Haleellaan Raashiyaa bakka itti fufeetti Tiraamp marii dhukaasa dhaabuurratti Puutiiniitti aaruu ibsan

Haguuggii Tamsaasa Kallattii

1. 28 Bitooteessa 2025Putiin mootummaan ce'umsaa UN jalatti taliigamu Yukireenitti akka hundaa'u yaada dhiheesse

   Aanga'oonni Awurooppaa nageenya Yukireen keessatti mirkaneessuu irratti akka xiyyeeffatan erga waliigalanii sa'aatii muraasa booda Pirezidantiin Raashiyaa Vilaadmiir Putiin mootummaan ce'umsaa UN jalatti to'atamu Yukireen keessatti akka hundaa'u yaada dhiheesse.

   Bulchiinsa mootummaa ce'umsaa deeggarsa UN qabutu marii waraana kana xumuruuf gargaaru milkeessuuf fayyada jedhe Putiin.

   Hanga filannoo seera qabeessi biyyattii keessatti gaggeeffamuun ''mootummaan dandeettii qabu'' aangoo qabatutti UN mootummaa ce'umsaa kana to'achuu qaba jedhe qondaalli Raashiyaa kun.

   Gaafa sana mootummaa haaraa waliin akka marii hiika qabu gaggeessan dubbate.

   ''Mootummaa haaraa filatamu waliin sanadoota seera qabeessa ta'an kan beekamtii addunyaa qaban nan mallatteessa,'' jedhe Putiin.

   US fi biyyoota Awurooppaa akkasumas michuuwwan Yukireen waliin akkaataa mootummaa ce'umsaa UN jalatti taliigamu Yukireen keessatti hundeessuun danda'amurratti dubbachuun akka danda'amus ibse.

   Kaleessa UK fi Faransaay walga'anii waraana kana xumuruuf Putiin irratti dhiibbaa cimsuu akka qaban walta'anii turan.

   Ministirri Muummee UK Kiir Istaarmar Putiin ''qoosaa jira, yeroodhaan taphachaa jira,'' jechuun himatan.

   Awurooppaan hanga nageenyi Yukireen mirkanaa'utti cichuu qabdi jedhan qondaalli UK kun. Kunis Raashiyaarratti qoqqobbii cimsuu akka ta'e eeran.

   Wayita aanga'oonni hunduu dubbatan kanatti waraanni ittuma fufeera.

   Raashiyaan halkan guutuu Dnipro, Nikopol, Pokrovsk fi Marhanetska keessatti haleellaa raawwachaa bulte.

   Bulchitoonni naannolee kunneen haleellaan Raashiyaa misoomaawwan bu'uuraa barbadeessuu himan.

   Ministeerri Ittisaa Raashiyaa ammoo dirooniiwwan Yukireen dhukaaste 78 qilleensarratti fashalsuu ibse.

2. 28 Bitooteessa 2025Puutiin Giriinlaand 'Raashiyaaf homaa Ameerikaaf garuu bowwoodha' jedhan

   Pirezidaantiin Raashiyaa Vilaadmir Puutiin, magaalaa guddittii kaaba geengoo Arktiik kan taate Murmaansk keessatti, ''dorgommiin ji'oopoolitikaa naannichaa'' cimee akka jiru akeekkachiisuun, ''hoggansa addunyaa Raashiyaan Arktiik keessatti qabdu cimsuudhaaf'' dhaadatan.

   Fakkeenyi inni jalqabaa Puutiin eeran yaada Doonaald Tiraamp Giriinlaandii dhunfachuuf qaban ture. Haata'u malee hogganaan Kiremlin gita isaa Ameerikaa irratti qeequumsa omaatuu hin dubbanne.

   Sunis kan agarsiisuu, yeroo ammaatti Waayit Haawusii fi Kiremliin hariiroo deebisanii ijaaruuf yaalaa akka jiraniidha.

   "Gabaabumatti, karoorri Ameerikaan Giriinlaandiin walqabatee qabdu cimaadha," jedhan Puutiin haasawa Fooramii Arktiik Raashiyaa Murmaanskitti taa'ame irratti taasisaniin.

   Odeessa waa'ee walitti dhufeenya Raashiyaa fi Ameerikaa jidduutti haala haaraan cimaa dhufa kanarratti dabalataan dubbiifachuuf asiin seenuu dandeessu.

3. 28 Bitooteessa 2025Maarkoo Ruubiyuu Viizaa barattoota biyya alaa 300 haquu beeksisan

   Ministirri Haajaa Alaa Ameerikaa Maarkoo Ruubiyoo sosochii deeggarsa Filisxeemotaa yunivarsiitiiwwan US keessatti adeemaa tureen walqabatee ajaja Tiraamp dabarasaniin viizaan barattoota 300 haqamuu ibsan.

   ''Tarii ammattii 300 ol ta'u'' kan jedhan Ruubiyoon, guyyaa guyyaan hojiin kun itti fufaa akka jiru dubbatan.

   Ammoo qaamoleen nageenyaa Immigireeshinii biyyattii barattuu lammii Turk Tufts Yunivarsiitii keessaa barattu to'ataniiru jedhamuun dhugaa miti jedhan.

   Barattuu Rumeeysaa Oztuurk jedhamtu Boostanitti namoota maaskii kaawwataniin fudatamtee yeroo deemtu viidiyoon mul'isu miidiyaa hawaasaa gubbaa bal'innaan qoodame dheekkamsas kaaseera.

   Lammiin Tuurk kun Iskoolaarshiippii Fuulbiraayit argattee sagantaa dooktireetii qo'annoo daa'immaniifi misooma namaarratti qora'aa turte. Kanaafis viizaa barataa F-1 argattee ture.

   Ruubiyoo waayee viizaan barattuu kanaa haqamuu yoo gaafataman namni barnootaaf deeme sochii biraa keessa galuu hin qabuu jedhan.

   ''Ilaa sababnisaa kana: gara Ameerikaa dhufuuf viizaa barataa argachuuf yoo iyyattee booda barnootaaf qofa hin dhufne jettee sochii yunivrasiitilii mancaasu, barattoota kaan hiraarsu, gamoo jeequufi hokkora uumu keessatti hirmaatte, viizaa sana siif hin laannu.''

   Lammiin Turk kun ammatti himatamee jiraachuufi dhiisuun ifa hin taane.

4. 27 Bitooteessa 2025US waliin mariyachuuf qophii ta'uu Iraan ibsite

   US waliin mariyachuuf ammayyuu balballishee banaa ta'uu Iraan beeksifte. Gorsaa gaggeessaa olaanaa Iraan kan ta'an Kamaal Karaazii, Iraan al-kallattiin US waliin mariyachuuf qophii ta'uu ibsuu isaanii Rooyitars gabaase.

   Iraan US waliin hin mari'attu yoo ta'e tarkaanfii waraanaa akka fudhatan Tiraamp torban lamaan dura akeekkachiisanii ture.

   Gaggeessaan Iraan Ayaatolaa Kameenii akeekkachiisa Tiraamp kanaaf deebii kennaniin, "biyyoota nama tuffatan waliin mariif hin teenyu" jedhanii ture.

   Amma immoo kallattiin osoo hin taane, al-kallattiin US waliin mari'achuuf qophii ta'uu beeksifte biyyattiin.

   "Rippaabikni Islaamaa balbala hundumaa hin cufne. US waliin karaa al-kallattii marii gaggeessuf qophiidha," jedhan.

   Pirezidaant Tiraamp xalayaa Iraanif barreessuunsaanii gabaafamaa ture. Xalayaa Tiraamp kanaaf Iraan deebii akka laattus Kamaal Karaazii dubbachuusaanii Royitars gabaase.

