Уруш ва бизнес: Украинада бугун кимлар қандай тижорат қилмоқда? Янгиликлар Dunyo

Украиналик ишбилармон Любомир Дюкиннинг айтишича, унинг 95 фоиз ходими "урушга кетган".

У Украинада иш юритадиган қўриқлаш компанияси G-Mak'нинг бош ижрочи директоридир.

Унинг компанияси камерага маҳкамланадиган кичик қора қутига ўхшаш қурилмани ишлаб чиқади.

Бирор босқинчини сезиб қолса, қурилма кўздан ёш оқизувчи газ пуркайди.

Компания шиори: "Украинлар ўз уйини қандай қўриқлашни билади".

Алоқадор мавзулар:

Украина уруш саҳналаштирилганми ё кимлар бундай фикрда?

Россия осмони ёпилгани Марказий Осиёга фойда келтирди

Украина уруши Путинни ё бор, ё йўқ қилиши мумкин

Ширкатнинг аксар ишчилари урушга кетди.

"Беш нафари урушда ҳалок бўлди", дейди у кўз ёшларини тўхтатишга тиришиб.

Энг яхши даврларда ҳам муваффақиятли стартап ташкил қилиш жуда қийин иш, аммо уруш вақтида бу каррасига қийинлашади.

Снаряд портлашлари, инфратузилмага қилинаётган ҳужумлар, блэкаутлар ҳозирда Украинада бизнес олдидаги муаммолардан бир қисми холос.

Шунга қарамай, Украина стартаплари узоқ сафарга, дунёнинг энг йирик технологик йиғилишига Лас Вегасга ўз делегациясини юбормоқда.

Улар учун CES (The Consumer Electronics Show - электрон истеъмол маҳсулотлари шоуси) Ғарб инвесторлари билан учрашиш учун улкан имкониятдир.

«Бу ерга келгунимча уч кун кетди», дейди Corner онлайн ошхона дизайни фирмаси ҳамасосчиси Артём Дудинский.

60 ёшдан кичик украиналик эркаклар мамлакатни тарк этиши мумкин эмас, шунинг учун у Украинанинг тегишли расмийларидан бунинг учун махсус рухсат олиши керак бўлган.

Унинг учун Лас-Вегасдаги сон-саноқсиз неон ёзувлар ва чироқлар электр энергияси тақчил бўлиб қолган Киевда анча олис орзуга ўхшайди.

"Баъзида менинг иш куним соати компьютерим батареяси қанчага етишига қараб белгиланади ... икки ҳафта олдин уч кун давомида электрсиз қолдим", дейди у.

Аммо Артём ечим топди. Унга яқин маҳаллий ёқилғи қуйиш шохобчасида ишончли ишлаб турган генератор бор. Унинг ишхонаси ҳозир шу шохобча бўлиб қолган. Бу компьютер дастурчиси ишлаши мумкин бўлган ягона йўл.

Унинг айтишича, хонадонида иситиш тизими йўқ. "Мен совқотмаслик учун тўшагимда итим билан ухлайман", дейди у.

Мариана Романяк эски қаҳва доналаридан санчқи, қошиқлар ишлаб чиқарувчи "Рекава" компаниясида ишлайди.

Россия чегараси яқинидаги Суми шаҳрида жойлашган бизнес ҳамкори компанияни тахминан 800 чақирим узоққа - ғарбдаги Львов шаҳрига кўчиришга қарор қилади.

Унинг айтишича, бомбалар ва электр таъминотидаги узилишлардан ташқари янги компаниялар учун маблағ топиш деярли иложсиз.

"Барча йирик сармоядорларимиз ва йирик компанияларимиз армияни қўллаб-қувватлаяпти", дейди у.

Маринага кўра, Польша билан чегарага яқин кўчишгани, бизнес учун қўл келмоқда.

"Биз Европа Иттифоқига яқин бўлганимиз яхшироқ, деб ўйлай бошладик, чунки маҳсулот етказиб бериш биз учун осонроқ бўлар эди", дейди у.

Яна бир компания eFarm эса украиналик фермерларга сунъий йўлдош технологиясидан фойдаланиб, ўз далаларини ўғитлашда ёрдам бериш учун яратилган.

Бироқ сўнгги бир неча ой ичида компания йўналишини ўзгартирди ва миналарни аниқлай оладиган технологияни синовдан ўтказмоқда.

Айни eFarm компаниясидан Татьяна Горзейнинг айтишича, Украина далаларининг 30 фоизи зарарланган.

G-Mak бош директори Любомирга қайтсак, у Америкада ўзининг уй қўриқлаш мосламаларини ишлаб чиқаришни истайди.

Унинг учун CES потенциал инвесторлар билан учрашиш учун муҳим имкониятдир.

Барча ишбилармонлар муваффақиятга эришишга умид қилишади.

Агар уруш уларнинг бошларига солган синовлар назарда тутилса, улар исталган бошқа жойда муваффақиятли ишлай олишади.

Telegram каналимиз: https://t.me/bbcuzbek

BBC.COM/UZBEK билан Telegram орқали +44 7858860002 номери билан боғланинг.