Hooggantuun eegdota US yaalii ajjeechaa Tiraampiin walqabatee aangoorraa kaate

Haguuggii Tamsaasa Kallattii

1. 17 Adooleessa 2024Seenaatarri US Masiriif hojjataa turan jedhaman yakkamaa ta'an

   

   Madda suuraa, Reuters

   Ameerikaatti seenaatarri dhageettii qabaataa turan mootummaa Masriitiif hojjatan jedhamuun malaamaltummaan yakkamaa jedhan.

   Seenaatarri Niiw Jeersii, Boob Mendeez, matt'aa fudhachuudhuufi mootummaa Masriif hojjechuun himannaa yakka mootummaa biyya biraa gargaaruu jedhuun itti murtaa'e.

   Miseensi mana maree Ameerikaa duraaniifi dura taa'aa koree dhimmoota alaa, himannaawwan malaammaltummaa 16n balleessaan irratti argame, yoo murteen irratti darbe hidhaa waggaa dheeraa irratti darbu danda'a.

   Abbaan alangaa, seenaatarichi mootummaa biyya alaarraa faayidaalee olaanaa fudhachu agarsiisuudhaaf dhugaa bahumsa ogeessotaa, barreeffama imeelii seenaatarichaa fi ergaawwan barreeffamaa dhiyeesseera.

   Mendeez fedhii mootummoota alaa raawwachiisuuf kennaawwan fudhatan keessaa warqee doolaara kuma 100 baasuufi konolaataa Marsadiisii kan eergaman yoo ta'u, mana jireenyaa saanii keessatti maallaqni callaan doolaara kuma 480 argameera.

   Seenaatarichi matta'aa fudhachuudhaan mootummaan Masrii deeggarsa waraana mootummaa Ameerikaa doolaara miiliyoonaa akka argatu gargaaraniiru jedhamuun himataman.

   Seenaatarichi daldaltoota lammii Masrii waliiniis hidhata faayidaa qabu jedhamaniiru.

2. 17 Adooleessa 2024Iraan Doonaald Tiraamp ajjeesuuf shirti sodaa jedhuun Tiraampif eegumsi erga cimee bubbuleera

3. 17 Adooleessa 2024Haleellaa tibbana Israa'el Gaazaa keessatti raawwatteen namoonni 50 ajjeeffamuun gabaafame

   

   Madda suuraa, EPA

   Haleellaa qilleensarra Israa’el kutaalee kibbaa fi giddugaleessa Gaazaa keessatti walduraa duubaan raawwateen yoo xiqqaate lammiileen Filisxeem 50 ajjeefamanii heddu madaa’uu ministeerri fayyaa Hamaasiin geggeeffamu beeksiseera.

   Haleellaa lubbuu namaa galaafate keessaa tokko naannoo gargaarsa namoomaa dhiheenya kana hundaa'e al-Mawaasi, magaalaa kibbaa Kaan Yuunis irraa gara dhihaatti argamutti raawwatame.

   Haleellaan biraa mana barumsaa UN kan namoonni buqqa'an akka kaampii baqattootaatti keessa buufatan Nuseerat, giddugala Gaazaa keessatti argamu irratti raawwatame.

   Waraanni Israa’el ammoo haleellaawwan lamaanuu kan miseensota gareewwan hidhattoota Filisxeem irratti xiyyeeffate ta’uu ibsuun, gabaasa lubbuu namoota nagaa baduu ilaalchisee ka'u ammoo qorataa jiraachu beeksiise.

   Akkasumas, haleellaa qilleensaa fi duula lafoo Israa’el ji’oota sagaliif Gaazaa keessatti raawwatte, hoggansi kutaa waraanaa Hamaas walakkaan ajjeefamuu ykn ''shororkeessitoonni” 14,000 ta'an ammoo akka to'ataman ibse.

   Israa’el haleellaa osoo hin eegamiin Onkoloolessa 7 kibba biyyattii irratti raawwachuun, namoonni gara 1,200 ajjeefamanii, kaan 251 ta'an ammoo ittiin booji'amanii deebii kennuuf jecha, Hamas balleessuuf duula waraanaa kan jalqabde.

   Ergasii booda garuu Gaazaatti namoonni 38,710 ol ajjeefamaniiru jedha ministeerri fayyaa naannichaa. Haata'u malees lakkoofsi kunis namoota nagaa fi loltoota addaan hin baasu. Ta'us, dhuma baatii Eblaatti namoota du’an keessaa daa’imman, dubartootaa fi maanguddoota 14,680 adda baafamunsaanii gabaafameera.

4. 17 Adooleessa 2024Ilma qonnaan bulaa Olompikarratti Afrikaaf warqii jalqabaa injifate

5. 17 Adooleessa 2024Baayiden Mana Murtii Olaanaarratti haaromsa gaggeessuu barbaadu: gabaasa

   

   Madda suuraa, AFP

   Joo Baayidan muudama umurii guutuu ta'u dabalatee, riifoormii Mana Murtii Olaanaa Ameerikaa keessatti taasifamu deeggaruuf yaadaa akka jiru miidiyaaleen Ameerikaa himan.

   Bayidan Mana Murtii Olaanarratti rofoormii gaggeessuu yaadunsaanii erga manni murtii olaanaa mirga ulfa baasuu federaalaa haqee fi murtii Doonaald Tiraamp pirezidaantii ta'uun ''gochaawwan seeraa'' raawwataniin himannaa irraa bilisa akka ta'e kennuu dabalatee murteewwan walduraa duubaan dabarsee boodadha.

   US keessatti michuu BBC kan ta’e CBS News akka gabaasetti, Aab Baayidan yeroo ammaa muudama umurii guutuu ta’eef daangaa yeroo abbootii murtii kaa’uu fi seera naamusaa mana murtii cimsuu qorachaa akka jiran gabaaseera.

   Haata'u malee, jijjiiramni Kongireesii qoqqoodame keessatti darbuun rakkisaa ta'a. Dhuma torban darbee Aab Baayidan waamicha irratti Dimookiraatotaaf akka himanitti, ogeeyyii haaromsa mana murtii olaanaa yeroo dhiyootti ifoomu irratti hojjechaa akka jiran maddi waamicha kana beeku CBS News'itti himeera.

   Baayidan waa’ee yaada dhihaate kana ilaalchisee waamicha Kongireesii Progressive Caucus waliin taasifame irratti bal’inaan hin ibsine.

6. 17 Adooleessa 2024Ashamaa hordoftootaa!

   Odeessaalee karaa tamsaasa kallattiin isin biraan geenyu kan har'aa kunoo amma eegalleerra.

   Yoo nu hordoftan odeessaalee ijoo addunyaa mara irraa karaa kanaan ni argattu.

   Bakka nagaa oolaa!

7. 16 Adooleessa 2024Boru ganama walitti deebina.

   Tamsaasi kallattii BBC Afaan Oromoo Kibxataa xumurame.

   Roobii ganama walitti deebina.

   Halkan gaarii!

8. 16 Adooleessa 2024Pirezidantiin Keeniyaa akka bu'an hiriira bahameen tokko ajjeefame

   

   Madda suuraa, BBC/Mercy Juma

   Mormiin dargaggoota Keeniyaa pirezidantiin biyyattii akka aangoorraa bu’an gaafatu har’as itti fufee gaggeeffameen namni tokko ajjeefame.

   Nami ajjeefame walitti bu’iinsa humnoota nageenyaafi mormitoota gidduun ta’u gaazexeessitoonni BBC bakkichaa gabaasaa turan himaniiru.

   Giddugala magaalaa Naayiroobii keessatti suuqileen cufaa oolan.

   Poolisiin mormitoota dhibbaan lakkaa’aman bittinsuuf waan ija gubu dhukaasaa ture.

   Mormiin Keeniyaatti baatii darbe eegale wixinee gibirri dabalataa akka ummanni kanfalu gaafatu mormuuni.

   Haa ta’u malee, eegasii pirezidantiin biyyattii Wiiliyaam Ruutoo wixinee sana hambisaniiru.

   Kaabinee isaanii hunda jedhamuu danda’u aangoorraa buusuun ala murtee danuu dabarsaniiru.

   Hoogganaan poolisii biyyattiis aangoorra bu’uu beeksisuun isaanii ni yaadatama.

   Ta’us, hammi isaa haa xiqqaatu malee mormiin hin dhaabbatiin jira.

   Mormii kanaan lammiileen biyyattii 40 ol ajjeefamuu Komishiniin Mirgaa biyyattii ibseera.

9. 16 Adooleessa 2024Inj. Taakkalaan hojii gaggeessaa Tajaajila Baaburaa Itiyoo-Jibuutii ta'un muudaman

   

   Madda suuraa, Takale Uma/Facebook

   Injinar Taakkala Uumaan Hojii Gaggeessaa Olaanaa Tajaajila Baabura Itiyoo-Jibuutii ta’un muudamuu dhaabbatichi beeksise.

   Ministirri Albuudaa duraanii kan muudaman Ministira Mummee Abiy Ahimadiin ta’u ibsameera.

   Guyyaa har’aa Injinar Taakkalaan ergaa miidiyaa hawaaasummaarratti barreessaniin deeggarsa naaf taasisaniif jedhaniin MM Abiy galateeffataniiru.

   Biyya kana tajaajiluun anaaf kabaja jechuun muudamuu isaanii waan akeekus kataban. Ammoo lafa muudaman ifatti hin ibsine ture.

   Miseensa kaabinee bulchiinsa MMA biy ta’u isaaniin dura Inj. Taakkalaan kantiibaa magaalaa Finfinneefi Naannoo Oromiyaattis itti gaafatama garagaraarratti tajaajilaniiru.

   Injinar Taakkalaan waggaa darbe barnootaaf gara Ameerikaa akka imalan BBC’tti dubbatanii turan.

   Eegasiimmoo tibbana erga daawwannaa hojiirratti Pirezidantii Oromiyaa Obbo Shimallis Abdiisaa waliin mul’atanii turan.

   Muudamni isaaniis guyyaa har’aa dhagahame. Akkaatuma kanaan Inj. Taakkalaan Dr Abdii Zannabee bakka bu'uun dhaabbaticha hoogganu jechuudha.

   Waa'ee muudama kanaa garuu ammatti waajjirri Ministira Muummee Itoophiyaa waan ibse hin qabu.

10. 16 Adooleessa 2024Dippiloomaatiin gameessi Kooriyaa Kaabaa biyya ganan

    

    Madda suuraa, Getty Images

    Dippiloomaatiin Kooriyaa Kaabaa, Kuubaa qubatanii jiran Kooriyaa Kibbaatti baqachuu ejensiin basaasaa Sowuul BBCf mirkaneesse.

    Dippiloomaatiin kuni Kooriyaa Kibbaatti baqachuun bara 2016 as qondaala aangoo olaanaa qabanidha jedhameera.

    Dippiloomaatiin kuni Sadaasa darbe akka Kooriyaa Kibbaa seenan Tajaajilli Tikaa Biyyaalessaa beeksiseera.

    Namoonni Kooriyaa Kaabaa irraa Kooriyaa Kibbaa seenan hamma ummatatti makamanitti waa'een isaanii ifatti hin himamu.

    Akka gabaasni miidiyaalee Kooriyaa Kibbaa irraa bahu agarsiisutti, dippiloomaatiin miilanaa kuni embaasii Kooriyaa Kaabaa Kuubaa jiru keessa dhimmoota siyaasaa irratti hojjetaa turan.

    BBC'n garuu kana hin mirkaneessine.

