Дайжест. Россия: Юзлаб мигрантлар жанжали, энди патентга онлайн ариза топшириш мумкин ва ўрмонда жасади топилган йигит-қиз ким? Rossiya O'zbekiston yangiliklar

Published
  • Кузминкида оммавий тўқнашув: пичоқланганлар касалхонага ётқизилган;
  • Москвада патентга аризалар энди онлайн тарзда олинади;
  • Ўрмонда 15 ёшли ўзбекистонлик қиз ва 19 ёшли тожикистонлик йигит ўлик ҳолда топилди;

Кичик низодан катта жанжалга

12 июл куни тунда Москвада Марказий осиёлик муҳожирларнинг оммавий муштлашуви юз берган. Россия ОАВларида тарқалган мазкур хабарни ИИВ расман тасдиқлади.

Маълумотларга кўра, Кузминки ҳудудидаги Зеленодолская кўчасидаги муштлашувда 150 га яқин киши қатнашган.

Ижтимоий тармоқларда можаро шахсий адоват ортидан келиб чиққани ёзилмоқда.

Жанжал тахминан соат 19: 00ларда бошланган, шундан сўнг можаро иштирокчиларининг ҳар бирига қўшимча кучлар етиб келиб катта тўқнашувга айланган.

Пичоқланган ва калтаклардан бир неча киши жароҳат олган, улар "Тез ёрдам" машинасида касалхоналарга олиб кетилган.

Воқеа гувоҳларининг сўзларига кўра, можаро пайтида тўхтаб турган бир нечта машиналар зарар кўрган.

Полиция муштлашувнинг 20 га яқин иштирокчиларини ҳибсга олган. ИИВ мигрантлар тўқнашуви сабаблари ва ҳибсга олинганларнинг аниқ сонини ҳозирча очиқлагани йўқ.

Ўзбекистон Ташқи меҳнат миграцияси агентлиги Матбуот котиби Telegram каналида Москвада меҳнат мигрантлари иштирокида юз берган оммавий муштлашув юзасидан расмий баёнот берди."Вазиятга ойдинлик киритиш мақсадида Ташқи меҳнат миграцияси агентлигининг Москвадаги ваколатхонаси ходимлари мамлакатимизнинг ушбу давлатдаги элчихонаси вакиллари билан биргаликда воқеа жойига бориб, Россия Федерацияси Ички ишлар вазирлиги ходимлари билан мулоқотда бўлиб, вазиятни ўрганди.Дастлабки маълумотларга кўра, ушбу оммавий муштлашувда Ўзбекистон Республикаси фуқаролари иштирок этмаган", дейилади баёнотда.

Skip Энг кўп ўқилган and continue reading
Энг кўп ўқилган

End of Энг кўп ўқилган

Электрон аризалар қандай юборилади?

Москвадаги Сахарово кўптармоқли миграция маркази меҳнат патентига ариза беришни истаган чет эл фуқаролари учун мажбурий электрон рўйхатдан ўтишни жорий этди. ️

Электрон рўйхат патент расмийлаштириш жараёнини такомиллаштириш ва айни кунларда юзага келаётган катта навбатларнинг олдини олиш мақсадида амалга оширилмоқда.

Сахарово КММ расмий сайти патент олиш учун ариза топширган чет эл фуқароларини фақат электрон шаклда тайинлаш орқали қабул қилишини билдириб, муҳожирларга қулайлик мақсадида бир неча ҳаволаларни келтиради.

Сайтнинг билдирилишича, мигрантларнинг патент учун электрон аризалари "MIGRANT SERVICE" мобил иловаси ёрдамида (https://play.google.com/store/apps/details?id=mmc63.ru) ёки «Патент учун ҳужжатларни топшириш учун дастлабки рўйхатга олиш» электрон хизмати (http://90.154.106.61:23080/PreRegistration.aspx) орқали қайд этилади.

Суиқасд бўлиши мумкин

Ленинград вилоятида ўрмонда икки ёш - бир қиз ва йигит ўлик ҳолда топилган. Аниқланишича, марҳумлар Ўзбекистон ва Тожикистон фуқаролари бўлган.

Ҳуқуқни муҳофаза қилиш идоралари Понтонний қишлоғидаги ўрмонда топилган жасаднинг бири 15 ёшли ўзбекистонлик қиз, иккинчиси 19 ёшли тожикистонлик йигит эканини маълум қилган.

Айни пайтда ҳодиса юзасидан жиноий иш қўзғатилган, тергов-суриштирув ишлари олиб борилмоқда.

Тергов қўмитаси ёшларнинг ўлими сабаби тахминлардан бирини ўз жонига қасд қилиш сифатида кўрмоқда.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek