Россия ва Ўзбекистон: Москвада аҳвол ўта оғир ёки ‘ишқилиб, яна йўллар ёпилиб қолмасин-да...’ - Rossiya, Putin, O‘zbekiston, dunyo, yangiliklar

Шу кунларда Москва ва Санкт-Петербургда ковиддан рекорд сондаги одам ўлди. Масъулларга кўра, бунақаси Россияда бутун пандемия даврида кузатилмаган. Москва ва Санкт-Петербург Россиянинг энг кўп сондаги Ўзбекистон фуқаролари меҳнат муҳожирлигида банд давлати бўлади.

Россияда сўнгги кунларда коронавирусга чалиниш ҳоллари кунига 20 мингдан ошган.

Ковиддан вафот этаётганларнинг сони ҳали расмий рақамларнинг ўзида юзлаб экани айтилмоқда.

Пойтахт Москвада эса, биргина шу ойнинг ўзида олти бор антирекорд янгиланган, кунига юздан ошиқ одам ўлаётгани қайд қилинган.

Ковид билан касалхонага тушаётганлар сони ҳам Москвада мисли кўрилмаган бир даражага етган.

Масъулларга кўра, бунча кўп одамнинг жонлантириш бўлимида экани ҳам шу пайтгача кўрилмаган.

Агар, ҳафта бошида эълон қилинган расмий маълумотларга таянилса, Москвада бир куннинг ўзида 2 мингга яқин одам касалхонага ётқизилган.

Жонлантириш бўлимидагиларнинг сони эса, кунига 600 кишидан ортган.

Мустақил экспертлар, ҳатто шунда ҳам, россиялик масъуллар келтираётган расмий рақамларга ишонқирамай қарашади.

Пойтахт Москвада аҳволнинг қанчалик оғир эканини шаҳар мэрининг ўзи ҳам эътироф этган.

Собянин, "ўта хавфли ва юқумли штамм билан тўқнаш келиб туришгани"ни яна бир бор такрорлаган.

"Барчани эҳтиёт бўлиш ва имкони бўлиши биланоқ ўзларини коронавирусга қарши эмлатиш"га чақириб қолган.

Бу гал ҳам пойтахт Москва коронавирус ўчоғига айланган.

Бу каби аҳвол шаҳарда яна карантин чоралари устма-уст кучайтирилаётган бир пайтда бўй кўрсатган.

Россия дунёнинг энг кўп сондаги ўзбекистонликлар турли иш, юмуш ва таҳсилда банд давлати бўлади.

Пандемияга қадар уларнинг сони бир неча миллионга нисбат берилган.

Ўзбекистонлик мигрантларнинг энг кўпи эса, айнан Россиянинг икки энг йирик шаҳри - Москва ва Санкт-Петербургда меҳнат қилиб келишган.

Коронавирус билан боғлиқ вазиятнинг кескин ёмонлашиши юз минглаб Ўзбекистон фуқаролари ишлаш учун Россияга қайтиш илинжида ва ҳаракати бўлган бир пайтга тўғри келган.

Биз Москвада меҳнат муҳожирлигида банд ўзбекистонликларнинг бугунги ўй-кайфиятларини билиш учун улардан бири билан боғландик.

"Тўғриси, ҳозирда Москвада ишлаб юрган юртдошларимиз орасида вирус балосидан қўрқув деган нарса буткул йўқолган, тўрт беш киши билан гаплашиб кўрдим.

Йўлларда, автобусларда, метроларда ҳамюртларимизни кузатдим, ўтган йили карантин бошланган вақтидаги саросимага тушиш йўқ.

Айниқса, ўзбек чойхоналари ўзимиздан келган ватандошлар билан доимо гавжум, ҳамма хотиржам.

Менга шундай туюлди.

Вакцина оласизми, деган саволимизга, "Иш жойимиздан мажбурий оласизлар дейишяпти, пулини фирмамизнинг ўзи тўлаб берар экан, соғлигим учун фойдаси бўладиган бўлса, оламан", дея жавоб берди бир акамиз.

"Мен ўтган йили вирусга чалиниб, тузалдим энди менга вакцинаси нима керак", дея шарт кесди бошқаси.

"Кўчада ушлаб олиб, мажбур қилмаса, сира олмайман соғлигим яхши, ҳаммаси жойида", деди таксичилик қиладиган яна бир ҳамюртимиз.

"Ўша вакцинаси қаерда экан, қаерда қилаяпти? Пули неччи пул ёки текинми? Билиб беринг, бориб ўзим оламан", деган жавобни берди қурилишда ишлайман деб ўзини таништирган бошқа бир суҳбатдошим.

"Вакцинаси энди чиққан пайтлар эди, синовдан ўтаётган вақтида ҳам вакцина олдим, ҳам пул беришди", деди яна бири.

Охирги кунларда касаллик кучайиб кетаётгани тўғрисида яна хабарлар кўпайди, юртдошларимиз эса, ишқилиб, яна йўллар ёпилиб қолмасин-да, деган ўй ва хавотирда", - дейди суҳбатдошимиз.

Пойтахт Москвада аллақачон карантин чоралари амалда ва улар кучайтириб ҳам борилмоқда.

Энди Москва вилоятида ҳам чекловлар қўлланиши айтилмоқда.

Москва ва Россиянинг бошқа минтақаларида ҳам коронавирусга қарши эмлаш мажбурий қилинган ва қилинмоқда.

Хизмат кўрсатиш соҳасида ишлайдиганларнинг камида 60 фоизи ўзини эмлатиши шарт экани айтилган.

Шу ҳафта бошидан бошлаб умумий овқатланиш масканларига фақат эмланган, ковидни ўтказиб бўлган ва ўзини коронавирусга текширтирганларнинг қўйилиши маълум бўлган.

Россия тўлиқ карантинга қайтиш эҳтимолини ҳозирча назардан соқит этмоқда.

Мамлакат аҳолисининг сони 146 миллион кишини ташкил қилади.

Масъуллар шу пайтгача вакцинация жараёнининг секин бораётганидан ташвиш билдириб келишган.

Одамларни турли йўллар билан бунга рағбатлантиришгача боришгани кўрилган.

Россия дунёнинг коронавирусга қарши тўртта вакцина яратиб, уларни расман қайддан ўтказган саноқли давлатларидан бири бўлади.

Маълум бўлишича, ҳозир ўзини эмлатиш истагида бўлганлар сони эса, кунига 100 мингга яқинлашган.

Шу кунларда мажбурий вакцинация доирасида Россияда меҳнат қилаётган мигрантларни ҳам эмлаш бошлангани ҳақида хабарлар олинган.

Мазкур янгилик аллақачон маҳаллий фаоллар орасида норасмий ишлаётган мигрантлар-чи, деган саволларни ҳам пайдо қилмай қўймаган.

Худди шу манзарада айрим вакциналарнинг тугаб қолаётганига оид хабарлар ҳам бўй кўрсатган.

Ковид билан боғлиқ вазият оғирлашаётган бир манзарада ҳам мамлакатда ўн минглаб кишилик оммавий тадбирларнинг ўтказилаётгани эса, жиддий танқидларга ҳам сабаб бўлмай қолмаган.

Россияда тарқалаётган коронавирус турлари геномининг таҳлили апрель ойидан буён "дельта"сининг бошқаларини сиқиб чиқараётганини кўрсатган.

Россияда жами коронавирус ҳоллари ҳозирга келиб 5 миллион 400 мингдан ортган.

Россия жорий пайтда дунёнинг коронавирус энг кўп тарқалган олтита давлатидан биттаси бўлиб турибди.

Россиядан кейин коронавируснинг "дельта" штамми Қозоғистонда ҳам аниқланган.

Бунинг ортидан, ҳиндча штамм Ўзбекистонга ҳам кириб келганига оид хабарлар олинган.

Аммо мамлакат масъуллари ҳалича бу ҳақда ўзларининг якуний хулосаларини эълон қилишмаган.

Ўзбекистонда шу пайтгача коронавируснинг "британча" ва "жанубий африкача" штаммлари аниқлангани расман тасдиқланган.

Орада "дельта" штамми сабаб, даҳшатли ковид инқирози ичида қолган Ҳиндистон билан мунтазам авиарейсларни вақтинчалик чеклаган Ўзбекистон шу кунларда яна қўшимча карантин чораларига қўл уришни бошлаган.

Яқинда мамлакатга кириб келаётган барчанинг коронавирусга тест топширишини яна шарт қилиб қўйган.

Коронавирус билан боғлиқ кескинлашаётган вазият сабаб, яқинда Афғонистон билан чегарасини ҳам вақтинча ёпишга қарор қилган.

Россия ва Қозоғистон дунёнинг энг катта сондаги Ўзбекистон фуқаролари меҳнат муҳожирлигида банд давлатлари бўлиб келишган.

Улар ортга юбориб келаётган миллиардлаб доллар маблағлар, йилларки, мамлакат иқтисодини тутиб, юритиб келаётган муҳим молиявий манбалардан бири бўлади.

Миллионлаб оилаларнинг тирикчилиги худди шу пуллар орқасидан ўтиши боис, Ўзбекистонда ўзига хос ижтимоий ҳимоя камари вазифасини ҳам бажариб келади.

Бу икки давлатда коронавируснинг "дельта" штаммини юқтираётган орасида ўзбекистонликлар бор-йўқлиги ҳозирча маълум эмас, бу ҳақдаги расмий маълумотлар ҳалича кўзга ташланмайди.

Россия ва Қозоғистон ҳозир дунёнинг Ўзбекистон билан мунтазам ҳаво парвозлари амалда бўлган саноқли давлатларидан бири ҳамдир.

Ўзбекистон ва Россия ўртасидаги мунтазам авиарейслар бир йиллик танаффус ортидан шу йилнинг 1 апрель куни қайта тикланган.

Россияда вужудга келаётган сўнгги вазиятнинг Москва ва Тошкент ўртасидаги парвозларга таъсири ҳалича маълум эмас.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek