အာဆီယံခေါင်းဆောင်တွေနဲ့တွေ့ဆုံဖို့ ကုလအထူးကိုယ်စားလှယ် စီစဉ်နေ

တိုက်ရိုက် ထုတ်လွှင့်ချက်

1. ၁၁ ဧပြီ ၂၀၂၁ရာထူးထုတ်ပယ်ခံရတဲ့ ရန်ကုန်မြန်မာ့အသံCDM ဝန်ထမ်းတွေ ကိုဗစ်ချေးငွေ ပြန်လျော်ဖို့ အတောင်းခံနေရ

   အာဏာဖီဆန်ရေးအကြမ်းမဖက်လှုပ်ရှားမှု CDM မှာ ပါဝင်လို့ ရာထူးကနေ ထုတ်ပယ်ခံထားရတဲ့ ရန်ကုန် မြန်မာ့အသံရုံးက ဝန်ထမ်း ၁၂၀ ကျော်ဟာ သမ္မတဦးဝင်းမြင့်အစိုးရလက်ထက်က ထုတ်ပေးခဲ့တဲ့ ကိုဗစ်ကာလ ဝန်ထမ်းချေးငွေ ၂ လစာ ပြန်တောင်းခံရတဲ့စာတွေရထားတယ်လို့ အဲဒီဝန်ထမ်းတွေက ဘီဘီစီကို ပြောပါတယ်။

   ချေးငွေ ပြန်တောင်းစာကို ဧပြီလ ၈ ရက် ရက်စွဲနဲ့ ထုတ်ခဲ့တာဖြစ်ပြီး အဲဒီချေးငွေတောင်းခံစာတွေကို CDM ဝန်ထမ်းတွေဆီကို လူမှုကွန်ယက်စာပို့စနစ် ဗိုက်ဘာကနေပေးပို့ခဲ့တာဖြစ်တယ်လို့ သိရပါတယ်။

   ချေးငွေဆိုင်းငံ့ကာလ ကုန်တဲ့အခါ ဝန်ထမ်းလစာထဲကနေ လစဉ်ဖြတ်တောက်သွားဖို့ဖြစ်ပြီး ချေးငွေအကျေ မဆပ်ခင် ဝန်ထမ်းကို ထုတ်ပယ်တာ ဒါမှမဟုတ် ဝန်ထမ်းအဖြစ်မှ ထုတ်ပယ်တဲ့ပြစ်ဒဏ်ချမှတ်ခံရတဲ့အခါ ချေးငွေကို ပြန်ကောက်ခံရန်ဖြစ်တယ်လို့ စာက ဆိုပါတယ်။

   ဒါ့ကြောင့် ချေးငွေတောင်းခံတာခံရတဲ့ဝန်ထမ်းဟာ ရာထူးက ထုတ်ပယ်ပြီးဖြစ်လို့ ချေးငွေ ၂ လစာကို ပြန်လည်ပေးလျော်ဖို့ အကြောင်းကြားတယ်ဆိုပြီး ညွှန်ကြားရေးမှူးအဆင့်ရှိသူက စာထုတ်ခဲ့တာပါ။

   မြန်မာ့အသံ ရန်ကုန်ရုံးက CDM ဝန်ထမ်း ၁၂၀ ကျော်ဟာ မတ်လကုန်ပိုင်းမှာ ရာထူးကနေ ထုတ်ပယ်စာ ကြေညာခံခဲ့ရသူတွေဖြစ်ပါတယ်။

   ''ချေးငွေအတောင်းခံရတဲ့ ဝန်ထမ်းက မဆပ်ဘူးဆိုရင် တရားရင်ဆိုင်ရမယ်ဆိုတာမျိုး နှုတ်နဲ့ပြောလာတာမျိုးလည်းရှိတယ်။ အခု CDM လုပ်နေတဲ့သူတွေကတော့ လုံးဝပြန်မဆပ်ဖို့ ညှိထားကြတယ်'' လို့ ချေးငွေအတောင်းခံရတဲ့ ရန်ကုန်မြန်မာ့အသံဝန်ထမ်းတစ်ဦးကပြောပါတယ်။

   ကိုဗစ်ရောဂါကြောင့်ဖြစ်လာနိုင်တဲ့ သက်ရောက်မှုတွေကို ကုစားဖို့ နိုင်ငံ့ဝန်ထမ်း(အမြဲတမ်း)တွေကို အတိုးမဲ့ချေးငွေအဖြစ် ၂၀၂၀ ခုနှစ်၊ အောက်တိုဘာလကစပြီး ဆိုင်းငံ့ကာလ ၆ လ၊ ပြန်ဆပ်ကာလ ၁ နှစ် သတ်မှတ်ပြီး သမ္မတဦးဝင်းမြင့်အစိုးရက ထုတ်ပေးခဲ့တာပါ။

   ဒါပေမဲ့ ကိုဗစ်ရောဂါ ဆက်ဖြစ်နေတာ၊ အာဏာသိမ်းမှုဖြစ်နေတာတွေကြောင့် ဝန်ထမ်းတွေသက်သာချောင်ချိရေးအတွက် ဒီချေးငွေကို ပြန်ပေးဆပ်ဖို့မလိုတဲ့ချီးမြင့်ငွေအဖြစ် CRPH ကခန့်အပ်ထားတဲ့ စီမံကိန်း၊ဘဏ္ဍာရေးနဲ့စက်မှုဝန်ကြီးဌာန ခေတ္တပြည်ထောင်စုဝန်ကြီး ဦးတင်ထွန်းနိုင်က မတ်လ ၈ ရက်မှာ ကြေညာထားပါတယ်။

2. ၁၁ ဧပြီ ၂၀၂၁တမူးမြို့မှာ မနေ့ကပစ်ခတ်မှု အရပ်သား ၂ ဦးသေဆုံး

   တမူးမြို့မှာ မနေ့ ဧပြီလ ၁၀ ရက်နေ့က စစ်ကောင်စီတပ်တွေရဲ့ပစ်ခတ်မှု ကြောင့် အရပ်သား ၂ ဦးသေဆုံးခဲ့ပါတယ်။

   စစ်ကောင်စီတပ်တွေက လက်နက်ကြီးတွေသုံးပြီး စစ်ကူတွေနဲ့လာရောက်တိုက်ခိုက်တာကြောင့် ပြည်သူတွေဘက်က ပြန်လည်ခုခံရင်း ဈေးတန်း ရပ်ကွက်နဲ့ စော်ဘွားရပ်ကွက်မှာ မနေ့ နေ့လည် ၁၂ နာရီခန့်ကနေ ညနေ ၆ နာရီအထိ ပစ်ခတ်မှုတွေဖြစ်ခဲ့တယ်လို့ တမူးမြို့ခံတွေက ပြောပါတယ်။

   ဒါ့အပြင် တမူးမြို့လယ်က ပါဝါတည်းခိုခန်းအနီး ပလက်စတစ် ပစ္စည်း အရောင်းဆိုင်မှာ အများပြည်သူ အပြင်မထွက်ရတဲ့ ကာဖျူးချိန် ည ကိုးနာရီနောက်ပိုင်းမှာ မီးလောင်ခဲ့ပြီး လူထုက ငြိမ်းသတ်ချင်ပေမဲ့ စစ်သား တွေ ၁၅ ယောက်လောက် အနားမှာရှိနေတယ်လို့ မျက်မြင်သက်သေ တွေက ဘီဘီစီကို ပြောပါတယ်။

   တချိန်တည်းမှာ အိန္ဒိယ-မြန်မာနယ်စပ်မှာ လှုပ်ရှားနေတဲ့ ကူကီးအမျိုးသား တပ်မတော်က ကြေညာချက်တစ်စောင်ထုတ်ပြန်ပါတယ်။

   တမူးမြို့မှာ စစ်ကောင်စီတပ်တွေက မနေ့မွန်းလွဲမှာ အများပြည်သူနေထိုင်ရာအိမ်တွေဘက်ဆီ အကြောင်းမဲ့ပစ်ခတ်တာကြောင့် ဆိုင်ကယ်မောင်းလာတဲ့လူငယ်တစ်ယောက် ခေါင်းကျည်ထိမှန်ခဲ့တယ်လို့ ဆိုပါတယ်။

   ဒါ့ကြောင့် ဒေသခံကူကီးတပ်မတော်နဲ့ပြည်သူလူထု ပူးပေါင်းကာ ပြန်လည်ခုခံတဲ့အတွက် စစ်ကောင်စီတပ်ဖွဲ့ဝင် ၁၈ ယောက်သေဆုံးခဲ့သလို ပြည်သူတစ်ဦးလည်း ထပ်မံသေဆုံးခဲ့ရတယ်လို့ သူတို့ ထုတ်ပြန်ချက်မှာ ဖော်ပြထားပါတယ်။

   ဒီသေဆုံးမှုနဲ့ပတ်သက်ပြီး ဘီဘီစီက သီးခြားအတည်ပြုနိုင်ဖို့ ကြိုးစားနေဆဲဖြစ်ပါတယ်။

   ဒီသတင်းနဲ့ပတ်သက်လို့ တပ်မတော်ကာကွယ်ရေးဦးစီးချုပ်ရုံးအင်တာနက် စာမျက်နှာရဲ့ ထုတ်ပြန်ချက်ကဏ္ဍမှာ တစုံတရာ ထုတ်ပြန်ထားတာမျိုးလည်း မတွေ့ရသေးပါဘူး။

3. ၁၀ ဧပြီ ၂၀၂၁စစ်အာဏာသိမ်း အကြမ်းဖက်မှုတွေက လွတ်ဖို့ မြန်မာတွေ အိန္ဒိယကို ဘယ်လိုပြေးခဲ့ရသလဲ

4. ၁၀ ဧပြီ ၂၀၂၁ပဲခူးမှာ လက်နက်ကြီးသုံးတိုက်ခိုက်မှု ကုလ စောင့်ကြည့်နေတယ်လို့ စာထုတ်

   ပဲခူးမြို့မှာ အရပ်သား ဆန္ဒပြသူတွေကို အင်အားပြင်း လက်နက်တွေသုံးပြီး နှိမ်နင်းခံရတာနဲ့ ဒဏ်ရာရသူတွေကို ဆေးကုသခွင့် ပိတ်ပင်တယ် ဆိုတဲ့ သတင်းတွေကို ကုလသမဂ္ဂက စောင့်ကြည့်နေတယ်လို့ ပြောဆိုလိုက်ပါတယ်။

   အခုလို အကြမ်းဖက်မှုတွေကို ချက်ချင်းရပ်ဖို့လိုပြီး ဆေးကုသရေး အဖွဲ့တွေကိုလည်း ဒဏ်ရာရသူတွေကို ကုပေးရေး ဝင်ခွင့်ပေးဖို့ ကုလသမဂ္ဂက တောင်းဆိုထားပါတယ်။

5. ၁၀ ဧပြီ ၂၀၂၁တမူးမြို့ ပစ်ခတ်မှု ၂ ဦးသေဆုံး

   တမူးမြို့ စျေးတန်းရပ်ကွက်နဲ့ စော်ဘွားရပ်ကွက်တို့မှာ ဒီကနေ့ နေ့လယ် ၁၂နာရီခွဲကနေ ညနေ ၆နာရီအထိ စစ်ကောင်စီတပ်တွေနဲ့ သပိတ်ခံတပ်တွေကြား ပစ်ခတ်မှုဖြစ်ပြီး အမျိုးသား ၂ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

   "ဆိုင်ကယ် ကယ်ရီသမားတွေဗျ။ တဦးဆို ၆ချက်လောက်ထိတယ်။ သူတို့ရဲ့ရုပ်အလောင်းတွေကိုတော့ ပြန်ရလိုက်တယ်။ စစ်ကောင်စီဘက်က လက်နက်ကြီးတွေ တော်တော်သုံးတယ်။ စစ်ကူတွေလည်း လာကြတယ်"လို့ ဒေသခံတဦးက ပြောပါတယ်။

   ရပ်ကွက်လုံခြုံရေးအတွက် ကာထားတဲ့သဲအိတ်တွေကို စစ်ကောင်စီတပ်တွေဘက်က စဖယ်ရှားရင်း ဈေးတန်းရပ်ကွက်ဘက်မှာ ပစ်ခတ်မှု စတင်ဖြစ်ပွားတာပါ။

   ပြည်သူတွေဘက်က ပြန်လည်ခုခံတာကြောင့် စစ်ကောင်စီတပ်တွေဘက်က ၁၂ ဦးသေဆုံးတယ်ဆိုတဲ့ သတင်းတွေပြန့်နေပေမယ့် သီးခြားအတည်ပြုနိုင်တာ မရှိသေးပါဘူး။

   တမူးမြို့လယ်က တာခင်မီးပွိုင့် Powerတည်းခိုခန်းအနီးက ပလပ်စတစ်ပစ္စည်းအရောင်းဆိုင် ည ၉ နာရီဝန်းကျင်မှာ မီးလောင်နေတယ်လို့ သိရပါတယ်။

   "အဲ့မှာကလူမရှိဘူးညဘက်က။ မီးလောင်နေလို့ ပြည်သူတွေက ငြိှမ်းဖို့လူပ်ချင်ပေမယ့် စစ်သား ၁၅ယောက် လောက် အနားမှာရှိနေတယ်" လို့ မျက်မြင်ဒေသခံ တဦးက ဘီဘီစီကိုပြောပါတယ်။

6. ၁၀ ဧပြီ ၂၀၂၁မြန်မာစစ်တပ်ကို ထိရောက်တဲ့အရေးယူမှုလုပ်ဖို့နဲ့ R2P ကိုပါ ထည့်သွင်းစဉ်းစားဖို့ CRPH တိုက်တွန်း

7. ၁၀ ဧပြီ ၂၀၂၁ရေပူဆရာတော်အပါအဝင် လူ ၃၀ ထက်မနည်း ထောင်ဒဏ်ချမှတ်ခံရ

   မိုးကုတ်မြို့က ရေပူဆရာတော်ဦးဣန္ဒက အပါအဝင် နောက်ထပ် အမျိုးသား ၃၁ ဦးဟာ ထောင်ဒဏ်အသီးသီးချမှတ်ခံလိုက်ရတယ်လို့ သူတို့တွေအရေး ကူညီပေးနေသူတွေက ဘီဘီစီကို အတည်ပြုပါတယ်။

   ဆရာတော်နဲ့ ဒီလူပုဂ္ဂိုလ်တွေဟာ မတ်လ ၁၁ ရက်က မိုးကုတ်မြို့လယ် ဆန္ဒပြပွဲကို စစ်ကောင်စီတပ်တွေက ဖြိုခွဲချိန် ကားပေါ်ဆွဲတင်ဖမ်းဆီးခံခဲ့ရတာဖြစ်ပြီး ဆရာတော်ကတော့ ပုဒ်မ ၅၀၅ က နဲ့ တရားစွဲခံခဲ့ရတာဖြစ်ပါတယ်။

   မနေ့ ဧပြီလ ၉ ရက်မှာတော့ ဆရာတော် အပါအဝင် အမျိုးသား ၃၁ ယောက်ကို မြို့ထဲက တောင်ကချင်အချုပ်ထောင်မှာ အမှုစစ်ပြီး ထောင် ၃ နှစ်စီချမှတ်လိုက်တာလို့ အမှုအတွက် လိုက်ပါကူညီဖို့ ကြိုးစားနေသူတွေကပြောပါတယ်။

   အမှုအတွက် ရှေ့နေကိုယ်စားလှယ်လွှဲစာကို ဆရာတော်က လက်မှတ် မထိုးလို့ ကျန်တဲ့လူငယ် ၂၅ ယောက်နီးပါးကလည်း လက်မှတ်မထိုးခဲ့တာကြောင့် အချုပ်ထောင် အမှုကြားနာမှုကို ရှေ့နေတွေ ဝင်ရောက်ကြည့်ရှုခွင့် မရခဲ့ဘူးလို့ သိရပါတယ်။

   ထောင်ဒဏ် ၃ နှစ်စီ ချမှတ်ခံလိုက်ရသူတွေထဲမှာ ဆရာတော်နဲ့ အဲဒီလူငယ်တွေအပြင် ဂေါ်ရခါးအမျိုးသား ၃ ဦးနဲ့ တခြားရက်တွေမှာ ဖမ်းဆီးခံရတဲ့ နောက်ထပ် အမျိုးသား ၃ ဦးတို့လည်း ပါဝင်တယ်လို့ အမှုဖြစ်စဉ်ကို သိထားတဲ့ နီးစပ်တဲ့မြို့ခံတွေက ပြောပါတယ်။

   မတ်လ ၁၁ ရက်တုန်းက ဆန္ဒပြပွဲမှာ ဆရာတော်နဲ့တနေ့တည်း ဖမ်းဆီးခံရတဲ့လူငယ် ၅၀ နီးပါးရှိခဲ့ပေမဲ့ တချို့က မိဘအုပ်ထိန်းသူပြန်ထုတ်လို့၊ အသက်မပြည့်လို့၊ ခံဝန်ထိုးလို့ နောက်ရက်ပိုင်းတွေမှာ ပြန်လွတ်လာသူတွေ ရှိခဲ့ပါတယ်။

   အခုထောင်ဒဏ်ချမှတ်ခံရတဲ့လူငယ် ၂၅ ဦးထက်မနည်းကတော့ အဲဒီသတ်မှတ်ချက်တွေကို ငြင်းဆန်ခဲ့ကြတယ်လို့ သိရပါတယ်။

8. ၁၀ ဧပြီ ၂၀၂၁လားရှိုး နောင်မွန်ရဲကင်းတိုက်ခိုက်ခံရ၊ ၁၄ ဦးသေဆုံး၊ ၇ဦးဒဏ်ရာရ

   လားရှိုး-မန္တလေး ပြည်ထောင်စုလမ်းမကြီးပေါ်ရှိ နောင်မွန်ရဲကင်းစခန်း ဒီကနေ့မနက်အစောပိုင်းက ဝင်ရောက်တိုက်ခိုက်ခံရပြီးနောက် သေဆုံးသူ၁၄ဦးနဲ့ ဒဏ်ရာရသူ၇ဦးရှိခဲ့တယ်လို့ လားရှိုးဒေသခံတွေက ဘီဘီစီကိုပြောပါတယ်။

   ဒီတိုက်ခိုက်မှုကို မြောက်ပိုင်းညီနောင်မဟာမိတ် သုံးဖွဲ့ဖြစ်တဲ့ တအာင်း(TNLA)၊ ရခိုင်(AA)နဲ့ ကိုးကန့်(MNDAA)တို့က ဝင်ရောက်တိုက်ခိုက်ခဲ့တာလို့ ဒေသခံတွေကြားပြောဆိုနေပါတယ်။ ဒါနဲ့ပတ်သက်ပြီး မြောက်ပိုင်း၃ဖွဲ့ရဲ့ပြောရေးဆိုခွင့်ရှိသူတွေဆီ ဘီဘီစီကဆက်သွယ်မေးမြန်းဖို့ကြိုးစားနေပေမယ့် သီးခြားအတည်ပြုနိုင်ခြင်းမရှိသေးပါဘူး။

   "မနက်အစောကြီးထဲက ပစ်သံခတ်သံတွေကြားရတယိ။ လားရှိုးကနေရဟတ်ယာဉ်တွေနဲ့သွားတာလည်းတွေ့ရတယ်။ မြို့ထဲမှာလည်းအဝိုင်းပတ်ကနေစပြီး စစ်ဆေးတာတွေလုပ်နေတယ်။ ​စစ်တပ်က စစ်နေတာတွေ့ရတယ်။ အခုတော့ မန်ဘိန်းဘက်မှာလည်းထပ်ပြီး တိုက်ပွဲတွေဖြစ်နေတယ်လို့ ကြားရတယ်"လို့ လားရှိုးမြို့ခံတစ်ဦးကပြောပါတယ်။

   နောင်မွန်ရဲကင်းက ကျဆုံးသူတွေကို လားရှိုးအခြေစိုက် လူမှုကူညီရေးကားတွေနဲ့ ရဲကားတစ်စီးက ဦးဆောင်ကာ သွားရောက်သယ်ယူပြီး စစ်ဆေးရုံဆီကို မောင်းနှင်သွားတာကိုလည်းတွေ့ရတယ်လို့ ဒေသခံတွေကပြောပါတယ်။

9. ၁၀ ဧပြီ ၂၀၂၁နောင်မွန်ရဲကင်းကို မြောက်ပိုင်းညီနောင်မဟာမိတ် သုံးဖွဲ့ ဝင်တိုက်၊ ရဲတပ်ဖွဲ့ဝင်တွေ သေဆုံးဒဏ်ရာရပျောက်ဆုံးမှုတွေရှိတယ်လို့ ဆို

   ဒီနေ့ ဧပြီ ၁၀ ရက် မနက် ၅ နာရီကနေ ၇ နာရီခွဲအထိ ဖြစ်ပွားခဲ့တဲ့ လားရှိုးမြို့ နောင်မွန်ရဲကင်း တိုက်ခိုက်ခံရမှုမှာ ရဲတပ်ဖွဲ့ဝင် ဆယ်ဦးကျော်သေဆုံးပြီး ပျောက်ဆုံးသူတွေလည်းရှိသလို မိသားစုဝင်တွေလည်း ဒဏ်ရာရရှိခဲ့တယ်လို့ ဒေသတွင်းသတင်းတွေက ဖော်ပြနေပါတယ်။

   ရှမ်းပြည်နယ်အခြေစိုက် ရွှေဖီမြေသတင်းဌာနက ပေးပို့လာတဲ့သတင်းမှာ လားရှိုးမြို့ အဝိုင်းပတ်မှာ ကား၊ ဆိုင်ကယ်တွေကို စစ်ဆေးနေပြီး အမှတ် ၁ ရဲစခန်းရှေ့က အသွားအပြန် လမ်းကြီးကိုလည်း ပိတ်ထားလိုက်ပြီ ဖြစ်တယ်လို့ ဆိုပါတယ်။

   လားရှိုး-မန္တလေး ပြည်ထောင်စုလမ်းမကြီးပေါ်ရှိ နောင်မွန်ရဲကင်းကို ညီနောင်မဟာမိတ် ၃ ဖွဲ့ဖြစ်တဲ့ တအာင်း(TNLA)၊ ရခိုင်(AA)နဲ့ ကိုးကန့်(MNDAA) တို့က ဝင်ရောက်တိုက်ခိုက်ခဲ့တယ်လို့ ဒေသခံတွေက ပြောပါတယ်။

   တိုက်ခိုက်မှုကြောင့် သေဆုံးသူနဲ့ ဒဏ်ရာရသူရှိသလို ရဲကင်းလည်း မီးလောင်ဆုံးရှုံးသွားတယ်လို့ နောင်မွန်ဘက် သွားရောက်ခဲ့သူတစ်ဦးက ပြောကြားကြောင်း ဖော်ပြထားပါတယ်။ ဒီတိုက်ခိုက်မှုနဲ့ပတ်သက်လို့ TNLA ဘက်ကတော့ မြေပြင်အခြေအနေသတင်းမသိရသေးဘူးလို့ ဆိုပါတယ်။ ဒီသတင်းနဲ့ပတ်သက်လို့ စစ်ကောင်စီဘက်ကိုလည်း ဘီဘီစီက ဆက်သွယ်မေးမြန်းဖို့ ကြိုးစားနေပါတယ်။

10. ၁၀ ဧပြီ ၂၀၂၁ပြေတီဦးနဲ့ အိန္ဒြာကျော်ဇင်တို့ ဖမ်းခံထားရ၊ ဘယ်နေရာမှာထားရှိတယ်ဆိုတာမသိရသေး

    ပြေတီဦးနဲ့ အိန္ဒြာကျော်ဇင်တို့ကို သူတို့ရဲ့ နေအိမ်မှာ ဧပြီ ၉ ရက် ညနေပိုင်းက ဖမ်းမိတယ်လို့ စစ်ကောင်စီထိန်းချုပ်ထားတဲ့ မြန်မာ့အသံနဲ့ မြဝတီရုပ်သံတို့က ကြေညာခဲ့ပါတယ်။ ၎င်းတို့ ဇနီးမောင်နှံနှစ်ဦးကို စစ်ကောင်စီက နိုင်ငံတော်အကြည်ညိုပျက်စေမှု ပုဒ်မ ၅၀၅ (က) နဲ့ တရားစွဲဆိုအမှုဖွင့်ထားပြီး ပြေတီဦးကိုတော့ စစ်ကောင်စီက ပြီးခဲ့တဲ့ တစ်လကျော်တည်းက ဖမ်းဝရမ်းထုတ်ခဲ့တာဖြစ်ပါတယ်။

    အိန္ဒြာကျော်ဇင်ကိုတော့ ဒီဧပြီလဆန်းမှာ ပုဒ်မ ၅၀၅ (က)နဲ့ တရားစွဲထားတယ်လို့ စစ်ကောင်စီက ထပ်မံကြေညာခဲ့တာဖြစ်ပါတယ်။ ၎င်းတို့နှစ်ဦး မနေ့ညနေ ၃ နာရီခွဲအချိန်မှာ ဗဟန်းမြို့နယ်ထဲက ၎င်းတို့ နေအိမ်မှာ ဖမ်းဆီးရမိတယ်လို့ သတင်းထုတ်ပြန်ခဲ့ပါတယ်။

    မိသားစုနဲ့ နီးစပ်သူတစ်ဦးကတော့ လက်ရှိမှာ သူတို့နှစ်ဦးကို ဘယ်နေရာမှာ ထားရှိတယ်ဆိုတာ မသိရသေးဘူးလို့ ဘီဘီစီကိုပြောပါတယ်။

    ပြေတီဦးနဲ့ အိန္ဒြာကျော်ဇင်တို့ နှစ်ဦးလုံးဟာ ဖေဖော်ဝါရီ ၁ ရက်စစ်အာဏာသိမ်းပြီးကတည်းက အာဏာသိမ်းမှုကို ဆန့်ကျင်တဲ့ လမ်းပေါ်ထွက်ဆန္ဒပြမှုတွေမှာ တက်တက်ကြွကြွပါဝင်ခဲ့ကြသလို အာဏာဖီဆန်တဲ့ ရုံးမတက်ရေးလှုပ်ရှားမှု CDM မှာပါဝင်သူတွေကိုလည်း ကူညီထောက်ပံ့ခဲ့ကြပါတယ်။ ဒါကြောင့်လည်း စစ်ကောင်စီက ခုလို ပုဒ်မတပ်ပြီး တရားစွဲဖမ်းဆီးခဲ့တာဖြစ်ပါတယ်။

    အခုဆို ပုဒ်မ ၅၀၅ (က) နဲ့ တရားစွဲပြီးဖမ်းဝရမ်းထုတ်ခံထားရတဲ့ထင်ရှားကျော်ကြားသူတွေထဲ လူမင်း၊ ရဲတိုက်၊ ပြေတီဦး၊ အိန္ဒြာကျော်ဇင်၊ ဝင်းမင်းသန်းတို့ ဖမ်းဆီးခံထားရပြီး လူရွှင်တော်ဇဂနာဟာလည်း ပုဒ်မ တပ်ထားတဲ့စာရင်းထဲမပါဝင်ပေမယ့်ဖမ်းခံထားရပါတယ်။

11. ၁၀ ဧပြီ ၂၀၂၁CRPH နဲ့ ဖုန်းစကား ပြောခဲ့တဲ့သတင်းကို ရန်ကုန်တရုတ်သံရုံးမငြင်း

    ရန်ကုန်မှာ ရှိတဲ့ တရုတ်သံရုံးက မြန်မာအရေးနဲ့ ပတ်သက်ပြီး “ဘက်ပေါင်းစုံ-အဖွဲ့ပေါင်းစုံ”နဲ့ အဆက်သွယ်ပြုလုပ်နေတယ်လို့ အတည်ပြုပါတယ်။

    CRPH နဲ့ ရန်ကုန်တရုတ်သံရုံးကြား ပြီးခဲ့တဲ့ သီတင်းပတ်တုန်းက ဖုန်းကနေတဆင့် ဆက်သွယ်စကားပြောဆိုမှု ပထမဆုံးအကြိမ် စပြီး ရှိလာခဲ့တယ်ဆိုတဲ့ သတင်းတွေ ထွက်ပေါ်လာတဲ့နောက် တရုတ်သံရုံးက အဲဒီသတင်းအပေါ်မငြင်းဆိုပဲ အခုလို အဖွဲ့ပေါင်းစုံနဲ့ကြား ဆက်သွယ်မှုတွေ ရှိနေကြောင်း ပြောဆိုတာ ဖြစ်ပါတယ်။

    အဲဒီလို အဆက်အသွယ်ထားရှိရတဲ့ ရည်ရွယ်ချက်ကလည်း အခြေနေတွေ အေးဆေးသွားအောင်၊ တည်ငြိမ်သွားအောင် ကူညီပေးလိုတဲ့ အတွက်ဖြစ်ပြီး၊ မတူညီမှုတွေကို တွေ့ဆုံဆွေးနွေး ၊ ဖြေရှင်းခြင်းအားဖြင့် ဒီမိုကရေစီ ဖော်ဆောင်ရေး လုပ်ငန်းစဥ်ကို ရှေ့ဆက်နိုင်မယ်လို့ ရန်ကုန်တရုတ်သံရုံးက ဆိုပါတယ်။

12. ၁၀ ဧပြီ ၂၀၂၁ကုလအထူးကိုယ်စားလှယ် ဘန်ကောက်ကိုရောက်လာ၊ မြန်မာပြည်ထဲ ၀င်ခွင့်မရ

    မြန်မာနိုင်ငံဆိုင်ရာ ကုလသမဂ္ဂ အထူးသံတမန် ခရစ္စတင်း ရှရနာ ဘာဂနာကို အာဏာသိမ်း စစ်ဗိုလ်ချုပ်တွေက ပြည်၀င်ခွင့်မပေးပဲ ငြင်းပယ်ထားပါတယ်။

    သူ့ကို မြန်မာပြည်ကနေ လက်ခံဖို့ရာ အဆင်သင့် မဖြစ်သေးဘူးလို့ပြီးခဲ့တဲ့ ကြာသပတေးနေ့၊ ဧပြီလ ၈ ရက်နေ့မှာပဲ လောလောလတ်လတ် ငြင်းပယ်ထားကြောင်း ရှရနာ ဘာဂနာက ထိုင်းနိုင်ငံ ဘန်ကောက်မြို့တော်အရောက် ထုတ်ဖော်ပြောပါတယ်။

    သူဟာ မြန်မာပြည်ထဲထိ သွားပြီး အာဏာသိမ်း စစ်ဗိုလ်ချုပ်တွေနဲ့ တွေ့ဆုံ စကားပြောခွင့်ရဖို့ မျှော်လင့်ချက်နဲ့ အာရှခရီးစဥ်ထွက်လာတာ ဖြစ်ပါတယ်။

    “ ကျွန်မအနေနဲ့ကတော့ တွေ့ဆုံစကားပြောဖို့ အသင့်ရှိပါတယ်။ အကြမ်းဖက်ခြင်း အားဖြင့် ရေရှည်ခိုင်မြဲနိုင်မယ့် ငြိမ်းချမ်းတဲ့ ဖြေရှင်းနည်းတွေဆီ မရောက်နိုင်ပါဘူး” ဆိုပြီး မစ္စက်ဘာဂနာက တွစ်တာပေါ်မှာ ရေးထားပါတယ်။

    ကုလအထူးကိုယ်စားလှယ်ဟာ တရုတ်နိုင်ငံထိ ခရီးဆက်မယ်လို့ နားလည်ရပါတယ်။

13. ၉ ဧပြီ ၂၀၂၁စစ်အာဏာသိမ်းပြီး ပထမဆုံး အကြိမ် လူ ၁၉ ယောက်ကို အစုလိုက်အပြုံလိုက် သေဒဏ်ချမှတ်

    မြောက်ဥက္ကလာပမြို့နယ်တွင်း လူတစ်ယောက်ကို သတ်ဖြတ်ခဲ့မှုမှာ ပတ်သက် နေသူတွေ ဆိုတဲ့ စွပ်စွဲချက်နဲ့ လူ ၁၉ ယောက်ကို သေဒဏ် ချမှတ်လိုက်ကြောင်း ဧပြီလ ၉ ရက်၊ သောကြာနေ့မှာ စစ်ကောင်စီထိန်းချုပ်ထားတဲ့ ရုပ်သံဌာနတွေက ကြေညာပါတယ်။

    မြန်မာစစ်တပ်က ဗိုလ်ကြီးအဆင့်ရှိသူနဲ့ အခြား တစ်ယောက် ဆိုင်ကယ်စီးလာစဥ် လူအုပ်က ၀ိုင်း၀န်းတိုက်ခိုက်ခဲ့တာလို့ ဆိုပါတယ်။

    အဲဒီဖြစ်ရပ်မှာ စစ်အရာရှိနဲ့ အတူပါလာသူဟာ ရင်ဘတ်ကို ထိုးသွင်း ဒဏ်ရာနဲ့ သေဆုံးခဲ့တယ်လို့ သတင်းကြေညာချက်ထဲ ပါ၀င်ပါတယ်။

    စစ်အရာရှိရဲ့ အခြေအနေကို ထည့်သွင်းပြောမသွားပေမယ့် သေနတ်ကို လူအုပ်က ယူသွားတယ်လို့ ဆိုထားပါတယ်။

    ကြေညာသွားတဲ့ ၁၉ ယောက်ထဲက ၁၇ ယောက်ကို မျက်ကွယ် သေဒဏ်ချမှတ်တာ ဖြစ်တယ်လို့ နားလည်ရပြီး စစ်ခုံရုံးက အမိန့်ချတာ ဖြစ်ပါတယ်။

    ဒါ့ကြောင့် သူတို့ပြောတဲ့ သတ်ဖြတ်မှု အတွက် ဖမ်းဆီးထားသူ ၂ ယောက် ရှိတယ်ဆိုတဲ့ အဓိပ္ပာယ် ဖြစ်ပါတယ်။

    ဖေဖေါ်၀ါရီ ၁ ရက် စစ်အာဏာသိမ်းပြီးနောက်ပိုင်း အခုလို သေဒဏ်ချမှတ်ကြောင်း အများကို စစ်ကောင်စီဘက်က ထုတ်ပြန်တာ ဒါ ပထမဆုံး အကြိမ်ဖြစ်ပါတယ်။

    သူတို့ပြောတဲ့ သတ်ဖြတ်မှု ပေါ်ပေါက်ခဲ့တယ် ဆိုတဲ့ မြောက်ဥက္ကလာမှာ စစ်ကောင်စီက စစ်အုပ်ချုပ်ရေး မာရှယ်လော ကြေညာထားပါတယ်။

    စစ်အုပ်ချုပ်ရေး ကြေညာထားတဲ့ နယ်မြေ ဖြစ်တယ် ဆိုတဲ့ အချက်ဟာ စွပ်စွဲမှုတွေအပေါ် အရပ်ဘက်ခုံရုံးမှာ ခုခံချေပခွင့်၊ တရားရင်ဆိုင်ခွင့်တွေ မရရှိတော့ပဲ၊ စစ်ခုံရုံးကနေ ပြစ်ဒဏ်တွေ စီရင် ချမှတ်တာမျိုးတွေ ဖြစ်လာစေပါတယ်။

14. ၉ ဧပြီ ၂၀၂၁လန်ဒန် မြန်မာသံရုံး သိမ်းပိုက်ခံရတာကို ဆန္ဒပြ

    မြန်မာနိုင်ငံမှာ ဆန္ဒပြ ပြည်သူတွေကို အာဏာသိမ်း စစ်ကောင်စီ တပ်ဖွဲ့တွေက ပစ်ခတ် သတ်ဖြတ်နေမှုတွေနဲ့ လန်ဒန်က မြန်မာ သံရုံးကို သံအမတ်ကြီး မရှိစဥ်မှာ သံမှူးကြီးနဲ့ စစ်သံမှူးတို့က စီးနင်း သိမ်းပိုက်တဲ့ လုပ်ရပ်ကို လက်မခံ နိုင်သူတွေ လန်ဒန်က မြန်မာသံရုံး ရှေ့မှာ လာရောက် ဆန္ဒထုတ်ဖော်ကြပါတယ်။

    လာရောက် ဆန္ဒပြသူတွေထဲမှာ မြန်မာတွေအပြင် ဗြိတိသျှ လူမျိုးတွေပါ ပါဝင်တာကိုလည်း တွေ့ရပါတယ်။အဲဒီအထဲမှာ အသက် ၈၀ အရွယ်က စလို့ လူငယ် လူလတ်ပိုင်းတွေပါ ပါဝင်တာကိုလည်း တွေ့ရပါတယ်။ ဗြိတိသျှမြေမှာ မြန်မာသံရုံးကို အာဏာသိမ်းသလို ဝင်စီးတာကို လက်မခံကြောင်း ဗြိတိသျှ အမျိုးသမီး တဦးက ပြောပါတယ်။သူတို့က ဒီလို လာရောက် ဆန္ဒပြကြတာဟာ မြန်မာပြည်တွင်းမှာ စစ်အာဏာသိမ်းမှုကို ဆန့်ကျင်နေကြတဲ့ မြန်မာပြည်သူတွေကို အားပေး ထောက်ခံတဲ့ အနေနဲ့ လာကြတာ ဖြစ်ကြောင်းပြောကြပါတယ်၊၊

    မြန်မာ လူမျိုး တဦး ဖြစ်တဲ့ ကိုချစ်ညိုက အာဏာသိမ်းထားတာကို ရပ်ပစ်ဖို့နဲ့ ပြည်သူက ရွေးကောက်တင်မြှောက်ထားတဲ့ အရပ်သား အစိုးရကို ပြန်ဖွဲ့စည်းပေးဖို့၊ မြန်မာပြည်သူတွေကိုလည်း ဆက်ကြိုးစားကြဖို့ အားမလျော့ကြဖို့ မြန်မာပြည်သူတွေအတွက် ပြည်ပက မြန်မာတွေကလည်း ကြိုးစားပေးသွားမှာ ဖြစ်ကြောင်း အားပေး စကားတွေ ပြောပါတယ်။

    ဗြိတိသျှ လူမျိုး တဦး ဖြစ်သူ ဒေးဗစ်က မြန်မာပြည်တွင်းက လူထု လှုပ်ရှားမှုကို ထောက်ခံကြောင်း၊ သံရုံးစီးနင်းမှုဟာ ဗြိတိသျှမြေပေါ်မှာ ဖြစ်တာကြောင့် အံ့သြမိကြောင်း၊ ဗီယင်နာ စာချုပ်အရ ဗြိတိန်အနေနဲ့ မပြောသာတာကို သိနားလည်ကြောင်း၊ ဗြိတိသျှ အစိုးရနဲ့ ကုလသမဂ္ဂကက CRPH ကို အသိအမှတ်ပြုရင် ဒီလူတွေကို လက်ခံစရာ မလိုတော့ဘူးလို့ ပြောပါတယ်။

    နောက်ထပ် ဗြိတိသျှ တယောက် ဖြစ်တဲ့ လူးကပ်စ်က သံရုံးစီးနင်းမှုဟာ သူရဲဘောကြောင်တဲ့ လုပ်ရပ်ဖြစ်တယ်၊ မြန်မာစစ်တပ်ဟာ ပြည်ပမှာပါ လာပြီး ဒီလိုအပြုအမူတွေကို လုပ်လာနေပြီ ဖြစ်ကြောင်း စစ်တပ်ရဲ့ လုပ်ရပ်တွေအတွက် အရေးယူရမယ်လို့ ပြောပါတယ်။

15. ၉ ဧပြီ ၂၀၂၁ပုံမှန်မလည်နိုင်တဲ့ ဘဏ်စနစ်ကြောင့် ပြည်သူတွေ အခက်တွေ့နေကြ

16. ၉ ဧပြီ ၂၀၂၁ရန်ကုန်တိုင်းထဲက မြို့နယ်တချို့မှာ PSI စလောင်းတွေဖြုတ်ဖို့ ကြေညာနေ

    ရန်ကုန်တိုင်းထဲက စစ်အုပ်ချုပ်ရေးကြေညာထားတဲ့ မြောက်ဒဂုံနဲ့လှိုင်သာယာမြို့နယ်တွေအပြင် တွံတေးမှာလည်း မြန်မာပြည်တွင်းလူသုံးများတဲ့ ဂြိုလ်တုကနေ ဖမ်းယူနိုင်တဲ့ PSI တံဆိပ် ဒစ်ဂျစ်တယ်ရုပ်သံဖမ်းစက်တွေကိုဖြုတ်ဖို့ စစ်ကောင်စီက လိုက်လံကြေညာတာတွေရှိနေတယ်လို့ နယ်ခံတွေက အတည်ပြုပါတယ်။

    အဲဒီရုပ်သံဖမ်းစက်စလောင်းငယ်တွေကို ဖြုတ်ဖို့၊ မဖြုတ်ထားတာတွေ့ရင် သိမ်းဆည်းမယ်ဆိုတာမျိုးကြေညာသွားတာလို့ ဆိုပါတယ်။

    မြောက်ဒဂုံမှာဆိုရင် ၃၅ ရပ်ကွက်နား ပင်လုံလမ်းမကြီးပေါ်မှာ မြေသယ်ယာဉ်တစ်စီးပေါ် အသံချဲ့စက်တင်ပြီး ရဲကား ၂ စီး၊ စစ်ကား ၂ စီးနဲ့ ကြေညာသွားတာလို့ အနီးနားမှာရှိသူတွေက ပြောပါတယ်။

    လှိုင်သာယာမှာဆိုရင်လည်း PSI စလောင်းတွေ ပိတ်ဖို့ကို ရပ်ကွက်ရုံးကနေ ကြေညာတာ၊ ရပ်ကွက်သူ ရပ်ကွက်သားတွေကြား တဆင့်စကားကနေ ကြားတာမျိုးရှိတယ်လို့ လှိုင်သာယာနယ်ခံတွေက အတည်ပြုပါတယ်။

    တွံတေးမြို့ပေါ်မှာတော့ ဒီညနေ ၃ နာရီလောက်မှာ စစ်တပ်က အဲဒီ PSI စလောင်းတွေကို လိုက်ဖြုတ်နေတယ်လို့ မြို့ခံတွေက ပြောပါတယ်။

    မနေ့တုန်းကတော့ ဧရာဝတီတိုင်းထဲက မအူပင်မြို့အပါအဝင် မြို့နယ်တချို့နဲ့ မွန်ပြည်နယ်က မြို့နယ်တချို့မှာ PSI စလောင်းတွေကို ဖြုတ်တာ သိမ်းဆည်းတာတွေရှိခဲ့ပါတယ်။

    စစ်ကောင်စီက ပြည်တွင်းမှာ ရုပ်သံထုတ်လွှင့်ခွင့်ပိတ်ထားတဲ့ မဇ္ဈိမ၊ ဒီဗီဘီ သတင်းရုပ်သံလိုင်းတွေ အဲဒီစလောင်းငယ်တွေကနေတဆင့် ဖမ်းယူကြည့်ရှုခွင့်ရနေဆဲဖြစ်လို့ သတင်းစီးဆင်းမှုလျော့အောင်လုပ်ဖို့ စစ်ကောင်စီရဲ့ကြိုးပမ်းမှုလို့ ကျယ်ကျယ်ပြန့်ပြန့်ရှုမြင်ခံထားရပါတယ်။

    ဒီတံဆိပ်ပိုင်ရှင်ဖြစ်တဲ့ ထိုင်းကုမ္ပဏီ PSI ကတော့ ပြည်သူတွေလုံခြုံရေးအတွက် မဇ္ဈိမနဲ့ ဒီဗီဘီလိုင်းတွေကို ယာယီပိတ်ထားတယ်ဆိုပြီး မနေ့ ဧပြီလ ၈ ရက်ညပိုင်းမှာကြေညာထားပါတယ်။

17. ၉ ဧပြီ ၂၀၂၁ဆန္ဒပြလူအုပ်ကို တကယ်ပစ်ရင် လူငါးရာကျော် နာရီပိုင်းအတွင်းသေတယ်လို့ စစ်ကောင်စီပြော

    ဆန္ဒပြသူတွေကို တကယ်သာပစ်ခတ်ဖြိုခွင်းရင် လူငါးရာကျော်ကို နာရီပိုင်းအတွင်း သေအောင်ပစ်နိုင်တယ်လို့ စစ်ကောင်စီကပြောလိုက်ပါတယ်။

    စစ်ကောင်စီရဲ့ ပစ်ခတ်ဖြိုခွင်းမှုကြောင့် နှစ်လအတွင်း လူ ၆၀၀ ကျော်သေဆုံးခဲ့မှုအပေါ် ဒီကနေ့ နေပြည်တော်မှာလုပ်တဲ့ သတင်းစာရှင်းလင်းပွဲမှာ စစ်ကောင်စီရဲ့ သတင်းထုတ်ပြန်ရေးခေါင်းဆောင် ဗိုလ်ချုပ်ဇော်မင်းထွန်းက ကာကွယ်ပြောကြားခဲ့တာပါ။

    “အမှန်တကယ်သာဆန္ဒပြတဲ့လူအုပ်စုကို မောင်းပြန်ရိုင်ဖယ်နဲ့အော်တိုမစ်တစ်ပစ်မယ်ဆိုရင် အခုခင်ဗျားတို့ပြောနေတဲ့ လူငါးရာဆိုတာ နာရီပိုင်းအတွင်းတင်သေတယ်။ စဥ်းစားကြည့်ပါ။အခုဘယ်နှရက်ရှိပြီလဲ။ နာရီပိုင်းအတွင်းတင်သေတယ်”လို့ သူကပြောခဲ့တာပါ။

    စစ်ကောင်စီရဲ့ပစ်ခတ်မှုကြောင့် လူ ၆ ရာကျော်သေဆုံးခဲ့ပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း AAPP က ထုတ်ပြန်ထားပါတယ်။

    ဒါပေမဲ့ စစ်ကောင်စီဘက်ကတော့ လူ ၂၀၀ ကျော် သေဆုံးခဲ့တယ်လို့ ထုတ်ပြန်ပါတယ်။

    လမ်းပေါ်က ဆန္ဒပြမှုတွေကိုမှားယွင်းပစ်ခတ်မှုတွေရှိနိုင်တယ်လို့ စစ်ကောင်စီဘက်က ပထမဆုံးအကြိမ်ဝန်ခံလိုက်ပြီး ရဲစခန်းကိုဝင်စီးတဲ့ဖြစ်စဥ်တွေမှာတော့ ကျည်အစစ်နဲ့ အနီးကပ်ပစ်ခတ်မှုတွေ ရှိခဲ့တယ်လို့ ပြောပါတယ်။

