုတိယအများဆုံးပြန်လွတ်လာသူတွေက မန္တလေးဗဟိုအကျဉ်းထောင်ကဖြစ်ပြီး လူပေါင်း ၉၀၀ နီးပါး ပြန်လွတ်လာတာဖြစ်ပါတယ်။

    ဒါ့အပြင် နေပြည်တော် အချုပ်ထောင်ကနေ ပြန်လွတ်လာသူ ၆၀ နီးပါးရှိပြီး မကွေးဗဟိုအကျဉ်းထောင်၊ ကသာ၊ ကျိုင်းတုံ၊ မြိတ်အကျဉ်းထောင်တွေကနေ ပြန်လွတ်လာသူပါ ပေါင်းရင် ၂၆၀၀ နီးပါးပြန်လွတ်လာတာဖြစ်ပါတယ်။

    စစ်ကောင်စီဘက်ကတော့ လွတ်ငြိမ်းခွင့်ပေးလိုက်သူ၊ အမှုရုပ်သိမ်းပေးလိုက်သူ ၅၀၀၀ ကျော်အထိရှိတယ်လို့ ကြေညာထားတာကြောင့် ပြန်လွတ်လာမယ့်သူတွေရှိနေပါတယ်။

19. ၂၀ အောက်တိုဘာ ၂၀၂၁ယခုနှစ် မိုးကြီးလို့ ပုဂံမှာ ဘုရား ၆ ဆူခန့်ပျက်စီး

    မိုးရွာသွန်းမှုများတာကြောင့် ယခုနှစ်မိုးရာသီအတွင်း ပုဂံဒေသမှာရှိတဲ့ဘုရားစေတီတွေ ထိခိုက်ပြိုကျတာတွေဖြစ်ခဲ့ပြီး ဘုရား ၆ဆူခန့် ပျက်စီးခဲ့တယ်လို့ဒေသခံလူမှုအဖွဲ့အစည်းတွေကပြောပါတယ်။

    ပုဂံမှာ သြဂုတ်လက မိုးသည်းထန်စွာ ရွာသွန်းခဲ့တာကြောင့် ပုဂံမြို့ဟောင်းဘက်မှာတည်ရှိတဲ့ သံပျဉ်စွာဘုရားတောင်ဘက်မှာ ပျက်စီးမှုတွေရှိခဲ့သလို စက်တင်ဘာလအတွင်းမှာလည်း စူဠာမဏိမြောက်ဘက်ကျောင်းတိုက်ဟောင်းက ဘုရားတံတိုင်းအုတ်ချပ်တွေ၊ တရုတ်ပြေးဘုရားအရှေ့တောင်ထောင့်က အုတ်ချပ်နဲ့ဓမ္မရံကြီးဘုရားအတွင်းပိုင်းတချို့ပျက်စီးမှုတွေရှိပြီးဘုရားအတွင်းပိုင်းရေဝင်တာတွေဖြစ်ခဲ့ပါတယ်။

    ပြီးခဲ့တဲ့ အောက်တိုဘာ ၁၈ရက်နေ့မှာဆိုရင်လည်း ပြသာဒ်ကြီးဘုရားမုခ်ဦးတစ်ခုလုံးပြိုကျခဲ့ပြီးထိခိုက်မှုများခဲ့တယ်လို့ဒေသခံတွေကပြောပါတယ်။

    “ပြသာဒ်ကြီးဘုရားက အနောက်ဘက်မုခ်ဦးတစ်ခုလုံးပြိုကျတယ်။ အရင်တုန်းက အဟောင်းကိုအသစ်ပြန်လုပ်ထားတာ၊ အသစ်တွေကလည်းတင်ထားတဲ့အလေးချိန်ကတော်တော်လေးများတယ်။အောက်ကအဟောင်းနဲ့တွဲစပ်မှုမရှိတော့မိုးရွာတဲ့အခါမှာ ရေဝင်ပြီးအိကျပြီး ပြိုတဲ့သဘောပါ။အရင်ကတည်းက ရေဝင်နိုင်တဲ့အပေါက်တွေဖြစ်နေတယ်။ သစ်ပင်အမြစ်တွေတိုးတယ်၊ မိုးများရင်တော့ဆက်ဖြစ်နေဦးမှာ “ လို့ပုဂံဒေသမှာဘုရားစေတီတွေနဲ့ပတ်သက်လို့ထိန်းသိမ်းမှုတွေလုပ်ဆောင်နေတဲ့ လူမှုရေးအသင်းအဖွဲ့ကတာဝန်ရှိသူတစ်ဦးက ဘီဘီစီကိုပြောပါတယ်။

    မိုးရွာသွန်းမှုနည်းလေ့ရှိတဲ့ ပုဂံဒေသမှာ အခုနှစ်မိုးရေချိန်မြင့်တက်ခဲ့ပေမယ့် သီတင်းကျွတ်လပြည့်နောက်ပိုင်းမှာတော့ မိုးရွာသွန်းမှုပြန်နည်းသွားလေ့ရှိတယ်လို့ဒေသခံတွေကပြောပါတယ်။

