በኢትዮጵያ ከፍተኛ ቁጥር ያላቸው ሰዎች የኮሮናቫይረስ ተገኘባቸው

የቀጥታ ሽፋን

1. 5 ግንቦት 2020የኢራን አየር መንገድ በመካከለኛው ምስራቅ ኮቪድ-19 እንዲሰራጭ አድርጓል ተባለ

   

   የፎቶው ባለመብት, Getty Images

   ማሃን የተሰኘው የኢራን አየር መንገድ በመካከለኛው ምስራቅ ለኮቪድ-19 መሰራጭት ምክንያት እንደነበረ ተረጋገጠ።

   ከኢራን አብዮታዊ ጥበቃ ጋር ግንኙነት ያለው ማሃን አየር መንገድ በቫይረሱ የተያዙ ሰዎችን ከኢራን ወደ ሌባኖስ እና ኢራቅ አጓጉዟል።

   በሌባኖስ እና ኢራቅ ለመጀመሪያ ጊዜ በኮቪድ-19 መያዛቸው የተረጋገጡት ሰዎች በዚህ አየር መንገድ ከኢራን የመጡ ናቸው።

   በማሃን አየር መንገድ ውስጥ የሚገኙ የቢቢሲ ምንጮች እንዳሉት፤ የአየር መንገዱ የበረራ አስተናጋጆች ስለቫይረሱ ስርጭት ስጋታቸውን እንዳይናገሩ ተደርገዋል።

   ከዚህ በተጨማሪም የበረራ ሠራተኞች በቂ የመከላከያ ቁሶችም አያገኙም ነበር።

   የበረራ መከታተያ መረጃ እንደሚያሳየው ምንም እንኳን አገሪቱ የበረራ እገዳ ብትጥልም አየር መንገዱ በተደጋጋሚ ወደ ቻይና ጉዞዎችን አድርጎ ነበር።

   ማሃን ኤር በጉዳዩ ላይ ምንም አይነት አስተያየት ከመስጠት ተቆጥቧል።

2. 5 ግንቦት 2020ጸጉር ቤቶችና ኮሮናቫይረስ በአውሮፓ

   

   የፎቶው ባለመብት, Getty Images

   ጥብቅ የእንቅስቃሴ ገደብ ጥለው ከነበሩት አገራት መካከል አንዳንዶቹ እገዳውን ማላለት ጀምረዋል።

   በመላው አውሮፓ የእንቅስቃሴ ገደቡ ቀስ በቀስ መላላት የጀመረ ሲሆን ወደስራቸው ለመመለስ ከፈጠኑት መካከል ጸጉር ቤቶች ይጠቀሳሉ።

   በጸጉር ቤቶቹ ውስጥም ከሁለት በላይ ደንበኞች መጠበቅ አይችሉም፣ ጋዜጣ ማንበብ አይቻልም፣ የጸጉር ባለሙያው ለእያንዳንዱ ደንበኛ የተለያዩ ጓንቶችን መጠቀም አለበት እንዲሁም ደንበኛውም ሆነ ባለሙያው የአፍና አፍንጫ መሸፈኛ ጭንብል ማድረግ አለባቸው።

   ከወርሃ መጋቢት በኋላ በጀርመን የሚገኙ አንዳንድ ጸጉር ቤቶች መከፈት ጀምረዋል።በስፔን የሚገኙ ጸጉር ቤቶችም ከትናንትናው ሰኞ ዕለት ጀምሮ ለደንበኞቻቸው ክፍት ሆነዋል።

3. 5 ግንቦት 2020አሜሪካ ከአንድ ወር በኋላ ለመጀመሪያ ጊዜ ዝቅተኛውን የሞት መጠን አስመዘገበች

   

   የፎቶው ባለመብት, EPA

   አሜሪካ ባለፉት 24 ሰዓታት ከኮቪድ-19 ጋር የተያያዘ ዝቅተኛውን የሞት መጠን እንዳስመዘገበች አስታውቃለች። የሟቾች ቁጥር 1015 ሲሆን ይህም ከአንድ ወር በኋላ ዝቅተኛው መሆኑ ተጠቁሟል።

   በአሜሪካ እስካሁን ከ 1.1 ሚሊየን በላይ ሰዎች በኮሮናቫይረስ ተይዘዋል። ይህ ቁጥር በስፔን ከተመዘገበው በአምስት እጥፍ የሚበልጥ ሲሆን ከቻይና ደግሞ በ 14 እጥፍ ይበልጣል።

   እስካሁን ደግሞ 200 ሺ የሚሆኑት ከቫይረሱ አገግመዋል።

   የአሜሪካ መንግስት በሰራው ጥናት መሰረት በቫይረሱ የሚያዙ ዜጎች ቁጥር ከዚህም በላይ በፍጥነት የሚጨምር ሲሆን የሟቾች ቁጥር ግን በመጪው ሰኔ መቀነስ እንደሚያሳይ ኒው ዮርክ ታይምስ ዘግቧል።

4. 5 ግንቦት 2020ካምቦዲያ ለሳምንታት በቫይረሱ የተያዘ ሰው አላገኘሁም አለች

   

   የፎቶው ባለመብት, Getty Images

   የደቡብ ምስራቅ እሲያዋ አገር ካምቦዲያ ባለፉት ሶስት ሳምንታት በቫይረሱ የተያዘ ሰው ስለመኖሩ ሪፖርት አላደረገችም።

   ይህም ብቻ ሳይሆን ካምቦዲያ በቫይረሱ ከተያዙ 122 ሰዎች 120ዎቹ በፍጥነት እንዲያገግሙ በመርዳት አመርቂ ውጤት አስመዝግባለች።

   ይሁን እንጂ የአገሪቱ መንግሥት የሚፈለገውን ያክል ምርመራ ባለማካሄዱ ተጨማሪ በቫይረሱ የተጠቁ ሰዎች ሊኖሩ ይችላሉ የሚል ግምት አለ።

   ከአጠቃላይ 16 ሚሊዮን የካምቦዲያ ህዝብ የኮቪድ-19 ምርመራ የተደረገላቸው ሰዎች ቁጥር ከ760 አይበልጥም።

   የአገሪቱ መንግሥት ምንም እንኳ ባለፉት ሶስት ሳምንታት በቫይረሱ የተጠቃ ሰው ባናገኝም ተጥለው የሚገኙት ገደቦች ይቆያሉ ብሏል።

   በአሁኑ ወቅት በካምቦዲያ ትምህርት ቤቶች፣ ቲያትር እና መዝናኛ ቤቶች ዝግ ናቸው።

5. 5 ግንቦት 2020ሕንድ የመጠጥ ሱቆችን መክፈቷን ተከትሎ ረጃጅም ሰልፎች እየታዩ ነው

   

   የፎቶው ባለመብት, AFP

   በሕንድ ሰኞ አመሻሹን አንዳንድ አነስተኛ ሱቆች መከፈት መጀመራቸውን ተከትሎ ዜጎች አልኮል ለመግዛት ሲጣደፉ ተስተውሏል። ረጅም የሚባሉ ሰልፎችም በሱቆች በር ላይ ታይተዋል።

   በማህበራዊ ሚዲያ በተሰራጩት ተንቀሳቃሽ ምስሎችና ፎቶዎች መሰረት የተሰለፉት ሰዎች ማህበራዊ ርቀታቸውን መጠበቅ ላይ ግድ እንደሌላቸው ማሳያ ነው ተብሏል።

   የሕንዷ ኒው ዴልሂ ከተማ ማንኛውም አልኮል መጠጥ ላይ ለኮሮና መከላከያ የሚውል 70 በመቶ ጭማሪ ብታደርግም ሰዎች ከመግዛት ሊቆጠቡ አልቻሉም።

   ሱቆች መከፈታቸውን ተከትሎ በታየው ሰልፍ ምክንያት ደግሞ በአንዳንድ የከተማዋ አካባቢዎች የሚገኙ ሱቆች ተመልሰው እንዲዘጉም ተወስኗል።

6. 5 ግንቦት 2020የአፍና አፍንጫ መሸፈኛ አድርጉ ያለው ጥበቃ ተገደለ

   

   የፎቶው ባለመብት, GOFUNDME

   የአፍና አፍንጫ መሸፈኛ ማስክ ባለማድረጋቸው ወደ ሱቅ ውስጥ እንዳይገቡ የከለከላቸውን የጥበቃ ሰራተኛ ነፍስ ያጠፉት የቤተሰብ አባላት ክስ ተመሰረተባቸው።

   ሟች የ43 ዓመቱ ካልቪን ሙንርሊይን በአሜሪካዋ ሚቺጋን ግዛት ነው ጀርባው ላይ በጥይት ተመትቶ ሕይወቱ ያለፈችው።

   የቤተሰቡ አባል የሆነች ሴት ልጅ ማስክ ባለማድረጓ ወደሱቁ መግባት እንደማትችል ሲነግራት በተፈጠረ አለመግባባት ነው ወንጀሉ የተፈጸመው።

   እናት ሻርሜል ቲግ በቁጥጥር ስር የዋለች ሲሆን ባለቤቷ እና ወንድ ልጇ ግን አሁንም እየተፈለጉ እንደሆነ ተገልጿል።

   ማስክ ባለማድረጓ ወደ ውስጥ እንዳትገባ የተከለከለችው ሴት ደግሞ የግዛቲቱን ሕግ በመተላለፍ ክስ ቀርቦባታል።

7. 5 ግንቦት 2020አሜሪካ ሪኮርድ የሆነ 3 ትሪሊየን ዶላር ልትበደር ነው

   

   የፎቶው ባለመብት, Getty Images

   አሜሪካ ኮሮናቫይረስ ያስከተለውን ከፍተኛ ጫና ለመቋቋም በአገሪቱ ታሪክ ሪኮርድ የሆነ 3 ትሪሊየን ዶላር ልትበደር መሆኑ ተገለጸ።

   ከዚህ ቀደም የቫይረሱን ስርጭት ለመግታት እና በኮቪድ-19 ምክንያት ዜጎችን ለመደገፍ የትራምፕ አስተዳደር ብድር ወስዶ ነበር።

   አሜሪካ ብድር የምትወስደው የመንግሥት ቦንድ በመሸጥ ነው።

   በብድር የሚገኘው 3 ትሪሊየን ዶላር በዋናነት በቫይረሱ የተጎዱትን በገንዘብ ለመደጎም እና የጤና ስርዓቱን ለማጠናከር የሚውል ነው ተብሏል።

   በአሁኑ ወቅት የአሜሪካ አጠቃላይ እዳ ወደ 25 ትሪሊዮን ዶላር ተጠግቷል።

8. 5 ግንቦት 2020በኒው ዚላንድ ለሁለተኛ ቀን በቫይረሱ የተጠቃ ሰው አልተገኘም

   

   የፎቶው ባለመብት, Getty Images

   ኒው ዚላንድ ለሁለተኛ ቀን በቫይረሱ የተጠቃ ዜጋ አላገኘሁም አለች።

   ኒው ዚላንድ ጥላ የነበረውን ጥብቅ የእንቅስቃሴ ገደብም እያላላች ትገኛለች። ጠቅላይ ሚንስትር ጃኪንዳ አርደረን ባስመዘገብነው ድል ሁላችንም ልንኮራ ይገባል ካሉ በኋላ የአገሪቱ ዜጎች ከፍተኛ ጥንቃቄ ማድረግ እንደሚኖርባቸው ተናግረዋል።

   ከቀናት በፊት ጠቅላይ ሚንስትሯ በማህብረሰብ ውስጥ ከአንድ ሰው ወደሌላ በሽታው እየተዛመተ እንዳልሆነ በመግለጽ ኮቪድ-19ን 'ድል ነስተነዋል' ብለው ነበር።

   በአሁኑ ወቅት በኒው ዚላንድ 1137 በቫይረሱ መያዛቸው የተረጋገጠ ሰዎች ያሉ ሲሆን 20 ደግሞ መሞታቸው ተገልጿል።

9. 5 ግንቦት 2020እንዴት አደራችሁ ውድ የቢቢሲ አማርኛ ቤተሰቦች

   

   የፎቶው ባለመብት, Getty Images

   ከአሁኗ ሰዓት ጀምሮ ኮሮናቫይረስን የተመለከቱ ዜናዎችን ከአገር ውስጥና ከመላው ዓለም በቀጥታ ዘገባችን ወደ እናንተ ማድረስ እንጀምራለን።

   አብራችሁን እንድትቆዩ ጋበዝናችሁ።