    ဗိုလ်ချုပ်ဇော်မင်းထွန်းရဲ့ အခုလို ပြောစကားအပေါ်ဝေဖန်မှု အများအပြားရှိနေကြပါတယ်။

    ၈၈ အရေးအခင်းတုန်းက ဦးနေဝင်းပြောခဲ့တဲ့ “လူစုလူဝေးနဲ့ဆူဆူပူပူလုပ်လို့ရှိရင်တော့ စစ်တပ်ဆိုတာ မှန်အောင်ပစ်တယ်။ မိုးပေါ်ထောင်ပြီး ခြောက်တာမပါဘူး”ဆိုတဲ့ စကားကို ပြည်သူအများစုက ဒီနေ့အထိ မမေ့နိုင်ဘဲ ဒေါသထွက်နေကြဆဲ ဖြစ်ပါတယ်။

18. ၉ ဧပြီ ၂၀၂၁တာဝန်ရပ်နားခံရတဲ့ မြန်မာသံအမတ်ကို ယူကေမှာ ဆက်နေခွင့်ပြု

    ရာထူးက ရပ်နားခံရတဲ့ မြန်မာသံရုံးက သံအမတ်ကြီး ဦးကျော်စွာမင်း သူ့အနာဂတ်ကို ဆုံးဖြတ်နေဆဲမှာ သူ့ကို နိုင်ငံထဲ ဆက်နေထိုင်ခွင့်ပြုမယ်လို့ ယူကေက ဒီကနေ့ ပြောပါတယ်။

    သံအမတ်ကြီးကို သံရုံးထဲ ဝင်ခွင့်မပြုတော့တဲ့ လုပ်ဆောင်ချက်ကို ရှုတ်ချတယ်လို့လည်း ယူကေ နိုင်ငံခြားရေးရုံးက ပြောထားပါတယ်။

    ဦးကျော်စွာမင်းက CDM လှုပ်ရှားမှုမှာ ပါဝင်တယ်လို့ တရားဝင် ထုတ်ပြောထားတာမရှိပေမဲ့ ရာထူးက ရပ်နားခံရပြီး နောက်တစ်နေ့မနက်မှာ ပြည်ထောင်စုလွှတ်တော်ကော်မတီ CRPH နဲ့ ပူးပေါင်းလုပ်ဆောင်မယ်ဆိုတဲ့သူ့ကိုယ်စား ကြေညာချက်ကို ယူကေရောက် မြန်မာအသိုင်းအဝိုင်းက ဦးဆောင်သူတစ်ဦးက ကြေညာခဲ့ပါတယ်။

    စစ်ကောင်စီဘက်ကတော့ ဦးကျော်စွာမင်းဟာ နိုင်ငံတော်က ချမှတ်ထားတဲ့ မူဝါဒတွေနဲ့ နိုင်ငံခြားရေးဝန်ကြီးဌာနရဲ့ ညွှန်ကြားချက်တွေကို လိုက်နာမှုမရှိဘဲ အာဏာအလွဲသုံးစားလုပ်ပြီး ဥပဒေမဲ့လုပ်ရပ်တွေကို ကျူးလွန်တယ်လို့ဆိုပြီး ဧပြီလ ၇ ရက် ကစပြီး ဝန်ထမ်းအဖြစ်က ထုတ်ပယ်လိုက်ပြီလို့ နိုင်ငံပိုင် မီဒီယာကနေ မနေ့ ဧပြီ ၈ ရက်က ကြေညာသွားပါတယ်။

    ဒါ့အပြင် သံအမတ်ကြီးနေရာမှာ သံမှူးကြီး ဒေါက်တာ ချစ်ဝင်းကို သံရုံးတာဝန်ခံအဖြစ် ခန့်အပ်ကြောင်း ယူကေနိုင်ငံခြားရေးဝန်ကြီးဌာနကို မြန်မာနိုင်ငံခြားရေးဝန်ကြီးဌာနဘက်က အကြောင်းကြားခဲ့ပါတယ်။

    ယူကေ နိုင်ငံခြားရေးဝန်ကြီးဌာန ပြောရေးဆိုခွင့်ရှိသူကတော့ မြန်မာသံအမတ် တာဝန်က ရပ်နားတဲ့ အကြောင်းကြားစာကို လက်ခံရရှိခဲ့ပြီးဖြစ်ကြောင်းနဲ့ မြန်မာစစ်ကောင်စီရဲ့ ဆုံးဖြတ်ချက်ကိုလက်ခံမယ်လို့ ပြောကြားထားပါတယ်။

19. ၉ ဧပြီ ၂၀၂၁လူထောင်ချီဆီ အကူအညီရောက်နေတဲ့ မိုးကောင်းမြို့က ရွှေ့လျားဈေးဆိုင်အလှူ, ဒီမျှဝေခြင်းအစီအစဉ်ကနေ တနေ့ကို လူ ၅၀၀ ကျော်အထိ အကူအညီရဖို့ ရည်ရွယ်

    ကချင်ပြည်နယ် မိုးကောင်းမြို့မှာ လိုသူယူ၊ပိုသူလှူ ရွှေ့လျားဈေးဆိုင်အလှူကို နေ့စဉ်ပြုလုပ်နေပြီး ဒီနေ့ ဧပြီ ၉ ရက်မှာဆိုရင် သီတင်း ၂ ပတ်ရှိနေပေမဲ့ အလှူရှင်ရော အလှူခံပါ ရပ်မသွားသေးဘူးလို့ သိရပါတယ်။

    ဒီနေ့အစီအစဉ်ကိုတော့ ညနေ ၃ နာရီကနေစပြီး မြစ်ကြီးနား-ရွှေဘို ပြည်ထောင်စုလမ်းမကြီးက ကျွန်းတောရပ်ကွက်ဈေးနားမှာ ပြုလုပ်တာပါ။

    ဆန်၊ ကြက်သွန်နီ အပါအဝင် အခြေခံ စားသောက်ကုန်တွေကို အဓိက လှူဒါန်းနေတာဖြစ်ပါတယ်။

20. ၉ ဧပြီ ၂၀၂၁မိုးကုတ်မြို့က လူငယ်တွေရဲ့ ကော်ဖီသပိတ်

    မိုးကုတ်မြို့မှာ လူငယ်တွေစုပေါင်းပြီး စစ်အာဏာရှင်ဆန့်ကျင်ရေးဆန္ဒပြတဲ့အနေနဲ့ ကော်ဖီသပိတ်ကို ဒီနေ့ ဧပြီလ ၉ ရက်မှာ ပြုလုပ်သွားပါတယ်။

    ဒါ့ပြင် မိုးကုတ်မှာ ဒီနေ့ မြို့အရှေ့ပိုင်းနဲ့ အနောက်ပိုင်းကလူထုကလည်း ဆန္ဒပြပွဲတွေ ပြုလုပ်ခဲ့ပါတယ်။

    မိုးကုတ်က ဒီနေ့ လူထုလှုပ်ရှားမှုပုံတွေကို စုစည်းဖော်ပြပေးလိုက်ပါတယ်။