Украина уруши: Қизим кўз олдимда ўлди, бир ой ертўлада тутқун бўлдим Video Ukraina Rossiya

Киев шимолидаги Чернигов шаҳрини Россия қўшинлари бир ой ушлаб турдилар.

Ҳудудларни Украина ҳарбийлари қайта эгаллаганидан кейин у ерда рўй берган даҳшатли ҳодисалар тафсилоти аёнлашмоқда.

Улардан бири қизи ва эридан айрилган, 24 кун давомида қимирламай мактаб ертўласида асирликни бошидан ўтказган Виктория Коваленко ҳикоясидир.

Россия Украина урушини 24 февраль куни бошлади.

Уруш бошланганининг тўққизинчи куни Петро Коваленко ва Виктория Коваленко болаларини асраш мақсадида яшаб турган жойлари - Черниговдан чиқиб кетишга қарор қилдилар.

Алоқадор мавзулар

Верониканинг тўнғич қизи Вероника 12 ёшда, иккинчи қизи Варвара бир ёшга тўлган.

Улар фақат энг зарур буюмларинигина олиб, машиналарида йўлга чиқишди.

Шаҳардан чиққандан кейин бир қишлоқ яқинида йўл тошлар билан тўсилганига дуч келдилар.

Петро машинадан тушди.

Шу вақт автомобилга ўқлар келиб тега бошлади.

Бир ўқ парчаси Викториянинг бошига келиб тегди. Қон оқа бошлади.

Вероника қўрқиб кетиб қалтирай бошлади.

Онаси уни тинчлантиришга ҳаракат қилади.

"Қизим машинадан тушди", деб хотирлайди Виктория.

"Орқасидан мен чиқдим. Тушган пайтимда қизим йиқилди. Қарасам... боши йўқ. Қон бўйнидан фонтандек отиларди. Шокнинг кучлилигидан йиғламабман ҳам. Қўлимда чақалоғим, дарров пана жойга яширинишим керак эди".

Петронинг ҳам овози келмаётганидан Виктория унинг ҳалок бўлганини англади.

У қизини олиб яширинишга ҳаракат қилади, аммо яна ўқ ёмғирлари остида қолади.

Ниҳоят уни Россия аскарлари тутиб оладилар.

Виктория ва қизини қишлоқ мактаби ертўласига қамайдилар.

У ерда одам кўплигидан, тиббий ёрдам кўрсатилмаганидан инсонлар ҳаётдан кўз юмганини кўрди Виктория.

Ертўлага 300 дан ортиқ қамалган эди.

Вероника ва Петро ўлимидан бир ҳафта ўтиб Виктория Россия аскарларидан қизи ва эрининг жасадларини мактабга олиб келишни илтимос қилди.

Ўзи кўмишга қарор қилди.

"Иккита қабр. Битта қути катта, иккинчи қути кичкина эди. Устларида исмлари ёзилган хочлар. Мен қутиларнинг устига тупроқ ташлашни бошлаганимда яна бомбардимон бошланди, кўмишни тугатолмадим. Қочишга мажбур бўлдим. Агар Путинни отиш имконияти менга берилганида эди, ҳеч қўлим қалтирамасдан отиб ташлардим", дейди Виктория.

Чернигов атрофидан Россия қўшинлари чиқиб кетганидан кейин Виктория Львовга етиб олди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek