Xiyyaarri Itoophiyaa waggoota jaha booda gara Asmaraa balali'uu dhaabe

Haguuggii Tamsaasa Kallattii

1. 27 Hagayya 2024Israa'el nama Hamaasin butame guyyoota 325 booda baraarte

   Waraanni israa'el nama Arabaa gosa Bediwiin gaafa Onkololeessa 7 Hamaasiin butame baraaruu hime.

   Kaayid Farhaan Elkaadii nama ganna 52 yoo tahu ''oppireeshinii wal-xaxaa kibba Gaazaatti adeemsifameen,'' waraana Israa'eliifi tajaajila nageenyaa biyya keessaa Siin Beet jedhamuun baraaramuu ibsi bahe mul'isa.

   Ibsichi dabaluun ''nageenya namoota ammallee qabamanii jiraniifi, nageenya humna waraanaa fi nageenya biyyalessaaf,'' jecha odeeffannoon dabalataa akka hin kennine hime.

   Obbo Elkaadiin haala gaarii keessa kan jiru yoo tahu yaalii dabalataafis gara hospitaalaa dabarfameera jedheera.

   Nami kuni erga uggurame guyyoota 325 baraarame jechuudha.

2. 27 Hagayya 2024Yukireen qubsuma Raashiyaa 100 to'achuu beeksiste

   Yukireen naannoo Raashiyaa Kurisk keessatti haleellaa torban sadii dura eegalte itti fufuu ajajaan waraana Yukireen himan.

   Jeneraal Oleeksaandir Siriskiyii akka jedhanitti, yeroo ammaa loltoonni Yukireen lafa Raashiyaa kilomeetir iskuweerii 1, 294 bal’atu to’ataniiru.

   Akkasumas qubsumi Raashiyaa 100 harka isaanii seenuu himan.

   Dabaluunis, loltoota 594 booji’uullee dubbatan.

   Torban darbe Pirezidantiin Yukireen Zeleniskiin Yukireen lafa Raashiyaa kilomeetir Iiskuweerii 1,250 to’achuu dubbatanii turan.

   Kaayyoon Yukireen kanaa loltoota Yukireen bakkeewwan kaan jiran danquuf akka ta’e ibsan.

   Dhimma kana Raashiyaan quba akka qabdu kan dubbatan Zeleniskiin, kanatti loltoota ishee naannawa Pokirovisk jiran irratti xiyyeeffatte jedhan.

3. 27 Hagayya 2024Haleellaa Raashiyaatiif deebii ni kennina- Zeleniskii

   Pirezidantiin Yukireen Voloodmiir Zeleniskii haleellaa Raashiyaan irratti raawwatteef deebii ni kennina jechuun dhadatan.

   Yukireen halkan darbe haleellaa Raashiyaatiin raafamaa bulteetti.

   Hojiin lubbuu baraaruu itti fufeera kan jedhan pirezidant Zeleniskiin, haleellaa Raashiyaa kanaan yoo xiqqaate namoonni afur du'anii 16 ammoo madaa'aniiru.

   Raashiyaan "bakkawwan 90 irratti xiyyeeffachuun namoota nagaafi bu'uuraalee misoomaarratti haleellaa raawwatteetti," jedhan Zeleniskiin ergaa miidiyaa hawaasaa isaaniirratti baasaniin.

   "Shakkii tokko malee gocha Raashiyaa kanaafi haleellaa birootiif deebii ni kennina. Yakki namoomarratti raawwatame adabbii osoo hin argatiin hin hafu," jedhan.

4. 27 Hagayya 2024Baayidan haleellaa Raashiyaan Yukireen irratti raawwachaa jirtu balaaleffatan

   Pirezidantiin US Joo Baayidan haleellaa Yukireen kaleessa Yukireen irratti raawwatte balaaleffatan. Mooskoon waraana gaggessaa jirtu kanaan "gonkumaa hin milkooftu" jedhan.

   Waashingitan Yukireen deeggaruu itti fufti jechuun waadaa galan Joo Baayidan.

   "Waraana Raashiyaan Yukireen irratti itti fuftee gaggeessa jirtuufi carraaqqii isheen ummata Yukireenitti dukkaneessuuf itti jitu cimseen balaaleffadha," jedhan Pirezidant Baayidan ergaa fuula X irratti maxxansaniin.

   "Raashiyaan gonkumaa Yukireen keessatti [waraana] gonkumaa hin milkooftu, akkasumas qalbiin ummata Yukiren hin cabu," jedhan.

