Qaamooleen Israa'el bakka bu'uun mari'ataa turan Kaataarii akka deebii'aniif ajajaman

Haguuggii Tamsaasa Kallattii

1. 31 Onkololeessa 2023Israa'el lola lafoo Gaazaatiin Hamaas waliin walitti 'dhukaasa cimaan' ta'e jette

   Israa'el duula lafoo Gaazaa keessatti gaggeeffamaa jiruun waraanasheefii hidhattoota Hamaas gidduutti walitti dhukaasni 'cimaan' taasifamuu beeksiifte.

   Dubbi-himaan, Humna Raayyaa Ittisaa Israa'el, Piitar Leernar, saganataa BBC Breakfast jedhamu irratti UK keessatti dhiyaatanii ture.

   Qondaalli kun humnoota Israa'eliifi Hamaas jidduutti waraanni cimaan halkan keessa gaggeeffamuu himan.

   Dubbi-himaan kun akka jedhanitti, raayyaan ittisa biyyattii, ''sadarkaa sadarkaan, akkasumas haleellaa haleelleedhaan'' Hamaas barbadeessaa jira jedhan.

   Yaadni waraanichaatis Hamaas dura dhaabbachuun ''bu'uuraalee misoomaa isaanii barbadeessuudha'' jedhan.

   Kana malees, Hamaas Masjiidootaafi gamoowan namoonni nagaa keessa jiraatan keessaa dhukaasa raawwata jechuun balaaleeffatan.

2. 31 Onkololeessa 2023Hamaas misaa'el farra taankiitiin konkolaatoota Israa'el sadii haleelluu hime

   Haams miisaa'eloota farra taankiitiin konkolaatawwan Israa'el haleelluu hime.

   Israa'el waraana halkan keessa Gaazaatti ''shororkeessitoota barbadeessuuf'' gaggeessiteen humnootashee irratti miisaa'el farra taankiifi qawweedhaan dhukaafni irratti banamuu dubbattee turte.

   Amma ammoo toora Teeleegraamii garee hidhattoota Hamaas, Birgeedii Al Qaasaamiin gaggeeffamu irraati waan haaraaan dhagahame. Innis Kaabaa Gaazaa keessatti konkolaattoota Israa'el sadii irratti haleellaa raawwachuu beeksiise.

   Maxxansi kunis konkolaatawwan wayita Gaazaa keessa gara naannawa Al-Taawwamiin keessa galuuf adeeman misaa'el farra taankiitiin itti dhukaafame jedheera.

   Odeeffannoo duraatiin ammoo, Hamaas loltoota lafoo Raayyaa Ittisa Israa'el dhiheenya Keereem, qaxxaamura kaabaa Gaazaatti moortaariin haleelluu himee ture.

3. 31 Onkololeessa 2023Loltoonni Israa’el ‘suuta, of eeggannoon’ socho’aa jiru

   Humni Raayyaa Ittisa Israa’el (IDF) ‘suuta garuu of eeggannoodhaan’ gara kaaba Gaazaatti socha’aa jira.

   Dubbi-himaan IDF Koloneel Janaataan Konriikas, waraabbii viidiyoo miidiyaa hawaasaarratti gadhiisaniin, humnootin Israa’el humnoota dhukaasaafi tikawwan hedduun gargaaramaa jiru jedhan.

   Itti-dabalunis, Hamaasirratti haleellaan lafoofi samiirra raawwatamaa jira.

   Dubbi-himaan kun itti dabalunis, humni Raayyaa Ittisa Israa’el, ‘‘qiyyeeffannaa isaanii kaabaa Gaazaarratti taasifachuun, aazaa hunda irratti haleellaa raawwataa jira’’ jedhan. Kaabni Gaazaas akka ‘‘wiirtuu Hamaas itti walgahe’’ jechuun ibsan.

4. 31 Onkololeessa 2023Gaazaan dho'insa lafa raasuun yeroo bar'uuf daawwadhaa

   Rippoortaroonni Gaazaarraa gabaasan, Israa'el Gaazaa Istiriip bakka Hamaas argamu hunda haleelaan jira jette.

   Addeessi Diimaa Filisxeem akka jedhetti, Magaalaa Gaazaa naannawaan hospitaala Al Quds humnoota Israa'eliin haleellaan hamaan irratti raawwatamaa jira.

   Viidiyooon Rooyitars gadhiise tokko dho'insi naannawaa Magaalaa Gaazaa kaabaan jiru agarsiisa.

5. 31 Onkololeessa 2023Gaazexeessitoota 31 ajjeefaman keessaa 26 Filisxeemota- CPJ

   Gidiraa Israa’el-Gaazaa keessa jiru gabaasaa osoo jiranii gaazexeessitoota ajjeefaman 31 keessaa 26 Filisxeemota, afur Israa’eloota, tokko ammoo lammii Libaanon akka ta’an ragaan jaarmiyaa mirga gaazexeessitootaaf falmu, CPJ, ni mul’isa.

   Dabalataan gaazedxeessitoonni saddet kan madaa’an yoo ta’u, sagal ammoo kan achi-buuteen isaanii dhabame ykn hidhaman ta’uu akka danda’an CPJn ibsa baaseen himeera.

   Addatti gaazexeessitoonni Gaazaa irraa gabaasan qoramaata guddaa keessa akka jiran gabaasni dhaabbata akanaa ibseera.

   “Haleellaa cimaa Israa’el lafoon taasisaa jirtu, haleellaa qilleensarraa hamaa, akkasumas toorawwan komunikeeshiniifi dhiyeessiin ibsaa haala hin jirre keessatti gabaasaa waan jiraniif balaa hamaaf saaxilamoodha jedheera.

   Kanneen ajjeefaman keessatti lammii Filisxeem beekamaa fiilmii hojjetu Roshidii Saaraaj, Baarutitti ogeessa viidiyoo Rooyitars kan ta’e Isaam Abdullaahii ni jiru.

   Haleellaa meeshaa guddaa Israa’el Libaanon keessatti gaggeessiteen gaazexeessaan Rooyitars kun ajjeefamuu CPJtu hime.

6. 31 Onkololeessa 2023Looltoonni Israa'el Gaazaa keessa hangam fagaatanii galaniiru?

7. 31 Onkololeessa 2023Deeggartoonni Filisxeem waajira mootummaa Kanaadaa qabatan

   Falmitoonni mirgoota namoomaa guutummaa Kanaadaa keessa jiran Gaazaatti waamichi dhukaasa dhaabuu akka taasifamu gaafachuufwaajiraalee aanga’oota mootummaa qabatan.

   Miseensonni paarlaamaa waamicha dhukaasa dhaabsisuu akka dhiyeessaniif dhiibbaa taasisuuf ture falmitoonni mirgoota namoomaa kunneen kan waajiraaleen hojjetoota mootummaa kan to’atan.

   Waajiraaleen Wixata qabatan keessaa kan ministira ittisaa Biil Bileeyar fi kan ministira muummee itti-aanaa Kiriistiyaa Firiilaand keessatti argamu.

   Mormiin kun kan gaggeeffame magaalota biyyattii keessa jiran 12 keessatti waajiraaleen mootummaa argaman 17tti ta’uu gaazexaan Montiriyaal gabaaseera.

   “Mootummaan kanaadaa gaazaatti waamicha dhukaasa dhaabuu akka taasisuuf, akkasumas dhorkaan Gaazaa Istiriippitti waggoota 16f ture akka dhaabbatufi Kanaadaan michummaa Israa’el waliin qabdu akka dhaabduuf gaafachuuf,” jechuun mormituun tokko Rooyitarsitti himeera.

   Mormitooonni dhaadannoowwan dhumaatiin Gaazaatti raawwatamaa jiru akka dhaabbatuufi Filisxeem bilisa taate gaafatan qabataniiru.

8. 31 Onkololeessa 2023Tamsaasa kallattii waraana Israa'el-Hamaas jalqabneerra.

   Tamsaasa kallattii waraana Israa'el-Hamaas Gaazaa keessatti taasifamaa jiru kallattiin isin biraan gahuu jalqabneerra.

   Nu hordofaa.