KALLATTIIN, Zeleniskiin yaada zoonii waraanarraa bilisaa lola Yukireen dhaabuuf dhihaate didan

Haguuggii Tamsaasa Kallattii

1. 30 Hagayya 2025Namni siyaasaa beekamaan Yukireen Andrii Paarubii magaalaa Lviv keessatti rasaasaan ajjeefame

   

   Madda suuraa, Getty Images

   Af-yaa'iin paarlaamaa Yukireen duraanii kan turan Andrii Paarubii magaalaa Lviv keessatti rasaasaan ajjeefamuusaa aanga'oonni Yukireen himan.

   Poolisiin Lixa Yukireen, kutaa Firaankiivsk Lviv keessatti, Sambata har'aa akka biyyaatti naannoo sa'aatii walakkeessa guyyaatti qaqqabuusaa gabaasni isa gahe.

   Gabaasni hin mirkanoofne akka agarsiisutti, namni siyaasaa beekamaan kun nama qawwee hidhate baaskilii elektirikaan hojjatuun uffata ergamtuu uffateen yeroo baayyee rasaasaan itti dhukaafame.

   Paarubii, namni umriin ganna 54, qaama sochii Maayidaan Yukireen kan Gamtaa Awurooppaa (EU) waliin hariiroo cimaa akka qabaatu leellisu fi kan bara 2014tti pirezidantii duraanii Raashiyaa deeggaru Viktor Yaanukovych kuffiseeti.

   Pirezidaantiin Yukireen Volodymyr Zelensky ''ajjeechaa suukaneessaa'' jechuun ibsuun jajjabina erganiiru.

   Poolisiin biyyaalessaa Yukireen, poolisiin bulchiinsa Lviv fi tajaajilli nageenyaa haalicha qorataa jiru. Eenyuu ajjeechaa kana duba akka jiru hanga ammaatti ifa miti.

   Ibsa Zeleniskiin toora Teeleeguraamii isaanii irratti barreessaniin, "Ministirri Dhimma Biyya Keessaa Yukireen Ihoor Klymenkoo fi Abbaan Alangaa Waliigalaa Ruslaan Kraavchenko haala ajjeechaa suukaneessaa Lviv keessatti raawwatame irratti ammatti kan beekan gabaasaniiru. Andrii Paarubii ajjeefameera. Maatii fi hiriyyoota isaaf jajjabinan hawwa."

   "Humni fi malli barbaachisaa ta'e hunda ajjeechaa kana qorachuun nama ajjeese argachuuf bobbaafamaa jira."

2. 30 Hagayya 2025Magaalaa Sudaan humnoota RSFtiin marfamtetti daangaan ijaaramaa jiraachuu suuraan saatalaayitii mul'ise

   

   Madda suuraa, Satellite image ©2025 Maxar Technologies

   Daangaan biyyoo bal'aan naannawa magaalaa Sudaan el-Faashar Humnoota RSFtiin marfamteetti ijaaramaa kan jiru yoo ta'u, innis namoota magaalicha keessaa kiyyootti galchuuf kan yaadame ta'uu qorannoon Yunivarsiitii Yaale irraa argame ni mul'isa.

   Suuraaleen saatalaayitii irraa kaafamerraa, Laabiin Qorannoo Namoomaa yunivarsiitichaa "dallaan biyyoo" km3 ol ta'u akka daangaatti qotamuun beekameera.

   Ijaarsi kunis Caamsaa irraa eegalee ala naannawa magaalaa Humnoota Addaa (RSF)n qabametti akka ijaarame adda baaseera.

   El-Faashar magaaaa waggaa tokkoo oliif marfamtee turte yoo taatu, erga waraana Ebla 2023 irraa eegalee as, waraanaa biyyattii RSF waliin wal waraanaa jiruuf Daarfuur keessatti bakka guddaa deeggarsa itti qabu kan dhumaati.

   Neetworkiin Doktoorota Sudaan, RSF achiitti haleellaa isaa cimseen itti yaadee namoota nagaa irratti xiyyeeffachaa akka jiru BBCtti himeera. Guutummaa gabaasa kanaa asiin galaatii dubbiifadhaa.

3. 30 Hagayya 2025Lubbuu qabeeyyiin addunyaa biraarra jiraachuun hin oolu maaf jedhama? Tarii dhiheenyatti mul'atuu?

   

   Madda suuraa, Cambridge University

   Halkan keessaa samii tuuta urjiiwwan balaqqisaniin guutame ol ilaaluun ofii keessan mee akkasiin gaafadhaa. Dhuguma dachee guutummaatti hubachuuf baay'ee bal'oo taate kana keessatti qophaa keenya jirraa laata?

   Tarii ta'uu dhiisuu mala. Dachiin tuqaa ishee xiqqoo galaana bal'aa biliyoonaan lakkaa'aman biroo keessa jirtudha. Kanaafuu, akkamitti samii gadiitti ykn dachee irratti lubbu qabeessa isa qofaa ta'uu dandeenya?

   Kanaafuu, waa'ee jireenya naannoo guutummaatti to'atamee; achiitiin ala jiru maal beekna?

   Ogeeyyiin hedduun akka jedhanitti, ragaa cimaan jiraachuu alagaa osoo hin jiraatin illee, isaan achi jiru jennee xumuruu qabna. Gaalaaksiin keenya Milkii Weey qofa - galaaksii biiliyoona 200tti tilmaamaman keessaa tokko - naannoo urjiilee biiliyoona 300 of keessaa qaba. Urjiin mataa keenyaa - aduun - madda jireenyaa ijoo ta'eedha.

   Oggeessonni baayyeen akka jedhaniitti, lubbuu qabeeyyiin gara biraa jiraachunsaaniif odeeffannoo cimaan jiraachu baatulleen, asi nu biraan akka jiran waliigaluu qabna. Guutuummaa odeessa kanaa dubbiifachuuf asiin seenaa.

   Black hole: Hawaa keessaa bakka qorattoonni ga'uu hin dandeenyee fi yoo ga'anis deebiin hin jirre.

   Pilaaneetii addeessa biraarra naannofturra lubbuu qabeessi jiraachuu wanti akeeku argame.

4. 30 Hagayya 2025Reeffi booji'amtoota Israa'el Gaazaadhaa argamuu waraanni Israa'el beeksise

   

   Madda suuraa, Israeli President

   Duula Gaazaa keessatti gaggeeffameen reeffi booji'amaa Israa'el, Ilaan Wee'is gara qee'etti deebifamuu isaa waraanni Israa'el (IDF) beeksise.

   Wee'is, gaheessi umuriin waggaa 56, haleellaa Hamaas kibba Israa'el keessatti Onkoloolessa 7 bara 2023 raawwateen ajjeefaman.

   Reeffi nama booji'amee lammataa, kan eenyummaan isaa hanga ammaatti hin ibsamnees deebifamuu isaa Raayyaan Ittisa Israa'el beeksiseera.

   Israa'el haleellaa Hamaas kana hordofuun namoonni 1,200 ajjeefamanii, kaan 251 ta'an ammoo butamuun gara naannoo sanaatti fudhatamuu hordofee tarkaanfii cimaa Gaazaa keessatti labsite.

   Ergasii as yoo xiqqaate Filisxeemoonni 63,025 ajjeefamaniiru jedha ministeerri fayyaa naannoo sanaa Hamaasiin geggeeffamu.

   Ilaan Wee'is guyyaa Hamaas haleellaa sanatti osoo Kibbutz Beeri ittisaa jiranuu ture kan ajjeefaman. Achiin hamaasiin reeffi isaas gara Gaazaatti geeffame.

   Haatii warraa isaa, Shiirii fi intallii isaanii, Noogaa, guyyaadhuma wal fakkaatuutti Hamaasiin butamanii fudhataman. Isaanis yeroo gabaabaaf dhukaasa dhaabuun taasifameetti Sadaasa 2023 keessa gadhiifaman.

   ''Olaan guyyaa badii sanatti daangaa tiksuudhaaf gootummaan fi miira ciminaa agariisuun lolaa tura'' jedhan Pirezidantiin Israa'el Isaak Heerzoog, osoo maatii isaatiin ''yaalii reefa isaa deebiisuu keessatti ciminsa ajaa'ibaa agarsiisaniiru'' jechuun hin leelliisiin dura.

   Labii dhiheenyaa kun erga bahee booda, ammalleen namoonni booji'aman 48 Gaazaatti hafaniiru, isaan keessaa Israa'eloonni 20 ammalleen lubbuun jiru jettee amanti.

   Ministirri Muummee Israa'el Beeniyaamin Netaaniyaahuun, waliigaltee namoota ammallee booji'amanii hunda akka deebi'an dandeessisu irratti akka waliigalaniif biyya keessaa dhiibbaan cimaan isaan mudachaa tureera.

   Waraanni gaggeeffamaa jiru akka dhaabbatu mormiin guddaan gaggeeffamaa tureera.

   Haata'u malee, Israa'el karoora magaalaa Gaazaa dhuunfachuu fi dhumarrattis guutummaa Istirippichaa irratti olaantummaa ishee uumuuf qabdu fuulduratti oofaa jirti.