5. 27 Bitooteessa 2025Dooniin Masrii turistoota feete, Galaana Diimaa keessatti liqinfamuun namootni 6 du'an

   Doonii bishaan jalaa 'Sindbad' jedhamtu buufata doonii Hurghada, bakka turistii beekamaa Galaana Diimaa irraa turistoota feete imalaa turte liqimfamuun yoo xiqqaate namoonni jaha du’uu, namoonni sagal ammoo heddu miidhamuu maddeen biyya keessaa BBC'tti himaniiru.

   Namoonni 29 ammoo lubbuub baraaramanii jiru.

   Namoonni miidhaman afur kanneen haala yaaddessaa keessa jiran dabalatee gara hospitaalota dhiyoo jiranitti geeffamaniiru.

   Imaltoonni gara 40 ta'an hedduun isaanii turistoota biyyota alaa ta'an doonii kanarra akka turan himameera.

   Rakkoon akkamii Doonii bishaan jalaa kana akka muudate hanga ammaatti waanti jedhame hin jiru.

   Imbaasiin Raashiyaa Masrii jiru akka jedhetti turistoonni doonii bishaan jalaa irra turan hundi lammii Raashiyaa turan.

   Akka Imbaasichi jedhetti daa'imman dabalatee imaltoonni 45 doonii kanarra turan.

6. 27 Bitooteessa 2025Huutiin Yaman Israa'elitti misaa'ela dhukaase

   Israa'el misaa'elota lama Yamanirraa itti dhukaafaman qolachuu beeksise.

   Humna Waraana Isra'el wabeeffachuun Rooyitars akka gabaasetti misaa'eloonni kunneen osoo daangaa Israa'el hin seenin rukutamanii kufan.

   Hidhattoonni Huutii Iraanin deeggarraman deeggarsa Hamaasif qaban agarsiisuf dirooniwwaniifi misaa'elotta gara Israa'elitti dhukaasaa tura.

   Ji'a Amajjii keessaa Israa'elifi Hamaas dhukaasa dhaabuf walii galuu hordofee Huutin Israa'el irratti haleellaa gaggeessuu dhaabuu beeksise.

   Torbaniin dura Israa'el Gaazatti lola jalqabnaan, Huutinis Israa'el haleeluu akka eegaluu beeksisee ture.

   Bitootessa 15 irraa eegaluun ajaja Pirezidaant Tiraampin US haleellaa gurguddaa buufataalee Huutii Yaman irratti gaggeessaa jirti.

7. 27 Bitooteessa 2025Kooriyaan Kibbaa ibidda bosonaa hamaa ta'een wal'aansoo qaba jirti; namootni 27 du'aniiru.

   Ibiddi bosona Kooriyaa Kibbaa keessatti ka’e kan guyyaa tokko duraa irraa dachaa laman dabaluu isaatiin, seenaa biyyatti keessatti balaa ibiddaa isa cimaa ta'uu aanga’oonni himaniiru.

   Ibiddichi hanga yoonatti lafa hektaara 33,000 ol barbadeessera.

   Balaa ibiddaa kanaan yoo xiqqaate namoonni 27 yoo du'an, manneen jireenyaa fi amantii hedduun barbadaa'aniiru.

   Namootni kuma 23 ol ta'an ammoo manaa fi qabeenya isaanii gatanii baqachuuf dirqamaniiru.

   Itti aanaan pirezidaantii biyyatti Haan Daaksoo, “Sababa ibidda bosona saffisaan babal’ataa jiru kanaan, akka biyyaatti miidhaan hedduun ga'eera,” jedhan.

   Helikooptaroota 120 ol ta’an naannolee sadiitti bobbaafamanii balaa ibiddaa kana dhaabsuuf abiddaan wal’aansoo qabamaa akka jiranis himameera.

8. 27 Bitooteessa 2025Hogganaan paartii mormiituu Turkii mormiin 'magaaloota hunda keessatti' akka itti fufu himan

   Hogganaan paartii mormituu guddicha Tarkii hanga filannoon pirezidaantummaa atattamaan waamamutti ykn kantiibaan magaalaa Istaanbul mana hidhaa jiru Ekrem Imamoglu hidhaatii bahutti "magaalaa hunda keessatti" mormiin akka itti fufu BBCtti himaniiru.

