Беларусь:Тихановская мамлакатни тарк этди, намойишлар давом этмоқда

Published
Ўқилиш вақти: 2 дақ

Беларуснинг баҳсли президент сайловларида асосий рақиб бўлган Светлана Тихановская "фарзандларининг ҳаёти муҳим экани"ни айтиб, мамлакатни тарк этган.

Қўшни Литва Ташқи ишлар вазири Линас Линкявичюс унинг хавфсиз жойда эканини айтган.

Беларусь сайлови: овоз бериш ортидан тўқнашувлар

Путин Беларусь президентини ағдармоқчими ёки буни мухолифат уддалайдими?

Президент Лукашенко Ислом Каримов, Андижон билан огоҳлантирди

Тихановская овозларнинг қайта саналишини талаб қилиб, ўзи борган Марказий Сайлов Комиссияси биносида тўрт соат қолиб кетиши ортидан номзоднинг тақдири борасида хавотирлар кучайган.

Якшанба куни сайловларда Президент Александр Лукашенконинг ғолиб деб эълон қилинишига қарши мухолифат оммавий иш ташлашларга чақирган.

'Болалар энг муҳими'

"Мен бу кампанияда тобландим ва ҳаммасига чидайман, деб ўйлагандим. Аммо афтидан, бошида қандай заифа бўлган бўлсам, шундай қолдим. Мен ўзим учун жуда ҳам қийин қарорни қабул қилдим. Бу қарорни буткул мустақил равишда қабул қилдим.... Биламан, кўпчилик мени тушунади, кўпчилик қоралайди, эҳтимол, кўпчилик нафратланар. Аммо биласизми, ҳеч ким мен каби танлов қаршисида қолмасин. Шунинг учун... Одамлар, ўзингизни асранг! Ҳозир бўлаётган нарсалар ҳеч кимнинг ҳаётига арзимайди", дейди титроқ овозда Тихановская ўзи эълон қилган видеода.

Skip Энг кўп ўқилган and continue reading
Энг кўп ўқилган

End of Энг кўп ўқилган

У ўз мурожаатини "болалар бизнинг ҳаётдаги энг муҳим нарсамиз" деган сўзлар билан якунлаган.

Душанба куни эрталаб Тихановская Беларусни ташлаб чиқиш нияти йўқлигини айтган эди.

У журналистларга ўзини президент сайловларининг ғолиби деб ҳисоблаши ва Марказий Сайлов Комиссиясига кўплаб овозларнинг сохталаштирилгани ҳақидаги шикоят билан мурожаат қилишини айтган.

Сафдошларининг айтишича, душанба кечга томон МСКга борган Тихановская 7 соат ушлаб турилган ва у ерда юқори мартабали куч тизимлари раҳбарлари у билан суҳбатлашган.

Суҳбат тафсилотлари маълум эмас.

Беларусь Марказий Сайлов Комиссияси якшанба куни ўтган сайловларда амалдаги президент Александр Лукашенко 80,08% овоз олганини эълон қилган, Тихановскаяга расман 10,09% сайловчилар овоз берган.

Мухолифат тарафдорлари расмий натижаларни рад этишган ва Тихановская сайловларда ғалаба қилганини айтишмоқда.

Намойишлар учинчи кун давом этган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek