Каримов билан учрашган, Ўзбекистонга ҳамкорлик ваъда қилган Колин Пауэлл вафот этди - расмий Тошкент таъзия билдирди Afg‘oniston, O‘zbekiston, Tolibon, dunyo, yangiliklar

Колин Пауэлл Ўзбекистонга шахсан ташриф буюрган учинчи АҚШ Давлат котиби бўлади.

Шу соатларда олинаётган хабарларга кўра, у ковиддан вафот этган.

Хасталикнинг ёмонлашган асоратларидан тузала олмаган.

АҚШ собиқ Давлат котибининг 84 ёшда бўлгани айтилмоқда.

Колин Пауэллнинг ўлими ҳақида унинг оиласи маълум қилган.

У расмий Вашингтон ўзининг "террорга қарши уруши"ни бошлаган 2001 йилда АҚШ Давлат котиблиги лавозимини эгаллаган.

Президент Жорж Буш(кичкина)нинг қўл остида ишлаган.

Колин Паэулл бу лавозимни эгаллаган келиб чиқиши афро-америкалик биринчи сиёсатчи сифатида ҳам АҚШ тарихига кирган.

Тошкентга ташриф

АҚШ Давлат котиби экан, Колин Пауэлл 2001 йил 7 декабрь куни Ўзбекистонга ташриф буюрган.

Ташриф АҚШ Ўзбекистонга чегарадош Афғонистонда бошлаган "террорга қарши уруш"дан роппа-роса икки ой ўтган бир кунда амалга ошган.

Ўзбекистонга сафари чоғида у президент Ислом Каримов (ҳозирда марҳум - таҳр.) ва юқори лавозимли расмийлар билан учрашган.

Тошкентдаги қўшма анжуман чоғида Колин Пауэлл "Афғонистондаги инқирозга қарамай", мамлакатининг Ўзбекистондаги манфаатлари давом этишини ваъда қилган.

Вашингтон "Ўзбекистон билан хавфсизлик, иқтисод, сиёсий демократлаштириш ва инсон ҳуқуқлари борасидаги муносабатларни чуқурлаштириш ва кенгайтиришга" умид қилажагини таъкидлаган.

Ўшанда президент Ислом Каримов АҚШ Президенти Жорж Бушнинг пойтахт Вашингтонга таклифини "бажонидил" қабул қилгани айтилган.

Колин Пауэлл Ўзбекистонга шахсан келган, президент Ислом Каримов билан юзма-юз учрашган учинчи АҚШ давлат котиби бўлган.

Бунгача Жеймс Бейкер(1992 йил) ва Мадлен Олбрайт(2000)лар Ўзбекистонга ташриф буюришган.

Ислом Каримов даври Ўзбекистони АҚШ Президенти Жорж Бушнинг "террорга қарши" урушида яқин ҳамкори бўлган.

Ўзбекистон ўшанда ўз ҳудудидан АҚШ ҳарбий базасига жой берган.

Афғонистонда урушаётган Ғарб бошчилигидаги хорижий иттифоқ қўшинлари таъминотида муҳим ўрин тутган Шимолий Таъминот тармоғининг муҳим узви вазифасини бажарган.

Ўзаро ҳамкорликка Ўзбекистондаги инсон ҳуқуқлари билан боғлиқ "абгор" эканликда кенг танқид қилиб келинган вазият ҳам таъсир қила олмаган.

"Террорга қарши уруш" ортидан Афғонистонда Толибоннинг Исломий Амирлиги ағдарилган.

Колин Пауэллнинг вафоти Ғарб қўшинлари Афғонистонни буткул тарк этган ва Толибон яна қудратга қайтган бир пайтга тўғри келган.

Стратегик шериклик ва ҳамкорлик

Икки давлат Ташқи ишлар вазирлари 2002 йилда Стратегик шериклик ва ҳамкорлик асослари ҳақидаги Декларацияни ҳам имзолашган.

Расмий Тошкентнинг билдиришича, бу - икки томонлама муносабатлар тарихида муҳим ўрин тутган.

Ўзбекистон янги президенти Шавкат Мирзиёевнинг Ғарбга илк ташрифи ҳам АҚШнинг яна бир Республикачи президенти бошқарувининг илк йилларига тўғри келган.

2018 йилги АҚШга расмий ташриф шахсан Дональд Трампнинг таклифи билан амалга ошган.

Томонлар бир ташрифнинг ўзидаёқ "стратегик шерикликнинг янги даври"ни бошлашганини расман эълон қилишган.

Ўзбекистон Ташқи ишлар вазирлиги шу соатларда расмий баёнот билан чиққан.

Колин Пауэллнинг вафоти ҳақидаги хабарни "чуқур қайғу" билан қабул қилганликларини билдирган.

"Ушбу жудолик" муносабати билан марҳумнинг яқинлари ва оила аъзоларига "чуқур ҳамдардлик ва таъзия изҳор этган".

Вазирликка кўра, Колин Пауэлл Ўзбекистон-Америка алоқаларининг ўрнатилиши ва тараққиётига "салмоқли" ҳисса қўшган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek