ဒေါ်အောင်ဆန်းစုကြည် တရားခွင်မှာ ကိုယ်တိုင်သက်သေထွက်

တိုက်ရိုက် ထုတ်လွှင့်ချက်

1. ၂၅ အောက်တိုဘာ ၂၀၂၁ရွှေစျေးနဲ့ ဒေါ်လာစျေးတွေ ပြန်ကျ

   ရွှေစျေးနဲ့ ဒေါ်လာစျေးတွေ အခုရက်ပိုင်းပြန်ကျလာကြောင်း ရန်ကုန်စျေးကွက် သတင်းတွေအရသိရပါတယ်။

   ရန်ကုန်တိုင်းရွှေလုပ်ငန်းရှင်များအသင်းက ဒီကနေ့ အောက်တိုဘာလ ၂၅ ရက်နေ့ ညနေပိုင်းထုတ်ပြန်တဲ့ အကယ်ဒမီ မီးလင်းရွှေတစ်ကျပ်သားကို ၁၇ သိန်းကိုးသောင်းကျော်အထိ ကျဆင်းလာခဲ့ပြီး အမေရိကန်ဒေါ်လာငွေလဲနူန်းကလည်း တစ်ဒေါ်လာကို ကျပ်နှစ်ထောင်အောက်ရောက်လာပြီး ကောင်တာတွေမှာ အဝယ်စျေး ကျပ် ၁၉၅၀ နဲ့ စျေးပေါက်တယ်လို့ ဆိုပါတယ်။

   ပြီးခဲ့တဲ့စက်တင်ဘာလကုန်ခန့်က ရွှေစျေးတွေ တစ်ကျပ်သား ၂၂ သိန်းကျော်ခန့်အထိ စျေးတက်လာခဲ့သလို ငွေလဲနူန်းကလည်း အမေရိကန်တစ်ဒေါ်လာကို ကျပ် ၂၇၀၀ ဝန်းကျင်ခန့်အထိ စျေးပေါက်ခဲ့တာဖြစ်ပါတယ်။

   ဗဟိုဘဏ်က ပြီးခဲတဲ့ အောက်တိုဘာလ ဆန်းက ပြည်ပကိုတင်ပို့နေတဲ့ ပိုကုန်တွေကနေရရှိတဲ့ ပို့ကုန်ရငွေတွေကို ဘဏ်ငွေစာရင်းထဲမှာ ၁ လသာ ထားခွင့်ပြုမယ်လို့ ဗဟိုဘဏ်က အသိပေးထုတ်ပြန်ခဲ့ပါတယ်။

   

   ဓာတ်ပုံ ရင်းမြစ်, YGEA

2. ၂၅ အောက်တိုဘာ ၂၀၂၁တပ်မတော်ထောက်ခံပွဲလုပ်ခဲ့တဲ့ မိတ္ထီလာမြို့မှာ ပေါက်ကွဲမှုဖြစ်, စစ်ကောင်စီတပ်ဖွဲ့ဝင်အနည်းဆုံး (၂)ဦး ပြင်းထန်ဒဏ်ရာရတယ်လို့ ဒေသခံပြော

   မန္တလေးတိုင်းဒေသကြီး၊ မိတ္ထီလာမြို့မှာ ဒီနေ့အောက်တိုဘာ (၂၅)ရက် မနက်ပိုင်းက တပ်မတော်ထောက်ခံပွဲ ကျင်းပခဲ့ပါတယ်။ ဒီတပ်မတော်ထောက်ခံပွဲကို မိတ္ထီလာမြို့နယ်၊ ကန်သာယာရပ်ကွက်၊ ကန်ဘောင်ထိပ် မှာလုပ်ဆောင်ခဲ့တာပါ။ နေ့လယ် (၁၁)နာရီဝန်းကျင် မှာတော့ မိတ္ထီလာမြို့ ဝင်းမာလာဈေးအနောက်ပေါက်အနီး ကင်းလှည့်သွားနေတဲ့ စစ်ကောင်စီကားပေါ် ပေါက်ကွဲမှုဖြစ်ပွားခဲ့ပါတယ်။ ဒီပေါက်ကွဲမှုကြောင့် စစ်ကောင်စီ တပ်ဖွဲ့ဝင်အနည်းဆုံး (၂)ဦး ပြင်းထန်ဒဏ်ရာရတယ်လို့ ဒေသခံတွေကပြောပါတယ်။

   “ထောက်ခံပွဲနဲ့က လမ်းကတော့တဖြောင့်ထဲပဲ၊ ၅ဖာလုံ ၁မိုင်လောက်ပဲကွာမယ်။ အဲ့ကားက အဲ့ဒီဘက်ကနေ လာတာ။ အဲ့ဒါကို ဗုံးပစ်ထည့်လိုက်တာ။ မိတ္ထီလာမှာတော့ ဒါဟာပေါက်ကွဲမှု အကြီးစား ပထမဆုံးဖြစ်တာ”လို့ မျက်မြင်တွေ့လိုက်တဲ့ ဒေသခံတစ်ဦးကဘီဘီစီကိုပြောပါ တယ်။

   ဒီလို ပေါက်ကွဲမှုပြီးတဲ့နောက် အနီးအနားတဝိုက်မှာ စစ်ကောင်စီဘက်ကပစ်ခတ်မှုတွေရှိခဲ့သလို မြို့အဝင် အထွက်တွေလည်း ပိတ်ဆို့ကာစစ်ဆေးရေးတင်းတင်းကြပ်ကြပ်လုပ်ဆောင်နေ ပါတယ်။ အခုလို တပ်မ‌တော်ထောက်ခံပွဲလုပ်တဲ့နေ့ ပေါက်ကွဲမှုဖြစ်စဉ်နဲ့ပတ်သက်ပြီး စစ်ကောင်စီဘက်က တစုံတရာ မထုတ်ပြန်သေးသလို ဘီဘီစီဘက်ကလည်း ဆက်သွယ်မေးမြန်းဖို့ ကြိုးစားနေပါတယ်။

   

   ဓာတ်ပုံ ရင်းမြစ်, CJ

3. ၂၅ အောက်တိုဘာ ၂၀၂၁မုံရွာစျေးထဲမှာ လူတစ်ဦးပစ်သတ်ခံရ

   စစ်ကိုင်းတိုင်း၊မုံရွာမြို့ ညောင်တပင်စျေး (ညနေစျေး)မှာ ဒီကနေ့ညနေပိုင်းက လူတစ်ဦးသေနတ်နဲ့ ပစ်သတ်ခံခဲ့ရတယ်လို့ မုံရွာမြို့ခံတစ်ဦးက ဘီဘီစီကိုပြောပါတယ်။

   မုံရွာညောင်တပင်စျေးဟာ မုံရွာမြို့လယ် ချင်းတွင်းရတနာစျေးအနီးဖွင့်တဲ့ ညနေပိုင်းစျေးဖြစ်ပြီးတော့ ပစ်ခတ်မှုဖြစ်ပွားပြီးနောက် စျေးကွဲသွားကြောင်းလည်း သူတို့က ပြောပါတယ်။

   ပစ်ခတ်ခံရသူဟာ စျေးကောက်တစ်ဦးဖြစ်ပြီးတော့ လည်ပင်းကို သေနတ်နဲ့ပစ်သတ်ခံရတာလည်းဖြစ်တယ်လို့ ဆိုပါတယ်။

   လက်ရှိမှာ မြစ်အနောက်ဖက်ဆားလင်းကြီး ယင်းမာပင်ဘက်မြို့တွေဘက် စျေးလာရောင်းတဲ့စျေးသည်များ ဆက်လက်မရောင်းတော့ဘဲ ပြန်သိမ်းသွားကြပြီး စစ်သားနဲ့ရဲတွေ ပိတ်ဆို့စစ်ဆေးနေတယ်လို့ သိရပါတယ်။

   မုံရွာမြို့အဝင် မအူကြီးရွာမှာ အောက်တိုဘာလ၂၄ရက်နေ့ညနေပိုင်းက စစ်ကောင်စီသတင်းပေးတစ်ဦးလို့ အများကပြောကြတဲ့သူတစ်ဦး ပစ်သတ်ခံရပြီးမုံရွာမှာ မနေ့က ပေါက်ကွဲမှုတွေလည်း ဖြစ်ပွားခဲ့ပါတယ်။

   

   ဓာတ်ပုံ ရင်းမြစ်, CJ

4. ၂၅ အောက်တိုဘာ ၂၀၂၁၉ လအတွင်း စစ်ကောင်စီဘက်သေဆုံးသူ ၁၈၀ကျော်ရှိတယ်လို့ စစ်ကောင်စီ လက်အောက်နိုင်ငံခြားရေးဝန်ကြီးဌာနထုတ်ပြန်လာ

   ပြီးခဲ့တဲ့ ၉ လနီးပါးအတွင်း လုံခြုံရေးတပ်ဖွဲ့ဝင် တပ်မတော်သား ၇၅ ဦး၊ ရဲတပ်ဖွဲ့ဝင်၉၃ ဦး နဲ့ အစိုးရဝန်ထမ်း ၁၄ ဦး၊ စုစုပေါင်း ၁၈၂ ဦး ဟာ တိုက်ခိုက်ခံရမှုတွေကြောင့်သေဆုံးခဲ့ပြီး ၆ဝ၂ ဦး ဒဏ်ရာရရှိတယ်လို့ စစ်ကောင်စီလက်အောက်က နိုင်ငံခြားရေးဝန်ကြီးဌာနက ထုတ်ပြန်ချက်မှာဖော်ပြပါတယ်။

   တိုက်ခိုက်မှုတွေကြောင့် သေဆုံးတဲ့အရပ်သား ၁,၁၅၅ ဦးအထိ ရှိလာပြီး ဒဏ်ရာရသူ ၇၆၀ ကျော်အထိရှိနေတယ်လို့ လည်း ထုတ်ပြန်ချက်မှာဖော်ပြပါတယ်။

   ကုလသမဂ္ဂအထွေထွေအတွင်းရေးမှူးချုပ်ရဲ့မြန်မာနိုင်ငံဆိုင်ရာအထူးကိုယ်စားလှယ်နဲ့ လူ့အခွင့်အရေးဆိုင်ရာအထူးအစီရင်ခံစာတင်သွင်းသူတို့ရဲ့ အစီရင်ခံနဲ့ဆွေးနွေးမှုတွေကို ပယ်ချတယ်ဆိုတဲ့ကြေညာချက်ထဲမှာ အဲဒီလိုပြောလာတာဖြစ်ပါတယ်။

   အထူးကိုယ်စားလှယ်နဲ့ အစီရင်ခံစာတင်သွင်းသူတို့ရဲ့ အစီရင်ခံစာ ၂ ခုစလုံးမှာ တစ်ဖက် အဖွဲ့တွေရဲ့ ကျူးလွန်မှုတွေကို အပေါ်ယံဖော်ပြထားပြီး အဲဒီနောက်ဆက်တွဲသေဆုံးမှု စာရင်းအမှန်ကို ဖုံးကွယ်ထားတယ်ဆိုပြီး စစ်ကောင်စီရဲ့နိုင်ငံခြားရေးဝန်ကြီးဌာန ထုတ်ပြန်ချက်က ဆိုပါတယ်။

   စစ်ကောင်စီဟာ အမျိုးသားညီညွတ်ရေးအစိုးရ(NUG)၊ ပြည်ထောင်စုလွှတ်တော် ကိုယ်စားပြုကော်မတီ(CRPH)နဲ့ ဆက်စပ်အဖွဲ့အစည်းတွေကို အကြမ်းဖက်အဖွဲ့ အဖြစ်ကြေညာထားတာဖြစ်ပြီး CRPH ကလည်း စစ်ကောင်စီကို အလားတူ ပြန်လည်ကြေညာထားပါတယ်။

   အကြမ်းဖက်အဖွဲ့တွေရဲ့လုပ်ရပ်တွေကြောင့် စစ်အာဏာသိမ်းမှုစတဲ့ ဖေဖော်ဝါရီလ ၁ ရက်နေ့ကနေ အောက်တိုဘာလ နှောင်းပိုင်းအထိ စစ်ကောင်စီတပ်ဖွဲ့ဝင် ရဲနဲ့ စစ်သား ၁၆၈ ဦးသေဆုံးတယ်လို့လည်း အဲဒီကြေညာချက်မှာဖော်ပြပါတယ်။

   ဒါပေမဲ့ စစ်ကိုင်း၊ မကွေး၊ ချင်း၊ ရှမ်း၊ ကယား၊ ရန်ကုန်တို့မှာ ပြောက်ကျားတိုက်ခိုက်မှုတွေ၊ ဒေသခံပြည်သူ့ကာကွယ်ရေးတပ်တွေရဲ့ခုခံမှုတွေကြောင့် အောက်တိုဘာလ ၂၃ ရက် တစ်နေ့တည်းမှာတင် စစ်ကောင်စီတပ်ဖွဲ့ဝင် ဆယ်ချီကျဆုံးတယ်ဆိုပြီး NUG က နေ့စဉ်စစ်ရေးထုတ်ပြန်ချက်မှာတော့ ဖော်ပြထားတာတွေ့ရပါတယ်။

   

   ဓာတ်ပုံ ရင်းမြစ်, Getty Images

5. ၂၅ အောက်တိုဘာ ၂၀၂၁ဟုမ္မလင်းမြို့ မှာ CDM ကျောင်းဆရာမတစ်ဦး သေနတ်နဲ့ ပစ်သတ်ခံရ

   

   ဓာတ်ပုံ ရင်းမြစ်, social media

   စစ်ကိုင်းတိုင်း ဟုမ္မလင်းမြို့ မှာ အောက်တိုဘာ ၂၄ ရက် ညနေပိုင်းက CDM ကျောင်းဆရာမတစ်ဦးကို ပစ်သတ်ခံခဲ့ရတယ်လို့ ဒေသခံတွေကပြောပါတယ်။

   သေဆုံးသူ ဆရာမဟာ ဟုမ္မလင်းမြို့ နောင်ပကျစ်ရပ်ကွက်က စစ်ကောင်စီတပ်တွေရဲ့လိုက်လံဖမ်းမှုကြောင့် တိမ်းရှောင်နေရတဲ့ သပိတ်ခေါင်းဆောင်ကိုကျော်ဝင်းစိန်ရဲ့ မရီးတော်စပ်သူဖြစ်တယ်လို့ သိရပါတယ်။

   ဟုမ္မလင်းမြို့ရဲ့ စစ်တပ်သတင်းပေးလို့ လူသိများသူတစ်ဦး အသတ်ခံရတဲ့နောက်မှာ ကိုကျော်ဝင်းစိန် ပါဝင်တယ်လို့ယူဆချက်နဲ့ အိမ်မှာတွေ့တဲ့သူကို လူတချို့ကသေနတ်နဲ့ပစ်ခတ်ခဲ့တာကြောင့် ဝရန်တာမှာထိုင်နေတဲ့ဆရာမကို ထိမှန်ခဲ့တာလို့ ဆိုပါတယ်။