    Miidiyaan Kooriyaa KaabaaChosun Ilbo jedhamu dippiloomaatii kana dubbisuu himuun nama ganna 52 fi Ri Il Kyu jedhamanidha jedhe.

    Kan inni Kooriyaa Kibbaatti baqataniifis, ''mufii Kooriyaa Kaabaa wajjin qabaniifi fuulduratti abdii dhabuurraani,'' jedhe miidiyichi.

    Hojiinsaanii Kuubaan hariiroo dippiloomaasii Kooriyaaa Kibbaa wajjiin qabdu fakkeessuurraa akka dhaabdu gochuu dabalata.

    Haa tahu malee, Guraandhala keessa biyyooti lamaan hariiroo ifaa tahe hundeessan, kunimmoo Kooriyaa Kaabaaf danqaa dha.

    ''Lammiin Kooriyaa Kaabaa hundi jireenyasaa keessatti takkaa Kooriyaa Kibbaa dhaqee jiraachuu barbaada,'' jedha gaazexaan kuni.

    Yeroo dhumaaf qondaalli olaanaa gara Kooriyaa Kibbaatti kan baqate bara 2016tti ture.

    Isaaniis Tee Yoon-hoo jedhamu. UKtti ambaassaadara ittaanaa Kooriyaa Kaabaa turan.

    Gaafa Dilbataa Kooriyaan Kibbaa yeroo jalqabaaf guyyaa namoota Kooriyaa Kaabaa irraa baqatanii yaadatteetti.

11. 16 Adooleessa 2024Waldiyaatti buufati poolisii haleelamee 'poolisoonni ajjeefaman, kaan butaman'

12. 16 Adooleessa 2024Dureessi Afrikaa baroota walitti aanan 13 Daangoteen, mana lama malee hin qabu jedhe

13. 16 Adooleessa 2024Hojjattoonni lammiilee Indiyaa hedduun 'garbummaa' Xaaliyaan irra bilisa bahan

    

    Madda suuraa, Getty Images

    Lammiileen indiyaa hedduun Xaaliyaanii keessatti hojii qonnaa haala hojii garbummaa fakkaatu irratti hirmaatanii turan jedhaman bilisa bahusaanii poolisiin ibse.

    Hojjattoonni 33 ammaan tana bilisa baafaman kan gara Xaaliyaaniitti geeffaman hojii gaarii fi egereensaanii kan fooyya'ee akka ta'u lammiilee Indiyaa lamaan gowwomsamanii akka ture poolisiin dabaluun hme.

    Haata'u malee, hojjattoota kanneen kan isaan mudate guyyaatti sa'aatii 10 ol, torbaniitti ammoo guyyoota torbaaf akka hojjataniifi mindaan isaaniif kanfalamaa tures baayyee gadaanaa ta'un ibsameera.

    Namoonni gara Xaaliyaaniitti jarreen kanneen fidanis kanfaltiidhuma xiqqaa kanayyuu idaatu isin irra jira jechuun harkaa fudhataa turan jedhameera.

    Namoonni lamaan kunneenis to'annoo poolisii jala kan oolfaman yoo ta'u, doolaarri kuma 545 harkasaaniitti qabameeda.

    Xaaliyaanitti bakka qonnaatti hojjattoota biyyattiifi kanneen biyya biraa irra dhufan irra saamicha humnaa olaanaatu raawwatama.

    Hojjattoonni qonna wayiniifi kaan irratti bobba'anii turan kunneenis haala baaafamaafi osoo waliigaltee hin mallatteessiin kan mindeeffamaniidha.

    Baatii darbe keessa lammiin Indiyaa hojii qonnaa hojjatu tokko osoo hojiirra jiruu harkisaa muramee lubbuunsaa darbuun gabaafameera.

    Balaa kana hordofuunis mindeessitoonni erga nama kana qarqara ollaatti gatanii biraa deemanii booda, balaan gara biraa miilasaarra gahuun ture kan du'aaf zaasilame.

