မြန်မာပြည်တွင်းအခြေအနေ အတော်ဆိုးရွားနေတယ်လို့ ကုလအထူးကိုယ်စားလှယ် ပြော

တိုက်ရိုက် ထုတ်လွှင့်ချက်

1. ၂၁ မေ ၂၀၂၁နိုင်ငံရေးတက်ကြွလှုပ်ရှားသူ ဆိုင်းနူးပန်နှင့် လွမ်းဇောင်း အပါအဝင် ၅ ဦး ဖမ်းဆီးခံရ

   နိုင်ငံရေး တက်ကြွလှုပ်ရှားသူ ကချင်လူငယ် နှစ်ဦးဖြစ်တဲ့ ဆိုင်းနူးပန်နှင့် လွမ်းဇောင်း တို့ နှစ်ဦး ဒီကနေ့ နေ့လယ် ၁၂ နာရီကျော်ခန့်က မြစ်ကြီးနားမြို့ ၈ မိုင်ကျေးရွာမှာ ဖမ်းဆီးခံရတယ်လို့ ဆိုင်းနူးပန်ရဲ့ မောင်က ပြောပါတယ်။

   ဆိုင်းနူးပန်ရဲ့အဘိုးဖြစ်သူ အသုဘမြေချပြီး အပြန် စစ်ကောင်စီတပ်ဖွဲ့ဝင်တွေရောက်ရှိလာပြီး ဆိုင်နူးပန်နှင့် လွမ်းဇောင်းတို့နှစ်ဦးကို ကားနဲ့တိုက်ပြီး သေနတ်ထောက် ဖမ်းဆီးသွားတယ်လို့ ပြောပါတယ်။

   ဖမ်းဆီးခံရသူစုစုပေါင်း ၅ယောက်ဖြစ်ပြီးတော့ ၃ယောက်ကတော့ တက်ကြွလှုပ်ရှားသူတွေမဟုတ်ဘူးလို့ ပြောပါတယ်။

   ဘယ်နေရာကို ဖမ်းဆီးခေါ်ဆောင်သွားသည်ကို မသိသေးကြောင်း နဲ့ ကချင် ငြိမ်းချမ်းရေး အကျိုးဆောင်အဖွဲ့ PCG ကိုတော့ အကူအညီတောင်းထားတယ်လို့ ပြောပါတယ်။

   ဆိုင်းနူးပန်ဟာ ကချင်ပြည်နယ်ပြည်သူ့ပါတီက ပြည်သူ့လွှတ်တော်ကိုယ်စားလှယ်လောင်းဖြစ်ပြီး လွမ်းဇောင်းဟာလည်း အဲဒီပါတီက ပြည်နယ်လွှတ်ာတော် ကိုယ်စားလှယ်လောင်းဖြစ်ပါတယ်။

2. ၂၁ မေ ၂၀၂၁မင်းတပ်က လိုအပ်ချက်တွေ ကုလကူညီဖို့ သွားလာခွင့် ခက်ခဲနေတယ်လို့ပြော

   စစ်ကောင်စီတပ်တွေနဲ့ တိုက်ခိုက်မှုတွေ ဖြစ်ခဲ့ပြီး ဒေသခံတွေ ထွက်ပြေးတိမ်းရှောင်နေရတဲ့ ချင်းပြည်နယ် မင်းတပ်မြို့က လိုအပ်ချက်တွေကို ဖြည့်ဆည်းပေးဖို့ လုပ်ဆောင်နေတယ်လို့ မြန်မာနိုင်ငံဆိုင်ရာ ကုလသမဂ္ဂရုံးက ဒီကနေ့ ထုတ်ပြန်ပြောဆိုပါတယ်။

   ဒါပေမဲ့ လုံခြုံရေး၊ လမ်းပိတ်ဆို့မှုနဲ့ သွားလာခွင့်အခက်အခဲတွေကြောင့် အကူအညီပေးရေး နှောင့်နှေးနေတယ်လို့ ဆိုပါတယ်။

   ဒါ့အပြင် အကူအညီပေးရေးအတွက် ကုလနဲ့ လူသားချင်းဆိုင်ရာ အကူအညီပေးနေတဲ့ ကယ်ဆယ်ရေးလုပ်ငန်းလုပ်သူတွေကို သွားလာခွင့်ပေးဖို့ တိုက်တွန်းတယ်လို့လည်း ပြောပါတယ်။

   အဲဒီထုတ်ပြန်ချက်ထဲမှာ လုံခြုံရေးတပ်ဖွဲ့တွေက အရပ်သားတွေကို ခွဲခြားမှု မရှိဘဲ တိုက်ခိုက်တာတွေကြောင့် သေဆုံးမှုတွေ ရှိတာသိရကြောင်းနဲ့ အကြမ်းဖက်မှုရဲ့ အကျိုးဆက်တွေကို စိုးရိမ်နေတယ်လို့လည်း ပြောပါတယ်။

   ဒါ့အပြင် တိုက်ခိုက်သူတွေနဲ့ အရပ်သားတွေကို ပစ်မှတ်ခွဲခြားဖို့နဲ့ အင်အားအလွန်အကျွံမသုံးဖို့ တောင်းဆိုတယ်လို့လည်း ပါရှိပါတယ်။

3. ၂၁ မေ ၂၀၂၁မြောင်က ကျေးရွာတစ်ရွာ ကုန်းရော၊ ရေပါ အဝိုင်းခံရပြီး ရွာသား ၁၅ ဦးထက်မနည်းဖမ်းဆီးခံထားရ

   စစ်ကိုင်းတိုင်း၊ မြောင်မြို့နယ်ထဲက ရွာတစ်ရွာကို စစ်ကောင်စီတပ်တွေက ရေပြင်ကရော၊ မြေမြင်ကပါ ဝိုင်းခဲ့ပြီးတဲ့နောက် ဒီနေ့ မေလ ၂၁ မနက်အစောပိုင်းမှာ ရွာသား ၁၅ ဦးထက်မနည်းကို ဖမ်းဆီးသွားတယ်လို့ ရွာခံတစ်ဦးက ပြောပါတယ်။

   စစ်ကောင်စီတပ်တွေ အဝိုင်းခံခဲ့ရတဲ့ရွာဟာ မြောင်မြို့ကနေ တနာရီလောက် ခရီးပေါက်တဲ့ ဧရာဝတီမြစ် အနောက်ဘက်ခြမ်းနဲ့ကပ်လျက်က ချောင်းဆင်းရွာငယ်လေးက ဖြစ်ပြီး စစ်ကောင်စီတပ်တွေလာတယ်ဆိုတဲ့သတင်းကြောင့် ရွာသားတွေ ညအချိန်မတော် ထွက်ပြေးခဲ့ကြပေမဲ့ တောထဲအထိ ဝင်အဖမ်းခံခဲ့ရတာလို့ ဒေသခံတစ်ဦးက ပြောပါတယ်။

   ''ကျတော်တို့ ကျေးရွာမှာ ကာကွယ်ရေးစခန်းရှိတယ်ဆိုပြီး သတင်းကြောင့် ဒီလိုဝင်တာလို့ ကြားတယ်။ တကယ်လည်း မရှိပါဘူး။ ဆန္ဒပြတာတွေတောင် မရှိသလောက်နည်းနေပြီ။ စစ်ကောင်စီတပ်တွေက ကျနော်တို့ ရွာနဲ့ကပ်လျက် နံဂါးပေါက်ရွာမှာ ကားတွေထားခဲ့ပြီး ဝင်လာတာ။ ဧရာဝတီမြစ်ထဲကလည်း သင်္ဘော ၃ စင်းနဲ့ လာကြတယ်။'' လို့ ဒေသခံ တစ်ဦးက ပြောပါတယ်။

   ဖမ်းဆီးခံထားရသူတွေကို မြောင်ကို ခေါ်သွားတယ်လို့ နောက်ဆုံးသိရပြီး ချောင်းဆင်းရွာခံတွေကို ပိတ်ဖမ်းဖို့ ဧရာဝတီမြစ် အရှေ့ဘက်ကမ်းက ရွာတွေကိုလည်း ဝင်ရောက်ရှာဖွေနေတယ်လို့ သိရပါတယ်။

   ပြီးခဲ့တဲ့ရက်ပိုင်းတုန်းကလည်း မြောင်မြို့နယ်ထဲက ရွေပေါက်ပင်ကျေးရွာမှာ ကျေးရွာဥက္ကဋ္ဌ၊ သမီး၊သားနဲ့မြေးဖြစ်သူတို့ တိုက်ခိုက်ခံရပြီး သေဆုံးတဲ့ ဖြစ်ရပ် ဖြစ်ခဲ့ပါသေးတယ်။

4. ၂၁ မေ ၂၀၂၁ကုန်းလောမှာ ညပိုင်းတိုက်ပွဲဖြစ်

   ကချင်ပြည်နယ်မှာရှိတဲ့ မိုးမောက်မြို့နယ်ထဲက ကုန်းလောရွာမှာ စစ်ကောင်စီတပ်ဖွဲ့ဝင်တွေနဲ့ ကချင်လွတ်မြောက်ရေးတပ်ဖွဲ့ (KIA)တို့ အပြန်အလှန် ပစ်ခတ်မှုတွေ ဆက်ရှိနေတယ်လို့ ဒေသခံတွေက ပြောပါတယ်။

   မနေ့ မေလ ၂၀ ရက်ညကဆိုရင် ည ၉ နာရီလောက်ကစပြီး ၁၂ နာရီလောက် အထိ ၃ နာရီကြာ ပစ်ခတ်မှုတွေရှိခဲ့တယ်လို့ ဒေသခံတွေက ပြောပါတယ်။