   Netaaniyaahuun mo'amuun Hamaas namoota booji'aman akka hiikaman mirkaneessa jechuun falmu.

5. 30 Hagayya 2025Teessoon mana fincaanii irra teenyu dhukkbaaf nu saaxiluu danda'aa?

   

   Madda suuraa, Getty Images

   Hammuma manneen fincaanii namoonni baay'een itti fayyadaman seennu fincaan teessoo mana fincaaniirratti faffaca'ee hafuu fi fooliin badaan mijaa'ina nu dhorkuu malu.

   Kanaafis balbala mana fincaanii ciqileen banuu, bishaan baay'isnee dhangalaasuun akkasumas teessuma mana fincaanii sooftiin haguuguun taa'uutu gorfama.

   Gaafiin organizimoonni dhibeef nu saaxilan mana fincaanii keessa yeroo hagamiif turuu danda'u jedhus samuutti nu dhufuu mala.

   Garuu teessoo mana fincaanii namoonni baay'een itti fayyadamanirra taa'uu qofaan dhibeef saaxilamuu dandeenyaa? Maloonni qaamni keenya teessoo mana fincaanii akka hin tuqneef nu gargaaran hoo jiruu? Maayikirobaayolojistiin deebii armaan gadii kennaniiru.

   Guutummaa odeessa kanaa dubbiifachuu yoo barbaaddan karaa knaan seenaa.

   Halluun fincaan keenyaa waa'ee fayyaa keenyaa maal hima? Halluu akkamiitu yaaddoodha?

   Ija keenya ittiin arguu malee akkamiin akka hojjetu hagam beekna?

6. 30 Hagayya 2025Dirooniin Yukireen 20 ganama har'aa fashalaa'uu ministeerri ittisa Raashiyaa beeksise

   

   Madda suuraa, State Emergency Service Of Ukraine

   Ministeerri ittisa Raashiyaa haleellaa diroonii Yukireen ganama har'aa gaggeessite qolachuu beeksise.

   Dirooniwwan Yukireen 20 ta'an rukutee kuffisuu beeksise ministeerichi.

   Kanneen keessaa kudha saddeet kan ta'an Kiriimiyaa irratti kufiifamusaanii dubbatan ministeerichi itti dabaluudhaan.

   Ministeerri kun kanaan dura odeeffannoo haaraa kenneen, halkan tokkotti xiyyaarota UAV 86 barbadeessuu isaanii ibseera.

   Kanaan dura ammoo ministeerichi dirooniiwwan nama maleessoo 86 halkan darbe keessa barbadeessuu ibsee ture.

7. 30 Hagayya 2025Teeknoloojii qophii qooccoo haadholiif dadhabbii guyyootaa sa'aatiitti deebise

   

   Aadde Asallafach Abbixee Kibba Itoophiyaa doorzee keessa jiraatu. Naannoon isaanii bakka qooccoon (nyaannii warqee irraa hojjatamu) baay'inaan itti oomishamu qofa osoo hin taane, isaan biratti qooccoon soorata idileeti.

   Gaazexeessitootni BBC mandara Warra Doorzee ka tabba ol ka'aarra jiruu fi baayyee qorru bahuun qe'ee isaanii wayita gahan Aaddee Asallafachis mana isaanii duubatti jirma qooccoo ciibsanii mala aadaatiin soofaa turan.

   Qe'een isaanii warqee qooccootiin kan marfamedha. Isaan hundee qooccoo qirixame taa'anii adeemsa dheeraa nyaataaf gahuuf fudhatu gara jalqabaarra jiru.

   Warqee qooccoo soofuun kun isaan qofa osoo hin taane, dubartoota naannoo isaanii cufaafuu hojii nyaata qopheessuu idilee barootaaf hojjetaniidha.

   Aadde Asallafachis hojiin qooccoo kun waan ijoollummaa irraa itti guddatan ta'uu himu. Dabalataan dubbifachuuf asiin seenuu dandeessu.

   Warqeen Itoophiyaa maaliif barana kana keessa qalbii qorattoota addunyaa hawwate?

8. 30 Hagayya 2025Haleellaa Raashiyaan kibbaafi giddugaleessa Yukireenrratti raawwatte namni tokko ajjeefamuun hedduun madaa'an

   

   Madda suuraa, Reuters

   Haleellaa Raashiyaan halkan darbe naannoo kibba Yukireen Zaaporizhiyaa irratti raawwateen namni tokko du'ee kaan hedduun madaa'aniiru.

   Namoota haleelaa kanaan miidhaman keessaa daa'imman sadii, dhiiroota lama kan umuriin isaanii waggaa sagalii fi 10 akkasumas shamarreen umuriin isaanii waggaa 16 ta'uu bulchaan naannichaa Ivaan Fedooroov'n himan.

   Pirezidantiin Yukireen Volodymiir Zeleniskiin, haleellaan kun naannichatti gamoolee mana jireenyaa rukutee ''ibidda hedduu'' uumeera jedhaniiru.

   ''Ammas irra deebiin Raashiyaan akka jechootaaf eddoo hin qabaanne agarsiisaa jirti, tarkaanfii dhugaa eeggataa jirra,'' jechuun ibsa Telegram irratti kenneen dubbatan.

   Akkasumas naannoolee giddu galeessa bahaa Diniproo fi Paavlohraad keessattis dhohinsi dhaga'ameera.

   Haleellaan dhiheenya Yukireen irratti raawwatame kun kan raawwatame Raashiyaan erga ji'a Adooleessaa haleellaa lubbuu namaa galaafate Kiiv irratti raawwatteen guyyoota muraasa boodadha.

   Haleellaa Kamisa darbe magaalaa guddoo Yukireen irratti raawwatameen yoo xiqqaate namoonni 23 ajjeefamanii hedduun madaa'anii ture.

9. 30 Hagayya 2025Manni murtii US taarifawwan Tiraamp addunyaarra kaa'e hedduunsaa seeraan ala jedhe

   

   Madda suuraa, Getty Images

   Manni Murtii Oliyyannoo US taarifawwan Doonaald Tiraamp biyyoota addunyaarra kaa'e hedduunsaa seeraan ala jechuun murtee laate. Murteen kun ajandaa Tiraamp tarsiimoo alaa irratti qabu irratti dhiibbaa akka cimaa akka fidu mala.

   Murteen mana murtichaa taarifa Tiraam biyyoota garaa garaa irra kaa'efi taarifa addaa biyyoota akka Kanaadaa, Chaayinaafi Meeksikoo irra kaa'e kan ilaallatuudha.

   Abootiin murtii Mana Murtii Oliyannoo US dhimmicharratti sagalee kennaniin sagalee 7fi 4n sagalee caalmaan taarifni Tiraamp labsii muddamaa diinagdee jechuun hojiira oolche fudhatama kan hin qabneefi "faallaa seera biyyattii ta'uu" murteessan.

   Murteen kun hanga Onkoloolessa 14tti hojiirra hin oolu jedhamee jira. Sababni ammoo Manni Murtii Waliigalaa dhimmicha fudhatee akka ilaalu bulchiinsi Tiraamp yoo ni gaafata ta'e yeroo kennuufidhaafi.

   Guutummaa odeessa kanaa dubbiifachuuf asiin seenaa.

10. 30 Hagayya 2025Haasaan bilbilaa miliqee bahe akkamitti MM Taayilaand aangorraa hariisiise?

    

    Madda suuraa, Getty Images

    Manni Murtii Heera Mootummaa Taayilaandi ammas mormuudhaan ministira mummee biyyattii biraa aangoo irraa kaaseera.

    Paanaalli biyyattii gidduu seenummaa beekamaan miseensa abbootii murtii sagal muudaman hammatu, MM biyyattii Paa'etongtaarn Shinaawaatraa haasaa bilbilaa ji'a Waxabajjii keessa hogganaa durii Kaamboodiyaa Huun Seen waliin taasifteen ulaagaa naamusaa cabsiteeti jechuun murteessee jira.

    Haasaa bilbilaan hoogganaa Kaamboodiyaa waliin taasiftee booda miliqe akka bahu taasisan.

    Haasicha keessattis Paa'etongtaarn falmii daangaa biyyoota lamaan qaban irratti Huun Seen waliin araara uumuun, ajaja waraanaa biyyashee tokko yoo qeeqan dhaga'amaa turte.

    Aangooftuun tun garuu nama hiriyyaa durii abbaa ishee, Thaaksin Shinaawaatraa kan ta'e, Huun Seen waliin dippilomaasii gaarii uumuuf yaalaa akka turte ibsuun haasawaan ishee falmtee, haasofni kun iccitii ta'ee turuu qaba tures jetteetti.

    Haasaan kun ishee fi dhaaba ishee Phee'u Thaayi irratti miidhaafi qaanii kan uume ture. Waahillan gamtaa paartiishee guddicha mootummaa keessaa ba'uudhaan akka isheen aangoo gadhiiftuuf waamicha godhan.

    Kunis akka sagalee deeggarsaa isa xiqqaan haaftu taasiseen.

    Ji'a Adooleessaa keessa abbootii murtii sagal mana murtii kana keessa jiran keessaa torba sagalee kennuudhaan Paa'etongtaarn hojii irraa ari'uuf sagalee kennaniiru.

    Kunis hiree namoota ishee afran duraanii wajjin wal fakkaatu akka ishee mudatu agarsiisa. Kanaaf murtoon Jimaata darbe waan nama ajaa'ibu hin turre.

    Paa'etongtaarn ministira mummee Taayilaand mana murtii kanaan aangoo irraa kaafaman 5ffaa yoo taatu, hundi isaaniiyyuu kan bulchiinsa abbaa isheetiin deeggaraman irraa turan.

    Kunis Taayilaandi keessatti yeroo hunda jechuun haala danda'amuun, namoota humnoota konsarvaatiivii, mootii ta'aniin akka balaatti ilaalaman irratti akka bulchitu amantaa bal'aa akka uumamu taasiseera.

    Akkasumas Manni murtichaa paartilee siyaasaa 112 kan uggure yoo ta'u, paartii Thaaksin Phee'u Thaayi beekamoo lama dabalatee, baay'een isaanii xixiqqoo fi Sochii Haaromsaa kan filannoo darbe bara 2023tti injifate 'Move Forward' dabalatee uguramniiru.

    Biyyoota muraasa biroo keessatti jireenyi siyaasaa damee qaama haqaa tokkoon akkasitti cimsee akka poolisiitti kan eegamudha.

11. 30 Hagayya 2025US hogganaan Filisxeem walgahii UN Niiwu York irratti akka hin hirmaanne dhorkite

    

    Madda suuraa, Getty Images

    Pirezidaantiin Filisxeem Maahmuud Abbaas yaa'ii waliigalaa Dhaabbata Biyyoota Gamtoomanii kan ji'a dhufu keessa Niiw Yoorkitti geggeeffamu irratti akka hin hirmaanne dhorkamuu Ministeerri Dhimma Alaa Yunaayitid Isteets mirkaneesse.

    Ministirri dhimma alaa Ameerikaa Maarkoo Ruubiyoon tattaaffii nagaa gufachiisuu fi ''gama tokkoon ammoo biyyummaa Filisxeemiif beekamtii argachuu'' barbaadu jechuun komatan.

    Murteen Israa'eliin simatame kun waan hin baratamneedha, sababiin isaas US imala qondaaltota biyyootaa waajjira muummee UN daawwachuu barbaadan hundaaf ni mijeessiti jedhamee eegama ture.

    Dhorkaan kunis kan raawwatame yeroo Faransaay walgahii kana irratti biyyummaa Filisxeemiif beekamtii kennuuf tattaaffii idil-addunyaa taasiftu dursaa jirtutti yoo ta'u, tarkaanfii kana bulchiinsi Doonaald Tiraamp mormeera.

    Odeessa kanarratti dabalataan dubbiifachuuf asiin seenuu dandeessu.

    Ministirri Israa'el akka addunyaatti qoqqobbiin irra kaa'ame eenyu?

    Biyyootni Lixaa Filisxeemiif beekamtii kennuu dura maal barbaadu?

12. 30 Hagayya 2025Zeleniskiin yaada zoonii waraanarraa bilisaa lola Yukireen dhaabuuf dhihaate didan

    

    Madda suuraa, Zelensky/Telegram

    Pirezidantiin Yukireen Volodymiir Zeleniskiin yaada humnoota Yukireen fi Raashiyaa gidduutti naannoo waraanaarraa bilisa ta'e (buffer zone) akka qaama waliigaltee nagaa ta'etti dhihaate kuffisaniiru, kunis qabatamaan kan waraana ammayyaa hin calaqqisiifne jechuun falmaniiru.

    Jimaata darbe ibsa gaazexeessitootaaf kennaniin, ''warra haala teeknooloojii waraana bara kanaa hin hubanne qofatu zoonii waranaarraa bilisaa kanaaf yaada dhiyeessa,'' jedhan.

    Yaadni Zeleniskii kunis gabaasa hoggantoonni Awurooppaa akka qaama dhukaasa dhaabuu ykn waliigaltee yeroo dheeraa ta'eetti, naannoo dhorkaa km40 (maayilii 25) ta'u yaadaa akka jiran agarsiisu dhagahamu hordofeetiidha.

    Waraanni Yukireen keessaa gara waldhabdee teeknooloojii dirooniitiin geggeeffamutti kan guddate yoo ta'u, Zelensiskiin sababii balaan haleellaa diroonii adda waraanaatti dhihoo ta'een naannoon waraanarraa bilisa ta'e hanga tokkoon duraanuu akka jiru dubbatan.