   Dura taa’aan paartii kantibichaa, Paartii Uummata Rippabilikaa (CHP), Ozgur Ozeel, mormiin guutuu biyyattii Sambata dhufaa hiriira baayyee guddaa Istaanbul keessatti gaggeeffamu kan dabalatu ta’uu ibsaniiru.

   Sunis filannoo bara 2028tti gaggeeffamuu irratti Imamogluun pirezidaantii biyyattii itti aanu taasisuuf duula paartichaa eegalamuudha jedhan.

   "Magaalaa deemnu hunda keessatti seenaa isaaniitiin duula filannoo isa guddaa ta'e ni qabaanna," jechuun Ozeel labseera.

   "Amantaan Ekreem Imamogluu fi dimokiraasii irratti qaban mormiicha guddaa fi cimaa taasisa," jechuun waajjira muummee dhaaba isaanii Istaanbul keessatti argamutti daawwattoonni, hojjettoonnii fi gorsitoonni yeroo seenanii fi bahanitti BBCtti himan.

   Mormichaan erga Imamogluun guyyoota torba dura hidhamee kaasee namoota hedduu daandiirratti kan baaseedha, kunis mormii waggoota kurnan oliif asitti gaggeeffame isa guddaadha.

   Hiriira ummataa kana maddiiti ammoo hidhaan jumlaa mootummaadhaan raawwatamaa jira.

   Haaluma kanaanis gaazexeessitoota Tarkii torba kanneen mormii kana gabaasaa turan dabalatee, namoonni 1,400 ol ta’anii to'annoo jala oolfamaniiru.

9. 27 Bitooteessa 2025Gartuun TPLF mootummaan federaalaa waliigaltee Piriitooriyaa cabsaa jira jechuun himate

   Gartuun Addi Bilisa Baasaa Uummata Tigraay (TPLF) kan Dabratsiyoon Gabramikaa'el (PhD) dursan, mootummaan federaalaa dhimma bulchiinsa yeroo irratti kophaa murtee dabarsuun waliigaltee Piriitooriyaa faallessaa jira jechuun komii dhiheesse.

   Ministirri Muummee Abiy Ahmad pirezidantii Bulchiinsa Yeroo muudaniif ummanni Tigraay kaadhimamaa akka eeru gaafachuu hordofeeti TPLF ibsa kana kan baase.

   Ibsa afaan sadi- Afaan Tigriffaa, Afaan Amaaraa fi Afaan Ingiliffaan baasuun karaa miidiyaa hawaasaa isaa maxxanseen mootummaan Itoophiyaa waliigaltee Piriitooriyaa cinaatti dhiisuun murteen inni addatti dabarsu fudhatama akka qabne eere.

   Ministirri Muummee Abiy Ahimad turtiin aangoo bulchiinsa Yeroo naannoo Tigraay waggaa lamaaf turu xumuraamaa waan jiruuf, hamma haalli filannoo gaggeessuuf hayyamu uumamutti bulchiinsi yeroo waggaa tokkoon akka itti fufu labsiin jijjiiramaa jiraachuu beeksisan.

   Odeessa kanarratti dabalataan duubbiisuudhaaf asiin argachuu dandeessu.

10. 27 Bitooteessa 2025Poolaandi mirga kologaltummaa baqattootaa dhorkuudhaaf

    Ministirri Muummee Poolaandi Doonaald Tuusk mootummaan isaanii godaantonni karaa daangaa biyyasaanii Beelaaruus waliin wal daangeessituun Poolaandi galan mirga koolu galtummaa gaafachuuf qaban yeroof akka dhaaban himan.

    Tusk kana kan beeksise labsiin falmisiisaa ta’e kan aanga’oonni Poolaandi yeroo tokkotti hanga guyyoota 60'f mirga kolugaltummaa kana addaan kutuu hayyamu Pirezidaantii Andirzeej Dudaaatiin seera ta’ee erga mallattaa’ee boodadha.

    Ministitti Mummee Tuusk, mootummaan isaanii seera kana ''yeroo muraasaaf osoo hin tursiisin'' kan fudhatu yoo ta'u, Dudaan ammoo jijjiiramni kun nageenya daangaa biyyattii cimsuuf barbaachisaadha jedhan.

    Haata'u malee seerri kun yoo hojiirra kan oolfamu yoo ta'e, Gamtaan Awurooppaa Poolaandi irratti tarkaanfii seeraa fudhachuu qaba jedhe dhaabbanni mirga namoomaatiif falamu Humaan Raayitsi Woochi.

    Gareewwan mirga namoomaatiif falaman baatii darbe keessa paarlaamaanii biyyattii seera kana akka kuffiisuuf gaafachuu, ''waliigalteewwan idil-addunyaafi Gamataa Awurooppaa Poolaandi mallateessite ni faalleessa'' jedhan.

    Akkasumas ''daangaa Poolaandi-Beeraaluus kan aanga'oonni Poolaandi irratti dhiibbaa seeraan alaaf i barbaachisaa hin taane irratti raawwataa turan cufuu danda'as'' jechuun yaaddoosaanii ibsan.

    Mootummaan kanaa dura dhorkaan kun kan kaa'amu kanneen nageenya mootummaa irratti yaaddoo uman, namoota humnaan daangaa cabsanii seenuuf yaalaniif kkfa irratti qofaadha jechuun dubbatee ture.

11. 27 Bitooteessa 2025'Amantii kootu kubbaa miilaa naaf caala'- Jifataa Bornimaz Dango Otaaraa

    Taphataan Bornimaz Dango Otaaraa amantiisaa fi kubbaa miillaa keessaa kamiif akka dursa kennu bareechee beeka.

    Sooma Ramadaanaa bara kanaa wayita xumurataa jirutti gaaffii fi deebii taasiseen ''anaaf, amantii kootu kubbaa miillaa naaf caala,'' jedhe.

    Jifataan Burkina Faasoo kun Muslima amantiisaatti kutannoo qabudha, salaata idilee shanan guyyaatti salaatamu hin qadeessu.

    Ammoo tapha duraa fi booda istaadiyeemii addaan tuqee kadhannaa godhachuun (sujuuda gochuun) beekama.

    Taphataan umrii waggaa 23 kun turtii BBC Sport Africa waliin taasiseen haalaa fi amalli amantiisaa kun akka tasgabbaa'uuf akka isa gargaaru hime.

    Odeessa kanarratti dabalataan dubiifachuudhaaf asiin dhaquu dandeessu.

12. 27 Bitooteessa 2025Tamsaasa kallattii eegalleerra.

    Ashamaa hordoftoota BBC Afaan Oromoo bakka jiratan maratti.

    Tamsaasa kallattii kan guyyaa Kamisaa ittiin odeesaalee addunyaa gagabaabsun isin biraan geenyu kunoo amma eegalleerra.

    Yoo nu hordoftan oduu addunyaa maraa argattu.

    Dabalataanis Chaanaalii WhatsApp keenya, fuula Facebook keenya fi marsariitii keenya millachuu hin dagatiinaa.

    Oolmaa gaarii qabaadha!

13. 26 Bitooteessa 2025Humni Waraanaa Sudaan maagaalaa Kaartuum guutummaan to'achuu labse

    Humni Waraanaa Sudaan magaalaa guddoo biyyattii Kaartuum guutummaan to'achuu beeksise.

    Ajajaan Humna Waraanaa Sudaan Jeneraal Abdul Fattaah Al-Burhaan buufata xayyaaraa har'a humnoota RSF harkaa baafametti bu'uun magaalan Kaartuum harka humnoota RSF irraa deebisanii to'achuu labsan.

    Masaraa mootummaa duraan harka RSF tures daawwataniiru. "Kaartuum walaba baatetti" jedhan.

    Humni Waraanaa Sudaan torbanuma kana masaraa mootummaa humnoota RSF irraa erga fudhateen booda saffisaan mo'icha argataa dhufeera.

    Humni Addaa Sudaan (RSF) Ebla bara 2023 irraa kaasee iddoowwan ijoo kanneen akka wiirtuu muummee buufata waraanaa biyyattii, buufata xayyaarafi masaraa mootummaa dabalatee magaalaa Kaartuum harka caalu to'atee ture.

    Yeroo dhiyoo as garuu haleellaa humni waraanaa biyyattii irratti bane dandamachuu hin dandeenye.

14. 26 Bitooteessa 2025Sa'aatii 24 keessatti jiraattonni Gaazaa 38 Haleellaa Israa'eliin ajjeefamin

    Haleellaa Israa'el Gaazatti gaggeessaa jirtuun sa'aatii 24 darbe keessatti Filisxeemonni 38 ajjeefamuu Misinsteera Fayyaa Gaazaa waabeffachuun miidiyaan Israa'el Haretz gabaase.

    Kanneen du'aniin alatti namonni 124 ammoo madaa'aniiru.

    Torbaniin dura Israa'el bifa haaran Gaazatti haleellaa gaggeessuu erga eegaltee jiraattonni Gaazaa 800 ol yoo ajjeefaman 1,700 ol ammoo madaa'aniiru.

    Erga waraanni Israa'eliifi Hamaas gidduutti bara 2023 eegalee as ammoo Filisxeemonni 50,183 yoo ajjeefaman 113,800 ol ammoo madaa'uu miidiyaan Israa'el kun gabaase.

    Waliigalteen dhukaasa dhaabuu ji'a Amajjii keessa mallattaa'e cabuu hordofee Israa'elifi Hamaas quba walitti qabaa jiru.

    Har'a ammoo jiraattonni Gaazaa dhibbaan lakkaa'aman karatti bahanii Hamaas akka waraana dhaabuf mormii dhageessisaniiru.

15. 26 Bitooteessa 2025Waraanni Sudaan buufata xayyaaraa magaalaa Kaartuum humnoota RSF harkaa baafate

    Humni Waraana Sudaan lola waggaa lamaa booda buufata xayyaaraa magaalaa Kaartuum Humna Addaa (RSF) irraa fudhate.

    Baha Kaartuumitti ajajajaa Humna Waranaa Sudaan kan ta'an Jeneraal Mohaammad Abdel Raahmaan al-Bilaawi BBC'f akka mirkaneessanitti loltoonni Sudaaan buufata xayyaarichaa guutummaan to'ataniiru.

    Yeroo dhiyoo as humni waraanaa magaalaa Kaartuum harka caalaa kan harka RSF ture to'achaa dhufee jira.

    Guyyootan dura masaraa mootummaa erga to'atee booda humnoota RSF irratti saffisaan olaantummaa gonfataa waan dhufe fakkaata.

    Dubbi himaan Humna Waraanaa Sudaan BBC'tti akka himanitti loltoonni biyyattii riqichawwan laga Naayil kan magaalota sadi wal qunnamsiisu hunda to'ateera.

    Jiraattonni akka himanitti, loltoonni RSF magaalaa Kaartuum gara Kibbaatti baqataa jiru.

    Humni waraanaa bakkeewwan kanaan dura humnoota RSFn qabaman deebisee to'achuusaatin jiraattonni yeroo gammachuu ibsatan viidiyoowwan qoodamaa jiran ni agarsiisu.

16. 26 Bitooteessa 2025Raashiyaan waligaltee dhukaasa dhaabuu Galaana Gurraachaan dura qoqqobbiin kaafamuu qaba jette

    Raashiyaan waliigaltee dhukaasa dhaabuu Galaana Guraacha Yukireen waliin utuu hin taasisiin dura qoqqobbii biyyoota lixaatiin irra kaa'aman muraasni kaafamuu qabu jette.

    Ameerikaan gareewwan lamaanuu qofa qofaatti dubbisuun haleellaa Galaana Gurraacha keessatti raawwatamu dhaabuuf waliigaluusaanii beeksiftee sa’aatiiwwan muraasa keessatti, Raashiyaan waliigalteen kun hojiirra kan oolfamu qoqqobbii baankota Raashiyaa hedduu irra kaa’ame erga kaafame booda akka ta’u ibsite.

    Gaaffiiwwan Raashiyaa kunis qoqqobbii baankii mootummaa 'Rosselkhoz bank' irra kaa’ame haquu fi dhaabbileen kunneen sirna kaffaltii idil-addunyaa Swift akka fayyadaman deebisuu kan dabalatudha.

    Erga Raashiyaan Yukireen irraatti weerara raawwatteen booda, Gamtaan Awurooppaa fi michoonni isaanii dhaabbilee faayinaansii Raashiyaa hedduun Swift akka hin fayyadamne qoqqobbii irra kaa'an.

    Kaayyoon isaas dhaabbileen Raashiyaa daldala idilee haala sirriifi battala karaa Swift'n argatan dhabuun kaffaltii anniisaa gatii guddaa qabuu fi al-ergii qonnaa biyyattii jeequu ture.

    Murtee sana duubatti deebisuudhaaf ammoo hayyama Gamtaa Awurooppaa barbaada.

    Kibxata darbe Pireezidaantiin Ameerikaa Doonaald Tiraamp Raashiyaan waraana kana xumuruuf harkifachuuf yaalii gochuu akka dandeessu dubbachuun ni yaadatama.

17. 26 Bitooteessa 2025Ollaa jiraattoonni ishee irra caalaan Youtubarii itti ta'an kana beektuu?

    Tuulsii ollaa biyya Indiyaatti argamtuudha. Jiraattoonni ganda kanaa irra jiraan YouTubarootadha.

    Dargaggoon waggaa 32 Jaavii Varmaa jiraattoota keessaa tokkodha. Innis dubartoota uffannaa Hindiitiin bareedan viidiyoo waraaba.

    Maanguddoon takkas dargaggoota jidduu taa'anii mul'atu. Shamarroota keessaa ammoo isheen takka miila maanguddoo tanaa qaqabdi.

    Shamarreen biraa ammoo bishaan dhiyeessiti. Jaaviin hojiisaa hojjata. Dubartoonni inni viidiyoo isaan waraabus baayyee gammadoodha. YouTube gubbaatti viidiyoon isaanii jaalatamaafi jiru.

    Jaaviin muuziiqaa Raajeesh Diiwaarim banuudhaan viidiyicha waraabu itti fufeera.

    Irra jiraan dubartoota ollaa kanaan wal fakkaatu. Jiraattoonni mukeen dheedheeroo jalatti walitti qabamu.

    Moggaasni masoo 'Ollaa YouTube' jedhus kennameefiira. Dabalataan asiin dubbiifadhaa.

18. 26 Bitooteessa 2025Gaazaatti hedduun hiriiraan waraanni akka dhaabbatuu fi Hamaas aangoo akka gadhiisu gaafatan

    Erga waraanni Israa’el fi Hamaas eegalee as mormii guddicha isa jalqabaa Gaazaa keessatti geggeeffame kanaan, namootni dhibbaan lakkaa’aman daanditti ba'uudhaan badii waraanichi irraan gahe balaaleffataa jiriu.

    Namoonni kunneen, waraanni akka dhaabbatuu fi Hamaas aangoo akka gadhiisuuf gaafataniiru.

    Hidhattoonni Hamaas haguuggii fuulaa godhatan, kaan qawwee hidhatanii, kaan ammoo ulee qabatanii, gidduu seenuudhaan mormitoota kana humnaan bittimsuuf yaalaa turaniiru akka vidiyoowwan ba'an mul'isanitti.