   ''အိမ်တွေတော့ လက်နက်ကြီးတွေရော၊ လက်နက်သေးတွေကြောင့်ရော ထိခိုက်သွားတာရှိတယ်။ လူတွေက ပုန်းနေကြတော့ အိမ်တွေကို ထိမှန်တဲ့အချိန်မှာ လူထိခိုက်မှု မရှိခဲ့ဘူး။ နွားတစ်ကောင်တော့ သေသွားတယ်'' လို့ ဒီနေ့ လည်ပိုင်းမှ အပျက်အစီးတွေရှိရာကို မှတ်တမ်းယူဖို့ရောက်နေတဲ့ ဒသေခံ တစ်ဦးက ဘီဘီစီကို ပြောပါတယ်။

   စစ်အာဏာသိမ်းပြီးတဲ့နောက် မိုးမောက်မြို့နယ်ထဲက ကုန်းလော၊ စီဟက်၊ မြို့သစ်၊ မခွယ် စတဲ့ရွာတွေမှာ စစ်ကောင်စီတပ်တွေနဲ့ KIA တို့ကြားက တိုက်ပွဲတွေကြောင့် ဒေသခံရာချီ မိုးမောက်မြို့ထဲနဲ့ အနီးနားက ရွာကြီးတွေမှာ သွားရောက်ခိုလှုံနေကြရပါတယ်။

5. ၂၁ မေ ၂၀၂၁ဂျပန်က အကူအညီတွေရပ်ဖို့ စဉ်းစားနေ

   မြန်မာနိုင်ငံမှာ စစ်အာဏာသိမ်းမှု ကန့်ကွက်ဆန္ဒပြသူတွေကို စစ်ကောင်စီတပ်ဖွဲ့တွေက အကြမ်းဖက် ဖိနှိပ်ဖြိုခွဲနေတဲ့အတွက် မြန်မာနိုင်ငံကို ဂျပန်က ပေးနေတဲ့ အထောက်အပံ့တွေအားလုံးကို ဆိုင်းငံ့ထားဖို့ စဉ်းစားနေတယ်လို့ ဂျပန်နိုင်ငံခြားရေးဝန်ကြီး တိုရှီမစ်ဆု မိုတက်ဂီက ပြောပါတယ်။

   မြန်မာနိုင်ငံအတွက် အထောက်အပံ့သစ်တွေ ထပ်မပေးဖို့ ဂျပန်အစိုးရက ဆိုင်းငံ့ထားပြီး ဖြစ်ပေမဲ့ ဒီကန့်သတ်ချက်ကို ထပ်တိုးလုပ်သွားဖွယ် ရှိတယ်လို့ မစ္စတာ မိုတက်ဂီက နစ်ကေး သတင်းစာကို ထုတ်ဖော်ပြောခဲ့ပါတယ်။

   ဂျပန်နိုင်ငံဟာ မြန်မာနိုင်ငံအတွက် စီးပွားရေး အထောက်အပံ့ အများဆုံး ပေးနေတဲ့ နိုင်ငံ ဖြစ်ပြီး မြန်မာစစ်တပ်နဲ့ ကာလတာရှည် ဆက်ဆံရေး ထားရှိခဲ့တာပါ။ ထိန်းသိမ်းထားတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ပြန်လွှတ်ပေးဖို့နဲ့ မြန်မာနိုင်ငံမှာ ဒီမိုကရေစီ ပြန်လည်ဆောင်ကြဉ်းပေးဖို့ အာဏာသိမ်း စစ်ကောင်စီကို ဂျပန်အစိုးရက တောင်းဆိုလိုက်ပါတယ်။

6. ၂၁ မေ ၂၀၂၁တက္ကသိုလ်တွေ၊ကောလိပ်တွေမှာ ထီလက်မှတ်ကို ဈေးလျှော့ရောင်းဖို့ ပြင်နေ

   အဆင့်မြင့်ပညာရေးအောက်မှာရှိတဲ့ တက္ကသိုလ်၊ကောလိပ်တွေက ထီထိုးလိုသူတွေအနေနဲ့ ထီလက်မှတ် ၁၁ စောင်ကို ၁၀ စောင်နှုန်းထားနဲ့ မှာနိုင်တယ်လို့ဆိုပြီး အဆင့်မြင့်ပညာဦးစီးဌာနက စာတစ်စောင်ထုတ်လာပါတယ်။

   အောင်ဘာလေသိန်းဆုဌာနကနေ လစဉ်မှာနိုင်တယ်ဆိုတဲ့အဲဒီစာကို တက္ကသိုလ်၊ ကောလိပ်တွေက ပါမောက္ခချုပ်ကြီးတွေ၊ ကျောင်းအုပ်ကြီးတွေကို ဖြန့်ဝေဖို့ ဆိုတဲ့ ညွှန်ကြားချက်ကို တွေ့ရပါတယ်။

   ထီရောင်းအားကျဆင်းတယ်ဆိုပြီး စစ်ကောင်စီပြောခွင့်ရသူက မကြာသေးခင်တုန်းက ပြုလုပ်တဲ့ နေပြည်တော်သတင်းစာရှင်းလင်းပွဲမှာ သတင်းထောက်တွေမေးခွန်းကို ပြန်ဖြေခဲ့ပြီးချိန်မှာ အခုလို ထီတစ်စောင်အပိုပေး ရောင်းချမယ့် အစီအစဉ်ထွက်လာတာလည်းဖြစ်ပါတယ်။

   အောင်ဘာလေ ထီလက်မှတ်ရောင်းချငွေကို နိုင်ငံ့အခွန်ငွေနဲ့ ဆုကြေးငွေအဖြစ်ပိုင်းခြားထုတ်ပေးတာဖြစ်လို့ စစ်တပ်က ဖေဖော်ဝါရီလ ၁ ရက်မှာ အာဏာသိမ်းချိန်ကစလို့ စစ်ကောင်စီဆီ အခွန်တွေ မရောက်အောင် ထီမထိုးဖို့ လူထုက လှုံ့ဆော်မှုတွေ ဖြစ်ခဲ့ပါတယ်။

   အဲဒီနောက်မှာ လစဉ်လတိုင်း ၁ ရက်နေ့မှာ ထွက်လေ့ရှိတဲ့အောင်ဘာလေထီဟာသက်တမ်းတစ်လျှောက် ပထမဆုံးအကြိမ်အနေနဲ့ ၁၅ ရက်နောက်ကျပြီး မတ်လ ၁၅ ရက်မှာ ထီဖွင့်နိုင်ခဲ့ပါတယ်။

7. ၂၁ မေ ၂၀၂၁NLD ပါတီ ဖျက်သိမ်းဖို့ စဉ်းစားဆောင်ရွက်သွားမယ်လို့ ရွေးကော် ဥက္ကဋ္ဌ ပြောလာ

   ပြီးခဲ့တဲ့ ၂၀၂၀ အထွေထွေရွေးကောက်ပွဲမှာ ပြည်ထောင်စုအစိုးရအဖွဲ့နဲ့ အာဏာပိုင်တွေ ဝင်ရောက်စွက်ဖက်တဲ့အထောက်အထားတွေကို သတင်းစာတွေမှာဖော်ပြခဲ့ပြီဖြစ်ပြီး မကြာမီမှာ မဲစာရင်းတွေစစ်ဆေးပြီးစီးမှာ ဖြစ်သလို အဲဒီလို ဥပဒေနဲ့မညီ ကြိုတင်ကြံစည်ဆောင်ရွက်ခဲ့တဲ့ NLD ပါတီကို ဖျက်သိမ်းဖို့နဲ့ ဆောင်ရွက်ခဲ့တဲ့ပုဂ္ဂိုလ်တွေကို နိုင်ငံတော်သစ္စာဖောက်အဖြစ် စစ်ဆေးစဉ်းစားဆောင်ရွက်သွားမယ်လို့ ပြည်ထောင်စုရွေးကောက်ပွဲကော်မရှင် ဥက္ကဋ္ဌ ဦးသိန်းစိုးက ပြောလိုက်ပါတယ်။

   "အဲဒီလို ဥပဒေနဲ့မညီ ကြိုတင်ကြံစည်ဆောင်ရွက်ခဲ့တဲ့ NLD ပါတီကို ဘယ်လိုလုပ်မလဲ၊ ပါတီကို ဖျက်မလား။ ဆောင်ရွက်ခဲ့တဲ့ပုဂ္ဂိုလ်တွေသည် နိုင်ငံတော်သစ္စာဖောက်အနေနဲ့ အရေးယူရမလား။ စစ်ဆေး စဉ်းစားဆောင်ရွက်မှာဖြစ်ပါတယ်" လို့ သူက ပြောကြားခဲ့တာဖြစ်ပါတယ်။

   ဒီနေ့ မေ ၂၁ ရက်မှာ နေပြည်တော်က ပြည်ထောင်စုရွေးကောက်ပွဲကော်မရှင်မှာ ပြုလုပ်တဲ့ နိုင်ငံရေးပါတီတွေနဲ့တွေ့ဆုံပွဲမှာခုလိုပြောကြားလိုက်တာဖြစ်ပါတယ်။ တွေ့ဆုံပွဲကို ဒီနေ့မနက် ၉ နာရီခန့်မှာပြုလုပ်ခဲ့တာဖြစ်ပြီး နိုင်ငံရေးပါတီ ၉၁ ပါတီကို ဖိတ်ကြားခဲ့တဲ့အနက် ဘယ်နှပါတီတက်ရောက်တယ်ဆိုတာတော့ မသိရသေးပါဘူး။ဒါပေမဲ့ အမျိုးသားဒီမိုကရေစီအဖွဲ့ချုပ် NLD၊ ရှမ်းတိုင်းရင်းသားများဒီမိုကရေစီအဖွဲ့ချုပ် SNLD နဲ့ချင်းအမျိုးသားဒီမိုကရေစီအဖွဲ့ချုပ် CNLD တို့ကတော့ တက်ရောက်ခြင်းမရှိပါဘူး။

8. ၂၁ မေ ၂၀၂၁ဒီမော့ဆိုမြို့မှာ စစ်ကောင်စီတပ်ဖွဲ့ဝင်တွေနဲ့ ပြည်သူ့ကာကွယ်ရေးအဖွဲ့တွေ ပစ်ခတ်မှုဖြစ်နေ

   ကယားပြည်နယ်၊ ဒီမော့ဆိုမြို့က ဒေါငံခါးရပ်ကွက် နဲ့ မားနားပလော့ရပ်ကွက်တွေမှာ ဒီနေ့ မေလ ၂၁ ရက် မနက်ပိုင်းမှာ စစ်ကောင်စီတပ်ဖွဲ့ဝင်တွေက ပစ်ခတ်တာတွေ လုပ်နေတယ်လို့ ဒေသခံတွေဆီက သိရပါတယ်။

   ဒီပစ်ခတ်မှုတွေ ဘာ့ကြောင့်ဖြစ်တယ်ဆိုတာ မသိရပေမဲ့ တိုးတက်သော ကရင်နီပြည်သူ့အင်အားစု(PKPF)ကတော့ စစ်ကောင်စီတပ်တွေက ရပ်ရွာအတွင်း နယ်မြေကျူးကျော်လာတာကြောင့် ပြန်လည်ခုခံတိုက်ပွဲဖြစ်နေတယ်ဆိုပြီး သတင်းထုတ်ပြန်ပါတယ်။

   ဒီမနက်ဖြစ်တဲ့ပစ်ခတ်မှုတွေမှာ အရပ်သား တချို့ဖမ်းဆီးခံရတာ၊ နောက် စစ်ကောင်စီဘက်က လက်နက်ကြီးနဲ့ အချက်ရေမနည်း ပစ်ခတ်တာတွေ လုပ်နေတယ်ဆိုတဲ့သတင်းတွေ ထွက်ပေါ်နေပေမဲ့ ဘီဘီစီက သီးခြားအတည်မပြုနိုင်သေးပါဘူး။

9. ၂၁ မေ ၂၀၂၁ကမ္ဘာ့ဖလားခြေစစ်ပွဲအတွက် မြန်မာ့လက်ရွေးစင်ဘောလုံးအသင်း ဂျပန်နိုင်ငံသို့ ထွက်ခွာ

   စစ်အာဏာသိမ်းမှုနောက် ကစားသမားတွေကြား သဘောထားကွဲလွဲမှုတွေရှိနေတဲ့ မြန်မာ့လက်ရွေးစင်ဘောလုံးအသင်းဟာ ဒီကနေ့ မေလ ၂၁ ရက်မနက်ပိုင်းက ကမ္ဘာ့ဖလားခြေစစ်ပွဲ ယှဉ်ပြိုင်ဖို့ဂျပန်နိုင်ငံကိုထွက်ခွာသွားပြီ ဖြစ်ပါတယ်။

   လက်ရှိအချိန်ထိ မြန်မာနိုင်ငံဘောလုံးအဖွဲ့ချုပ်အနေနဲ့ သွားရောက်ယှဉ်ပြိုင်မယ့် လက်ရွေးစင်ကစားသမားစာရင်းကို တရားဝင်ထုတ်ပြန်တာမရှိသေးပါဘူး။

   မြန်မာ့လက်ရွေးစင်ဘောလုံးအသင်းဟာ ၂၀၂၂ ဖီဖာ ကမ္ဘာ့ဖလား (ကာတာ) ခြေစစ်ပွဲနဲ့ ၂၀၂၃ အာရှဖလား ခြေစစ်ပွဲတွေအတွက် ဒုတိယအဆင့် ခြေစစ်ပွဲ အုပ်စု(F)ကို ဆက်လက်ယှဉ်ပြိုင်ရဖို့ရှိနေတာပါ။

   ခြေစစ်ပွဲတွေကို ၂၀၁၉ ခုနှစ်က စတင်ကာ ယှဉ်ပြိုင်ခဲ့တာဖြစ်ပြီး ကိုဗစ်ကပ်ရောဂါကြောင့် ​ခေတ္တရပ်နားထားခဲ့ရတာပါ။

   လက်ရှိအချိန်အထိ လက်ရွေးစင်အသင်းဟာ အုပ်စုပွဲ (၅)ပွဲ ကစားထား ခဲ့ပြီးဖြစ်ပါတယ်။

   အုပ်စု အနေအထားအရ မြန်မာ အသင်းဟာ လက်ရှိ အဆင့်(၄)နေရာမှာ ရောက်ရှိနေပြီး ဂျပန်၊ ကာဂျစ်စ္စတန်၊ တာဂျီကစ္စတန် အသင်းတို့နဲ့ ဆက်လက် ယှဉ်ပြိုင်ဖို့ရှိနေတာပါ။ အဲဒီလက်ကျန် ၃ ပွဲကို ဂျပန်နိုင်ငံ မှာ မေလ ၂၈ ရက် ကနေ ဇွန်လ ၁၅ ရက်အထိ သွားရောက် ကစားကြမှာပါ။

   မြန်မာအသင်းနည်းပြဂျာမဏီနိုင်ငံသား အန်တိုနီဟေးကတော့ နှစ်ပေါင်း ၅၀ ကျော်ကြာ ဝေးကွာနေတဲ့ အာရှဖလားပြိုင်ပွဲကို တက်ရောက် ကစားခွင့်ရဖို့ဒါဟာ အခွင့်အရေးဖြစ်လို့ လက်လွတ်မခံသင့်ဘူးလို့ပြောထားပါတယ်။

   ဒါပေမယ့် မြန်မာ့လက်ရွေးစင် အများစုကတော့ စစ်အာဏာသိမ်းဆန့်ကျင်တဲ့အနေနဲ့ ကစားဖို့ငြင်းဆန်ထားကြတာပါ။

10. ၂၁ မေ ၂၀၂၁စစ်ကောင်စီပေါ်အရေးယူပိတ်ဆို့မှု တိုးလုပ်ဖို့ ကုလလူ့အခွင့်အရေးကျွမ်းကျင်သူ တိုက်တွန်း

    ကမ္ဘာ့တခြားနိုင်ငံတွေဟာ အမေရိကန်၊ ဗြိတိန်နဲ့ ကနေဒါ နိုင်ငံတို့ နည်းတူ မြန်မာစစ်တပ်ကို အရေးယူပိတ်ဆို့မှု တိုးလုပ်ဖို့ ကုလသမဂ္ဂလူ့အခွင့်ရေးကောင်စီရဲ့ မြန်မာနိုင်ငံဆိုင်ရာလူ့အခွင့်အရေးအစီရင်ခံစာတင်သွင်းသူ တွန် အမ်ဒရူးက ပြောလာပါတယ်။

    အမေရိကန်ပြည်ထောင်စုက စစ်ကောင်စီအပါအဝင် လူပုဂ္ဂိုလ် ၁၆ ဦးကို အရေးယူ ပိတ်ဆို့လိုက်တာ၊ စစ်တပ်ကို သစ်နဲ့ကျောက်မျက်ကုန်သွယ်မှုတွေကနေ အကျိုးအမြတ်မရအောင် ပစ်မှတ်ထားလိုက်တဲ့ ဗြိတိန်နဲ့ ကနေဒါ နိုင်ငံတို့ရဲ့ အရေးယူ ပိတ်ဆို့မှုအသစ်တွေကို ကြိုဆိုတဲ့အကြောင်းပြောရင်း သူက အခုလို တိုက်တွန်းလိုက်တာပါ။

    ''အမေရိကန်၊ ဗြိတိန်နဲ့ ကနေဒါနိုင်ငံတို့ကပြုလုပ်လိုက်တဲ့ ချိတ်ဆက်မှုရှိတဲ့ဒီပိတ်ဆို့မှုအသစ်တွေက ကြိုဆိုရမယ့် တိုးတက်မှုဖြစ်ပါတယ်။ ဒီပိတ်ဆို့မှုတွေကနေ တခြားနိုင်ငံတွေပါ ပါဝင်လာပြီး မြန်မာပြည်သူတွေအပေါ် ဖိနှိပ်မှုတွေလုပ်နေတဲ့ စစ်တပ်အတွက် အင်အားအပြင်းဆုံးထိုးနှက်ချက် တစ်ခုဖြစ်လာဖို့ မျှော်လင့်တယ်'' လို့ သူက ကုလသမဂ္ဂသတင်းဌာနကို ပြောပါတယ်။

    ဒါ့ပြင် လက်ရှိစစ်ကောင်စီရဲ့ဝင်ငွေရရှိနိုင်မှုဟာ အကန့်အသတ်ရှိနေပြီး ရေနံနဲ့သဘာဝဓာတ်ငွေ့ ရောင်းချမှုကနေ အသက်ဆက်နေတာလို့ သူက ထောက်ပြပါတယ်။

    အရင်စစ်အစိုးရတွေဟာ ဒီနည်းလမ်းနဲ့ပဲ နိုင်ငံတကာပိတ်ဆို့မှုတွေကို ခံနိုင်စေခဲ့တယ်လို့လည်း သူက ဆိုပါတယ်။

    ဒါ့ကြောင့် တရားမဝင် အာဏာသိမ်းပြီး လူ့အခွင့်အရေးကို ချိုးဖောက်မှုတွေကိုလုပ်နေတဲ့ မြန်မာစစ်ခေါင်းဆောင်တွေကို ပိတ်ဆို့မှုတွေ လုပ်မယ်လို့ ဆိုတဲ့ နိုင်ငံတွေ အနေနဲ့လည်း ခြေလှမ်းစဖို့ အချိန်ကျပြီလို့ သူက တိုက်တွန်းထားပါတယ်။

11. ၂၁ မေ ၂၀၂၁မင်းတပ်က စစ်ဘေးရှောင်ထောင်ချီအတွက် အကူအညီတွေ လိုအပ်နေ

    ချင်းပြည်နယ်၊ မင်းတပ်မြို့မှာ စစ်ကောင်စီတပ်တွေရဲ့ ထိုးစစ်ကြောင့် မြို့ထဲကနေ အနီးနားဝန်းကျင်က ကျေးရွာတွေဆီ ထွက်ပြေးခိုလှုံနေရတဲ့ အရပ်သား ထောင်နဲ့ချီရှိနေတယ်လို့ ဘီဘီစီက သိရှိရပါတယ်။

    တချို့ဆိုရင် အသက်ဘေးအတွက် ပြေးလွှားခဲ့ရတာဖြစ်လို့ ဘာကိုမှ မသယ်နိုင်ခဲ့ဘဲ တောတောင်တွေထဲမှာ စားနပ်ရိက္ခာမရှိ၊ အိပ်စရာ မရှိ ကျော်ဖြတ်နေကြရတယ်လို့ ဒေသခံတချို့က ပြောပါတယ်။

    အခုလို ထွက်ပြေးနေကြရသူတွေထဲ သက်ကြီးရွယ်အိုတွေ၊ အမျိုးသမီးတွေနဲ့ ကလေးသူငယ်တွေ အများအပြားပါဝင်နေပါတယ်။ အများစုဟာ ယာယီတဲတွေ ထိုးနေနေကြရပြီး စားစရာ မလုံလောက်တဲ့အခြေအနေ ရှိနေပါတယ်။

    ဒီအခြေအနေအတွက် ဒေသတွင်း လူမှုအကူအညီပေးနိုင်ဖို့ ကြိုးစားနေပေမဲ့ နိုင်ငံတကာအကူအညီလိုအပ်နေတယ်လို့ လှုပ်ရှားတက်ကြွသူ တချို့က ပြောပါတယ်။

    မင်းတပ်က အရပ်သားတွေကို စစ်ကောင်စီတပ်တွေက အင်အားသုံးတိုက်ခိုက်တာကြောင့် အသက်ဆုံးရှုံးမှုတွေနဲ့ လူထောင်ချီ အိုးအိမ်စွန့်ခွါထွက်ပြေးနေရတဲ့ အခြေအနေကို စိုးရိမ်တယ်လို့ ရန်ကုန်မှာရှိတဲ့ ပြင်သစ်သံရုံးက ကြေညာချက် ထုတ်ပြန်ပါတယ်။

    မင်းတပ်မြို့ထဲက အရပ်သားတွေဟာ ရေနဲ့ လျှပ်စစ်ဓာတ်အားမရှိဘဲ နေနေကြရတယ်ဆိုတဲ့သတင်းတွေကြောင့် ဒီလို အခြေခံလိုအပ်ချက်တွေအပါအဝင် လူသားချင်းစာနာထောက်ထားမှု အကူအညီတွေကို ပြည်သူတွေဆီ အမြန်ဆုံးပို့ပေးနိုင်ဖို့ လို အပ် နေတယ်လို့ ပြင်သစ်သံရုံးက တိုက်တွန်းနေပါတယ်။

    မင်းတပ်မှာ ဆန္ဒပြစာတန်းချိတ်သူတချို့ကို စစ်ကောင်စီတပ်တွေက ဖမ်းဆီးမှုဖြစ်ခဲ့ပြီးတဲ့နောက် ဒီလူတွေ ပြန်လွတ်ရေး ညှိနှိုင်မှုလုပ်ခဲ့ပေမဲ့ မအောင်မြင်ခဲ့အပြီးမှာ ဒေသခံ ကာကွယ်ရေးတပ်ဖွဲ့နဲ့ စစ်ကောင်စီတပ်တွေကြား တိုက်ပွဲတွေ ဖြစ်ခဲ့တာပါ။

    အဲဒီနောက် စစ်ကောင်စီက မင်းတပ်ကို မေလ ၁၃ ရက်မှာ စစ်အုပ်ချုပ်ရေးကြေညာခဲ့ပါတယ်။

    မေလ ၁၃ ရက်နဲ့ ၁၄ ရက်တွေမှာ မင်းတပ်အနီးနားမှာ စစ်ကောင်စီတပ်ဖွဲ့ဝင်တွေ တိုက်ခိုက်ခံရမှုဖြစ်ပြီးတဲ့နောက် မေလ ၁၅ ရက်မှာ စစ်ကောင်စီဘက်က မင်းတပ်ကို မြေပြင်မှာရော၊ ရဟတ်ယာဉ်သုံး ဗုံးကြဲပြီး ဝေဟင်ကပါ ထိုးစစ်ဆင်ခဲ့တာဖြစ်ပါတယ်။

12. ၂၀ မေ ၂၀၂၁ဂျပန်က မြန်မာသံရုံး ဝန်ထမ်းနှစ်ဦး ရာထူးက ထုတ်ပယ်ခံရ

    ဂျပန်နိုင်ငံ တိုကျိုမြို့တော်မှာ ရှိတဲ့ မြန်မာသံရုံးက စစ်အာဏာသိမ်းမှုကို ဆန့်ကျင်တဲ့ သံအမှုထမ်း ၂ ဦးကို စစ်ကောင်စီကရာထူးကနေ ထုတ်ပယ်လိုက်တယ်လို့ ကျိုဒို သတင်းဌာနက ကြာသပတေးနေ့မှာ ဖော်ပြထားပါတယ်။

    သံအရာရှိ ဦီး အောင်စိုးမိုးနဲ့ နောက်ထပ် သံ အမှုထမ်း တယောက်ဟာ အာဏာသိမ်းမှုကို ဆန့်ကျင်ဆန္ဒပြခဲ့တာကြောင် ထုတ်ပယ်ခံလိုက်ရတာ ဖြစ်တယ်လို့ ဆိုပါတယ်။

    ပေါက်ကြားလာတဲ့ စာရွက်စာတမ်း တခုအရ ကမ္ဘာတဝန်းမှာ တာဝန်ထမ်းဆောင်နေကြတဲ့ မြန်မာ သံအမှုထမ်း ၁၀၀ ဝန်းကျင်ဟာ စစ်အာဏာသိမ်းမှုကို ဆန့်ကျင်တာကြောင့် တာဝန်တွေကနေ အနားပေးခံခဲ့ရတယ်လို့ ကျိုဒိုက ဆိုပါတယ်။ မြန်မာနိုင်ငံမှာ ပြီးခဲ့တဲ့ ဖေဖော်ဝါရီလက ဒေါ်အောင်ဆန်းစုကြည် ခေါင်းဆောင်တဲ့ ပြည်သူလူထုက တင်မြှောက်ထာတဲ့ အစိုးရကို စစ်တပ်က အာဏာသိမ်းပြီး နောက်ပိုင်းမှာ ဒါကို ဆန့်ကျင် ဆန္ဒပြမှုတွေ အကြီးအကျယ် ရှိနေကာ ပြည်တွင်းက ဆန့်ကျင်မှုတွေကိုတော့ စစ်ကောင်စီက အင်အားသုံးပြီး ဖြိုခွဲနှိမ်နင်းတာတွေကို လုပ်နေပါတယ်။

    ဒီ တိုကျိုသံရုံး အမှုထမ်း ၂ ယောက်ကတော့ ပြီးခဲ့တဲ့ မတ်လ ၁၁ ရက်နေ့ကတည်းက ဖေ့စ်ဘုတ်ခ်မှာ အာဏာသိမ်း စစ်ကောင်စီကို ငြိမ်းချမ်းစွာ ဆန့်ကျင်ဆန္ဒပြ မှုတွေကို ထောက်ခံကြောင်း တင်ခဲ့ကြပြီး သံရုံးထဲက ထွက်သွားခဲ့ကြတယ်လို့ ကျိုဒိုက ပြောပါတယ်။

    ဒီလူတွေက တာဝန်ကနေ နုတ်ထွက်သွားတာ မဟုတ်ပေမယ့် သူတို့ရဲ့ သံတမန် အဆင့်နဲ့ နိုင်ငံကူးလက်မှတ်တွေ ပယ်ဖျက်ခံခဲ့ရပြီး အခုတော့ တိုကျိုမြို့မှာ မြန်မာ အသိုင်းအဝိုင်းရဲ့ အကူအညီနဲ့ နေထိုင်နေကြပါတယ်။

    မြန်မာသံရုံးက ဂျပန် နိုင်ငံခြားရေး ဝန်ကြီး ဌာနကို ဒီ သံအမှုထမ်း ၂ ဦးရဲ့ သံတမန် ဗီဇာတွေ ပျက်ပြယ်ပြီး ဖြစ်ကြောင်း အကြောင်းကြားခဲ့တယ်လို့ ဂျပန် အစိုးရရဲ့ ပြောရေးဆိုခွင့်ရ ပုဂ္ဂိုလ် ကတ်ဆုနိုဘူ ကာတိုက ကြာသပတေးနေ့မှာ သတင်းထောက်တွေကို ပြောကြားခဲ့ပါတယ်။

    မစ္စတာ ကာတိုက နိုင်ငံခြားရေး ဝန်ကြီး​ဌာန အနေနဲ့ လက်ရှိ မြန်မာ့အခြေအနေတွေကို သုံးသပ်ပြီး ဒီ ကိစ္စနဲ့ပတ်သက်လို့ ဘယ်လို တုံ့ပြန်ဆောက်ရွက်ရမယ် ဆိုတာကို စဥ်းစားနေတဲ့ အကြောင်း ပြောပါတယ်။

    ဂျပန်ဟာ မြန်မာပြည်မှာ အာဏာသိမ်းခဲ့တဲ့ လုပ်ရပ်ကို ဝေဖန်ရှုတ်ချခဲ့သလို ဒီမိုကရေစီ ပြန်လည် ကျင့်သုံးဖို့ တောင်းဆိုထားပါတယ်။ ဒါပေမယ့် ဒီထက်ပိုပြီး ထိထိရောက်ရောက် ကိုင်တွယ်ဆောင်ရွက်ဖို့ ဖိအားတွေနဲ့ ရင်ဆိုင်နေရပါတယ်။ အခုကိစ္စနဲ့ ပတ်သက်လို့ တိုကျိုမြို့ မြန်မာသံရုံးကို ဆက်သွယ်ဖို့ ကြိုးစားခဲ့ပေမယ့် အဆက်အသွယ်မရခဲ့ဘူလို့ ဆိုပါတယ်။

    ပြီးခဲ့တဲ့ ဧပြီလ အတွင်းကလည်း လန်ဒန်မြို့မှာ ရှိတဲ့ မြန်မာသံရုံးကို စစ်ကောင်စီလိုလားတဲ့ သံအမှုထမ်းတွေက စီးနင်းခဲ့လို့ ဒေါ်အောင်ဆန်းစုကြည်ကို လွှတ်ပေးဖို့ တောင်းဆိုခဲ့တဲ့ မြန်မာသံအမတ် သံရုံးထဲ ဝင်မရ ဖြစ်ခဲ့ရပါတယ်။

    နောက်ပြီး စစ်ကောင်စီကို ဆန့်ကျင်မှုတွေ ရှိတဲ့ ကုလသမဂ္ဂနဲ့ ဂျာမနီက ဘာလင်မြို့တော်မှာ ရှိတဲ့ သံရုံးတွေမှာလည်း အလားတူ ခြိမ်းခြောက်မှုတွေနဲ့ ကြုံခဲ့ရပါတယ်။

    ဂျပန်ဟာ မြန်မာနဲ့ ခိုင်မာတဲ့ စီးပွားရေး ဆက်ဆံမှုတွေ ရှိသလို စစ်တပ်နဲ့လည်း ကာလရှည် ဆက်ဆံရေးတွေ ရှိနေတဲ့ နိုင်ငံတနိုင်ငံ ဖြစ်ပါတယ်။ ပြီးခဲ့တဲ့ သီတင်းပတ်အတွင်းကလည်း စစ်အာဏာသိမ်းမှု ဆန့်ကျင် ဆန္ဒပြပွဲတွေကို သတင်းယူနေခဲ့တဲ့ ဂျပန် သတင်းထောက်ကို ဖမ်းဆီးထားရာကနေ နှစ်နိုင်ငံ ဆက်ဆံရေးကို အလေးထားတဲ့ သဘောနဲ့ ပြန်လွှတ်ပေးခဲ့ပါတယ်။

    ဂျပန်ဟာ မြန်မာကို အကူအညီတွေ များစွာ ပေးနေတဲ့ နိုင်ငံတနိုင်ငံလည်း ဖြစ်ပြီး ပြီးခဲ့တဲ့ မတ်လက စစ်အာဏာသိမ်းမှုကို တုံ့ပြန်တဲ့ အနေနဲ့ နောက်ထပ် အကူအညီသစ်တွေ ထပ်မပေးတော့ဘူးလို့ ကြေညာခဲ့ပါတယ်၊ ဒါပေမယ့် တခြား နိုင်ငံတွေလို စစ်တပ်နဲ့ ရဲ တပ်ဖွဲ့က အရာရှိကြီးတွေအပေါ် ပိတ်ဆို့ အရေးယူတာမျိုးတွေကိုတော့ ချမှတ်တာမျိုး မလုပ်ခဲ့ပါဘူး။

13. ၂၀ မေ ၂၀၂၁စစ်ကိုင်းမှာ နေအိမ်တွေထဲရှာဖွေဖမ်းဆီးမှု ၁၀ ဦး ဖမ်းဆီးခံရ

    စစ်ကိုင်းမြို့မှာ စစ်ကောင်စီကနေ အရပ်ဝတ်တွေနဲ့ နေအိမ်တွေထဲ ဝင်ရောက်ရှာဖွေဖမ်းဆီးတာတွေရှိပြီး ဒီနေ့ မေလ ၂၀ ရက်မှာ ပြည်သူ ၁၀ဦးဖမ်းဆီးခံရတယ်လို့ ဒေသခံတွေက ပြောပါတယ်။

    "မနေ့ည ပေါက်ကွဲမှုတွေဖြစ်ပြီးကတည်းက သူတို့ထင်တဲ့နေရာ အိမ်တွေကို တံတားခေါက်ပြီး ဝင်စစ် ဖမ်းတော့တာပဲ။ ဒီနေ့ နေ့လယ် ၂နာရီမှာ သူတို့လိုချင်တဲ့လူနှစ်ယောက်မရလို့ အဲဒီအိမ်က မြို့နယ်တရားသူကြီး အငြိမ်းစားကို ဓားစာခံဖမ်းခေါ်သွားတယ်။ အဲ့အိမ်မှာ လက်လုပ်ဗုံးတွေ့တယ်ဆိုပြီး အမှုဆင်တာပဲ" လို့ စစ်ကိုင်းမြို့ဒေသခံ တစ်ဦးက ပြောပါတယ်။

    အဘိုးဖြစ်သူ ဖမ်းဆီးခေါ်ဆောင်ခံရတဲ့ စစ်ကိုင်းမြို့ဒေသခံတစ်ဦးက " ပထမတစ်ခေါက်လာရှာတယ်။ ဘာမှ မတွေ့ဘူး။ သိပ်မကြာဘူး နောက်တခေါက် လာရှာပြီး ဗုံးတွေ့တယ်ဆိုပြီး အဘိုးကို ခေါ်သွားတာ။ ဒါကြီးက အမှုဆင်ခေါ်သွားတာ။ လက်လုပ်မိုင်းတွေ့တယ်ဆိုပြီး ခေါ်သွားတာ။ အိမ်မှာ ယမ်းမှုန့်တောင် မရှိပါဘူး။ မတရားသဖြင့်ခေါ်တာ။ အဘိုးက အသက်ကြီးပြီ ခါးမကောင်းဘူး"လို့ ဒီနေ့ဖြစ်စဉ်တွေကို ပြောပါတယ်။

    မေလ ၁၉ရက်ညပိုင်း ၈နာရီကျော်လောက်က စစ်ကိုင်းဈေးရှေ့၊ အထက ၂ရှေ့၊ တောင်ပေါ်လမ်းတခုမှာ ပေါက်ကွဲမှုဖြစ်စဉ်တွေ ရှိခဲ့ပါတယ်။

    စစ်ကိုင်းဈေးရှေ့ပေါက်ကွဲမှုမှာ စစ်ကောင်စီဘက်က သုံးဦး ဒဏ်ရာရ ထိခိုက်သွားတယ်လို့ သိရကြောင်း ဈေးအနီးနေထိုင်သူတွေက ပြောပါတယ်။

    အဲ့ဒီကိစ္စနဲ့ပက်သက်ပြီး ညပိုင်း ဆိုင်ကယ်မောင်းလာသူ နှစ်ယောက်ကိုလည်း ဖမ်းဆီးထားပါတယ်။

    ဒီနေ့မှာ စစ်ကိုင်းမြို့ ပါရမီရပ်ကွက် နဲ့ စစ်အာဏာသိမ်း ဆန့်ကျင်ဆန္ဒပြရာမှာ ဓာတ်ပုံထဲပါခဲ့တဲ့ လူငယ်တွေကို တွေ့တဲ့နေရာမှာ ဖမ်းဆီးခေါ်ဆောင်သွားလို့ လူ ၁၀ဦးပါသွားတယ်လို့ စစ်ကိုင်းနည်းပညာတက္ကသိုလ် ကျောင်းသားများ သမဂ္ဂအဖွဲ့ဝင်တစ်ဦးက ပြောပါတယ်။

    လက်ရှိမှာ စစ်ကိုင်းမြို့အဝင်နေရာနဲ့ လမ်းဆုံ လမ်းမကြီးတွေမှာ အရပ်ဝတ်တွေနဲ့ အသွင်ယူ စောင့်ကြည်တာတွေ ရှိနေလို့ စစ်အာဏာသိမ်း ဆန့်ကျင်ဆန္ဒပြတာတွေလည်း မရှိဘူးလို့ ဆိုပါတယ်။

14. ၂၀ မေ ၂၀၂၁ရွေးကော်နဲ့မတွေ့မီ နိုင်ငံရေးပါတီ ၂၄ ပါတီ ကြံ့ခိုင်ရေးရုံးချုပ်မှာတွေ့, တရားဥပဒေစိုးမိုးရေးနဲ့ လုံခြုံရေးကိစ္စဆွေးနွေးခဲ့တယ်လို့ဆို

    စစ်ကောင်စီက ဖွဲ့စည်းထားတဲ့ ရွေးကောက်ပွဲ ကော်မရှင်သစ်နဲ့ နိုင်ငံရေးပါတီတွေ မနက်ဖြန်တွေ့ကြဖို့ ရှိနေပြီး အဲဒီတွေ့ဆုံမှုမတိုင်ခင် ဒီကနေ့ နိုင်ငံရေးပါတီ ၂၄ ပါတီ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီရုံးချုပ်မှာတွေ့ခဲ့တယ်လို့ အဲဒီပါတီက သတင်းထုတ်ပြန်ပါတယ်။

    နေပြည်တော်မှာ ပြုလုပ်တဲ့ အဲဒီဆွေးနွေးပွဲကို ဘယ်ပါတီတွေ တက်ရောက်တယ်ဆိုတာ အသေးစိတ်မဖော်ပြထားပေမဲ့ စစ်ကောင်စီမှာ အဖွဲ့ဝင်အဖြစ်ပါဝင်ထားတဲ့ ဦးသိန်းညွန့်ရဲ့ အမျိုးသားဒီမိုကရေစီပါတီသစ်လည်း အဲဒီ ၂၄ ပါတီမှာ ပါဝင်တာကို တွေ့ရပါတယ်။

    ဒီကနေ့တွေ့ဆုံပွဲမှာ မြန်မာနိုင်ငံမှာ ဖြစ်ပေါ်နေတဲ့ တရားဥပဒေစိုးမိုးရေးနဲ့ လုံခြုံရေးကိစ္စတွေကို ဆွေးနွေးကြတယ်လို့ ဆိုပါတယ်။

    မနက်ဖြန် ရွေးကောက်ပွဲကော်မရှင်နဲ့ တွေဆုံမှုမှာတော့ ၈၈ မျိုးဆက်ကျောင်းသားခေါင်းဆောင်တစ်ဦးဖြစ်တဲ့ ဦးကိုကိုကြီးရဲ့ ပြည်သူ့ပါတီလည်း တက်ရောက်ဖို့ရှိပါတယ်။

    လက်ရှိမှာ တရားဝင် ရပ်တည်နေတဲ့ နိုင်ငံရေးပါတီ ၉၁ ပါတီရှိပြီး အမျိုးသားဒီမိုကရေစီအဖွဲ့ချုပ် NLD ပါတီကိုလည်း မနက်ဖြန်တွေ့ဆုံပွဲကို ဖိတ်ကြားတယ်လို့ ရွေးကောက်ပွဲ ကော်မရှင်က ပြောထားပါတယ်။

15. ၂၀ မေ ၂၀၂၁တနိုင်းက ယုဇန ပီလောပီနံစက်ရုံ တိုက်ခိုက်ခံရ

    ကချင်ပြည်နယ် တနိုင်းမြို့နယ် ဆန်တော်ကျေးရွာအနီးက ယုဇနကုမ္ပဏီပိုင် ပီလောပီနံစက်ရုံ ဒီနေ့မနက် ၃ နာရီလောက်က တိုက်ခိုက်ခံခဲ့ရတယ်လို့ ဒေသခံတွေနဲ့ မြန်မာ့အသံနဲ့ ရုပ်မြင်သံကြား သတင်းထုတ်ပြန်ချက်အရ သိရပါတယ်။

    အဲဒီတိုက်ခိုက်မှုကို မနက် ၃ နာရီလောက်မှာ ဖားကန့်မြို့နယ် ရှဒူးဇွပ် ကျေးရွာကနေ လက်နက်သံတွေ ကြားရတဲ့အကြောင်း ဒေသခံတွေက ပြောပါတယ်။

    ပစ်ခတ်သံ ၅ ချက် လောက်ကြားခဲ့ရပြီး အဲဒီအသံတွေကို ကျယ်ကျယ်လောင်လောင်၊ နီးနီးကပ်ကပ်ကြားရသလို ရှိတယ်လို့ ဒေသခံတစ်ဦးက ဘီဘီစီကို ပြောပါတယ်။

    ယုဇနကုမ္ပဏီကို စစ်တပ်ကျောထောက်နောက်ခံရှိတဲ့ကုမ္ပဏီလို့လည်း ဒေသခံအများစုက ယူဆထားတာပါ။

    ဒီတိုက်ခိုက်မှုကို ကေအိုင်အေက တိုက်ခိုက်တာဖြစ်တယ်လို့ အဲဒီရုပ်မြင်သံကြား သတင်းမှာ စွပ်စွဲပြောထားပြီး ကေအိုင်အေဘက်ကတော့ တစ်စုံတစ်ရာပြောကြားတာ မရှိသေးပါဘူး။

    အဲဒီတိုက်ခိုက်မှုမှာ ကေအိုင်အေ ဘက်ဟိုးယာဥ် သုံးစီးနဲ့ ဖျက်ဆီးခဲ့တယ်လို့လည်း ရုပ်သံသတင်းမှာ ပြောသွားပါတယ်။

    ဒီတိုက်ခိုက်မှုကြောင့် အုတ်တံတိုင်း ၁၅၀ ပေ၊ ကားဂိုဒေါင် နှစ်လုံး၊ စက်ယန္တရားဂိုဒေါင် တစ်လုံး၊ လူနေအဆောက်အအုံ လေးလုံး၊ ဝန်ထမ်းအိမ်ရာ သုံးလုံးနဲ့ မော်တော်ယာဥ်တစ်စီးတို့ ပျက်စီးခဲ့တယ်လို့ အဲဒီသတင်းမှာ ဖော်ပြခဲ့ပါတယ်။

16. ၂၀ မေ ၂၀၂၁ရုရှားရဲ့ ရဟတ်ယာဥ်ပြပွဲ မြန်မာလေတပ် ဗိုလ်ချုပ်ကြီးတက်

    ရုရှားနိုင်ငံ မော်စကိုမှာ ကျင်းပတဲ့ ရဟတ်ယာဥ် ပြပွဲကို မြန်မာ စစ်တပ်က ကာကွယ်ရေးဦးစီးချုပ် (လေ) ဗိုလ်ချုပ်ကြီးမောင်မောင်ကျော်နဲ့အဖွဲ့ တက်ရောက်နေပါတယ်။ ဒါဟာ အာဏာသိမ်းပြီးတဲ့နောက် ရုရှားကို တပ်မတော်အဆင့်မြင့်အရာရှိကြီးတစ်ဦး ပထမဆုံးအကြိမ်သွားရောက်တဲ့ ခရီးစဥ်ဖြစ်ပါတယ်။

    အဲဒီ ပြပွဲဟာ နိုင်ငံပေါင်း ၅၀ ကျော်တက်ရောက်မယ့် HeliRussia ဟာ ရုရှားနိုင်ငံရဲ့ အကြီးဆုံး ရဟတ်ယာဥ်ပြပွဲဖြစ်ပြီး မေလ ၂၀ ကနေ ၂၂ ရက်အထိ ပြုလုပ်မယ့် ဒီပြပွဲကို မြန်မာလေတပ်ဗိုလ်ချုပ်ကြီး တက်‌ရောက်မယ်လို့ ရုရှားအ‌ခြေစိုက် မီဒီယာတွေကရေးသားနေကြတာ ဖြစ်ပါတယ်။

    အဲဒီပြပွဲမှာ ရုရှားက နောက်ဆုံးထုတ် Ka-52 နဲ့ Mi-28NE တိုက်ခိုက်ရေး ရယာဥ်တွေနဲ့အတူ ဘက်စုံသုံး ရဟတ်ယာဥ်တွေကို ပြသထားမယ်လို့ ရှရှားမီဒီယာတွေမှာ ဖော်ပြထားပါတယ်။

    ဒါ့အပြင် ရုရှားအစိုးရ လက်နက် ထုတ်လုပ်ရောင်းချရေးလုပ်ငန်းထုတ် ဒရုမ်းတွေလည်း ပြပွဲမှာ ပြသထားမယ်လို့ ဆိုပါတယ်။

    ဧရာဝတီသတင်းဌာနရဲ့သတင်းဖော်ပြချက်မှာ ဒီပြပွဲကိုသွားရောက်တဲ့ မြန်မာအဖွဲ့မှာ ရုရှားနဲ့အဆက်သွယ်ကောင်းတဲ့ နာမည်ကြီးခရိုနီ ဦးတေဇလည်းပါတယ်လို့ ဆိုပါတယ်။

    စစ်တပ်က အာဏာမသိမ်းခင် ဇန်နဝါရီလအတွင်း မြန်မာနိုင်ငံကိုလာရောက်ခဲ့တဲ့ ရုရှားကာကွယ်ရေးဝန်ကြီးရဲ့ နေပြည်တော်ခရီးစဥ်မှာ ရုရှားက မြန်မာကို လေကြောင်းရန်ကာကွယ်ရေး ဒုံးကျည်စနစ်တွေ၊ ထောက်လှမ်းရေးသုံးဒရုမ်းတွေနဲ့ ရေဒါစနစ်တွေရောင်းဖို့ သဘောတူခဲ့တယ်လို့ရုရှားမီဒီယာတွေကဖော်ပြခဲ့ကြပါတယ်။

    လေတပ် ဦးစီးချုပ်ရဲ့ဒီခရီးစဥ်ဟာ ဒီကိစ္စတွေနဲ့ သက်ဆိုင်မှုရှိမရှိ စစ်ရေးအကဲခတ်တွေက စောင့်ကြည့်နေကြပါတယ်။

    ရဟတ်ယာဥ်နဲ့ပတ်သက်ရင် မြန်မာလေတပ်ဟာ ရုရှားရဲ့အဓိက ဖောက်သည်လည်းဖြစ်ပါတယ်။

    အဲဒါနဲ့ ပတ်သက်ပြီး တပ်မတော်နဲ့နီးစပ်တဲ့ သေနင်္ဂမဟာဗျူဟာလေ့လာရေးအဖွဲ့က ‌ဒေါက်တာနိုင်ဆွေဦးက တပ်မတော်မှာ သုံးတဲ့ ရဟတ်ယာဥ်တွေ အားလုံးနီးပါးက ရရှားရဟတ်ယာဥ်တွေ ဖြစ်တယ်၊ ဒီလို ပြပွဲတွေသွားရောက်မှ ခေတ်မီလက်နက်တွေကို မျက်ဝါးထင်ထင်တွေ့မြင်ရမှာ ဖြစ်ပြီး အနာဂတ်အတွက် စဥ်းစားပြင်ဆင်နိုင်မယ်လို့ ဆိုပါတယ်။

    စစ်တပ်က အာဏာသိမ်းပြီးကတည်းက တိုက်ပွဲတွေ ပြန်ပြင်းထန်တဲ့ ကချင်ပြည်နယ်နဲ့ ကရင်ပြည်နယ်ထဲမှာ လေကြောင်းကနေ ပစ်ခတ်တိုက်ခိုက်မှုတွေလုပ်ခဲ့ပါတယ်။

    ဒါပေမဲ့ မေလဆန်းပိုင်းက ကချင်ပြည်နယ် မိုးမောက် မြို့နယ်မှာ စစ်တပ်ရဲ့ ရဟတ်ယာဥ်တစ်စင်းကို ကေအိုင်အေက ပစ်ချခဲ့ပါတယ်။ စစ်တပ်က လေကြောင်းကနေ ပြင်းပြင်းထန်ထန်တိုက်ခိုက်တာ ခံခဲ့ရတယ်လို့ ကေအိုင်အေဘက်က ပြောပါတယ်။

