Ўзбекистон: Сирдарё вилоятида 5 яшар қизчага тегажоқлик қилган нафақахўрга нега қисқа жазо берилди? Yangiliklar O'zbekiston
Аёллар ҳуқуқларини ҳимоя қилувчи «Сукут Сақлама» ташкилоти хабарига кўра, Сирдарё вилоятида 5 ёшли қизчани зўрлашга уринган эркакка 10 йиллик қамоқ жазоси берилган. Аммо, бу қонунчиликда белгиланган жазодан кам.
Жорий йил 13 апрелида В.Г. исмли эркак ўз туғилган кунида спиртли ичимликлар қабул қилган. Сўнг у ўз уйида ижарада турган ёш оиланинг беш яшар қизчасини зўрлашга уринган.
Ташкилот ёзишича, қизча тушликдан сўнг уй ҳовлисида ўйнаш учун онасидан рухсат сўраган. Маст ҳолатдаги уй эгаси бир ўзи ўйнаётган қизчани мультфильм таклифи билан ўзига жалб қилиб, ўз хонасига олиб кирган ва қисман ечинтирган.
«Сукут Сақлама» ёзишича, нафақа ёшидаги эркак ўзини жинсий қониқтира бошлаган, ҳамда ўзи ва қизчани телефон видеосига олган. Қўрқиб қолган қизча уни қўйиб юборишни сўраган, аммо эркак унинг белидан қаттиқ ушлаб олган. Оғриқлардан қийналган қизча қичқиришни бошлаган. Ташкилотга кўра, қизчанинг танасидаги қонталаш ва тирнаш излари суд тиббий экспертизаси томонидан тасдиқланган.
Қизчанинг қичқириқларига онаси югуриб келгач, эркак уни қўйиб юборган. Аммо, бу вақти қўлидан тушиб кетган телефонни қизча олиб қочиб онасига кўрсатган ва бўлган воқеани сўзлаб берган. Нафақахўрнинг илтижоларига қарамай, она Ички ишлар ходимларини чақирган ва эртасига эркак ҳибсга олинган.
Шу йил июлида, ташкилотга кўра, ёпиқ ўтган судда В.Г. Ўзбекистон Жиноий кодексининг 119-моддаси 4-банди (Жинсий эҳтиёжни зўрлик ишлатиб ғайритабиий усулда қондириш) билан айбдор топилган. Унга умумий тартибдаги колонияда 10 йил жазо муддатини ўташ белгиланган.
Жиноий кодексда «Ушбу моддада назарда тутилган ҳаракатлар ўн тўрт ёшга тўлмаган шахсга нисбатан содир этилган бўлса, — ўн беш йилдан йигирма йилгача озодликдан маҳрум қилиш билан жазоланади», дейилган.
«Сукут Сақлама» ташкилотига кўра, ҳакам эркакнинг 60 ёшдан ўтган бўлгани, ҳамда унинг айбига иқрор бўлиши, ёши ва оилавий шароитини ҳисобга олган ҳолда қонундаги муддатдан қисқа жазони белгилаган.
Ташкилот ёзишича, нафақа ёши судда жазони юмшатувчи омил сифатида қўлланаётгани биринчи марта юз бермаяпти.
Охирги вақтда Ўзбекистонда болаларга нисбатан жинсий зўравонликлар сони тобора кўп хабар қилинмоқда. Баъзи таҳлилчилар буни ижтимоий тармоқлар кенг ишлатилиши ва бунга қарши курашувчи ташкилотлар фаоллиги билан изоҳлашади.
https://t.me/bbcuzbek
BBC.COM/UZBEK
Telegramda bog'lanish raqami +44 7858860002