   သေနတ်နဲ့ ပစ်ခတ်ခံရတာကြောင့် သေဆုံးခဲ့တဲ့ ဆရာမ ဒေါ်မေနှင်းအေးဟာ အာဏာဖီဆန်အကြမ်းမဖက်လှုပ်ရှားမှု(CDM) ကျောင်းဆရာမဖြစ်ပြီး လက်ရှိမှာ တစ်နှစ်ကျော်သားလေးတစ်ဦး ကျန်ရစ်ခဲ့ပါတယ်။

6. ၂၅ အောက်တိုဘာ ၂၀၂၁အာဆီယံက နိုင်ငံခြားရေးအမြဲတမ်းအတွင်းဝန် ဦးချမ်းအေးကိုဖိတ်ကြား, စစ်ကောင်စီဘက်ကစေလွှတ်ဖို့မသေချာ

   မနက်ဖြန် အောက်တိုဘာ ၂၆ ရက်မှာ အာဆီယံထိပ်သီးအစည်းအဝေးတွေ စတင် ကျင်းပတော့မှာဖြစ်ပေမယ့် စစ်ကောင်စီအနေနဲ့ ကိုယ်စားလှယ်စေလွှတ်ဖို့ မဆုံးဖြတ်ရသေးဘူး လို့ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ဘီဘီစီကိုပြောပါတယ်။

   နိုင်ငံခြားရေးဝန်ကြီးဌာန၊ အမြဲတမ်းအတွင်းဝန် ဦးချမ်းအေးကိုအာဆီယံဘက်က ဖိတ်ကြားထားပေမယ့်လို့ စစ်ကောင်စီဘက်က စေလွှတ်ဖို့မဆုံးဖြတ်ရသေးဘူးလို့ ဗိုလ်ချုပ်ဇော်မင်းထွန်းကပြောပါတယ်။စစ်ကောင်စီ ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ကိုမဖိတ်ဘဲ နိုင်ငံရေးအရကိုယ်စားမပြုသူတစ်ဦးကိုဖိတ်တာဟာ အာဆီယံပဋိညာဉ် တွေနဲ့မကိုက်ညီဘူးလို့ စစ်ကောင်စီက ဝေဖန်ထားပါတယ်။

   စစ်ကောင်စီအတွက် အာဆီယံဟာ သံတမန်ရေးအရ ထွက်ပေါက်တစ်ခုဖြစ်လို့ အစည်းအဝေးသွားမတက်တာက အခွင့်အရေးဆုံးရှုံးမှုတစ်ခုလို့ သုံးသပ်မှုအချို့လည်းရှိနေပါတယ်။

   စစ်ကောင်စီဘက်ကအမြင်ကတော့ တန်းတူညီတူမရှိဘဲ နှိမ့်ချထားတဲ့ အစည်းအဝေးတစ်ခုကို သွားတက်တာကမှ သံတမန်ရေးအရ ထိခိုက်မှုလို့ ဗိုလ်ချုပ်ဇော်မင်းထွန်းက ပြောပါတယ်။

   

   ဓာတ်ပုံ ရင်းမြစ်, Getty Images

7. ၂၅ အောက်တိုဘာ ၂၀၂၁ရုရှားရေတပ်ရဲ့ထိပ်ပိုင်းအကြီးအကဲတစ်ဦးမြန်မာနိုင်ငံရောက်ရှိနေ

   ရုရှားရေတပ်ရဲ့ ထိပ်ပိုင်းခေါင်းဆောင်တွေထဲ ဒုတိယအကြီးအကဲတစ်ဦးဖြစ်တဲ့ ဗိုလ်ချုပ်ကြီး Vladimir Kasatonov ဦးဆောင်တဲ့ အဖွဲ့ဝင်တွေဟာ မနေ့က အောက်တိုဘာ ၂၄ရက် မနက်ပိုင်း က ရုရှားလေတပ်ပိုင် လေယာဉ်နဲ့ မြန်မာနိုင်ငံကိုရောက်ရှိနေတယ်လို့ တပ်မတော်နဲ့နီးစပ်တဲ့အသိုင်းအဝိုင်းက ဘီဘီစီကိုပြောသလို စစ်ကောင်စီဘက်ကအတည်ပြုပါတယ်။ နိုင်ငံရေးအကဲခေတ်တွေကတော့ အခု ရုရှားရေတပ်ထိပ်ပိုင်းအရာရှိကြီးဟာစစ်ကောင်စီဥက္ကဋ္ဌ ဇွန်လအတွင်းက သွားခဲ့တဲ့ ရုရှားခရီးစဉ်မတိုင်မီကလည်း မြန်မာနိုင်ငံကို လာရောက်ခဲ့ဖူးသူဖြစ် နှစ်နိုင်ငံရေတပ်ဆိုင်ရာနဲ့ စစ်ရေးဆိုင်ရာတွေအတွက် ထပ်မံလာရောက်တာဖြစ်နိုင် တယ်လို့ သုံးသပ်ကြပါတယ်။ မြန်မာနိုင်ငံမှာ စစ်တပ်ကအာဏာသိမ်းပြီးတဲ့နောက် မြန်မာစစ်တပ်ဟာရုရှားစစ်တပ်နဲ့ ပိုမိုနီးကပ်တဲ့ ဆက်ဆံရေးကို တည်ဆောက်နေသလို မြန်မာစစ်ခေါင်းဆောင်တွေကလည်း ရုရှားနိုင်ငံကို မကြာခဏသွားရောက်ပြီး စစ်ရေးနဲ့ စီးပွားရေးဆိုင်ရာပူးပေါင်းမှုတွေကို လုပ်ဆောင်နေတာပါ။ လက်ရှိမှာ စစ်ကောင်စီဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် ကို ဒေသတွင်းသြဇာရှိတဲ့ အာဆီယံအဖွဲ့က အောက်တိုဘာနောက်ဆုံးပတ်မှာ ကျင်းပမယ့် အာဆီယံထိပ်သီးညီလာခံကို တက်ရောက်ခွင့်မပြုဘူးဆိုတဲ့ ဆုံးဖြတ်ချက်နောက်မှာ အခုလို ရုရှားစစ်တပ်က အကြီးအကဲ တစ်ယောက်မြန်မာနိုင်ငံကိုရောက်ရှိနေတာလည်းဖြစ်ပါတယ်။

   

   ဓာတ်ပုံ ရင်းမြစ်, Wikipedia

8. ၂၅ အောက်တိုဘာ ၂၀၂၁နေပြည်တော်အပါအဝင် မြို့ကြီးတချို့မှာ တပ်ထောက်ခံပွဲတွေ ပြုလုပ်

   

   ဓာတ်ပုံ ရင်းမြစ်, CJ

   နေပြည်တော်ကောင်စီ နယ်မြေအပါအဝင် မြို့ကြီးတချို့မှာ တပ်ထောက်ခံပွဲတွေကို ဒီနေ့ အောက်တိုဘာလ ၂၅ ရက် မနက်ပိုင်းမှာတပ်မတော်ထောက်ခံသူတွေက လူစုလူဝေးနဲ့ ပြုလုပ်ကြတာတွေ့ရပါတယ်။

   တပ်မြို့တွေလို့ လူသိများတဲ့ မိတ္ထီလာနဲ့ ပြင်ဦးလွင်မြို့တွေအပြင် မန္တလေး၊ မြစ်ကြီးနား၊ မော်လမြိုင်မြို့တွေမှာပါပြုလုပ်သွားတာတွေ့ရပါတယ်။

   အဲဒီမြို့တွေမှာ အင်အားရာချီတဲ့ တပ်မတော်ထောက်ခံသူဆိုသူတွေက လမ်းလျှောက် ဆန္ဒဖော်ထုတ်တာ၊ ဆိုင်ကယ်တွေနဲ့ အင်အားပြတာကိုလုပ်ကြတာလည်းတွေ့ရပါတယ်။

   နိုင်ငံတဝန်းက စစ်အာဏာသိမ်းဆန့်ကျင်ရေး ဆန္ဒထုတ်ဖော်သူတွေကို ပစ်ခတ်ဖြိုခွဲတာတွေ လုပ်နေချိန်၊ ဆန္ဒထုတ်ဖော်သူတွေကို ပိတ်ဆို့ဖမ်းဆီးတာတွေ စစ်ကောင်စီတပ်ဖွဲ့တွေက ဆက်တိုက်လုပ်နေချိန်မှာ အခုလို လူအင်အားအမြောက်အများနဲ့ တပ်ထောက်ခံသူတွေ လှည့်လည်နေကြတာကို ဒေသခံတွေက ဝေဖန်နေကြပါတယ်။

   တခါ ကိုဗစ်ရောဂါကြောင့် လူစုလူဝေးမလုပ်ရဆိုတဲ့ အချက်တွေကို တပ်ထောက်ခံသူတွေ ကိုယ်တိုင် မလိုက်နာဘူးဆိုတဲ့ အချက်တွေကိုလည်း လူမှုကွန်ရက်မှာဝေဖန်နေကြတာတွေ့ရပါတယ်။

   ဒီနေ့ပြုလုပ်သွားတဲ့ တပ်မတော်ထောက်ခံပွဲဟာ စစ်အာဏာသိမ်းမှု ၉ လ ထဲဝင်လာချိန်မှာ တပ်ထောက်ခံသူတွေပြုလုပ်တဲ့ လူအင်အားများတဲ့ထောက်ခံဆန္ဒပြပွဲတစ်ခု လည်းဖြစ်ပါတယ်။

9. ၂၅ အောက်တိုဘာ ၂၀၂၁အထူးသံရဲ့ခရီးစဉ်ပေါ်လာဖို့ မြန်မာကို အာဆီယံခေါင်းဆောင်တွေ ဆက်ပြီး တိုက်တွန်းပြောဆိုမယ်

   

   ဓာတ်ပုံ ရင်းမြစ်, Getty Images

   မြန်မာ့အရေးဆိုင်ရာ အာဆီယံအထူးသံတမန်ရဲ့ မြန်မာပြည်တွင်း ခရီးစဉ်ပေါ်လာဖို့ မြန်မာဘက်ကို အာဆီယံအဖွဲ့ဝင်နိုင်ငံတွေရဲ့ ခေါင်းဆောင်တွေက ဆက်ပြီး တိုက်တွန်းပြောဆိုမယ်လို့သိရပါတယ်။

   မနက်ဖြန် အောက်တိုဘာလ ၂၆ ရက်မှာ ကျင်းပဖို့ရှိတဲ့ အာဆီယံထိပ်သီးဆွေးနွေးပွဲအတွက် အာဆီယံအလှည့်ကျဥက္ကဋ္ဌက ထုတ်ပြန်ဖို့ရှိတဲ့ ကြေညာချက်မူကြမ်းမှာ အခုလိုပါရှိတာဆိုပြီး ဂျပန်သတင်းဌာန Kyodo က ရေးသားပါတယ်။

   အဲဒီမူကြမ်းအရဆိုရင် မြန်မာ့အရေးပါဝင်ပတ်သက်သူတွေအားလုံးကိုတွေ့ခွင့်ရပြီး ယုံကြည်မှုတည်ဆောက်နိုင်ဖို့ အာဆီယံအထူးသံရဲ့မြန်မာပြည်တွင်းခရီးစဉ်ပေါ်ပေါက်အောင်ဖော်ဆောင်တာအပါအဝင် အာဆီယံခေါင်းဆောင်တွေ ကြားရထားတဲ့ ဘုံသဘောတူညီချက်ကတိကဝတ်ကို အထမြောက်အောင်ဆောင်ရွက်ရေး စစ်ကောင်စီဘက်ကို တိုက်တွန်းမယ့်အချက်လည်း ပါဝင်ပါတယ်။

   အာဆီယံအထူးသံတမန်လည်းဖြစ် ဘရူနိုင်းနိုင်ငံခြားရေးဝန်ကြီး ၂ လည်းဖြစ်တဲ့ အီရာဝမ် ယူဆွဖ်ကတော့ သူ့ရဲ့ မြန်မာပြည်တွင်း ခရီးစဉ်မှာ ဒေါ်အောင်ဆန်းစုကြည်အပါအဝင် တွေ့သင့်တွေ့ထိုက်သူတွေနဲ့တွေ့ဖို့ စစ်ကောင်စီဘက်ကို တောင်းဆိုထားတယ်လို့ လူသိရှင်ကြားပြောထားပြီးဖြစ်ပါတယ်။ ဒါပေမဲ့ စစ်ကောင်စီကတော့ ပြည်တွင်းမှာ အမှုရင်ဆိုင်နေရသူတွေနဲ့ တွေ့ဆုံခွင့်ပေးဖို့ မဖြစ်နိုင်ဘူးဆိုပြီး တုံ့ပြန်ထားပါတယ်။

   တဖက်မှာလည်း ဘုံသဘောတူညီချက်ကို စစ်ကောင်စီဘက်က ထက်ထက်သန်သန်ပူးပေါင်းဆောင်ရွက်မှု မပြဘူးဆိုတဲ့အချက်နဲ့ အာဆီယံက မနက်ဖြန်မှာကျင်းပမယ့် အဖွဲ့ဝင်နိုင်ငံတွေက ခေါင်းဆောင်တွေရဲ့ထိပ်သီးဆွေးနွေပွဲကို မြန်မာစစ်ခေါင်းဆောင်ကို မဖိတ်ကြားထားပါဘူး။

   စစ်ကောင်စီဘက်ကတော့ အာဆီယံရဲ့ဘုံသဘောတူညီချက်တွေကို တတ်နိုင်သမျှပူးပေါင်းအကောင်အထည်ဖော်မယ်ဆိုပြီး နောက်ဆုံးပြောဆိုထားတာလည်းတွေ့ရပါတယ်။

10. ၂၅ အောက်တိုဘာ ၂၀၂၁မြောင်မြို့နယ်က ကျောက်ရစ်ရဲစခန်းကို PDF ပူးပေါင်းအဖွဲ့တွေ ဝင်တိုက်, စစ်ကောင်စီတပ်ဖွဲ့ဝင် ၅ ဦးထက်မနည်း သေဆုံးနိုင်ချေရှိတယ်လို့ UDLA ပြော

    စစ်ကိုင်းတိုင်း၊ မြောင်မြို့နယ်ထဲက ကျောက်ရစ်ရဲစခန်းကို ဒေသခံပြည်သူ့ကာကွယ်ရေးတပ်ဖွဲ့တွေက အောက်တိုဘာလ ၂၄ ရက် နေ့လည်မှာ ပူးပေါင်းတိုက်ခိုက်ခဲ့တယ်ဆိုပြီး ပြည်ထောင်စုကာကွယ်ရေးနဲ့လွတ်မြောက်ရေးအဖွဲ့(UDLA)က သတင်းထုတ်ပြန်လာပါတယ်။

    မြောင်မြို့နယ်၊ အနောက်ဖက်ခြမ်းကို စစ်ကောင်စီတပ်ဖွဲ့က အင်အား ၁၀၀ခန့်နဲ့ဝင်ရောက်လာလို့ အခုလို တိုက်ခိုက်ခဲ့တာလို့ ဆိုပါတယ်။ ၂

    နာရီကြာမြင့်ခဲ့တဲ့အဲဒီအပြန်အလှန်တိုက်မှုမှာ စစ်ကောင်စီတပ်ဖွဲ့ဝင် အနည်းဆုံး ၅ ဦး အထိသေဆုံးနိုင်ချေရှိပေမဲ့ PDF ဘက်ကတော့ တပ်ဖွဲ့ဝင်တစ်ဦး ပါးကို ကျည်ထိမှန်ခဲ့တယ်လို့ ပြောပါတယ်။ မနေ့က တိုက်ခိုက်မှုကို ဒေသခံကာကွယ်ရေးတပ်ဖွဲ့ ၇ ဖွဲ့ပူးပေါင်းတိုက်ခိုက်ခဲ့တာလို့လည်း ဆိုပါတယ်။

    မြောင်မြို့နယ်ထဲက ကျောက်ရစ်ကျေးရွာအနီးမှာ စက်တင်ဘာလလဆန်းပိုင်းကလည်း စစ်ကောင်စီတပ်တွေနဲ့ ပြည်သူ့ကာကွယ် ရေးတပ်တွေ အပြန်အလှန်ပစ်ခတ်မှုဖြစ်ခဲ့ပြီးနောက်ပိုင်း စစ်ကောင်စီဘက်က ကျေးရွာဘက်ကို ပစ်ခတ်မှုတွေ ပြုလုပ်ခဲ့တာကြောင့် ရွာလုံးကျွတ်နီးပါးဘေးလွတ်ရာထွက်ခဲ့ရတယ်လို့ ဒေသခံတွေက ဘီဘီစီကို ပြောထားဖူးပါတယ်။

    

    ဓာတ်ပုံ ရင်းမြစ်, cj

11. ၂၅ အောက်တိုဘာ ၂၀၂၁ကန်ကြီးထောင့်မြို့မှာ စစ်ကောင်စီတပ်ဖွဲ့၀င်တွေရဲ့ကား ဗုံးပစ်ခံရလို့ ၃ ဦးသေဆုံး

    ဧရာဝတီတိုင်း၊ ကန်ကြီးထောင့်မြို့က ကညင်ငူကျေးရွာ ကားမှတ်တိုင်အနီးမှာ အောက်တိုဘာလ ၂၄ ရက်ညနေပိုင်းတုန်းက စစ်ကောင်စီတပ်ဖွဲ့ဝင်တွေရဲ့ကားပေါ် ဗုံးပစ်ခံရတာကြောင့် စစ်ကောင်စီတပ်ဖွဲ့ဝင် ၃ ဦးသေဆုံးတယ်လို့ ဒေသခံတွေက ပြောပါတယ်။

    ဒေသခံပြောက်ကျားတပ်ဖွဲ့က စစ်ကောင်စီတပ်ဖွဲ့ဝင်တွေပါတဲ့ကားကို မနေ့ညနေ ၆ နာရီဝန်းကျင်က လက်ပစ်ဗုံးနဲ့တိုက်ခိုက်ခဲ့တာလို့ဒေသခံတွေကပြောကြပါတယ်။

    အဲဒီဖြစ်ရပ်ကြောင့် စစ်ကောင်စီတပ်ဖွဲ့ဝင် ၁ ဦး နေရာမှာတင်သေဆုံးခဲ့ပြီး နောက် ၂ ဦးကတော့ ဆေးရုံရောက်မှ သေဆုံးတာဆိုပြီး ဒီဖြစ်စဉ်နဲ့ နီးစပ်သူ မြို့ခံတစ်ဦးက ဘီဘီစီကိုပြောပါတယ်။

    ရန်ကုန်-ပုသိမ်လမ်းမကြီးပေါ်မှာဖြစ်တဲ့မနေ့က ပြောက်ကျားတိုက်ခိုက်မှုမှာ ပြည်သူ့ကာကွယ်ရေးတပ်ဘက်ကရဲဘော်တစ်ဦးလည်း ကျဆုံးခဲ့တယ်လို့ ပုသိမ်မြို့ပြပြောက်ကျားတပ်ဖွဲ့က ဝမ်းနည်းစာထုတ်ပြန်ထားတာတွေ့ရပါတယ်။

    ဧရာဝတီတိုင်းထဲက မြို့တွေမှာ ပြောက်ကျားတပ်ဖွဲ့တွေက ရဲစခန်းတွေအနီးနဲ့ မိုင်တဲလ်တာဝါတိုင်တွေကို ဖောက်ခွဲဖျက်ဆီးမှုတွေလုပ်တာမျိုးရှိပေမဲ့ စစ်ကောင်စီကားကို တိုက်ရိုက်တိုက်ခိုက်မှုလုပ်တာ အခုတစ်ကြိမ်က ပထမဆုံးဖြစ်တယ်လို့ဆိုပါတယ်။

    ကန်ကြီးထောင့်က အခုဖြစ်ရပ်နဲ့ပတ်သက်ပြီး စစ်ကောင်စီဘက်က တစုံတရာသတင်းမထုတ်ပြန်သေးသလို မှတ်ချက်တစုံတရာသိရှိနိုင်ဖို့ ဘီဘီစီက စစ်ကောင်စီသတင်းထုတ်ပြန်ရေးအဖွဲ့ဆီ ဆက်သွယ်နေပါတယ်။

    

    ဓာတ်ပုံ ရင်းမြစ်, CJ

12. ၂၄ အောက်တိုဘာ ၂၀၂၁သံတွဲမှာ လူမှုရေးသမားတစ်ဦးကို ထပ်မံအဖမ်းခံရ

    ရခိုင်ပြည်နယ် သံတွဲမြို့နယ်အတွင်းက လူမှုရေးသမားတစ်ဦးလို့ လူသိများတဲ့ ကိုရဲနိုင်ဦးဟာ အောက်တိုဘာ ၂၃ ရက်နေ့ နေ့လယ် ပိုင်းမှာ ထပ်မံဖမ်းဆီးခြင်းခံလိုက်ရတယ်လို့ သံတွဲဒေသခံတွေက ပြောဆိုကြပါတယ်။

    ဖမ်းဆီးခံရသူ ဦးရဲနိုင်ဦးဟာ သုံးဘီး (တုတ်တုတ်) မောင်းတဲ့အလုပ်ကို လုပ်ကိုင်နေသူဖြစ်ကာ မနေ့က နေ့လယ်ပိုင်းမှာ ငပလီကမ်းခြေမှာ တုတ်တုတ်မောင်းနေချိန် ရဲတပ်ဖွဲ့ရဲ့ဖမ်းဆီးခြင်း ခံလိုက်ရတာဖြစ်တယ်လို့ သိရပါတယ်။

    ဖမ်းဆီးခံရသူ ကိုရဲနိုင်ဦးဟာ သံတွဲမြို့နယ် ငပလီမြို့ လင်းသာရပ်ကွက်ကဖြစ်ပြီး အခုလ ၉ ရက်နေ့က PDF နဲ့ဆက်စပ်တယ် ဆိုကာ ဖမ်းဆီးခြင်းခံလိုက်ရတဲ့ ဦးစိန်ချစ်နဲ့အတူ လူမှုရေးလုပ်ငန်းတွေကို လုပ်ကိုင်နေကြသူတွေထဲက တစ်ဦးလည်း ဖြစ်ပါတယ်။

    PDF တွေကိုအကူအညီပေးတယ်ဆိုပြီး ဖမ်းဆီးအမှုဖွင့်ခံထားရတဲ့ လူမှုရေးသမား ဦးစိန်ချစ်နဲ့ ဆက်စပ်ပြီးတော့ ကိုရဲနိုင်ဦးကို ထပ်မံဖမ်းဆီးသွားတာဖြစ်နိုင်တယ်လို့ ဒေသခံတွေက ယူဆနေကြတပါတယ်။

    အခုလအစောပိုင်းက မအူပင်မြို့မှာ ဖမ်းဆီးရမိတဲ့ PDF ကျောင်းသားအဖွဲ့တစ်ဖွဲ့ဟာ သံတွဲမြို့နယ်အတွင်းကို ရောက်ရှိလာခဲ့ ကြပြီး အဲ့ဒီအဖွဲ့တွေကို ငပလီကမ်းခြေက ဟိုတယ်တစ်ခုမှာ တည်းဖို့အကူညီပေးလိုက်တဲ့အတွက် ဦးစိန်ချစ်ဖမ်းဆီးခံလိုက် ရတာဖြစ်တယ်လို့ သိရှိရပါတယ်။

    လက်ရှိမှာတော့ ဦးစိန်ချစ်ကို အကြမ်းဖက်မှုတိုက်ဖျက်ရေးဥပဒေပုဒ်မ ၅၀ (က) ၅၂ (က) တို့နဲ့ သံတွဲမြို့အခြေစိုက် ခလရ ၅၅ တပ်ရင်းက ဗိုလ်ကြီးအဆင့်ရှိတဲ့အရာရှိတစ်ဦးက သံတွဲမြို့မရဲစခန်းမှာ အမှုဖွင့်ထားတာဖြစ်ပြီး အောက်တိုဘာ ၂၂ ရက်နေ့မှာ ဒုတိယအကြိမ်ရမန်ယူက စစ်ဆေးမှုတွေ ပြုလုပ်နေတယ်လို့ ဇနီးသည် ဒေါ်ခင်နှင်းဖြူက ပြောပါတယ်။

    လောလောဆယ်မှာတော့ ဖမ်းဆီးခံလိုက်ရသူ ကိုရဲနိုင်ဦးဟာ ပြန်လည်လွတ်မြောက်လာခဲ့ခြင်းမရှိသေးသလို မိသားစုတွေနဲ့ လည်း အဆက်သွယ်မရရှိသေးဘူးလို့သိရပါတယ်။

    ဒါ့အပြင် အခုလ ၁၅ ရက်နေ့ကလည်း မြောက်ဦးမြို့နယ် ပန်းမော်ကျေးရွာက လူငယ်စာရေးဆရာတစ်ဦးဖြစ်တဲ့ မင်းဒီပါ (ခ) ကိုအောင်နိုင်မြင့်ကို PDF နဲ့ဆက်စပ်တယ်ဆိုပြီး ရဲတပ်ဖွဲ့က နေအိမ်ကနေ လာရောက်ဖမ်းဆီးသွားခဲ့ပါတယ်။

    

    ဓာတ်ပုံ ရင်းမြစ်, CJ

13. ၂၄ အောက်တိုဘာ ၂၀၂၁ဆေးကျောင်းသား တစ်ဦးဖလမ်းမြို့အနီးမှာ ပစ်သတ်ခံရ

    ရန်ကုန် ဆေးတက္ကသိုလ်(၂)က တတိယနှစ်အမ်ဘီဘီအက်စ် ဆေးကျောင်းသား ကိုနိုင်ထူးလွင်ဟာ စစ်ကောင်စီတပ်တွေက ပြီးခဲ့တဲ့ရက်ပိုင်း ဖလမ်းမြို့အနီးမှာ ပစ်သတ်တာခံခဲ့ရတယ်လို့သိရပါတယ်။

    သူဟာ စစ်အာဏာရှင်စနစ်ကို တော်လှန်ရင်းကျဆုံးသွားကြောင်းကြောင်း ရန်ကုန် ဆေးတက္ကသိုလ်(၂) ကျောင်းသားသမဂ္ဂကလည်း သတင်းထုတ်ပြန်ပါတယ်။

    ကိုနိုင်ထူးလွင်ဟာ CNF ဆေးဌာနမှာ တာဝန်ထမ်းဆောင်နေသူ တစ်ဦးဖြစ်ပြီး ပြီးခဲ့တဲ့အောက်တိုဘာလ ၁၅ ရက်နေ့ခန့်က သေဆုံးခဲ့တာလို့ ယူဆရကြောင်းလည်း CNF ချင်းအမျိုးသား တပ်မတော်က ထုတ်ပြန်ပါတယ်။

    ပြီးခဲ့တဲ့ရက်ပိုင်းက ချင်းပြည်နယ်၊ ဖလမ်းမြို့မှာ ပုပ်ပွနေတဲ့ အလောင်းတစ်လောင်း တွေ့ရှိခဲ့ရာကနေ ကိုနိုင်ထူးလွင် သတ်ဖြတ်ခံခဲ့ရတယ်ဆိုတာ ခြေရာခံသိခဲ့ကြတာ ဖြစ်ပါတယ်။

    စစ်ကောင်စီတပ်တွေဟာ အောက်တိုဘာ ၁၃ ရက်နေ့ဝန်းကျင်က ဖလမ်းမြို့ကနေ ဟားခါးဘက်ကို ချီတက်လာခဲ့ပြီး ဖလမ်းမြို့ရောက်ချိန်က တိုက်ပွဲဖြစ်ပြီး အရပ်သားတွေကို ဖမ်းဆီးပစ်ခတ်ခဲ့တာတွေ ရှိခဲ့ပါတယ်။

    ရန်ကုန်ဆေးတက္ကသိုလ် ၂ ကတော့ ကိုနိုင်ထူးလွင် ကျဆုံးမှုအတွက် ဝမ်းနည်းကြောင်း​ဆိုပြီး ကြေညာချက် ထုတ်ပြန်ထားခဲ့ပါတယ်။

    စစ်ကောင်စီဘက်ကတော့ သူ့ကိုပစ်ခတ်ခဲ့တယ်ဆိုတာနဲ့ ပတ်သက်လို့ သတင်းထုတ်ပြန်တာမျိုးမရှိသေးပါဘူး။

    

    ဓာတ်ပုံ ရင်းမြစ်, CJ

14. ၂၄ အောက်တိုဘာ ၂၀၂၁မုံရွာမြို့ မှာ ပေါက်ကွဲမှုဖြစ်ပြီး ၊ လူတစ်ဦး ပစ်သတ်ခံရ

    မုံရွာမြို့ကားလေးကွင်း အနီးမှာရှိတဲ့ SME ဘဏ်မှာ အောက်တိုဘာလ ၂၄ ရက်နေ့ ညနေပိုင်းမှာ ပေါက်ကွဲမှုဖြစ်ပွားခဲ့ပြီး မအူကြီးကျေးရွာက စစ်ကောင်စီသတင်းပေးလို့ စွပ်စွဲခံရသူတစ်ဦး သေနတ်နဲပစ်သတ်ခံရတယ်လို့ ဒေသခံတွေက ပြောပါတယ်။

    SME ဘဏ် ပေါက်ကွဲမှုဟာ အနောက်မြောက်လွင်ပြင်တော်လှန်ရေးတပ်ဖွဲ့ NPRF သတိပေးဖောက်ခွဲခဲ့တာလို့ ထုတ်ပြန်ပါတယ်။

    အဲ့ဒီဘဏ်ဟာ CDM ဝန်ထမ်းတွေကို ဝန်ထမ်းချေးငွေတွေ အတင်းအဓမ္မပြန်လည်တောင်းခံနေလို့ဖြစ်တယ်လို့လည်း သူတို့ကပြောပါတယ်။

