Россия-Ўзбекистон: Юлдузнинг Москвадаги концертини кимнинг чўнтаги кўтарди?

Ўзбекистон халқ артисти Юлдуз Усмонованинг ижтимоий тармоқларда анчагина баҳсу мунозараларга сабаб бўлган Москвадаги концерти аншлаг билан ўтди.

Би-би-си ўзбек хизмати ушбу мавзу атрофидаги ҳолатларни кузатиб борди ва ҳамма томонларнинг фикрларини билди.

"Инсоф қилинг, Юлдуз опа!"

Концерт санаси интернетда эълон қилинган дастлабки кунларда Инстаграмда фаол бўлган ўзбекистонлик блогер Жасмина Раҳимова ("транс Жасмин" номи билан таниқли) билетларнинг қимматлигидан шикоят қилди.

-Халқим-халқим деган хожи онамиз билетни 10 минг (рубль - таҳр) дан сотаяпти экан. 10 мингдан! Ўзбеклар 30 минг ойлик олади. 30 минг! Ундан 5 минги патентга кетади, 5 минги квартирасига, 5 минг овқатига кетади. Инсоф қилинг, Юлдуз опа! 10 мингга ким сизга билет олиб киради? - дея видео орқали мурожаат қилди Жасмина Раҳимова.

Кўзлари оқиб кетган мигрант нимадан афсусда?

Ўзбеклар Россия банкларига 60 млн АҚШ доллар фойда келтирмоқда

“Умид Зеленский” Хайрулло Ҳамидов, “Миллион” жамоаси ва Россия шоу-бизнесидаги ҳаёти ҳақида

Шунингдек, блогер бу нархга ҳеч қачон концертга тушмаслигини айтиб, бошқаларни ҳам бормасликка чақирди:

-"Концертга борманглар, одамлар! Уйга пул юборинглар!"

Бу мурожаат ижтимоий тармоқларда зудлик билан тарқалиб, транслиги учун Жасминни юмшоқ қилиб айтганда, "ёқтирмайдиганлар" ҳам унинг фикрини маъқуллашди.

Би-би-си ўзбек хизмати концерт чипталари масаласида "Крокус сити холл"нинг матбуот хизмати билан боғланганида, уларнинг расмий сайтида очиқ кўрсатилганини билдирди. Кўриб чиқдик: ўзбекистонлик санъаткорнинг концертига чипта нархлари 800 рублдан 7000 рублгача қилиб белгиланган эди.

Билет чипталари бўйича Инстаграмда скриншотлар эълон қилаётган Жасмина Раҳимова билан телефон орқали боғландик.

-Женнифер Лопеснинг ҳам чиптаси бунчалик қиммат эмасди, - фикрида қатъий қолди Жасмин.

"Крокус сити холл" маъмурияти эса, нуфузли залларда концерт уюштиришнинг ҳаражатлари ҳам катта бўлишини билдирди.

Бир ой сотилмаган чипта бир соатда сотилиб кетди

13 ноябрь куни Юлдуз Усмонова ва унинг 8 кишилик ижодий гуруҳи Москвага етиб келди, аммо концертга чипталар яхши сотилмаган эди. Хонанда концерт продюссери Тимур Хацаев билан Инстаграмда мухлисларига видеомурожаат қилди:

-Касса ёнига келишга қўрқаётганларга гапим, ундай нархлар йўқ. Бунга ўзим келиб кўриб ишонч ҳосил қилмагунча гапирмагандим. Мутлақо бошқа нархлар, жуда меъёридаги нархлар. Бу эртаклар кимгадир керак бўлган экан. Келинглар, - деди Юлдуз Усмонова.

-Нотўғри ташвиқотларга ишонманг, ундай нархлар йўқ. Билетлар нархи 800 рублдан 5000 рублгача, - қўшимча қилди продюссер.

Концертдан 8 соат эълон қилинган ушбу мурожаатдан сўнг, залнинг қарийб ярмига ҳам олинмаган чипталар концертдан олдин сотилиб кетди.

Шу тариқа Юлдуз Усмонованинг ўзининг юбилей концертини Крокус сити холлдаги 6000 ўринлик катта залда жонли ижрода ўтказди.

Москвадаги бу энг нуфузли мааданият масканларидан бирида муқаддам ўзбекистонлик санъаткорлардан Севара Назархон ва Наргис ўз концерт дастурларини россиялик мухлисларига тақдим қилган.

Би-би-си ўзбек хизмати концертдан олдин таниқли хонанда билан суҳбатлашишга муваффақ бўлди, у чипталар бўйича изоҳлар берилганини билдирди.

-Концертдан олдин сўровнома ўтказдик, кўпчилик ўзлари севган қўшиқларини айтишимни сўрашди. Хит қўшиқларни кўпроқ куйлайман ва албатта, янгилари ҳам бўлади, - деди Юлдуз Усмонова.

Хонанда ўз жамоаси билан ноябрь ойи турнеси эълон қилгани ва Москвадан сўнг Санкт-Питербург, Қозоғистон ва Америкага гастрол сафарига боришини билдирди.

Филипп Киркоровнинг кутилмаган ташрифи

Суҳбатимиз тугамасдан, Юлдуз Усмоновани юбилей концерти билан табриклагани россиялик таниқли санъаткор Филипп Киркоров қўлида бир даста атиргуллар билан кириб келди. Кутилмаган ташриф ўзбекистонлик хонандаги қувонтириб юборди.

-Келганингдан бошим осмонга етди. Сен билан неча йиллик танишлармиз. "Юрмала", "Асия даусы", танловларда қатнашганларимиз эсингдами? - хотирлади Юлдуз.

-Тиғиз иш тартибимдан базўр узилиб ёнингга югурдим. Ўзбек санъати қироличаси, афсоновий истеъдоди, - дея таърифлади Киркоров.

Бу пайтда эса 6000 дан зиёд кишилик жой тўлиб, Юлдуз Усмонованинг чиқишини кутарди.

Юлдуз саҳнага чиқди, унинг мухлислари ҳар бир қўшиғини қизғин қаршилади, бирга куйлашди, бирга ўйнашди. Асли ўзбекистонлик хонанда Суғдиёна ва россиялик таниқли қўшиқчи Султон Ураган концерт меҳмонлари бўлишди.

Концерт охирида ҳамма бир бўлиб "Ҳеч кимга бермаймиз сени, Ўзбекистон!" дея куйлади.

Концертга оддий муҳожирлар келдими?

Концертдан сўнг эса, томошабинларни саволга тутдик.

"Муҳожирлар учун имконсиз" дея шов-шув бўлган концертга кимлар келди ва чипта нархлари уларга қимматлик қилмадими?

-800 рублга олдим, мен учун қиммат эмас, - деди бир мухлис. (800 рубль - балкондаги жой нархи - таҳр)

-Нархлар хар хил, бизга - эр-хотинга 14000 рублга тушди (олд қаторлар - 7000 рубль - таҳр.) Концерт шунга арзийди, - дейишди ёш оила Асрор ва Гулмира.

-Ўқиб ишлайман, 2000 га билет олдим, чўнтагим кўтаради, - деди талаба йигит.

-Таксичилармиз, Қозоғистон чегарасига қатнаймиз. Билетни 3000 рублга олдик ҳар биримиз, - дейишди хонанданинг тожикистонлик мухлиси Раҳмиддин.

"Фут-сити" бозорида ишловчи муҳожир эса чиптани 1500 рублга олганини айтди.

Баъзи суҳбатдошларимиз эса, уларга чипта нархи аҳамиятли эмаслиги, концертдан маънавий озуқа олишганини билдиришди.

-30 йилдан ошдики, Москвада яшаймиз. Юлдуз билан бирга йиғладик, кулдик, маза қилдик. Ўзбекистонга бориб келгандек бўлдик, - деди андижонлик Руқия опа.

Концертга ташриф буюрган мухлисларни кузатдик, ўнлаб томошабинлар билан суҳбатлашдик. Асосан катта ёшлилар кўп эди: Россияга келиб бу ерда муқим қолган асли ўзбекистонликлар, ҳаётида Ўзбекистон билан боғлиқ хотиралари бор МДҲ давлатлари фуқаролари.

Меҳнат муҳожирларидан эса катта қисми Москвада топиш-тутиши яхши бўлганлар ва ота ёки онасини хурсанд қилиш учун уларга чипта олиб бериб, улар билан бирга келганлар.

Концертга ҳамма пўрим бўлиб келган. Блогер айтганидек, кўринишидан "30 минг ойлик оладиган" оддий муҳожирларни деярли учратмадик. Ҳар ҳолда, суҳбатдошларимизнинг ҳеч бири "зўрға орттириб билет олдим" демади. Улар билет олмай, концертга ҳам келмай қўя қолишган бўлса керак...

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek