ဒေတာကုန်ကျမှုလျှော့ချနိုင်ရန်အတွက် ယခုဝက်ဘ်ဆိုက်မှ စာမျက်နှာများကို ရုပ်ပုံမပါ စာသားဖြင့်သာတင်ဆက်ပေးထားပါသည်။ ရုပ်ပုံ ဗီဒီယိုများနှင့် ကြည့်လိုလျှင် မူလစာမျက်နှာတွင်ကြည့်နိုင်ပါသည်။
ထိပ်သီးဆွေးနွေးပွဲမတိုင်ခင် အာဆီယံခေါင်းဆောင်တွေနဲ့တွေ့ဆုံဖို့ ကုလအထူးကိုယ်စားလှယ် စီစဉ်နေ
ဧပြီလ ပထမပတ်အတွင်း အမျိုးသားညီညွတ်ရေးအစိုးရကို ဖွဲ့စည်းပြီး ဖက်ဒရယ်ဒီမိုကရေစီအင်အားစု အားလုံးနဲ့ လက်တွဲပြီး အဲဒီပဋိညာဉ်ပါ ဦးတည်ချက်တွေအတိုင်း ဆောင်ရွက်မယ်လို့ ပြည်ထောင်စုလွှတ်တော်ကိုယ်စားပြုကော်မတီ CRPH က ကြေညာပါတယ်။
တရုတ် မြန်မာနယ်စပ်မှာ မြန်မာနိုင်ငံသားတချို့ အပါအဝင် လူ ၉ ဦးမှာ ကိုဗစ် ၁၉ ရောဂါပိုး တွေ့ရှိခဲ့တဲ့အတွက် တရုတ်အစိုးရက နယ်စပ် ရွှေလီမြို့ကို လော့ခ်ဒေါင်း ချထားလိုက်ပါတယ်။
ရွှေလီမြို့မှာ နေထိုင်နေသူအားလုံးကို သီတင်းတစ်ပတ် အိမ်ထဲမှာပဲ နေပြီး အိမ်ပြင်မထွက်ကြဖို့ အာဏာပိုင်တွေက ညွှန်ကြားထားပြီး မြို့နေလူထု ၂ သိန်းစလုံးကို ကိုဗစ်ပိုးရှိမရှိ PCR နည်းနဲ့ အမြန်ဆေးစစ်မှုတွေ စလုပ်နေပြီ ဖြစ်ပါတယ်။
ရောဂါပိုးတွေ့ခဲ့သူ ၉ ဦးထဲက ၄ ဦးဟာ အသက် ၂၄ နှစ်ကနေ ၃၀ အကြား အရွယ် မြန်မာလူမျိုးတွေ ဖြစ်တယ်လို့ သိရပြီး မြန်မာနိုင်ငံထဲကနေ တရားမဝင် ဝင်လာမယ့်သူတွေကိုလည်း လုံခြုံရေးတပ်ဖွဲ့တွေက စောင့်ကြည့်စစ်ဆေးမှုတွေ ပိုလုပ်လာမယ့်ပုံ ရှိပါတယ်။
အခုအခါ ရွှေလီမြို့အနီး တရုတ်မြန်မာ နယ်စပ်မှာ လုံခြုံရေးတွေ တင်းတင်းကျပ်ကျပ် ချထားပြီး နယ်စပ်ဂိတ် တချို့ကိုလည်း ပိတ်ထားတယ်လို့ သိရပါတယ်။
မတ်လ ၂၉ ရက်နေ့က ကျောက်စိမ်းအရောင်းအဝယ် လုပ်တဲ့ ကျောက်ဝိုင်းမှာ မြန်မာတစ်ဦးမှာ ကိုဗစ် ရောဂါပိုး တွေ့ခဲ့တဲ့အပြီး အဲဒီနေ့က စလို့ ရွှေလီ တံတားနဲ့ မန့်ဝိန်း တံတားတွေကို တရုတ်ဘက်က ပိတ်ထားလိုက်တယ်လို့ မူဆယ် ဆန်စပါးကုန်စည်ဒိုင် ဒုတိယဥက္ကဌ ဦးမင်းသိန်းက ဘီဘီစီကို ပြောပြပါတယ်။
အခုအခါ တရုတ်နိုင်ငံဘက်ခြမ်း ကျယ်ဂေါင်မှာ ကုန်တင်ကား အစီးရေ ၃၀၀ ကျော်လောက်နဲ့ ၁၀၅ မိုင်- မူဆယ်လမ်းတလျှောက်မှာ ကုန်တင်ကား အစီးရေ ၅၀၀ လောက် ပိတ်မိနေပြီး ကုန်စည်စီးဆင်းမှု တုံ့ဆိုင်းသွားခဲ့ရတယ်လို့ သူက ပြောပါတယ်။
မကြာသေးခင်ကပဲ မြန်မာလူမျိုးတွေကို ရွှေလီမြို့က ဟိုတယ်တွေမှာ တည်းခိုခွင့် တားမြစ်ထားပြီး တချို့ကို ထိန်းသိမ်းတာမျိုးတွေ လုပ်ခဲ့ပါတယ်။ ဒါဟာ မြန်မာနိုင်ငံမှာ စစ်တပ်က အာဏာသိမ်းခဲ့အပြီး အိမ်နီးချင်း တရုတ်နိုင်ငံထဲ လူတွေ အစုလိုက်အပြုံလိုက် ထွက်ပြေး ခိုလှုံလာခဲ့ရင် နိုင်ငံ့လုံခြုံရေး ထိခိုက်လာမှာကို တရုတ်အစိုးရက စိုးရိမ်နေတယ်ဆိုတာ ပေါ်လွင်နေပါတယ်။
“ဆိုးရွားလာနေသောလုံခြုံရေးအခြေအနေကြောင့် အရေးပေါ်တာဝန်ထမ်းဆောင်ရန်မလိုအပ်သည့် အမေရိကန်သံရုံးဝန်ထမ်းများနှင့်၎င်းတို့၏မိသားစုဝင်များကို မြန်မာနိုင်ငံမှထွက်ခွာရန် အမေရိကန်နိုင်ငံခြားရေးဝန်ကြီးဌာနက ညွှန်ကြားထားပါသည်။ အမေရိကန်သံရုံးဆက်လက်ဖွင့်ထားပါသည်။”
ဗမာနိုင်ငံလုံးဆိုင်ရာ ကျောင်းသား သမဂ္ဂများအဖွဲ့ချုပ်နဲ့ ဘုရားကြီး ငြိမ်းချမ်းရေး စစ်ကြောင်းတို့ ပူးပေါင်းပြီး မတ်လ ၃၁ ရက်နေ့ မနက်ပိုင်းက မန္တလေးမြိုမှာ အာဏာသိမ်း စစ်ကောင်စီကို ဆန့်ကျင် ဆန္ဒထုတ်ဖော် ခဲ့ကြပါတယ်။
ရန်ကုန်တိုင်းအတွင်းက မာရှယ်လော ထုတ်ပြန်ထားတဲ့ မြို့နယ်တွေမှာ ဖမ်းဆီးမိခဲ့သူတွေကို အခုအခါ စစ်ခုံရုံးဖွဲ့ စစ်ဆေးနေပါတယ်။
မတ်လ ၁၅ ရက်က မာရှယ်လော ထုတ်ပြန်ပြီး စစ်အုပ်ချုပ်ရေး ကြေညာထားတဲ့ ရန်ကုန်တိုင်းက လှိုင်သာယာ၊ ရွှေပြည်သာ၊ တောင်ဒဂုံ အပါအဝင် မြို့နယ် ၆ မြို့နယ်မှာ ဖမ်းဆီးမိခဲ့သူတွေကို အင်းစိန်ထောင်မှာ ထိန်းသိမ်းထားခဲ့ရာမှာ အခုလို စစ်ခုံရုံးဖွဲ့စစ်ဆေးနေတာလို့ သိရပါတယ်။
တပ်မတော်ရဲ့စည်းမျဉ်းဥပဒေနဲ့ ဖွဲ့စည်းထားတဲ့ စစ်ခုံရုံးဟာ အကျဉ်းရုံးနည်းနဲ့ စစ်ဆေးတာ ဖြစ်ပြီး တရားစွဲဆိုထားတဲ့ ပုဒ်မတွေရဲ့ အမြင့်ဆုံး ပြစ်ဒဏ်နဲ့ စီရင်လေ့ရှိပါတယ်။
အင်းစိန်ထောင် စစ်ခုံရုံးမှာ အမှုစစ်ဆေးခံရသူတွေအနေနဲ့ ခုခံပိုင်ခွင့် မရှိသလို တချို့တွေလည်းထောင်ဒဏ် ၃ နှစ်ကနေ အနှစ် ၂၀ အထိ ချမှတ်ခံခဲ့ရတယ်လို့ ဖမ်းဆီးခံရသူတွေအရေး လိုက်ပါ ဆောင်ရွက်ပေးနေသူ ရှေ့နေ ဒေါ်ဇာလီအေးက ဘီဘီစီကို ပြောပါတယ်။
ဒီလို မာရှယ်လော ထုတ်ခံထားရတဲ့ မြောက်ဒဂုံမြို့နယ်မှာ မတ်လ ၂၁ ရက်ညက ဖမ်းဆီးခံခဲ့ရတဲ့ အသက် ၁၆ နှစ် မပြည့်သေးသူ ကျောင်းသားတစ်ဦးကတော့ လက်နက်ကိုင်ဆောင်မှုနဲ့ ထောင်ဒဏ် သုံးနှစ် ချမှတ်ခံခဲ့ရပါတယ်။ ဖမ်းဆီးခံခဲ့ရတဲ့ညက လက်ကို သေနတ် ထိမှန်ထားခဲ့ပြီး စစ်ဆေးရုံမှာ ဆေးကုသမှု ခံယူအပြီး တစ်ပတ်အတွင်းမှာ ပြစ်ဒဏ် ချမှတ်ခံခဲ့ရတာ ဖြစ်ပါတယ်။
ဂျင်ဂလိနဲ့ လှမ်းချိန်တာ တွေ့လို့ဆိုပြီး ဖမ်းသွားတဲ့ နေ့ကတည်းကနေ ကနေ့အချိန်အထိ မိသားစုနဲ့ ဖုန်း နှစ်ကြိမ်သာအဆက်အသွယ် ရသေးတယ်လို့ အစ်မဖြစ်သူက ပြောပါတယ်။
မာရှယ်လော ကြေညာထားတဲ့ ဒီမြို့နယ် ၆ ခုမှာ စစ်တပ်အင်အား အလွန်အကျွံ သုံးထားပြီး ဖမ်းဆီးခံထားရသူ အရေအတွက်ဟာလည်း သိသိသာသာ များလာနေတယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP ရဲ့ ပြောခွင့်ရသူတစ်ဦးက ပြောပါတယ်။
ရွှေပြည်သာနဲ့ လှိုင်သာယာ မြို့နယ် ၂ မြို့နယ်ထဲမှာတင် မတ်လ ၂၉ ရက်နေ့အထိ ဖမ်းဆီးခံထားရတဲ့အမှုပေါင်း ၃၆ မှု ရှိပြီး အဲဒီထဲကမှ ၃ မှုကိုသာ စစ်ခုံရုံးက စစ်ဆေးပြီး ဖြစ်တယ်လို့ ဖမ်းဆီးခံထားရသူများအရေး လိုက်ပါဆောင်ရွက်ပေးနေတဲ့ "သင့်အတွက်ရှေ့နေများ အဖွဲ့"ထံက သိရပါတယ်။
တစ်နိုင်ငံလုံး အတိုင်းအတာအနေနဲ့ကတော့ လူ ၃၀၀၀ နီးပါး ဖမ်းဆီးခံခဲ့ရပြီး သေဆုံးသူက လောလောဆယ် ၅၀၀ ကျော် ရှိနေပြီ ဖြစ်ပါတယ်။
မြန်မာနိုင်ငံ တစ်ဝန်းလုံးမှာ ကာကွယ်ရေးနဲ့ အုပ်ချုပ်ရေး ကိစ္စရပ်များအပြင် အစိုးရရဲ့ လုံခြုံရေးနဲ့ အုပ်ချုပ်ရေး ယန္တရားတွေ နှောင့်ယှက်ထိပါး တိုက်ခိုက်ချိန်မှအပ တပ်မတော်ရဲ့ စစ်ရေးလှုပ်ရှားမှုတွေကို ဧပြီ ၁ ရက်မှ ၃၀ ရက် အထိ ရပ်ဆိုင်းမယ်လို့ တပ်မတော်ကာကွယ်ရေး ဦးစီးချုပ်ရုံးက ဒီကနေ့ မတ်လ ၃၁ ရက် ရက်စွဲနဲ့ ကြေညာပါတယ်။
ငြိမ်းချမ်းရေးဆွေးနွေးမှုတွေ ပြုလုပ်နိုင်ဖို့နဲ့ သင်္ကြန်ပွဲတော်ကျင်းပနိုင်ဖို့အတွက် ဒီလို ရပ်ဆိုင်းတာ ဖြစ်တယ်လို့ ဆိုပြီး ငြိမ်းချမ်းရေး လုပ်ငန်းစဥ်တွေမှာ ပါဝင်နေသူတွေ ဒီကာလမှာ ထာဝရ ငြိမ်းချမ်းရေးရရှိအောင် ကြိုးပမ်းစေလိုကြောင်း တိုက်တွန်းတယ်လို့လည်း ဆိုပါတယ်။
ညီနောင်မဟာမိတ် ၃ ဖွဲ့ဖြစ်တဲ့ ကိုးကန့် (MNDAA)၊ တအာင်း(TNLA)နဲ့ ရခိုင်(AA) တပ်တွေကတော့ နိုင်ငံရေးပြဿနာကို နိုင်ငံရေးအရ လက်တွေ့ကျကျ ဖြေရှင်းနိုင်ဖို့ တစ်ဖက်သတ် အပစ်ရပ်တာကို ၂၀၁၉ ခုနှစ် စက်တင်ဘာလ ၉ ရက်ကနေ ၂၀၂၁ ခုနှစ် မတ်လ ၃၁ ရက်အထိ အဖြတ်လိုက်ခွဲပြီး အကြိမ်ကြိမ်ကြေညာခဲ့ပေမဲ့ တပ်က အာဏာသိမ်းပြီး ဆန္ဒပြသူတွေကို အကြမ်းဖက် ပစ်ခတ်မှုတွေ လုပ်ဆောင်နေတာတွေကြောင့် တဖက်သတ် အပစ်ရပ်တဲ့ကိစ္စကို ပြန်သုံးသပ်နေပြီလို့ မနေ့က ကြေညာခဲ့ပါတယ်။
ဒါ့အပြင် စစ်အာဏာသိမ်းပြီးနောက် ကချင်ပြည်နယ်နဲ့ ကရင်ပြည်နယ်တို့မှာ တိုက်ပွဲတွေ ဖြစ်ပေါ်နေပြီး ဒေသခံတွေ နေအိမ်တွေကို စွန့်ခွာထွက်ပြေးနေရပါတယ်။
နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ သမ္မတ ဦးဝင်းမြင့် အပါအဝင် မတရား ဖမ်းဆီး ခံထားရသူတွေကို ပြန်လွှတ်ပေးရေး ဆက်တောင်းဆိုပေးဖို့ ၊ CRPH ပြည်ထောင်စုလွှတ်တော် ကိုယ်စားပြုကော်မတီက ဖွဲ့စည်းမယ့် အစိုးရသစ်ကိုသာ အသိအမှတ်ပြုဖို့နဲ့ အာဏာသိမ်း စစ်ကောင်စီကို အသိအမှတ် မပြုဖို့ အပါအဝင် တောင်းဆို တိုက်တွန်းချက် ၁၁ ချက်ပါ စာတစ်စောင်ကို မတ်လ ၃၁ ရက်နေ့က CRPH Supporters UK အဖွဲ့နဲ့ ယူကေရောက် တိုင်းရင်းသားအဖွဲ့အစည်းတွေက ယူကေ နိုင်ငံခြားရေးရုံးထံ သွားရောက် ပေးအပ်ခဲ့ပါတယ်။
နေ့လည် ၁၁ နာရီခွဲမှာ ယူကေရောက် မြန်မာတွေက လန်ဒန်မြို့ ဗြိတိသျှပါလီမန်လွှတ်တော်ရှေ့နဲ့ တရုတ်သံရုံးရှေ့တို့မှာ စုရုံး ဆန္ဒပြခဲ့ကြပါတယ်။
ဂျာမနီနိုင်ငံ Giesecke+Devrient ကုမ္ပဏီက မြန်မာနိုင်ငံသုံး ငွေစက္ကူတွေ ပုံနှိပ်ရာမှာ အသုံးပြုတဲ့ ကုန်ကြမ်းပစ္စည်းတွေ တင်သွင်းမှုအားလုံးကို ချက်ချင်း ဆိုင်းငံ့ဖို့ ဆုံးဖြတ်လိုက်ကြောင်း ဒီကနေ့ မတ်လ ၃၁ ရက် နေ့စွဲနဲ့ ထုတ်ပြန် ကြေညာလိုက်ပါတယ်။
Giesecke+Devrient ကုမ္ပဏီဟာ မြန်မာနိုင်ငံမှာ ဖြစ်ပျက်နေတဲ့ အခြေအနေတွေကို အထူးစိုးရိမ် ဝမ်းနည်းစိတ်နဲ့ စောင့်ကြည့် လေ့လာနေခဲ့ပြီး အာဏာသိမ်းစစ်တပ်နဲ့ မြန်မာပြည်သူတွေအကြား အကြမ်းဖက် ထိပ်တိုက်ရင်ဆိုင်မှုတွေ ဆက်လက် ဖြစ်ပွားနေတဲ့ အခြေအနေကြောင့် အခုလို ဆုံးဖြတ်လိုက်တာလို့ ဆိုပါတယ်။
မြန်မာနိုင်ငံမှာ ဖြစ်ပျက်နေတဲ့ အခြေအနေတွေနဲ့ ပတ်သက်လို့ Giesecke+Devrient ကုမ္ပဏီအနေနဲ့ ကုလသမဂ္ဂအဖွဲ့ကြီးနဲ့ရော၊ ဂျာမနီအစိုးရ၊ သံတမန်အဖွဲ့အစည်းတွေနဲ့ပါ ဆက်သွယ် ပြောဆိုခဲ့တယ်လို့ ဆိုပါတယ်။
Giesecke+Devrient ကုမ္ပဏီဟာ ဗဟိုဘဏ်နဲ့ မြန်မာ ပြည်သူပြည်သားတွေ အသုံးပြုနိုင်ဖို့အတွက် မြန်မာနိုင်ငံသုံး ငွေစက္ကူတွေ ပုံနှိပ်ရာမှာ အသုံးပြုတဲ့ ကုန်ကြမ်းပစ္စည်းတွေ တင်သွင်းဖို့နှစ်နိုင်ငံ စီးပွားရေး ပူးပေါင်းဆောင်ရွက်မှု စာချုပ်နဲ့ ရင်းနှီးမြှုပ်နှံမှု လုပ်နေတာ ဖြစ်ပါတယ်။
အခုလို ကုန်ကြမ်းပစ္စည်းတင်သွင်းမှု မဆိုင်းငံ့ခင် ပြီးခဲ့တဲ့ သီတင်းပတ်တွေအတွင်းကတည်းက Giesecke+Devrient ကုမ္ပဏီဟာ မြန်မာနိုင်ငံနဲ့ စီးပွာရေး အဆက်အသွယ်တွေ ကန့်သတ်ထားခဲ့ပြီး ဖြစ်တယ်လို့ သိရပါတယ်။
စစ်ကိုင်းတိုင်းဒေသကြီး၊ ကန့်ဘလူမြို့နယ်၊ တောက္ကရှပ်ကျေးရွာအုပ်စုမှာ မတ် ၃၁ ရက် ညနေပိုင်းက ပြုလုပ်တဲ့ နွေဦးတော်လှန်ရေး ပုံရိပ်တွေ ဖြစ်ပါတယ်။
အင်အား ရာဂဏန်းဝန်းကျင်ပါဝင်တဲ့ ဒီမိုကရေစီအရေးတောင်းဆိုသူတွေက ကံသာကုန်း၊ တောက္ကရှပ်နှင့် မင်းကုန်း ကျေးရွာသုံးရွာကို လှည့်လည်ချီတက်ကာ ဆန္ဒထုတ်ဖော်ခဲ့ကြပါတယ်။
မြန်မာနိုင်ငံမှာ စစ်တပ်က ဖေဖော်ဝါရီလ ၁ ရက်မှာ အာဏာစသိမ်းကတည်းကနေ မတ်လ ၃၀ အထိ ၂ လနီးပါးအတွင်း စစ်အာဏာရှင်ဆန့်ကျင်ရေးဆန္ဒပြပွဲတွေမှာ အကြမ်းဖက်ဖြိုခွင်းခံရမှုတွေကြောင့် သေဆုံးရသူ ၅၂၁ ဦးအထိရှိလာပြီလို့ နိုင်ငံရေး အကျဉ်းသားများ ကူညီစောင့်ရှောက်ရေး အသင်း (AAPP) ရဲ့ မှတ်တမ်းတွေက ဆိုပါတယ်။
မနေ့ မတ်လ ၃၀ရက် တစ်ရက်တည်းတင် သေဆုံးသူ ၈ ဦးအထိ ရှိခဲ့တယ်လို့ ဖေဖော်ဝါရီကတည်းက ဖြိုခွင်းမှုတွေနဲ့ ဖမ်းဆီးမှုတွေကို စောင့်ကြည့်စာရင်းပြုစုနေတဲ့ AAPP က ပြောပါတယ်။
ဒါက ကောက်ယူရရှိတဲ့ အချက်အလက်တွေပေါ် မူတည်ပြီး တွက်ချက်ထားတဲ့ ကိန်းဂဏန်းသာဖြစ်ပြီး အမှန်တကယ်သေဆုံးတဲ့ အရေအတွက် ဒီထက် ပိုနိုင်တယ်လို့လည်း ဆိုပြောတယ်။
ဒါ့ပြင် ဖမ်းဆီးခံရသူ အရေအတွက်ကလည်း နှစ်ထောင့်ခြောက်ရာ ကျော်ရှိတယ်လို့ ဆိုပါတယ်။
စစ်အာဏာရှင်စနစ် အမြစ်ပြတ် ဖြုတ်ချနိုင်ရေးအတွက် အကြမ်းမဖက်တဲ့နည်းတဲ့ ပြည်သူ့အာဏာဖီဆန်ရေး CDM လှုပ်ရှားမှုမှာ ဝန်ထမ်းတွေအားလုံး ပါဝင်ကြဖို့ ပြည်ထောင်စုလွှတ်တော်ကိုယ်စားပြု ကော်မတီ CRPH က ဒီကနေ့မှာ ထပ်မံတိုက်တွန်းတာကို တွေ့ရပါတယ်။
ဒီကနေ့ မတ်လ ၃၁ ရက်နေ့ဟာ CDM လုပ်ဖို့ နောက်ဆုံး သတ်မှတ်ထားချိန်ဖြစ်တယ်၊ လာမယ့် ဧပြီလ ပထမအပတ်အတွင်း ပေါ်ပေါက်လာမယ့် ပြည်သူ့အစိုးရ တာဝန်ယူချိန်ရောက်ရင် CDM မလုပ်တဲ့ သူတွေအားလုံးကို ဆန့်ကျင်ပုန်ကန်သူတွေအဖြစ် မှတ်ယူကာ ပြင်းပြင်းထန်ထန် အရေးယူသွားမယ်လို့လည်း CRPHက သတိပေးထားပါတယ်။
တဖက်မှာလည်း အာဏာသိမ်းစစ်ကောင်စီဘက်က CDM လုပ်နေတဲ့ ဝန်ထမ်းတွေကို အလုပ်တာဝန်ရပ်ဆိုင်းတာ၊ ဖမ်းဆီးတရားစွဲဆိုတာတွေ ရှိနေပါတယ်။
ဒါပေမဲ့ CDM လှုပ်ရှားမှုမှာ ပါဝင်နေတဲ့ ဝန်ထမ်းတွေ အများအပြားရှိနေပါတယ်။