    ဒါ့အပြင် မုံရွာမြို့အနီး မအူကြီးကျေးရွာက စစ်ကောင်စီသတင်းပေးလို့ စွပ်စွဲခံရသူ ဦးကျော်ဆန်းခိုင် ဆိုသူကို မုံရွာလျှပ်စီးအဖွဲ့နဲ့ သံမဏိအဖွဲ့တို့ပူးပေါင်းပြီး သေနတ်နဲ့ ပစ်သတ်ခဲ့တယ်လို့ထုတ်ပြန်ပါတယ်။

    ဒီကနေ့ အောက်တိုဘာလ ၂၄ ရက် မနက်ကလည်း မုံရွာမြို့က မြို့တော်ခန်းမအနီးနဲ့ သူနာပြုသင်တန်းကျောင်းတို့မှာ ပေါက်ကွဲမှုတွေ တစ်ပြိုင်နက်ဖြစ်ခဲ့ပြီး ကလေးနှစ်ဦးသေဆုံးခဲ့တယ်လို့ မြို့ခံတွေက ဘီဘီစီကိုပြောပါတယ်။

    

    ဓာတ်ပုံ ရင်းမြစ်, CJ

15. ၂၄ အောက်တိုဘာ ၂၀၂၁မွန်ပြည်နယ်က NLD မြို့နယ် ရုံး ၃ ရုံး အချိန်ကိုက်ဖောက်ခွဲခံရ

    မြန်မာနိုင်ငံတောင်ပိုင်းဒေသတွေမှာ အောက်တိုဘာလအတွင်း အမျိုးသားဒီမိုကရေစီအဖွဲ့ချုပ်ရုံးတွေ ဆက်တိုက် ဖောက်ခွဲခံလာနေရပါတယ်။

    မနေ့ည အောက်တိုဘာလ ၂၄ ရက်နေ့ကလည်း မွန်ပြည်နယ်ထဲက NLD မြို့နယ် ရုံး ၃ ရုံး အချိန်ကိုက်ဖောက်ခွဲခံရတယ်လို့ ဒေသခံတွေကပြောပါတယ်။

    ဖောက်ခွဲခံရတဲ့ NLD မြို့နယ် ရုံး ၃ ရုံး ကတော့ သထုံ၊ဘီးလင်း နဲ့ကျိုက်ထိုက NLD ရုံးတွေ ဖြစ်ပြီး မနေ့ည သန်းခေါင်ယံမှာ တစ်ချိန်ထဲလိုလို ဖောက်ခွဲခံခဲ့ရတာလို့ပြောပါတယ်။

    စစ်ကောင်စီက ထုတ်ပြန်ချက်မှာတော့ ည ၁၁ နာရီခွဲမှာ သထုံ NLD မြို့နယ် ရုံး ဖောက်ခွဲခံရတယ်လို့ သတင်းထုတ်ပြန်ပါတယ်။

    တနင်္သာရီတိုင်းထဲက မြိတ်နဲ့ ထားဝယ်က NLD ရုံးတွေ ဖောက်ခွဲခံရပြီးတဲ့နောက် ဆက်တိုက်ဆိုသလို ဖောက်ခွဲခံရတာလည်းဖြစ်ပါတယ်။

    ညမထွက်ရအချိန်တွေမှာပေါက်ကွဲတာဖြစ်လို့ ဘယ်သူဖောက်ခွဲမှန်းမသိရပေမယ့် ပေါက်ကွဲမှုတွေရဲ့ ပြင်းအားအရ ကျွမ်းကျင်တဲ့ဖောက်ခွဲရေးသမားတွေလက်ချက်လို့ ဒေသခံတွေက ခန့်မှန်းပါတယ်။

    မတ်လ တုန်းကလည်း ရန်ကုန်က အမျိုးသားဒီမိုကရေစီအဖွဲ့ချုပ်ရုံး မီးကွင်းပစ်ခံခဲ့ရပြီး ပြီးခဲ့တဲ့လပိုင်းတွေအတွင်း ဧရာဝတီတိုင်း၊မန္တလေး၊စဥ့်ကူး၊မတ္တရာနဲ့ တောင်သာ က NLD ရုံးတွေ ဆက်တိုက်ဆိုသလိုဖျက်ဆီးခံခဲ့ရပါတယ်။ လက်ရှိမှာ NLD ပါတီခေါင်းဆောင်ပိုင်းတွေဖမ်းဆီးခံထားရပြီး အများစုကလည်း ဝရမ်းထုတ်ခံထားရလို့ ထွက်ပြေးတိမ်းရှောင်နေရတာဖြစ်ပါတယ်။

    စစ်ကောင်စီဘက်ကတော့ NLD မြို့နယ် ရုံးတွေကို ဒေသလုပ် လက်လုပ်မိုင်းတွေနဲ့ ဖောက်ခွဲခဲ့တာဖြစ်ပြီး ဖောက်ခွဲခဲ့သူတွေကို ဖမ်းမိရေး ဆောင်ရွှက်နေတယ်လို့ သတင်းထုတ်ပြန်ပါတယ်။

    

    ဓာတ်ပုံ ရင်းမြစ်, Social media

16. ၂၄ အောက်တိုဘာ ၂၀၂၁စစ်ကြောရေး ငရဲခန်းကို ကျော်ဖြတ်ခဲ့ရတဲ့ အမျိုးသမီးများ

17. ၂၄ အောက်တိုဘာ ၂၀၂၁ကိုဂျင်မီ မြောက်ဒဂုံမှာ အဖမ်းခံရ

18. ၂၄ အောက်တိုဘာ ၂၀၂၁ချင်းပြည်နယ်က တိုက်ပွဲတွေကြောင့် အိန္ဒိယကို ထွက်ပြေးတိမ်းရှောင်သူ ထောင်နဲ့ချီရှိနေ

    

    ဓာတ်ပုံ ရင်းမြစ်, AFP

    ချင်းပြည်နယ်အတွင်းမှာ စစ်ကောင်စီတပ်တွေနဲ့ ဒေသခံကာကွယ်ရေးတပ်တွေရဲ့တိုက်ပွဲတွေကြောင့် နယ်စပ်ချင်းကပ်လျက်မှာရှိတဲ့ အိန္ဒိယနိုင်ငံထဲက မီဇိုရမ်ပြည်နယ်ထဲကို မြန်မာဒုက္ခသည်တွေ ဝင်လာနေဆဲဆိုပြီး အိန္ဒိယက လာတဲ့သတင်းတွေမှာဖော်ပြပါတယ်။

    လက်ရှိမှာ မီဇိုရမ်ပြည်နယ်ထဲမှာ လာရောက်ခိုလှုံနေတဲ့မြန်မာနိုင်ငံသား ၁ သောင်း ၃ ထောင်နီးပါးအထိရှိနေတယ်လို့ ပြည်နယ်ရဲအရာရှိတစ်ယောက်ရဲ့ပြောစကားကို ကိုးကားပြီး အိန္ဒိယသတင်း ဟိန္ဒူစတန်တိုင်းမ်စ်က သတင်းဖော်ပြပါတယ်။

    အဲဒီထဲက လူပေါင်း တစ်ထောင့် ငါးရာကျော်ရဲ့အချက်အလက်ကိုပဲ စာရင်းရယူထားနိုင်တယ်လို့ အဲဒီအရာရှိက ပြောပါတယ်။