    ဒါ့အပြင် ပုဂံဒေသဘုရားတွေနဲ့ပတ်သက်လို့ဒေသခံလူမှုရေးအသင်းအဖွဲ့တွေအနေနဲ့ မိုးရာသီကာလတွေမှာ အလားတူပျက်စီးဆုံးရှုံးမှုတွေမဖြစ်အောင် ညှိနှိုင်းဆွေးနွေးတာတွေရှိခဲ့ပေမယ့်အခုနောက်ပိုင်းမှာတော့ အုပ်ချုပ်ရေးပိုင်းက ပူးပေါင်းပါဝင်မှုတွေအားနည်းနေတယ်လို့ ဒေသခံလူမှုရေးအသင်းအဖွဲ့တွေကပြောပါတယ်။

    

    ဓာတ်ပုံ ရင်းမြစ်, CJ

20. ၂၀ အောက်တိုဘာ ၂၀၂၁မကွေးဝန်ကြီးချုပ် ဒေါက်တာအောင်မိုးညိုကို သံခြေချင်းနဲ့ ရံးချိန်းထုတ်

    

    ဓာတ်ပုံ ရင်းမြစ်, Aung Moe Nyo

    စစ်တပ်က အာဏာသိမ်းပြီးတဲ့နောက် ဖမ်းဆီးထိန်းသိမ်းခံရပြီး ထောင်တွင်းကနေ အမှုတွေ ရင်ဆိုင်နေရတဲ့ မကွေးတိုင်းဝန်ကြီးချုပ် ဒေါက်တာအောင်မိုးညိုရဲ့ အမှု ၂ ခု ရုံးချိန်းကို အောက်တိုဘာလ ၁၈ ရက်၊ တနင်္လာနေ့က ပြုလုပ်ခဲ့ပြီး ဒေါက်တာ အောင်မိုးညို ဟာ သံခြေချင်းနဲ့ ရုံးထုတ်ခံခဲ့ရတာတယ်လို့ သိရပါတယ်။

    စစ်တပ်က အာဏာသိမ်းပြီးတဲ့နောက် ပုဒ်မ ၅၀၅(ခ)နဲ့ တရားစွဲခံခဲ့ရတဲ့ မကွေးတိုင်းဝန်ကြီးချုပ်ဟာ လက်ရှိမှာ အလုပ်ကြမ်းနဲ့ ထောင်ဒဏ် ၂ နှစ် ချမှတ်ခံထားရပါတယ်။

    ''သူ(ဒေါက်တာအောင်မိုးညို)ကတော့ အခုတော့ ကျန်းမာရေးပြန်ကောင်းပါပြီ။ ဒါပေမဲ့ ပြစ်ချက်တရားခံဆိုတော့ သံခြေချင်းတော့ အခတ်ခံရတာပေါ့လေ။ ထောင်ဝတ်စုံလည်း ဝတ်ရတာပေါ့။ နည်းနည်းပိန်သွားပေမဲ့ အမြင်အားဖြင့်တော့ ကျန်းမာရေးကောင်းပါတယ်''လို့ ရုံးချိန်းမှာ သူမြင်တွေ့ခဲ့ရတဲ့အခြေနေကို ဒေါက်တာအောင်မိုးညိုရဲ့ရှေ့နေက ပြောပါတယ်။

    တနင်္လာနေ့ရုံးချိန်းမှာတော့ ဒေါက်တာအောင်မိုးညို၊ တိုင်းလူမှုရေးဝန်ကြီးနဲ့ဆောက်လုပ်ရေးဝန်ကြီးတို့ တစ်မှုတည်းစွပ်စွဲခံထားရတဲ့အမှုအတွက် အပြန်အလှန်စစ်မေးတာ၊ တရားလိုကို မေးမြန်းတာလုပ်ခဲ့တယ်လို့ ဒေါက်တာအောင်မိုးညိုရဲ့ရှေ့နေက ပြောပါတယ်။

    နောက် အဲဒီရုံးချိန်းမှာပဲ မကွေးပညာရေးကောလိပ် ၃ ထပ်အိပ်ဆောင် ဆောက်လုပ်ရေးမှာ တင်ဒါအောင်တဲ့ကုမ္ပဏီအစား တခြားကုမ္ပဏီတစ်ခုကို လုပ်ကိုင်ခွင့်ပေးခဲ့လို့ နိုင်ငံတော်နစ်နာတယ်ဆိုပြီးတိုင်ကြားထားတဲ့အမှုအတွက် တရားလို အဂတိတိုက်ဖျက်ရေးအဖွဲ့က စစ်ဆေးရေးမှူးကို မေးခွန်းမေးမြန်းတာလုပ်ခဲ့တယ်လို့လည်း ရှေ့နေဦးမြင့်အောင်က ပြောပါတယ်။

    NLD ဗဟိုကော်မတီဝင်တစ်ဦးဖြစ်တဲ့ မကွေးတိုင်း ဝန်ကြီးချုပ် ဒေါက်တာအောင်မိုးညိုဟာ သူ့အပေါ် စွဲဆိုထားတဲ့ အမှု ၈ ခုအထိ တရားရင်ဆိုင်နေရပါတယ်။