CRPH က ခန့်အပ်ထားတဲ့ ပြည်ထောင်စုဝန်ကြီးတဦးလည်း ဖြစ်၊ CDM လှုပ်ရှားမှုမှာ ပါဝင်ကြဖို့ အဓိက တိုက်တွန်းဆော်သြနေသူလည်း ဖြစ်တဲ့ ဒေါက်တာ ဇော်ဝေစိုးကတော့ စစ်အုပ်ချုပ်ရေးစနစ်အောက်မှာ ဝန်ထမ်းတွေအနေနဲ့ ဘာအကြောင်းနဲ့မှ အလုပ်ပြန်ဆင်းစရာမလိုဘူး၊ ဖယ်ဒရယ် ဒီမိုကရေစီ ပြည်ထောင်စု မရမချင်း အလျှော့မပေးပဲ ဆက်လက်တိုက်ပွဲဝင်သွားကြရမယ်လို့ ပြောဆိုထားပါတယ်။
ပုဒ်မ (၅)ခုနဲ့ တရားစွဲဆို ခံထားရတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ ဒီကနေ့ မတ်လ ၃၁ ရက်မှာ သူ့အတွက် အမှုလိုက်ဖို့ ရှေ့နေပါဝါ တင်ထားသူတွေနဲ့ ဗွီဒီယို ကွန်ဖရင့်စ်ကတဆင့် တွေ့ဆုံ စကားပြောခွင့် ရခဲ့ပါတယ်။
ဇမ္ဗူသီရိမြို့နယ် ရဲတပ်ဖွဲ့မှူးရုံးကနေ ဒေါ်အောင်ဆန်းစုကြည်ရဲ့ ရှေ့နေတွေကို အမှုပါဝါ တင်ထားတဲ့ကိစ္စပြောဖို့ ခေါ်ခဲ့တာ ဖြစ်ပြီး အဲဒီနောက်မှ ရဲတပ်ဖွဲ့မှူးရုံးခန်းမှာ ဒေါ်အောင်ဆန်းစုကြည်နဲ့ အွန်လိုင်းကတဆင့် ၁၅ မိနစ်ခန့် ကြာ စကားပြောခွင့် ရခဲ့တာလို့ ဒေါ်အောင်ဆန်းစုကြည်ရဲ့ရှေ့နေ ဒေါ်မင်းမင်းစိုးက ဘီဘီစီကို ပြောပါတယ်။
ဒေါ်အောင်ဆန်းစုကြည်ဟာ ကျန်းမာရေးကောင်းမွန်တဲ့ပုံ တွေ့ရပြီး ရွှင်ရွှင်လန်းလန်းရှိတယ်လို့ ဆိုပါတယ်။
ဒီကနေ့ မတ်လ ၃၁ ရက်နေ့ဟာ အမျိုးသားဒီမိုကရေစီအဖွဲ့ချုပ်ပါတီ NLD အစိုးရ သက်တမ်း ကုန်ဆုံးတဲ့နေ့ဖြစ်ပြီး ဧပြီလ ၁ ရက်နေ့ဟာ အစိုးရသစ် တက်ရမယ့်အချိန် ဖြစ်ပါတယ်။
တခါ အမေရိကန် အခြေစိုက် CNN ရုပ်သံသတင်းထောက်တစ်ဦးဟာ မြန်မာနိုင်ငံကို ရောက်ရှှိနေပါတယ်။ သူဟာ စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံမေးမြန်းဖို့ရှိတယ်လို့လည်း သတင်းတွေ ထွက်ပေါ်နေပါတယ်။
ဒီလို အခြေအနေမှာပဲ ဒေါ်အောင်ဆန်းစုကြည်ကို ရုံးချိန်းရက်မတိုင်မီ တရက်စောပြီး ရုတ်တရက် သူ့ရဲ့ရှေ့နေတွေနဲ့ တွေ့ခွင့်ပြုခဲ့တာ ဖြစ်ပါတယ်။
မင်္ဂလာပါ။ မြန်မာနိုင်ငံမှာ ဖြစ်ပေါ်နေတဲ့ အခြေအနေတွေကို အချိန်နဲ့ တစ်ပြေးညီ တိုက်ရိုက်တင်ဆက်မှု စတင်ပါပြီ။ ပြီးခဲ့တဲ့ သီတင်းပတ်အတွင်းက ဖြစ်ပေါ်ခဲ့တဲ့ သတင်းတွေကို ဒီနေရာမှာ ပြန်လည်ဖတ်ရှုနိုင်ပါတယ်။