Afcon 2021: Masriin Ayivoorii Koostiin, Ikiwaatoriyaal Giiniin ammoo Maalii injifatan
Madda suuraa, Getty Images
Waancaa Afrikaa Kaameruunitti gaggeeffamaa jiruun Masriin Ayivoorii Koostiin, Ikiwaatoriyaal Giiniin ammoo Maalii rukuttaa peenaalitiin injifatanii gara marsaa ittaanutti darban.
Masrii fi Ayivoorii Koost tapha daqiiqaawwan 120 goolii walirratti osoo hin galchiin hafuu isaaniitiin, rukuttaa peenaalitiin gargar kan bahan yoo ta'u, rukuttaawwan shan kessaa Ayivoorii Koost tokko galchuu dhabuun 5-4 injifatamte.
Goolii eegaan warra Fara'oon Gabaskiin rukuttaa sadaffaa Eric Bailly yoo gooliirraa baraaru, Mohaammad Saalaa ammoo rukuttaa ishee xumuraa gooliitti jijjiiruun eda Kaayiroo gammachiiseera.
Istaadiyeemii Duwaalaatti warri Fara'oon kan taphataa sarara fuulduraa Mohaammad Saalaa qaban deeggarsa guddoo argataniiru. Faaruun biyyaalessaa Masrii yeroo faarfamu fi suurri Saalaa iskiriinii guddaarratti mul'atu deeggartootni sagalee guddoon deeggarsa agarsiisaa turan.
Tapha walakkaa jalqabaa irratti warri Masrii yaaliiwwan goolii ta'uuf dhiyaatan uumanii turan, boqonnaan boodas akkasuma gareen lameen yaaliiwwan goolii danuu uumaniiru.
Taphni biroo Roobii taphatame ammoo Maaliifi Ikuwaatoriyaal Giinii kan walitti fide yeroo ta'u, taphni isaanii daqiiqaawwan 120 goolii waan hin keessummeessineef rukuttaa peenaalitiin gargar bahan.
Sadarkaa kubbaa miilaan addunyaarratti Maaliin morkattuusheerra kan aantu ta'uus goolii eegaan Ikuwaatooriyaal Giinii si'a lama kubbaa gooliirraa qoluun goota jedhameera.
Ikuwaatooriyaal Giiniin kan qabxii waliigalaa 6-5 Maalii injifattee biyyoota torba biroo gara marsaa Nuusa xumuraatti ce'an keessaa Seenegaal morkatti.
Masriin biyya Kaaba Afrikaa biroo Morookoo waliin, qopheessituun dorgommicha Kaameruun seenaa ishee keessatti yeroof duraaf nuusa xumuraa kan geesse Gaambiyaa waliin, Burkinaafaasoon Tuniziyaa waliin Sanbataa fi Dilbata dhufu ni morkatu.