14. 16 Adooleessa 2024Yaaliin ajjeechaa Tiraamp irratti taasifame attamiin fudhatama isaarratti jijjirama hin eegamne fide?

15. 16 Adooleessa 2024Masjiida Omaan biratti namoonni afuur itti dhukaafamuun ajjeeffaman

    

    Magaalaa guddoo Omaan Maskaat keessatti naannawa masjiidaatti dhukaasa banameen lubbuun namoota afur darbuu poolisiin biyyattii beeksise.

    Ibsa gabaabaa poolisiin kennanii, naannoo al-Wadi al-Kabir keessattis namoonni ''lhedduunis'' madaa'aniiru jedhu.

    Qondaaltonni taatee kanaaf battalattii deebii kan kennan yoo ta'u, ammattis qorannoon gaggeeffamaa jiraachuu ibsi Kibxata bahe kun ni mul'isa.

    Poolisiin ibsa dabalataa kan hin kennine yoo ta'u, gabaasaaleen tokko tokko garuu yoo xiqqaate namni tokko dhukaasaa kana akka banee himu.

    "Haala kana to'achuudhaafis tarkaanfiin nageenyaa hundi hojiirra oolfamuun kan himame yoo ta'u, haaluma qaama qorannoo kanaattis hojimaanni ragaa walitti qabuu xumuramaa jira," jedha ibsi poolisii kun.

    Taateen akkanaa kunis Omaan, biyya tarsiimooftuu ulaa Galoo Galaana Arabaa irratti argamtuu fi kan ummanni Isalaamaa baayyinaan keessa jiraatu keessatti baay’ee waan barame miti.

16. 16 Adooleessa 2024Namni Tiraamp kaadhimamaa pirezidaantii ittaanaa gochuun filatan JD Vaans eenyu?

17. 16 Adooleessa 2024Poolisiin kantiibaa Filiippiin basaastuu Chaayinaati jedhe admsaa jira

    

    Madda suuraa, Facebook

    Dubartiin Kantiibaa magaala xiqqoo Filiippiinsiitti argamtu tokko ta'an erga basaastuu Chaayinaati jedhamuun himannaan irratti dhiyaateen booda dhokachuu aanga'oonni himan.

    Poolisiin Kantiibaan magaala Aliis Gu'aang jedhamtu to'annoo jala oolchuudhaaf teessoo ishee beekamuun ajaja mana murtii fudhatulleen argachu akka hin dandeenye hime. Bakka buuteenshee dhabameera jedhe.

    Kantiibaan tunis bakka dhaloota isheetti dhaabbata Chaayinaa Baambaan kan tajaajila intarneetiin tapha seeraan ala gaggeeffamu (tirgaa) waliin hidhata qabdi jedhameera.

    Dhaabbanni kunis dadabarsa namootaa karaa seeraan alaa, namoota hidhuu, dararaa fi miidhaa qaamaa geessisuun kan himatamu yoo ta'u, tapha karaa intarneetii garuu haguuggiidhaaf itti fayyadamaa ture jedhameera.

    Seenaan kantiibaa tanaatis akka diraamaatti TV gubbaatti kan dowwatame yoo ta'u, naannawa lammii Chaayinaa abbaasaaniifi shakkiiwwan Chaayinaatu akka basaastuutti ishee kaa'e jedhu ilaalchisuun kanaan dura deebii kennanii turan.

    Chaayinaafi Fiiliippiinsi kan qabeenya daangaa qarqara galaanaa irratti wal dhabdee keessatti argamanis, dhimmi kantiibaa tanaa mudama biraa itti dabaleera.

18. 16 Adooleessa 2024Tiraampi baandeejii gurra tokkotti godhachuun deeggartoota duratti argaman

    

    Madda suuraa, Getty Images

    Doonaaldi Tiraampi gurra isaanii tokkotti baandeejii (haguuggii madaa) godhachuun Wiixata galgala Konveenshinii Paartii Rippaabilkinaaotaa irratti argaman.

