Mootiin Sa'uudi haleellaa lammiin isaanii Ameerikaatti raawwate ‘hojii gara-jabeessaati' jechuun ibsan

Daataa qusachuuf barreeffama qofa dubbisi
Buufata Humna Galaanaa Yunaayitid Isteet Pensaakolaa, Ameerikaa

Madda suuraa, Reuters

Ibsa waa'ee suuraa, Buufata Humna Galaanaa Pensaakolaatti hojjettoonni waraana 16,000 fi sivilii 7,400 qaxaramaniiru
Maxxanfame

Mootiin Sa'uudi Arabiyaa, Saalmaan, haleellaa barataan Sa'uudii buufata galaanaa Ameerikaa irratti raawwate 'hojii gara-jabeessaati' jechuun ibsuu isaanii Pirezidantiin Yunaayitid Isteet Donaald Tiraamp himan.

Bulchiinsi Sa'uudi gadda itti dhagahame himuuf akka itti bilbilan Obbo Tiraamp fuula tiwiitara isaanii irratti barreessaniiru.

Nami ajjechaa kana raawwate, barataa aviyeeshinii yeroo ta'u bulchiinsa Filooridaa Pensaakolaa jedhamutti nama sadii ajjeesee saddeet madesseera.

Boodarra garuu poolisiin itti dhukaase ajjeeseera.

Bulchaan bulchiinsa Filoriidaa Roon DeSantiis akka jedhanitti mootummaan Sa'uudi Arabiyaa kanneen lubbuu dhabanif beenyaa ni kenna.

Barataan ajjeechaa kana raawwate Mohaammad Sa'iid Alshamrani akka ta'e miidiyaalen Ameerikaa gabaasaniiru. Ajjeechaa kana raawwachuuf shugguxii harkarraa fayyadame jedhameera.

Poolisiin Ameerikaa, FBI barataan kuni akka inni kana godhu waan isa kakaase ifa godhuu baatus hidhata shororkeessisoota waliin qabaachusaa akka qoratamaa jirutti amanameera.

Biyyoota Baha Giddugaleessaa keessaa Sa'uudi Arabiyaan michuu Ameerikaati. Sagantaa waraanaa waliinis qabu. Barataan ajjeechaa kana raawwate immoo nama waraanaas ta'u barnootaaf gara Ameerikaa ergame raawwachuun isaa gaaffii kaaseera.

Skip Baay'ee kan dubbifame and continue reading
Baay'ee kan dubbifame

End of Baay'ee kan dubbifame

Ajjeechaa gaazexessaa Jamaal Kaashogjiif qondaaltonni Sa'uudi Arabiyaa himatamanis, Ameerikaan ammallee michummaa Sa'udii Arabiyaa akkuma cimsiteetti jirti.

Ajjeechaan buufata galaanaa Ameerikaatti torban kana qofa yeroo raawwatu kuni kan lammataati.

Mootiin Sa'udii Saalmaan, ''ummanni Sa'uudi taate 'hojii gara-jabeessummaan' raawwaten gaddaniiru, miirri nama kanaa ilaalcha ummanni Sa'uudi ummata Ameerikaa jaalalan hubatu bakka hin bu'u,'' jedhan.

Buufanni Humna Galaanaa Pensaakolaa erga rakkoon mudate booda balballi cufameera

Madda suuraa, Reuters

Ibsa waa'ee suuraa, Buufanni Humna Galaanaa Pensaakolaa erga rakkoon mudate booda balballi cufameera

Mohaammad Sa'iid Alshamraniin Humna Qilleensaa Sa'uudi keessatti leetanaantii lammaffaa ture jedhaniiru qondaaltonni Ameerikaa.

Ajjeechaa kana booda lammiileen Sa'uudi Arabiyaa hedduu to'annoo jala kan oolan akka ta'e Niw Yoork Taayims gabaaseera.

Humni galaanarraa Ameerikaa akka beeksisetti yeroo ammaa lammiileen Sa'uudii Arabiyaa 18 yeroo ammaa pensaakolaatti leenji'aa jiru.