    Zooniin waraanarraa bilisa ta'e biyyoota wal waraanaa jiran jidduutti, kan akka Kooriyaa Kaabaa fi Kibbaa gidduutti naannoo waraana irraa bilisa ta'e uumuu danda'a. Akkasumas daangaawwan qaamaan akka dallaa Sibiilaa, kan Waraana Addunyaa Lammaffaan booda garee Sooviyeet fi warra lixaa adda baase uumuu danda'a.

    Akka gabaasa Politikoo irratti ba'etti, yaada dippilomaatonni Awurooppaa dhiyeessan keessaa, kan qondaaltota waraanaa fi siiviilii biratti dhiyaate, lafta Yukireen keessatti argamu irratti humnoota lamaan gidduutti akka cufamu kan jedhu ta'u himan.

    Haata'u malee, Zelensiin akka jedhanitti, duraanuu naannoonadda waraanaatti gama lamaaniinuu sababa balaa dhukaasa dirooniitiin bakkii meeshaan waraanaa cimaan itti hojjechuu hin dandeenye jira.

    "Har'a meeshaaleen waraanaa cimoon keenya fageenya km10n ol walirraa fagaatanii argamu, sababiin isaas wanti hundi dirooniin haleelamaa jira waan ta'eefiidha," jedhan.

    "Zooniin waraanarraa bilisaa kun, kan ani 'zoonii du'aa' jedhee waamuufi kan gariin 'zoonii daalach' (grey zone) jedhanii waaman duraanuu jira."

13. 30 Hagayya 2025Tamsaasa kallattiin deebiineera.

    Ashamaa hordoftoota BBC Afaan Oromoo bakka jirtan matarri.

    Tamsaasa kallattii kan odeessaalee addunyaa mara irraa gagabaabsiine isin biraan geenyu kan Sambata har'aa kunoo amma eegalleerra.

    Odeessaalee kaan bal'naan argachuuf ammoo YouTube keenya, ykn WhatsApp keenya, ykn Facebook fi kallattiin marsariitii keenya millachuu hin dagatiinaa.

    Bakka nagaa olaa!

    

14. 29 Hagayya 2025Itoophiyaan humna poolisii galaanaafi daangaa galaanaa eegu 'kan jalqabaa' jedhe eebbisiise

    

    Madda suuraa, Poolisii Federaalaa

    Poolisiin Federaalaa Itoophiyaa seenaa biyyattiin poolisii eegduu galaanaa fi daangaa galaanaa ''kan jalqabaati,'' jedhe eebbisiisuu hime.

    Poolisiin federaalaa ibsa guyyaa har'aa miidiyaa hawaasaa irratti baaseen Geejiba Galaanaafi Loojastiksii Itoophiyaa waliin tahuun poolisii karra galaanaa eegu leenjisee eebbisuu ibseera.

    Ibsi bahe Koomishinarri Poolisii Federaalaa Jeneraal Dammalaash Gabiramikaa'el ''seenaa poolisii Itoophiyaa waggaa 116 lakkoofsiseen poolisiin galaana eegu leenjisuun kan jalqabaati,'' jechuun eerameera

    Jeneraalichi meeshaaleen gurguddoo ijaarsa Hidha Haaromsaaf yeroo geejibaman poolisiin federaalaa tajaajila eegumsaa ''hamma wareega lubbuutti waggaa 14f kennaa ture'' jechuun galateeffachuus ibseera.

    Gama biraan Hoji-gaggeessaan Geejiba Galaanaafi Lojastiksii Dr Bariisoo Amaloo poolisoonni eebbifaman nageenya galaanaafi daangaa galaanaa eeguudhaan ''fedhiin daldalaa galaanaa Itoophiyaa haala amanamaa taheen akka adeemu faayidaa guddaa qabu,'' jechuun isaaniis gabaafameera.

15. 29 Hagayya 2025Bidiruun gara odola Ispeenitti imalaa turte dhidhimtee namoonni 49 lubbuun darbe

    

    Madda suuraa, Anadolu Agency/Getty Images

    Bidiruun qarqara galaanaa Mooriteeniyaatti dhidhimuun booda namoonni 49 lubbuun darbee kanneen 100 tahan ammoo achi buuteen isaanii hin baramne jechuun eegdoti galaana biyya Afrikaa lixaa kanaa himan.