5. 27 Hagayya 2024Naajeeriyaatti doktorri tokko butamuu hordofe hakiimoonni lagannaa hojii eegalan

   Naajeeriyaatti hakimiin dubartii maqaan ishee Dr Gaanaayaat Popuulaa jedhamu hidhattootaan erga butamntee baatii saddeeti lakkoofsiifte, , akka gadhiifamtu gaafachuudhaaf ogeessonni fayyaa biyyattii hospitaaloota mootummaa keessa hojjatan guyyaa torbaaf lagannaa hojii eegalan.

   Hakimiin haadha ijoollee shanii taate kun wallakkeessa baatii Muddee halkan keessa abbaa warraa fi mucaa obbooleettii ishee waliin fudhatamte.

   Abbaan warraashee Bitooteessaa keessa maallaqa namoota butaniin gaafatame kaffaluun gadhiifamuun kan himame yoo ta'u, hakimiin ijaa fi firrii ishee garuu ammalleen akkuma butamaniitti jiru.

   Sababii kanaatin dheekkamsa olaanaarratti kan argaman hakiimoonni Naajeeriyaa lagannaa hojii gochuun tajaajila balaa tasaa dabalatee hojii akka hin seennee ibsaniiru.

   Hakimoonni kunneen humnootiin nageenyaa Dr Popuulaa baraarudhaaf hojii gahaa hin raawwanne jedhu.

   Pirezidantiin Waldaa Hakiimoota Naayijeeriyaa Dr Deele Abdullaahii, sababii hakimiin tun butamuusheetti maatiiniifi waahillan hojii ishee baatiiwwan saddeettan darbaniif dhiphina keessatti argamu.

   Naajeeriyaatti hakiimootaaf kunuunsi taasifamuu qaba kan jedhan pirezidantiin walidichaa, yoo lagannaa hojii kana keessa jijjiramni kan hin dhufne ta'e lagannaa hojii daangaa guyyaa hin qabne akka eegalan dabaluun ibsaniiru.

   Waahila hakiima butamtee kan ta'e Dr Ibraahiim Mahaammad, ''hakiimoonni haamleesaanii akka xuqamuufi akka nagan taasifamaa turaniiru. Hakimoonni nageenyummaansaanii eegamee hojjachu qabu'' jechuun yaada kenna.

   Naayijeeriyaatti namoota butanii maallaqa ittiin gaafachuun yeroo dhihoon asiitti irra deddebiin dhagahamaa jira.

6. 27 Hagayya 2024Zeleniskiin haleellaa Raashiyaan osoo walirraa hin citiin irrati rawwatteen booda ‘birmannaa’ gaafate

   Haleellaan hamaa lubbuu galaafachaa jiru Raashiyaarraa guyyaa lamaffaaf walitti fufinsaan itti dhufaa jirtu, Yukireen maaliif akka michootashee warra lixaarraa meeshaa waraana dabalataa barbaaddu kan mirkaneessedha jedhan Pirezidantin biyyattii Zeleniskiin.

   Pirezidantiin Yukireen karaa lamaan tumsa barbaada: Tokkoffaan, kuusaa meeshaa waraanaa, xiyyaarotaafi dirree xiyyaaraa Raashiyaa keessa fagaatanii seenuun rukkutuudhaaf Biriitish, Ameerikaafi michoonni kaan meeshaaleen warri lixaa oomishan akka fayyadamtuuf hatattamaan hayyamuu qabu jedhan.

   Kana gochuun ammoo samii magaalota Yukireen kan akka Kiiv, Zaappoorizhiyaa, Kiriivii Rih fi magaalota biroo sa’aatii 48 darban irratti xiyyeeffatte hin shorokkeessineef humna Mooskoo laaffisa jedhan.

   Haleellaan qilleensarraa yoo itti fufe, misaa’eliifi diroonii Raashiyaa namoota nagaa ajjesaa jiruuf bu’uuraalee annisaa Yukireen mancaasaa jiran dhaabsisuudhaaf, humni qindaa’aa fi qabatamaa jiraachuu qaba jedhan Zeleniskiin.

7. 27 Hagayya 2024WBO waamicha nagaa uummata Shawaa Kaabaafi himannaa manneen barnootaa gubuuf deebii kenne

8. 27 Hagayya 2024Kanaadaan konkolaataa elektirikii Chaayinaan oomishtee dhiyeessiturratti gibira %100n keesse

   Kaanaadaan erga Ameerikaa fi Gamtaan Awurooppaa tarkaanfii walfakkaatu labsaniin booda, konkolaataa elektirikii Chaayinaan hojjetaman (EV) gara biyya keessaa galfaman irratti gibira %100 akka keessu ibsiteetti.