    Deeggartoonni kumaatamatti lakkaa'aman bahuun miira ho'aan simataniiru. Kaan imimmaansaanii qabachuu hin dandeenye.

    Tiraampi akkuma barame harka abootatan ol kaasuun ''Waaqayyo Ameerikaaa haa Eebbisu'' jechuun walatajjii seenan.

    Tiraampi michuuwan siyaasaa isaanii, ijoollee isaanii sadan dabalatee miseensota maatii isaanii harka fuudhan.

    Garuu haadha warraa isaanii Elaaniyaa hin dubbisne. Deeggartoonni isaa sagalee guddaan ''qabsaa'i, qabsaa'i,qabsaa'i,'' yoo jedhan dhagahamu.

    Yerootti Dimokiraatonni namni isaan bakka bu'an Joo Baayiden gahumsa guutuu irra hin jiran ejchuun wla dhabanitti Rippaabilikaanotni ammoo gammachuun deeggars akennaafii jiru.

19. 16 Adooleessa 2024Chaayinaatti haleellatiin booda T-shartiiwwan Tiraamp dhaabsiifame

    

    Marsartiiwwan daldala karaa intarneetii Chaayinaa keessatti T-ishartii suuraa Doonaald Tiraamp wayita inni harkasaa qilleensa keessa ol kaasuu agarsiisu qaban, rasaasaan rukutamee sa'aatii muraasaan booda buufamaniiru.

    T-shartiiwwan battalum inni rasaasaan rukutameetti gurgurtaaf dhiyaatanii kan turan yoo ta'u, marsariitiiwwan daldala karaa intarneetii beekamoo kanneen akka Taobao fi JD.com fa'i irrattis dhiyaatee ture.

    Tarreefamni kun maaliif akka buufamee ifa miti, garuu intarneetiin Chaayinaa baay'ee kan to'atame yoo ta'u, qabiyyeen "miira qabeessadha" jedhamu kamuu akkaa addaatti marsariitii irra nu buufama.

    Yaaliin ajjeechaa Sambata darbe hiriira Pensilvaaniyaa irratti raawatame kunis, hashtagwwan kanaan walqabatan waliin waltajjii X irratti toorawwan interneetii kan akka Weibo fa'irratti mata duree marii bal’aa ol’aanaa ta’aniiru.

    Daldaltoonni Chaayinaas dhukaasni erga Tiraamp irratti banamee sa'aatii sadii hin guunne keessatti ture lkan gara hojiitti utaaluun tiishartiiwwan jalqabaa maxxansuun gurgurtaaf toora interneetii irratti dhiyeessan.

    Suuraan marsariitii daldala karaa intarneetii Chaayinaa gurguddoo keessaa tokko kan ta'e, Taobao irratti maxxanfame akka agarsiisutti, tiishartiintokko gatiinsaa Yuuwaan 39 ($9; £7) akka ta'e agarsiisa.

    Daldaltuun Taobao kan ganna 25 tokko akka South China Morning Postitti akka himtetti, T-shirt kana gurgurtaaf erga dhiheessitee sa'aatii sadii qofa booda ajaja 2,000 ol akka argatte himteetti.

    Irra caalaan isaanii Chaayinaa fi US irraa turan jette. Tiraamp waggootaaf Chaayinaa keessatti madda xiyyeeffannoo toora interneetiiti - sababa gaarii fi hamaa ta'een.

20. 16 Adooleessa 2024Ashamaa hordoftootaa!

    Hordoftootaa odeessaalee kallattii dhimma yaalii ajjeechaa Doonaald Tiraampiifi odeessaalee ijoo addunyaa kallatiidhaan isin biraan geenyu kunoo amma eegalleerra.

    Yoo nu hordoftan odeessaalee haaraa argattu.

    Oolmaa gaarii!