Четга қочган Россия зобити: Армиямиз украин асирларни қийнади ва талади Янгиликлар Yangiliklar Dunyo
Россия армиясининг собиқ зобити Би-би-си билан бўлган эксклюзив суҳбатда ўз сафдошлари Украинада уруш жиноятларини қилганларига гувоҳ бўлганини айтди.
Константин Ефремовнинг айтишича, украиналик асирлар хўрланган, дўппосланган ва отилган. Ефремов ўтган августда Россия армиясини тарк этган ва хорижга қочган.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Би-би-сининг Москвадаги мухбири Стив Розенберг хабар қилишича, Россия мудофаа вазирлиги тарқатадиган видеоларда довюрак аскарлар ўз ватани ҳимоясида жанг қилаётганлари акс этади. Лекин Константин Ефремов жангларни ўз кўзи билан кўрган ва асл вазият бошқача дейди.
Константин Россия армиясида юқори даражали лейтенант эди. У хорижга қочди ва Украинада россиялик аскарлар амалга оширган жиноятларни Би-би-сига сўзлаб беришга рози бўлди.
Мана бу Константин Украинада тушган илк суратларидан бири. У Мелитополь яқинида руслар босиб олган ҳаво базасида олинган.
"У ерда талончиликка гувоҳ бўлдим. Аскарлар ва зобитлар қўлига тушган нарсани талади. Улар учоқлар ва биноларни титкилаб чиқдилар. Бир аскар боғда майса кесадиган асбобни олиб, баракларга қайтганда ўтларни кесаман деб мақтанди. Челак, болта, велосипед, ҳаммасини Камазларга ортдилар", - дейди у.
Константин Россия Украинага бостириб кирган куни армиядан кетишга урингани, аммо у агар кетса 10 йилга қамалиши мумкинлиги айтилгани билдирди.
Босиб олинган Украина ерларида қурол-аслаҳа омборини қўриқлаган ва украиналик асирлар қийноққа солинганига гувоҳ бўлган.
"Украиналик асирнинг кўзлари боғланганди. Полковник унинг пешонасига тўппончани тиради-да, учгача санайман, кейин бошингдан отаман, деди. У санади-да, асирнинг бошига яқинликда ўнга ва чапига ўқ узди. Полковник унга қичқира бошлаганда, мен ўртоқ полковник унинг қулоғини кар қилдингиз, эшитмаяпти дедим. Бу қийноқ ва терговлар бир ҳафта, туну-кун давом этди."
Константин даъво қилишича, терговлар борган сари қонли тус олган.
"Тергов чоғида полковник асирнинг қўлига ва ўнг тиззасининг пастига ўқ узиб суягига тегди. Мен қўмондонларга бориб украиналикни касалхонага олиб бормасак, тонггача қон йўқотиб ўлиши мумкинлигини айтдим. Уни Россия ҳарбий формасига кийинтириб касалхонага олиб бордик. Унга "украиналик асир эканинг ҳақида оғиз очма, чунки шифокорлар сендан юз ўгириши ё яраланган рус аскарларини сени отиб ташлашлари мумкин" дедим."
Би-би-си Константиннинг шахси ва ҳаракатларини асословчи ҳужжатлар, видео ва суратларни тасдиқдан ўтказди. Россияга қайтиб келгач у Украинага яна боришдан бош тортгани учун жиддий равишда тартибни бузишда айбланган ва армия сафидан чиқариб юборилган.
Гулагунет инсон ҳуқуқлари гуруҳи сўнг унга хорижга чиқишга ёрдам берган.
"Мен бутун Украина халқидан ҳеч таклифсиз қўлимда қурол билан уларнинг уйларига бостириб кирганим учун кечирим сўрайман. Аслида менинг украиналиклардан узр сўрашга ҳаққим йўқ. Мен ўзимни кечиролмайман, улар мени қандай кечирсинлар..."
Константин урушга қарши бўлгани учун юқори рутбали зобитлар уни хоинликда айблашганини айтади.
"Аммо, мен бошқа давлатга ҳужум қилиш эмас, ўз ватанимни ҳимоя қилишга қасам ичгандим", - дейди у.
BBC.COM/UZBEK билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