   Akkasumas, biyyattiin sibiilaa fi aluminiyeemii Chaayinaa irrattis qaraxa (duty) %25 kaa'uuf karoorfattee jirti.

   Kaanaadaa fi michoonnishee warra lixaa Chaayinaan indaastirii konolaataa elektirikii (EV) isheetiif deeggarsa gochuudhaan, oomishtoota konkolaataa isheef faayidaa haqa hin qabne kenniteetti jechuun himatu.

   Chaayinaan tarkaanfii kanaan ''eegumsa daldalaa'' jechuun kan sochii ''seera Dhaabbata Daldala Addunyaa cabsudha'' jette.

   "Dameen konkolaataa Kaanaadaa akka konkolaattota boruu oomishuudhaan dursaa addunyaa ta'uuf jijjiiraa jirra. Haata'u malee, taphattoonni akka Chaayinaa gabaa addunyaa keessatti faayidaa haqa hin qabne ofiisaaniif kennuu filataniiru", jedhan Ministirri Muummee Kaanaadaa Jastiin Tiruudoo.

   Dirqamni Kaanaadaan EV Chaayinaa irratti qabdu Onkoloolessa 1 irraa eegalee hojiirra kan oolu yoo ta’u, kan sibiilaa fi aluminiyeemii irratti kaa'ame ammoo Onkoloolessa 15 irraa eegalee hojiirra oola.

   “Guddinni saffisaan indaastirii konkolaataa elektirikii Chaayinaa bu’aa kalaqa teeknooloojii itti fufiinsa qabu, hidhata industirii fi dhiyeessii haala gaariin hundeeffamee fi dorgommii gabaa guutuu ta’uu isaati,” jedha ibsi Imbaasii Chaayinaa Kaanaadaa irraa argame.

   "Dorgommummaan isaas kan argamu deeggarsa mootummaa irratti hirkatanii osoo hin taane, karaa faayidaawwan dorgommii wal madaalaa qabeessa ta'e fayyadamuu fi seerawwa gabaa hordofuudhaani."

   Chaayinaan, UStti aantee michuu daldalaa Kanaadaa isa guddicha lammaffaati.

9. 27 Hagayya 2024Suura yeroo warri lubbuu baraaran hoteela barbaadaa’e keessa nama lubbuun hafe barbaadan daawwadhaa

   Suuraawwan magaalaa wiirtuu Yukireen taate Kiriiviiv Rih irraa dhufan, haleellaa Raashiyaan wal walirratti halkan raawwataa bulteen hoteela barbaadaa’e keessa yeroo hojjetoonni lubbuu barraafuu bobba’an agarsiis.

   Raashiyaan guutummaa Yukireen keessatti guyyaa lamaffaaf haleellaa gaggeessaa jirti.

10. 27 Hagayya 2024Jaappaan xiyyaarri basaasaa Chaayinaa naannoo qilleensaashee sarbuu himte

    Jaappaan xiyyaarri basaasaa Chaayinaa naannoo qilleensaashee cabsuu kan himatte yoo ta'u, kunis yeroo kallattiidhaan daangaa sarbuu isa jalqabaati.

    Jaappaan erga xiyyaaronni baraasaa Y-9 Wiixata akka sa'aatii biyya keessaattii sa'aatii 11:29tti (02:29 GMT) irratti gara daqiiqaa lamaaf ''daangaa qilleensaa'' Odoolawwan Daanjoo cabseen booda jeettiiwwan waraanaa naanneessite.

    Barreessaan olaanaan kaabinee Jaappaan, sarbamni daangaa qilleensaa kun ''guutumaan guutuutti fudhatama hin qabu'' jechuun mormanii, qondaala imbaasii Chaayinaa Tookiyoo jiru mariif waaman.

    Taateen kun kan mudate yeroo naannichatti mudamni dabalaa jiruutti, wayita Chaayinaan Jaappaan dabalatee, Ameerikaa fi michootashee waliin olaantummaa argachuuf dorgomtuttidha.

    Angawoonni Jaappaan yeroo Wiixata kaleessaa daangaa qilleensaa sarbanitti xiyyaarota Chaayinaatiif ''beeksisaa fi akeekkachiisa'' kan kennan yoo ta'u, garuu meeshaan waraanaa akka qawwee dhuka'an hin fayyadamne jedha biroodkaastariin Jaappaan NHKn.

    Kanas ta'e sana, taateen kun yaaddoo uumeera.

    Mootummaan Jaappaan, sarbama daangaa qilleensaa kanaan walqabatee mormii cimaa dhageessisuuf karaa chaanaalii dippilomaasiin Beejiing qunnamuun gara fuulduraatti taateen walfakkaataan akkanaa akka ittifamuuf gaafachuu ibseera. Beejiing garuu ifatti deebii hin kennine.

    Akkasumas, Tookiyoon dhiheenya kana dooniiwwan Chaayinaa Galaana Baha Chaayinaa keessatti Odoolawwan Senkaakuu kanneen Chaayinaan kan kooti jechuun Diaoyus jettee waamtu keessa jiraachuusaanii kaafte turte.

    Odolawwan namni hin jiraanne garuu kuufama boba'aa fi gaazii qabaachuu danda'an jedhaman kunneen, Beejiingii fi ollaashee (irra caalaan isaanii michoota Ameerikaa ta'an) gidduutti maddeen waldhabdee umaman hedduu keessaa tokkoti.

11. 27 Hagayya 2024Yukireen naannoo Kiiv keessatti diroonota 60 rukkuttee kuffiiste

    Humni ittisa qilleensaa Yukireen dirooniiwwan 60 fi misaa’eloota baayyee Raashiyaan magaalaa Kiiv ittiin haleeluuf erigitu rukkutee kuffiisuu dursaan, hoganaa waraana magaalattii himan.

    “Wanti gara magaalaa guddoo kanatti ergaman hunduu dhabamsiifamaniiru,” jedhan Seerhiy Poopkoo fuula Telegiraam irrratti.

12. 27 Hagayya 2024Ministeerri fayyaa Filisxeem haleellaa Weest Baankitti gaggeeffameen namoonni jaha ajjeefamu ibse

    Haleellaa qilleensaa Israa’el kaampii baqattootaa Weest Baankitti raawwateen yoo xiqqaate namoonni shan du’uu qondaaltonni Filisxeem himan.

    Humni Ittisaa Israa'el (IDF) haleellaa kana, kaampii Nur Shaams naannoo magaalaa Tulkarmitti argamu irratti raawwachuu mirkaneessee, kutaa ajaja "seeliin shororkeessummaa" kan jedheen irratti xiyyeeffate hime.

    Addatti, Abbaan Taayitaa Filisxeem haleellaa qubattoonni Israa’el naannoo Beetalihemitti raawwatameen namni tokko du’uufi sadii madaa’uu ibseera. IDF ammoo gabaasawwan kana qorachaa akka jiru ibse.

    Erga waraanni Gaazaa jalqabee as Weest Baank keessatti jeequmsi dabalaa dhufeera, kunis ajjeechaa hidhattoonni Hamaas Onkoloolessa 7 kibba Israa’el irratti raawwateen kan ka’edha.

    Waajjirri Qindeessituu Dhimmoota Namoomaa Dhaabbata Mootummoota Gamtoomanii (UN) Roobii darbe akka beeksisetti, Onkololeessa 7 irraa eegalee haleellaa qilleensaa Weest Baank keessatti raawwatameen, daa’imman 26 dabalatee lammiileen Filisxeem 128 ajjeefamaniiru.

    Itti dabaluudhaanis, hanga Hagayya 19'tti, Baha Yerusaalem dabalatee, lammiileen Filisxeemootaa 607 Weest Baank keessatti ajjeefamaniiru. Isaan keessaa torba qubattoota Israa'eliin ajjeefaman.

    Akkasuma lammiileen Israa’el kudhan haleellaa Filisxeemoonni Weest Baank irraa raawwataniin ajjeefamaniiru jechuun dhaabbatichi dabalee ibse.

13. 27 Hagayya 2024Raashiyaan haleellaa jabaa guutummaa Yukireen irratti gaggeessitu guyyaa lamaffaa itti fufte

    Raashiyaan haleellaa walirraa hin cinne Yukireen irratti gaggeessaa jirtu guyyaa lamaaf itti fufteetti.

    Ganama kana akeekkachiifni qilleensaa haleellaan gaggeeffamaa kan dhaga’ame yoo ta’u, xiyyaarri Raashiyaa misaa’eloota hayipparsoonik dhukaasuu isaa hordoffii taasisaa jirtuun Yukireen hubatteetti.

    Humni ittisa qilleensaa Yukireen akka jedhetti, guutummaan biyyattii yaaddoo haleellaa meeshaa waraanaan balaastik jala jirti.

    Humni waraanaa Raashiyaa akka jedhutti ammoo Kiiv, Liviiv, akkasumas naannoleeKaraakiiviifi Odeesaa dabalatee buufataaleen annisaafi bu’uuraalee misoomaa kaan guutummaa Yukireen keessa jiran sirriitti irratti xiyyeeffatanii haleeluudhaaf meeshaan waraanaa qilleensaafi galaana keessa fagootti rukkutu hojiirra ooleera.