    Viidiyoonni miidiyaa hawaasaa irratti aktivistoonni Hamaas qeeqaniin bal'inaan qoodama turan akka agarsiisutti, namootni Kibxata darbe daandii Behit Lahiya, kaaba Gaazaa irratti hiriira ba'an "ba'aa, ba'aa, Hamaas ba'aa" jechaa dhaadannoo dhageessissaa turan.

    Deeggartoonni Hamaas ammoo garee kana ittisuufi, barbaachisummaa hiriira kanaa xiqqeessaniiru. Hirmaattotas gantoota jechuun himatan. Dhimmicha irratti Hamas ammallee yaada hin kennine.

19. 26 Bitooteessa 2025MM Abiy ummanni Tigraay pirezidantii Bulchiinsa Yeroof kaadhimamaa akka eeru gaafatan

    Ministirri Muummee Itoophiyaa Abiy Ahimad turtiin aangoo bulchiinsa Yeroo naannoo Tigraay waggaa lamaaf turu xumuraamaa waan jiruuf, hamma haalli filannoo gaggeessuuf hayyamu jiraatutti turtii bulchiinsi yeroo waggaa tokkoon akka itti fufu labsiin jijjiiramaa jiraachuu beeksisan.

    Yeroo waggaa tokkoo dhufu keessatti pireezidnatii bulchiinsa yeroo nananichaa nama ta'u ammoo uummanni naannichaa karaa email akka eeruu kennu waamicha godhaniiru.

    MM Abiy ibsa Afaan Tigriffaan fuula miidiyaa hawaasaa isaanii gubbaa kaahaniin ''mootummaan Federaalaa haala qabatamaa jiru ilaalcha keessa galchuudhaan pirezidantii bulchan yeroo haaraa muuduun barbaachisaa ta'eera'' jedhan.

    Waliigaltee Piriitooriyaatiin hojiilee ijoo bulchiinsi yeroo waggaa lama keessatti akka raawwatu eegamu keessaa tokko haala filannoo gaggeessuuf barbaachisu uumuu ture jedhan MM Abiy.

    Odeessa kanarratti dabalataan karaa kanaan seenaatii dubbiifadhaa.

20. 26 Bitooteessa 2025Paapuwa Niiw Giiniin oduu sobaafi poornoogiraafii 'daangeessuuf' Feesbuukii uggurte

    Aanga'oonni Paapuwa Niiw Giiniin ''yaalii'' haasa jibbaa, oduu sobaa fi poornoogiraafii 'daangeessuuf' jecha Feesbuukii ugguran.

    Uggurri tasa Wiixata darbe eegale kana irrattis miseensonni paarlaamaa, mormitoota fi kanneen biroo irraa qeeqni ka'aa jira.

    ''Gochi kun mirga namoomaa sarba jedhan''

    Tarkaanfii kana kan deeggaran Ministirri Poolisii,biyyattiii mootummaan mirga fi bilisummaa dubbio fo odeeffannoo ukkaamsuuf utuu hin taane, ''qabiyyee miidhaa geessisan irraa lammiilee eeguuf itti gaafatamummaa qaba'' jedhan.

    Feesbuukiin waltajjii miidiyaa hawaasaa Paapuwa Niiw Giinii keessatti baay'ee jaallatamu yoo ta'u, daldala xixiqqaa hojii daldalaa isaaniitiif Facebook irratti hirkatan dabalatee, tilmaamaan fayyadamtoota gara miliyoona 1.3 qaba.

    Bilisummaan pireesii biyyattii keessatti gadi bu’aa dhufe keessatti miidiyaaleen hawaasaas marii ummataa mijeessuudhaanf murteessoo ta’aniiru.

    Pirezidaantiin mana maree miidiyaa Paapuwa Niiw Giinii, Neeviil Chooyi tarkaanfiin kun ''abbaa hirree siyaasaa fi dhiittaa mirga namoomaa waliin kan daangessuudha'' jedhan.