Pirezidantiin duraanii Ameerikaa Doonaaldi Tiraamp yaalii ajjeechaa halkan Sambataa hiriira Pensilvaaniyaa keessatti irratti gaggeeffame tureen silaa ''du'een turee'' jedhan.
Tamsaasi kallattii BBC Afaan Oromoo kan har'aa kunoo eegaleera.
Yaalii ajjeechaa Pirezidantii duraanii Ameerikaa Doonaald Tiraamp irratti taasifameen wal qabatee akkasumas odeessaalee addunyaa ijoo ta'an karaa kanaan isin biraan geenyaatii nu hordofaa.
Oolmaa nagaa qabaadhaa!
Madda suuraa, Getty Images
Waa’ee meeshaa dhukaafame maal beekna? Miidhaa dhaqqabsiisewoo? Lubbuu Tiraamp balaarra kan buuse turee?
Eegdonni akka jedhanitti bakka dhukaasi raawwatameeti qawween AR-15 jedhamu argameera.
Qawween kuni ‘’qawwee Ameerikaa’’ jedhamuunis beekama. Ajjeechaa jumlaa hedduu Ameerikaa keessa dhaqqabuurratti namoonni itti dhimma bahaniiru.
Qawween kuni hamma tokko atomaatikiidha. Kana jechuun nami dhukaasu erga takkaa hedduu dhukaasuu danda’a jechuudha.
Qawween waraanaa kuni saffisa guddaa kan qabu yoo ta’u fagoorraa miidhaa dhaqqabsiisuus danda’a.
Gatiin isaa salphaafi Ameerikaa keessatti harka namoota hedduu argama jedhamee amanama.
Xiinxaltoonni akka jedhanitti osoo rasaasni inchiima tokko gara mirgaatti siqee jiraate yookiin mataan Tiraamp gar tokkotti jallatee jiraate waan biraatu mudata ture.
Humni rasaasichaa dhiibamee mataa Tiraamp rukutuun galaafatuu danda’a ture jedhu xiinxaltoonni dhimma nageenyaa.
Gabaabumatti Tiraamp xiqqumaaf lubbuun hafan.
Akkamiin eegdonni osoo jiranii haleellaan akkanaa raawwate kan jedhu baruuf qorannoon eegaleera.
Tiraamp osoo ergaa dabarsanii erga gidduutti dhuka'ee booda ''hunduu rifatee gad ciise,'' jedhan nami ijaan arganiifi BBC'n dubbise.
Eegdonni Tiraamp karaatti dhukaafame erga adda baasan booda nama dhukaase ajjeesaniiru.
Nami dhukaase kuni Tomaas Kiruukis akka jedhamu poolisiin ibseera.
Madda suuraa, Reuters
Aadde Melaaniyaan namicha Tiraampitti dhukaase ‘bulguudha’ jedhan
Haati warraa Donaald Tiraamp, Melaaniyaa Tiraamp, yaalii ajjeechaa abbaa warraa isaaniirratti yaada kennaniiru.
Dargaggoo Tiraampitti dhukaaseenis ‘’bulguu’’ jechuun ibsan.
Ibsa miidiyaa hawaasummaa X gubbaa maxxansaniin yeroo dhukaasi Tiraampitti dhukaafame jireenyi isaaniifi kan ilma isaanii ‘’qarqara jijjiirama hamaarra’’ gahee akka ture dubbatan.
Ummanni Ameerikaa siyaasa garagaraas hordofu waan isaan bira dhaabateef galateeffatan.
Giiftiin Duree duraanii Melaaniyaa hammana ifatti yoo dubbatan hin baramneyyuu.
‘’Ilaalchi garagaraa, imaammati, fi taphi siyaasaa jaalalaa gadi ta’usaa dagachuu hin qabnu,’’ jechuun dubbatan.
Hundi keenya maatii jiruu gaarii akka qabaannu falman keessaa dhufne jechuun tokkommaan akka ititu waamicha dabarsan.
Maatii namoota jaalatan of biraa dhabaniis jajjabina hawwaniiru.
Meeshaan dargaggoon Tiraampitti dhukaasuuf itti dhimma bahe kan abbaan isaa bitanidha jechuun qondaalonni nageenyaa akka amanan AP'n gabaaseera.
Akka qondaalonni maqaa dhokfatanii midiyaatti dubbatan jedhanitti abbaan dargaggoo kanaa meeshaa kanaa yoo xiqqaatee baatii jaha dura bitan.
Qondaalonni nageenyaa federaalaa sababa Tiraampitti dargaggoon kuni dhukaase hin ibsine.
Ammoo ‘’yaalii ajjeechaati’’ jechuun ibsaniiru.
Gama kaaniin konkolaataa dargaggeessa kana keessaa meshaaleen dhodhootuu argamuullee miidiyaaleen US gabaasaa jiru
Madda suuraa, CBS
US'tti michuu BBC kan ta’e CBS humnoota nageenyaarraa mirkaneessetti ‘’meeshaaleen shakkisiisoo’’ ta'an konkolaataa nama Tiraampitti dhukaase keessaa argameera.
Teknishaanonni boombii qoratan bakkichatti waamamaniiru. Akkuma jala jalaan odeeffanneen isin biraan geenya.
Madda suuraa, Getty Images
Donaald Tiraamp yaalii ajjeechaa booda yaada yeroo lammataaf kennaniin deeggartoonni isaanii ''kadhataafi yaadaan'' bira dhaabbachuu isaaniif galateeffatan.
''Waanti hin yaadamne akka hin taane kan hambise Waaqa jedhan. Waan sodaannu hin qabnu, hamaa fuulduratti amantiifi diddaa keenyatti cichina,'' jechuun miidiyaa hawaasaa isaanii Truth Social irratti maxxansan.
''Kanneen miidhaman akka bayyanatan kadhanna, warri haala suukaneessaan ajjeefaman yaadannoon isaanii onnee keenyarraa hin badu,''
Yeroo kamiyyuu caala amma ''tokkummaan dhaabbachuun,'' barbaachisaadha jedhan.
''Biyya keenya dhugumaanin jaaladha, isiniinis siniin jaaldha. Torbee kana Ummata Gudddaa keenyaaf Wiiskonsiin irraa haasaa nan taasisa,'' jedhan
Madda suuraa, Getty Images
Biiroon Qorannoo Federaalaa US kan FBI jedhamuun beekamu akkaataa kuni mudate qorachuu malu.
Haa ta’u malee, eegdota Tiraamp kan ‘Secret Service’ jedhamuun beekamanitti quba qabama.
Hojii tokko qofa qabu – innis pirezidantii US aangoorra jiraniifi bu’an eeguudha. Sambata galgala garuu kanarraa hanqataniiru.
Yeroo xumuraaf waggoota 43 dura ture pirezidantii duraanii US Ronaald Reegan irratti yaaliin ajjeechaa kan raawwatame.
Reegaan somba keessa rukutamanii lubbuun hafaniiru.
Guyyaa har’aa namoonni siyaasaafi ummanni US akkamiin namni tokko qawwee hidhatee baaxiirra bahee rasaasa afur gara waltajjiitti dhukaasuu danda’e jechuun deebii barbaadu.
Qorannoon FBI, eegdota pirezidantootaafi Dippaartimantii Homeland Security hirmaachise eegaleera.
Pireezidantiin duraanii Ameerikaa Donaaldi Tiraamp duula na filadhaarra osoo jiraniiti yaaliin ajjeechaa kan irratti taasifame.
Battaluma sana eegdotaan marfamanii gara konkolaataa eegaa jirutti geeffamaniiru.
Yeroo gara konkolaataatti seenanis harka ol kaasanii agarsiisaa turan.
Madda suuraa, TMZ
Suuraa Niiw Yoork Taayims maxxanse rasaasni yeroo mataa Donaald Tiraamp gubbaa dabartu mul’isa.