    မြန်မာစစ်တပ်ဟာ စစ်လက်နက်ဝယ်ယူမှုအပြင် ပညာတော်သင်စေလွှတ်မှုအပိုင်းမှာပါ ရုရှားကိုအားထားပါတယ်။ ရုရှားကာကွယ်ရေးဒုဝန်ကြီးဟာ အာဏာသိမ်းပြီးမှလုပ်တဲ့ တပ်မတော်နေ့အခမ်းအနားကိုတောင် လာတက်ခဲ့ပါသေးတယ်။

    ကုလသမဂ္ဂလုံခြုံရေကောင်စီအနေနဲ့လည်း မြန်မာနိုင်ငံအပေါ် လက်နက်ရောင်းချမှုပိတ်ပင်တဲ့ ဆုံးဖြတ်ချက်ကို ချက်ချင်းပြဌာန်းဖို့ ကမ္ဘာ့အဖွဲ့အစည်းပေါင်း ၂၀၀ ကျော်က မေလဆန်းက တောင်းဆိုခဲ့ပါသေးတယ်။ ဒါပေမဲ့

    မြန်မာစစ်တပ်ကို လက်နက်ရောင်းချမှု အမြန်ဆုံးဆိုင်းငံ့ဖို့ ဆုံးဖြတ်ချက်မူကြမ်းတစ်စောင် ထွက်လာရေးကုလအစည်းအဝေးကို မေလ ၁၈ ရက်မှာ ပြုလုပ်ဖို့ရှိခဲ့ပေမဲ့ ရက်အကန့်အသတ်မရှိ ရွှေ့ဆိုင်းခဲ့ပါတယ်။

17. ၂၀ မေ ၂၀၂၁မြန်မာ လေယာဉ်ဆီတွေ စင်္ကာပူကနေ တင်သွင်းတဲ့ အချက်အလက်တွေတွေ့

    စင်္ကာပူ နိုင်ငံက PetroChina International Singapore Pte Ltd ကပြီးခဲ့တဲ့ ဧပြီလအတွင်းက မြန်မာနိုင်ငံကို လေယာဥ်ဆီတွေ ရောင်းချခဲ့တာကို တွေ့ရတယ်လို့ အစိုးရရဲ့ သွင်းကုန်ဆိုင်ရာ အချက်အလက်တွေကို လေ့လာခဲ့တဲ့ ရိုက်တာ သတင်းဌာနက ပြောပါတယ်။

    ပြီးခဲ့တဲ့ ဖေဖော်ဝါရီလက စစ်တပ်က အာဏာသိမ်းပြီးနောက်ပိုင်း ဒီလို ကုန်တင်သွင်းမှုကို ပထမဆုံးအကြိမ် လုပ်ခဲ့တာ ဖြစ်ပါတယ်။

    တင်ပို့ရောင်းချသူတွေက သူတို့ရောင်းတဲ့ ဂျက်လေယာဥ်ဆီတွေကို အရပ်ဘက် လေကြောင်းလိုင်းတွေမှာ သုံးဖို့ အပြင် အာဏာသိမ်းမှုကို ဆန့်ကျင်တဲ့ ပြည်သူတွေကို ကူညီပေးနေတဲ့ တိုင်းရင်းသား လက်နက်ကိုင်တွေကို ဗုံးကြဲတိုက်ခိုက်မှုတွေ လုပ်တဲ့ နေရာမှာ သုံးနိုင်တာကိုလည်း ကောင်းကောင်း သိနားလည်ကြတဲ့ အကြောင်း လုပ်ငန်းတွေနဲ့ နီးစပ်တဲ့ အသိုင်းအဝိုင်းက ပြောပါတယ်။

    ဒီလို ရောင်းချမှုကြောင့် မြန်မာ့အရေးမှာ တရုတ်ရဲ့ ပါဝင်ပတ်သက်မှုတွေနဲ့ ပတ်သက်လို့ မေးခွန်း ထုတ်စရာတွေ ပိုဖြစ်လာနိုင်ပါတယ်။ အာဏာသိမ်းမှုကို ဆန့်ကျင်သူတွေက တရုတ်ဟာ အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကို ကူညီထောက်ပံ့ပေးနေတယ်ဆိုတဲ့ စွပ်စွဲမှုတွေ ရှိနေပြီး တရုတ်ဘက်တော့ ငြင်းဆန်ထားပါတယ်။

    တရုတ် နိုင်ငံခြားရေးဌာနက ဒီရောင်းချမှုနဲ့ ပတ်သက်လို့ တစုံတရာမှတ်ချက်ပေး ပြောကြားတာမျိုး မလုပ်ပါဘူး။ PetroChina ကုမ္ပဏီကို တရုတ် နိုင်ငံပိုင် China National Petroleum Corporation က ထိန်းချုပ်ထားတာ ဖြစ်ပြီး ကုမ္ပဏီဘက်ကလည်း ဒီဂျက်လေယာဥ်ဆီ ရောင်းချမှုတွေနဲ့ ပတ်သက်လို့ ဘာမှ တုံ့ပြန်ပြောကြားတာ မလုပ်ပါဘူး။

    ထုတ်ပြန်ကြေညာခြင်း မရှိသေးတဲ့ ကုန်ပစ္စည်း တင်သွင်းမှု ဆိုင်ရာ အချက်အလက်တွေထဲမှာ PetroChina International ရဲ့ ဂျက်လေယာဉ်ဆီ တန်ချိန် ၁၃,၃၀၀ နဲ့ ဓာတ်ဆီ တန်ချိန် ၄,၀၀၀ ကို ဆီတင်သင်္ဘော MT Yu Dong က ပြီးခဲ့တဲ့ ဧပြီလ ၁၅ ရက်နေ့မှာ သီလဝါ ဆိပ်ကမ်းမှာ ချပေးခဲ့တယ်လို့ ဖော်ပြထားပါတယ်။

    အမေရိကန်နဲ့ ဗြိတိန်အပါအဝင် အနောက်နိုင်ငံတွေက မြန်မာနိုင်ငံမှာ အရပ်သားတွေကို အကြမ်းဖက်သတ်ဖြတ်မှုတွေ လုပ်နေတဲ့ စစ်ကောင်စီ အပေါ် ဝေဖန် ပြစ်တင်ရှတ်ချ ခဲ့ကြသလို အကန့်အသတ်နဲ့ ပိတ်ဆို့ အရေးယူမှုတွေကိုလည်း ချမှတ်ခဲ့ကြပါတယ်။ ဒါပေမယ့် ဒီလို ရေနံထွက် ပစ္စည်းတွေ ရောင်းချတာနဲ့ ပတ်သက်လို့ နိုင်ငံတကာက ပိတ်ပင်တားမြစ်ထားမျိုး မရှိသေးပါဘူး။

    မြန်မာပါဝင်တဲ့ အာဆီယံ အဖွဲ့ကလည်း ပြီးခဲ့တဲ့ ဧပြီလအတွင်းက ထုတ်ပြန်ချက်မှာ မြန်မာနိုင်ငံအတွင်း အကြမ်းဖက်မှုတွေရပ်ပြီး တွေ့ဆုံ ဆွေးနွေးကြဖို့ တောင်းဆိုတာမျိုး လုပ်ခဲ့ပေမယ့် ပိတ်ဆို့ အရေးယူမှုတွေ လုပ်ဖို့ ပြောတာမျိုးတော့ မတွေ့ရပါဘူး။

18. ၂၀ မေ ၂၀၂၁ကမ်းထောင်းကြီးမြို့မီးလောင်၊ အိမ် ၁၄ လုံး ပျက်စီး

    ရခိုင်ပြည်နယ် မြောက်ပိုင်း မြေပုံမြို့နယ် ကမ်းထောင်းကြီးမြို့မှာ မေလ ၂၀ ရက် ဒီကနေ့ မနက်ပိုင်း ၃ နာရီကျော်အချိန်က မီးလောင်မှုဖြစ်ပွားခဲ့ပြီး နေအိမ် ၁၄ ဆောင် မီးလောင်ပျက်စီးသွားခဲ့တယ်လို့ စာရေးဆရာ မောင်ချယ်ရီက အတည်ပြုပြောဆိုပါတယ်။

    မီးလောင်မှုဖြစ်စဉ်အတွင်း နေအိမ် ၁၄ ဆောင်မှာ လုံးဝလောင်ကျွမ်းသွားခဲ့ပြီး နောက်ထပ်ငါးဆောင်ကတော့ တစ်ဝက်တစ်ပျက်လောင်ကျွမ်းသွားခဲ့ကာ မီးဘေးဒဏ်သင့်မိသားစုထဲက ကျား ၃၁ ဦး၊ မ ၃၇ ဦး၊ စုစုပေါင်း ၆၈ ဦးတို့ဟာ ဆွေမျိုးတွေရဲ့နေအိမ်တွေမှာ ယာယီခိုလှုံနေကြရတယ်လို့ ဆိုပါတယ်။

    မီးစတင်လောင်ကျွမ်းခဲ့တာဟာ ကမ်းထောင်ကြီးမြို့ တောင်ပိုင်းရပ်ကွက်အတွင်းက မုန့်ရောင်းတဲ့နေအိမ်မှာ မနက်အရုဏ်တက်ချိန် ၃ နာရီကျော်မှာ မုန့်ကြော်ရန်တည်ထားတဲ့ ဆီအိုးကနေတစ်ဆင့်စတင်လောင်ကျွမ်းခဲ့တာဖြစ်တယ်လို့ ရခိုင်ပြည်နယ်မီးသတ်တပ်ဖွဲ့က ထုတ်ပြန်ထားပါတယ်။

    မီးလောင်မှုဖြစ်ပွားခဲ့တဲ့နေရာနဲ့ မီးသတ်တပ်ဖွဲ့တည်ရှိတဲ့နေရာဟာ နှစ်မိုင်ခန့်ကွာဝေးပြီး မီးလောင်မှုဖြစ်စဉ်ကို နံနက် ၄ နာရီ ၅ မိနစ်မှ သတင်းရရှိတဲ့အတွက် သွားရောက်မီးငြိမ်းသတ်ခဲ့ရာ နံနက် ၅ နာရီ ၁၀ မိနစ်မှာ မီးငြိမ်းသွားခဲ့တယ်လို့ မီးသတ်တပ်ဖွဲ့ရဲ့ ထုတ်ပြန်ချက်မှာ ရေးသားထားပါတယ်။

    ကမ်းထောင်းကြီးမြို့မှာ အိမ်ခြေသုံးထောင်ကျော်ရှိပြီး မြေပုံမြို့နဲ့အမ်းမြို့နယ်အကြားမှာ တည်ရှိတဲ့မြို့တစ်မြို့လည်း ဖြစ်ပါတယ်။

19. ၂၀ မေ ၂၀၂၁ရခိုင်မှာ ကိုဗစ် ၁၉ ရောဂါပိုးအသစ်ကူးစက်ခံရသူတွေတိုးလာ

    ကိုဗစ် ၁၉ ရောဂါ ဒုတိယလှိုင်း အစပြုခဲ့ရာ ရခိုင်ပြည်နယ်မှာ အခုလအတွင်း ကိုဗစ်ပိုးအသစ်ကူးစက်ခံရသူတွေ စစ်ဆေးတွေ့ရှိထားတယ်လို့ ပြည်နယ်ကျန်းမာရေးဌာနနဲ့ ဒေသန္တရအာဏာပိုင်တွေက အတည်ပြုပြောကြားပါတယ်။

    လတ်တလောမှာ ကိုဗစ် ရောဂါပိုးအသစ်ကူးစက်ခံထားရသူ ငါးဦးကို မေလ အစောပိုင်မှာစစ်ဆေးတွေ့ရှိခဲ့ပြီး စစ်တွေမြို့ပြည်သူ့ဆေးရုံကြီးမှာ သီးသန့်ထားရှိကာ ဆေးဝါးကုသမှုတွေပြုလုပ်ပေးနေတယ်လို့ ပြည်နယ်ကုသရေးဌာနမှူး ဒေါက်တာကြည်လွင်က ဘီဘီစီကိုပြောပါတယ်။

    အခုလအစောပိုင်းက ဘင်္ဂလားဒေ့ရှ်နိုင်ငံ တက္ကနာ (ကယုချောင်း)ဆိပ်ကမ်းကနေ စစ်တွေမြို့ ရွှေမင်းဂံကုန်သွယ်ရေးစခန်းကို ပြန်လည်ရောက်ရှိလာခဲ့တဲ့ ရေယာဉ် ငါးစီးက ရေယာဉ်လုပ်သား လေးဆယ်ဦးခန့်ကို အသွားအလာကန့်သတ်ထားရှိပြီး သုံးရက်မြောက်နေ့မှာ တို့ဖတ်နမူနာတွေကို ဓာတ်ခွဲစမ်းသတ်ခဲ့ရာမှာ အဲ့ဒီထဲက လေးဦးမှာကိုဗစ်ပိုးကူးစက်ခံထားရကြောင်း တွေ့ရှီခဲ့တာဖြစ်ပါတယ်။

    အဲ့ဒီရေယာဉ်လုပ်သားတွေကို စစ်ဆေးတဲ့အခါမှာ မေလ ၁၀ ရက်နေ့က လေးဦးတွေ့ရှိခဲ့ပြီး ၁၂ ရက်နေ့မှာ ဒုတိယအကြိမ်စစ်ဆေးတဲ့အခါမှာ နောက်ထပ်တစ်ဦးတွေ့ရှိကာ ၁၄ ရက်နေ့မှာ တတိယမြောက်စစ်ဆေးတဲ့အခါမှာ နောက်ထပ်တစ်ဦးကိုထပ်မံတွေ့ရှိခဲ့တာဖြစ်တယ်လို့ ပြည်နယ်ကုသရေးဌာနမှူး ဒေါက်တကြည်လွင်က ပြောပါတယ်။

    အဲ့ဒီပိုးကူးစက်ခံထားရသူတွေဟာ အသက် ၅၀ နဲ့ ၆၀ အကြားအရွယ် အမျိုးသားတွေဖြစ်ကြပြီး လောလောဆယ်မှာတော့ ဘာလက္ခဏာမှမပြသလို ကျန်းမာရေးလည်းကောင်းမွန်နေကြတယ်လို့ဆိုပါတယ်။

    ဒေသတွင်းနိုင်ငံတွေမှာ အခုလို မျိုးဗီဇပြောင်းဗိုင်းရပ်စ်ပိုးအသစ်တွေ ကူးစက်ခံရတဲ့တတိယလှိုင်းဖြစ်ပွားနေချိန်မှာပဲ ရခိုင်ပြည်နယ်အတွင်းကူးစက်ခံရသူတွေလည်း တစ်စတစ်စတိုးလားနေတော့ ဒုတိယလှိုင်းလိုမျိုး ကူးစက်ခံရမှာကို ဒေသခံတွေက စိုးရိမ်နေကြပါတယ်။

    “ဘင်္ဂလားဒေ့ရှ်ကပြန်ဝင်လာတဲ့လူတွေကိုတော့ အစိုးရကစနစ်တကျထားတယ်လို့သိထားပါတယ်။ အဲ့လိုထားနိုင်ရင်တော့အကောင်းဆုံးပေါ့။ ကျွန်တော်တို့ပြည်သူတွေဘက်ကတော့ အမြဲတမ်းစိုးရိမ်နေရတာပါ။ ဘာလို့လဲဆိုတော့ အစိုးရဘက်ကလုပ်တယ်ဆိုပေမယ့်လဲ စစ်ဆေးတဲ့အနေအထားတွေတော့မတွေ့ရဘူး။ နှာခေါင်းစည်းတွေဘာတွေလည်း စစ်ချင်တဲ့ရက်မှာစစ်တယ်၊ မစစ်ချင်ရင်မစစ်ကြဘူး။”လို့ မောင်တောမြို့ခံ ဦးမောင်ဝင်းသိန်းက ပြောပါတယ်။

    လက်ရှိမှာ ရခိုင်ပြည်နယ်အတွင်း ကိုဗစ်ကာကွယ်ဆေးထိုးနှံ့ပြီးသူပေါင်း ကိုးသောင်းရှစ်ထောင်ကျော်ရှိပြီဖြစ်ကာ တစ်ချို့ကနှစ်ကြိမ်လုံးထိုးပြီးသွားသလို တချို့ကတော့ ဒုတိယအကြိမ်ထိုးနှံဖို့ကျန်နေသေးပြီး အခုလအကုန်ထိ အပြီးထိုးပေးသွားဖို့ရှိတယ်လို့ ဒေါက်တာကြည်လွင်က ပြောပါတယ်။

20. ၂၀ မေ ၂၀၂၁ရန်ကုန်မက်ခရို ကုန်တိုက်မှာ ပေါက်ကွဲမှုဖြစ်ပွား

    ရန်ကုန်၊ စက်ဆန်းမှာရှိတဲ့ မက်ခရိုကုန်တိုက်ရဲ့ ကားပါကင်မှာ ဒီနေ့မွန်းလွဲပိုင်း ၂ နာရီကျော်ခန့်က ပေါက်ကွဲမှုဖြစ်ပွားခဲ့ပါတယ်။ပေါက်ကွဲမှုကြောင့် ကုန်တိုက်အတွင်း ဈေဝယ်သူများအပါအဝင် မည်သူကိုမှ အပြင်ကိုဝင်ထွက်ခွင့်မပေးထားဘဲ လုံခြုံရေးတပ်ဖွဲ့ဝင်တွေလည်းရောက်ရှိနေပြီလို့ သိရပါတယ်။

    ပေါက်ကွဲမှုကြောင့် ထိခိုက်ဒဏ်ရာရရှိမှု ပျက်စီးဆုံးရှုံးမှုကိုလည်းမသိရှိရသေးပါဘူး။

    မက်ခရိုကုန်တိုက်ဟာ မေ ၂၁ ရက်ကစလို့ ဈေးဝယ်လာရောက်သူတွေအားလုံး ယာဉ်မောင်းလိုင်စင် ဒါမှမဟုတ် မှတ်ပုံတင် တို့ကို လုံခြုံရေးဂိတ်မှာ ပြသပြီးမှ ဈေးဝယ်စင်တာထဲကို ဝင်ရောက်ခွင့်ပြုမယ်လို့ ကြေညာထားတာဖြစ်ပါတယ်။ အဲဒီကြေညာချက် လူမှုကွန်ရက်မှာပျံ့နှံ့လာပြီးနောက်တစ်ရက်မှာ ခုလို ပေါက်ကွဲမှုဖြစ်ပွားတာဖြစ်ပါတယ်။

    ဒီမတိုင်ခင်ကလည်း မက်ခရိုစီးပွားရေးလုပ်ငန်းစုဟာ စစ်တပ်နဲ့ဆက်နွှယ်တဲ့လုပ်ငန်းဖြစ်တာကြောင့် လူမှုရေးပြစ်ဒဏ်(Social Punishment) ပေးသင့်ကြောင့် ရေးသားပြောဆိုမှုတွေရှိတဲ့အပေါ် မက်ခရိုကုန်တိုက်ဘက်က ဘယ်အဖွဲ့အစည်းနဲ့မှ မသက်ဆိုင်တဲ့ ပုဂ္ဂိလက စီးပွားရေးလုပ်ငန်းစုသာဖြစ်ကြောင်း ပြန်လည်ရှင်းလင်းကြေညာချက်ထုတ်ပြန်ထားပါတယ်။