    ဒ့ါအပြင် နိုင်ငံတကာနယ်စပ်အနီးမှာနေထိုင်သူတွေဟာ အိန္ဒိယနိုင်ငံထဲကို နေ့စဉ်အမျှ အဝင်အထွက်ရှိနေတာကြောင့် မီဇိုရမ်ပြည်နယ်ထဲကို ဝင်လာတဲ့မြန်မာအရေအတွက်ဟာ အချိန်နဲ့အမျှ ပြောင်းလဲနေတယ်လို့ သူက ပြောပါတယ်။

    လက်ရှိ မီဇိုရမ်ပြည်နယ်ထဲရောက်နေတဲ့ မြန်မာတွေကို ဒေသခံတွေ၊ ရပ်ရွာခေါင်းဆောင်တွေ၊ အစိုးရမဟုတ်တဲ့အကူအညီပေးရေးအဖွဲ့အစည်းတွေနဲ့ ဘုရားကျောင်းတွေက နေစရာနဲ့ စားစရာ ကူညီထားတယ်လို့ သိရပါတယ်။

19. ၂၄ အောက်တိုဘာ ၂၀၂၁လွိုင်ကော်မှာ ရဲအရာရှိတစ်ဦး သေနတ်ပစ်ခံရပြီး သေဆုံး

    ကယားပြည်နယ် လွိုင်ကော်မြို့က ဗဟိုဈေးမှာ ဒီကနေ့ အောက်တိုဘာလ ၂၄ ရက်နေ့ မနက် ၇ နာရီခွဲခန့်က ရဲအရာရှိတစ်ဦး သေနတ်နဲ့ အပစ်ခံရပြီးသေဆုံးသွားကြောင်း လွိုင်ကော်ဒေသခံတွေက ဘီဘီစီကိုပြောပါတယ်။

    အဲ့ဒီလူဟာ မုန့်ဟင်းခါးဆိုင်အတွင်းမှာရှိနေစဉ် သေနတ်ပစ်ခံရတာဖြစ်ပြီး နေရာမှာပဲ သေဆုံးသွားတယ်လို့ လွိုင်ကော်ဒေသခံတွေက ပြောပါတယ်။

    သေနတ်နဲ့ပစ်ခံရပြီး သေဆုံးခဲ့သူဟာ လွိုင်ကော်မြို့ ရဲတပ်ဖွဲ့က ဒုရဲမှူးတစ်ဦးဖြစ်တယ်လို့ မြို့ခံတွေက ပြောကြပေမယ့် ဘီဘီစီအနေနဲ့တော့ စစ်ကောင်စီဘက်ကို မေးမြန်းအတည်ပြုနိုင်တာမျိုး မရှိသေးပါဘူး။

    သေနတ်နဲ့ပစ်ခတ်မူတွေအပြီး လွိုင်ကော်မြို့ထဲ စစ်ဆေးမေးမြန်းတာအချို့ရှိပြီး လုံခြုရေးတင်းကျပ်ထားတယ်လို့လည်း ဒေသခံတွေက ပြောပါတယ်။

    ဒီပစ်ခတ်မူနဲ့ပတ်သက်ပြီးတော့ ဘယ်အဖွဲ့က ပစ်ခတ်ခဲ့တယ်ဆိုတာကို ထုတ်ပြန်တာမျိုးမရှိသေးဘူး။

    လွိုင်ကော်မှာ အခုရက်ပိုင်းတိုက်ပွဲ အခြေအနေတွေငြိမ်သက်နေပေမယ့် ရှမ်း-ကယားနယ်စပ်အနီး မိုးဗြဲမြို့မှာစစ်ရေးတင်းမာနေပြီး တိုက်ပွဲ ပြင်းထန်လာနိုင်လို့ ဒေသခံတွေက စိုးရိမ်နေကြပါတယ်။

    

    ဓာတ်ပုံ ရင်းမြစ်, Kayah Land

20. ၂၄ အောက်တိုဘာ ၂၀၂၁မြောက်ဒဂုံ ပင်လုံနှင်းဆီအိမ်ရာထဲမှာ ပစ်ခတ်မှုဖြစ်

    

    ဓာတ်ပုံ ရင်းမြစ်, Getty Images

    ရန်ကုန်တိုင်း၊ မြောက်ဒဂုံမြို့နယ်၊ ပင်လုံနှင်းဆီအိမ်ရာထဲမှာ ဒီကနေ့ အောက်တိုဘာ ၂၄ရက် မနက်စောစော သုံးနာရီခွဲအကျော်မှာ ပစ်ခတ်မှုတစ်ခုဖြစ်ခဲ့တယ်လို့ ပစ်ခတ်မှုဖြစ်တဲ့နေရာအနီးနေထိုင်ကြသူတွေကပြောပါတယ်။

    မနက်စောစောအချိန်မှာ ပင်လုံနှင်းဆီအိမ်ရာအနီး ရှုခင်းသာလမ်းနဲ့ ဆရာစံလမ်းထောင့်ကိုဖြတ်မောင်းတဲ့ အငှားယာဉ်ကို အသင့်စောင့်နေတဲ့ စစ်ကောင်စီတပ်ဖွဲ့ဝင်တွေက လိုက်လံပစ်ခတ်တာလို့ အဲဒီအနီးဝန်းကျင် ဒေသခံတွေက ပြောကြပါတယ်။

    '' ဖြောင်းဖြောင်းဖြောင်းနဲ့ ဆက်တိုက်ကိုပစ်တာ၊ မနက်စောစော ပစ်ခတ်မှုဖြစ်ပြီး အဲဒီလမ်းကို ပိတ်လိုက်တယ်။ ဒါပေမယ့် မနက် ၇နာရီကျော်လောက်မှာတော့ပြန်ဖွင့်တယ်။ အခုတော့အားလုံးပုံမှန်ပြန်ဖြစ်နေပြီ။ အရပ်သားတစ်ယောက်သေတယ်။ ဘယ်သူဘယ်ဝါဆိုတာကို ဘယ်သူကမှ သွားမမေးတော့ သေချာတော့မသိဘူး လို့ အဲဒီဖြစ်စဉ်အနီးနေဒေသခံအမျိုးသားတစ်ဦးက ဘီဘီစီကိုပြောပါတယ်။

    ပစ်ခတ်မှုဟာ ပင်လုံပုဂ္ဂလိကဆေးရုံအနီး လမ်းမှာဖြစ်တာကြောင့် ဆေးရုံကို ကျည်ဆံမှန်တာမျိုးရှိပေမယ့် ဆေးရုံအတွင်း အခြားလူထိခိုက်မှုတော့မရှိဘူးလို့ဆိုကြပါတယ်။

    အဲဒီလိုပစ်ခတ်မှုတွေမဖြစ်ခင် ညပိုင်းကတည်းက အဲဒီဝန်းကျင်မှာ စစ်ကောင်စီတပ်တွေကလှည့်ပတ်ကင်းချတာတွေအပြင် အဲဒီညကပဲ ပင်လုံနှင်းဆီအိမ်ရာထဲမှာ ဧည့်စာရင်းစစ်ဆေးခဲ့တယ်လို့ ဒေသခံအဲဒီအမျိုးသားက ဘီဘီစီကိုပြောပါတယ်။

    ပင်လုံနှင်းဆီအိမ်ရာမှာ တပ်မတော်အငြိမ်းစားအဆင့်မြင့် အရာရှိဟောင်းတွေအများစုနေထိုင်ကြတာလည်းများသလို၊ လုပ်ငန်းရှင်၊ ငွေကြေးချမ်းသာသူအများစုလည်းနေထိုင်ကြတဲ့နေရာတစ်ခုဖြစ်တယ်လို့လည်း ဒေသခံတွေရဲ့ ပြောပြချက်အရသိရပါတယ်။