Pirezidantiin duraanii US guyyaa Sambataa duula filannoo Pensalveeniyaatti gaggeessaa jiranii yaaliin ajjeechaa irratti raawwatamuu FBI ibseera.
Madda suuraa, DOUG MILLS/THE NEW YORK TIMES/REDUX/EYEVINE
Madda suuraa, Getty Images
Pirezidantiin duraanii US Donaald Tiraamp yaaliin ajjeechaa erga irratti raawwatameen booda wal'aansaaf hospitaala dhaqanii turan.
Eegasii wal’aansa argatanii gara mana isaanii Niiw Jersii jirutti deebi’aniiru.
Yaaliin ajjeechaa gaafa Sambataa kan irratti raawwatame yoo ta’u karaa gurra isaanii dhiigni dhangala’aa ture.
Akkuma dhukaasni dhagahameen eegdonni kan ‘secret service’ jedhamuun beekaman battala dhaquun isaan marsaniiru.
Namoonni duula filannoo sanarratti argaman cookaa turan.
Viidiyoon TMZ argate namichi baaxii manaarra dhokatee osoo Tiraampitti dhukaasu mul’ise.
Biiroon Qorannoo Federaalaa US (FBI) taatee Pensalveeniyaatti mudate akka yaalii ajjeechaatti akka hubatu ibseera.
Haleellaa kanaan namichi dhaabataa ture tokko yoo ajjeefamu, namoonni lama biroommoo haalaan miidhamuu poolisiin ibseera.
Madda suuraa, Reuters
Intalli Doonaald Tiraamp Ivaankaa Tiraamp toora X isheerratti barreeffama maxxansuun, ''jaalalaafi kadhannaa'' abbaashee fi namoota ''hokkora hiika hin qabneen'' kanneen miidhaman biroof taasifame beekamtii kenniteetti.
"Eegdotaafi qondaaltoota seera kabachiisan kanneen biroo hunda kanneen har'a tarkaanfii ariifataa fi murteessaa ta'e fudhataniif galata guddaan qaba."
"Biyya keenyaaf kadhachuu itti fufeera. Abbaakoo har'as, yeroo hundumaa siin jaalladha."
Akkasumas toora X irratti maxxansuun, Doonaald Tiraamp Jr suuraa abbaan isaanii hiriira Pensilvaaniyaa keessatti geggeeffame irraa harka isaanii qilleensatti ol kaasaniifi dhiigni fuula isaaniirratti mul'atu maxxansan.
Suuraa kana birattis, "Ameerikaa baraaruudhaaf qabsaa'uurraa yoomiyyuu hin dhaabatu" jedhamee barreeffameera.
Tooruma walfakkaatu irratti, Tiffaanii Ariyaanaa Tiraamp abbaan ishee lubbuun ooluusaaniitti Waaqayyoon galateeffachuudhaan, jeequmsi siyaasaa ''gonkumaa deebii hin ta'u'' jetteetti.
"Akkuma har'a argite abbaankoo qabsaa'aa waan ta'eef sii fi Ameerikaadhaaf falmuu itti fufa."
Madda suuraa, Getty Images
Ministirri Muummee Itoophiyaa Abiy Ahimad yaalii ajjeechaa pirezidantii duraanii US Donaald Tiraampirratti dhaqqabeen haalaan ''rifachuu'' dubbatan.
''Haleellaa pirezidantii duraanii Tiraampirratti [dhaqqabeen] baay’een rifadhe.
‘’Dafanii akka bayyanatan nan hawwa. Ummanni Ameerikaammoo waqtii filannoo naga qabeessaafi dimookiraatawaa [akka ta'uf] nan hawwa,’’ jedhan.
Guyyaa Sambataa osoo Donaald Tiraamp duula na filadhaa gaggeessanii haleellaan erga irratti raawwateen booda wal'aansaaf hospitaala seenaniiru.
Dureewwan biyyoota adda addaa haleellaa kana kan balaaleeffatan yoo ta'u poolisiin US nama eenyummaa nama Tiraampitti dhukaasuun shakkame adda baasuu beeksiseera.