    Namoonni 17 lubbuun kan baraaraman yoo tahu imaltoota ammallee otoo gara odola kibba Ispeenitti argamtu, Kaanaritti deeman achi buuteen isaanii dhabames barbaadamaa jiru.

    Akka namoonni lubbuun hafan himanitti bidiruun kuni gaafa Kibxataa biyya Za Gaambiyaa jedhamturraa imaltoota 160 baayyeen isaanii lammiilee Gaambiyaafi Senegaal tahan feeteetu yabalaa turte.

    Imalli balaafamaa garba Atlaantiik irratti taasifamu toora godaantonni Afrikaa gara Awurooppaa ittiin qaqqaban tahaa dhufeera.

16. 29 Hagayya 2025Tiraamp eegumsa addaa Kamlaa Hariisiif taasifamu dhorke

    

    Madda suuraa, Getty Images

    Pireezidantiin Ameerikaa Donaald Tiraamp eegumsa Tajaajila Tikaa biyyattiin kennamu Kamlaa Hariis irraa molqan. Tika addaa kana Joo Baayidanitu yeroo waajira gadhiisan Kamlaaf mijeesseefi.

    Pireezidantiin ittaantuu duraanii kuni erga waajiraa bahanii eegumsa kana kan argachuu danda'an baatii jahaaf qofa dha. Kunis Adoolessa darbe dhumate.

    Eegumsi isheef taasifamu kuni hogganaashee duraaniin yeroonsaa waggaa tokkoof akka dheeratu ajajaan kan eeyyamameef tahus Tiraamp garuu Kamisa kaleessaa haquu isaanii BBC'n odeeffateera.

    Tiraamp murtoo kana kan dabarsan yeroo Kamlaa Hariis kitaaba ishee ''107'' jedhuufi waa'ee duula filannoo 2024 odeessu eebbisuuf imala jalqabuuf yeroo jettutti.

    Xalayaan BBC'n arge eegumsi Kamlaaf kennamu Fulbaana 1 irraa qabee akka addaan citu akeeka.

    Qondaalli olaanaa Waayit Haawus tarkaanfii kana mirkaneessaniiru.

17. 29 Hagayya 2025Miseensonni poolisii shakkamaa lafarra harkisaa buufata poolisii geessan to'ataman

    

    Madda suuraa, Addis Ababa police

    Poolisiin magaalaa Finfinnee miseensota poolisii shakkamtoota konkolaataa keessa taa'anii jimaa qama'aafi baala sammuu namaa hadoochu fayyadamaa turan haalli itti to'onnoo jala oolchuuf yaalan naamusa hooj-maataa cabse jedhe. Kanaafis miseesonni poolisii kunneen to'atamani qoratamaa jiru jedheera jechuun Feesbuukii irratti maxxanse.

    Gaafa Hagayya 23, 2017 A.L.I to'annoo jala oolanii qorannoon irratti adeemsifamaa kan jiru Saajina olaanaa Ashabbir Gimjaaawu fi gargaaraa Saajiniin Naatinaa'el Balaay miseesnota poolisii kutaa magaala Lidataati.

    Miseensonni poolisii kunneen yeroo hojiisaanii dalagaa turanitti Finfinnee naannoo mana barumsaa Baalchaatti shakkamtoonni konkolaataa keessa taa'anii otoo jimaa qama'aniifi qoricha sammuu hadoochu fayyadaman arguun qabuuf yaalaa turan.

    Shakkamtoota kunneen keessaa inni tokko miliquuf yeroo yaalu poolisonni kunneen jala bu'anii qaban.

    Haa tahu malee akki isaan ''lafarra harkisaa buufata poolisii geessan naamusa ogummaa kan cabseefi qajeelfama eeegumsa mirga namoomaa kan hordofe miti,'' jedhe poolisiin.

    Poolisiin ibsa miidiyaa hawaasa irratti baase waa'ee shakkamtoota poolisoonni qabuuf yaalanii homaa hin jenne.

18. 28 Hagayya 2025Haleellaan Raashiyaan namoota nagaa irratti raawwattu 'fudhatama hin qabu' - Hogganaa olaanaa UN

    

    Madda suuraa, EPA

    Hogganaan olaanaa Biyyoota Gamtoomanii Antooniyoo Guuteerez haleellaa Raashiyaan magaalawwan Yukireen irratti raawwachuun namoota nagaa 19 ajjeesuun ''fudhatama hin qabu'' hatattamaan dhaabachuu qaba jedhan.

    Haleellaan kuni gamoowwan dippiloomaatotaa Gamtaa Awurooppaa fi Qontsilaa Biriitish faa rukuteera.