Madda suuraa, AP
Gorsaan olaanaan duula filannoo Doonaald Tiraamp, eegdonni bulchitoota US kan secret services jedhamanii waamaman hangam akka qophaa'anii jiranirratti gaaffiin akka jiru himan.
Isteefan Muur sagantaa BBC World Service “Weekend” jedhamuutti akka dubbataniitti, “guyyaa sodaachisaa – kan hundi keenya itti rifannedha” jedhan.
"Ittaanaawwan koo keessaa tokko irraa barreeffama Tiraamp rasaasaan rukutameera jedhu wayita na qaqqabeetti onneen koo rukutuu waan dhaabeef, gaaffii ‘irraa hafeeraa laata?’ jedhu gaafachuu sodaadheen ture," jedha Muur.
"Viidiyoo irratti akka mul’atetti rasaasa kana jalaa miliqeera, garuu wanti hunda keenya baay’ee sodaachisu osoo rasaasni sun gara mataasaatti inchii tokkitti fagaatee kun ajjeechaa ta’a ture."
Muur itti dabaluudhaan “Tiraamp eegumsa dabalataa akka barbaadu beekamaadha. Tajaajilli Iccitii guutummaatti qophaa’uu ta'usaa ilaalchisee amma gaaffii baay’eetu jira,” jedhan.
Madda suuraa, Reuters
Haleellaa Israa’el hogganaa waraanaa Hamaas irratti xiyyeeffate raawwateen namoonni 90 ajjeefaman Ministeerri Fayyaa Hamaasiin Gaazaa keessatti geggeeffamu ibseera.
Haleellaan qilleensaa Israa'eliin raawwatame kunis naannawa deeggarsa namoomaaf adda baafame irratti jedhameera.
Haleellaa Israa’el hogganaa olaanaa Hamaas Mohaammad Deeef fi ittaanaa isaanii Raafaa Salamaa irratti kan xiyyeeffatedha jette kanaan, namoonni gara 300 ta'an madaa’uu ibsi ministeera fayyaa kun mul’isa.
Ministirri Mummee Israa'el Beenjaamiin Netaanyaahuun ibsa Sambata galgala gaazexeessitootaaf kennaniin, eenyusaanii akka ajjeeffaman wanti ''mirkanaa'aa hin jiru'' jedhan.
Haleellaan kunis naannawa Al-Maawaasiitti bakka dhiheenya Kaan Yuunis jedhamufi bakka waraanni Israa’el zoonii gargaarsa namoomaa jedhee adda baaseetti raawwatme.
Al-Mawaasitti namni ijaan arge tokko BBC'tti akka himanitti, bakki haleellaan kun itti raawwatames bakka ''kirkirri lafaa'' itti mudate fakkaata.
Viidiyoon naannoo sanaa waraabamee tamsa'e akka agarsiiseetti, jijigaa gamoo fi namoota miidhamanii dhiigaan guutaman yoo siree namoota miidhaman ittiin batan irratti kaa'aman agarsiisa.
Namoonni harka isaaniitiin jijjigaa bakka haleellaadhaan boolli guddaan itti umamee keessaa baasuuf wayita yaalan mul’ata.
Gareen BBC Verify suuraa haleellichaan booda kaafaman xiinxaluudhaann, haleellichi naannawa marsariitii Raayyaa Ittisa Israa’el (IDF) irratti akka naannoo gargaarsa namoomaatti agarsiifame keessatti kan raawwatame ta'u mirkaneessee jira.
Obbo Netaaniyaahuun erga ibsi humnoota nageenyaa waliigalaa isaaniitiin kennameef booda oppareeshiiniin kun akka gaggeeffamuuf ajaja kennuu himan.
Namoota booji'aman naannoo sana akka hin jirre, hamma miidhaa qaqabee fi meeshaa waraanaa gosa akkamii akka fayyadamu beekuu akka barbaadu dubbateera.