    ''Haleellaan namoota nagaa fi bu'uuraalee misoomaa siviilii irratti raawwatu seera idl-addunyaa cabsa,'' jechuun Guuteeres karaa dubbiihimaa isaanii ibsa kennan.

    ''Hogganaan Olaanaa kuni dhukaasni akka dhaabbatu akka haaraatti waamicha dhiyeessaniiru, Yukireniif nagaan waliigalaafi waarawaa tahe akka bu'us gaafatan,'' jechuun dubbiihimaan ibsan.

    Hogganaan Nato Maark Ruut haleellaa ''hamaa'' Raashiyaa balaalefate.

    ''Yukireen of tiksuufi nagaa waarawaa akka qabaattu gochuu qabna,'' jechuun miidiyaa hawaasaa irratti barreessan.

    Gama biraan Ministarri Mummee Xaaliyaan Joorjiyaa Melooniin mootummaan Raashiyaa karoora ''waliigaltee nagaa gochuu hin qabu,'' jedhan.

    Joorjiyaan ergaa X irratti barreessaniin ''eenyu nagaaf akka dhaabbatuufi eenyu kaayyoo marii akka hin qabne haleellaan miilanaa kuni nutti agarsiiseera,'' jedhan.

    ''Qalbiin kenya namoota nagaa Yukireenitti ajjeefaman waliin jira, maatiifi miidhamtotaaf jajjabina hawwa,'' jedhan.

19. 28 Hagayya 2025Haleellaa Raashiyaan Yukireen Kivitti raawwatteen namoonni 19 ajjeefaman

    

    Madda suuraa, Getty Images

    Haleellaa Raashiyaan magaalaa guddoo Yukireen Kivitti raawwachuun booda:

    • Adoolessa darbee as haleellaa Raashiyaan Yukireen, Kivitti raawwatteen ijoollee dabalatee namoonni 19 ajjeefamaniiru. Kaan baayyeen ammoo miidhaan qaamaa irra gaheera.

    • Miidiyaaleen biyya keessaa akka gabaasanitti Raashiyaan doonii waraanaa Yukireen haleeluun hojjetaa tokko ajjeefteetti.

    • Haleellaa kanaan manneen jireenyaa Yukireen baayyeen rukutamaniiru. Gamoowwan Gamtaa Awurooppaa, Qontsilaan Biriitish akkasumas Embaasiin Azarbaajaaniifi gamoon Turkii tokkos haleelamaniiru

    • Pireezidantiin Yukireen Voloodmiir Zelenskii haleellaa ''guddaa'' kana balaaleffachuun booda Moskoorra ''qoqqobbiin cimaa'' akka irra kaa'amu gaafataniiru.
    • Jimaata darbe yeroo qondaalonni Yukireeniifi Ameerikaa Niiw Yoorkitti walgahuuf jedhan kantiibaan Kiiv guyyaa ''gaddaa'' labsanii ture.

    • Zeleenskiin dabaluun Yukireeniif wabii nageenyaa kennuu irratti hojjetamaa jiraachuu X irratti beeksisanii, ibsi bal'aa torbee dhufu kennama jedhan.

    • UK'tti amabaasaaddara Raashiyaa fi Gamtaa Awurooppaatti ergamaan addaa Raashiyaa haleellaa miilanaa irratti waamamanii kan gaafataman yoo tahu haleellaan irra deddeebiin taasifamu ''Gamtaa Awurooppaa fi Yukireen akkasaan Yukireen deeggaruu akka jabeessan godha,'' jedhaniiru.

20. 28 Hagayya 2025Turistiin kumbii arbaatti biiraa gad naqe dheekkamsa kaase

    

    Madda suuraa, skydive_kenya / Instagram

    Turistiin lammii Ispeen Keeniyaatti otoo kumbii arbaattii biiraa gad naquu viidiyoon waraabamee maxxanfamuun booda miidiyaa hawaasaa irratti dheekkamsi irratti ka'e

    Namni kuni biiraa Taaskar jedhamuufi Keeniyaatti beekamu otoo dhuguu achumaan immoo arba otoo obaasuu viidiyoon waraabame.

    "Just a tusker with a tusked friend,"(biiraa Taskar(kumbii) abbaa kumbii waliin) jechuun viidIyicha irratti barreessee Instaagiraam irratti maxxanse. Boodarra komiin itti baay'annaan viidiyoo kana haqeera.

    BBC'n viidiyoo kana argee sirrii tahuusaa mirkaneesseera.

    Miseensi paarkii dhuunfaa amala namni kuni agarsiiseen rifachuu himee- viidiyoon kuni ''qondaaltotaaf'' dabarfama, '' jedhe.