Россия ва мигрант: Патриарх Кирилл ёрдамчиси айтишича, муҳожирлар Москвани босиб олишга келяпти Dunyo Yangiliklar Янгиликлар
Сурат манбаси, Telegram/Cogito ergo sum (канал епископа Саввы)
Патриарх Кириллнинг викарийси (ёрдамчиси) Епископ Савванинг айтишича, мигрантлар Москвага шаҳарни босиб олиш учун келишади.
Епископ Савва Рус православ черковининг епископи бўлмиш Патриарх Кирилл Московскийнинг яқин сафдошларидан бири ва у кўп мавзуларда, хусусан Украинадаги урушга хайрихоҳ кайфиятдаги фикрларни билдириб келади.
Исми Сергей Тутунов бўлган Епископ Савва ўзининг Телеграм каналида чоп қилган «Москва ва масжид» сарлавҳали мақоласида пойтахтнинг Косино-Ухтомский туманидаги кўл бўйича қурилиши режаланган масжиддан норозилигини айтади.
«Святое озеро» кўли бўйида 60 минг намозхонга мўлжалланган масжид қурилиши ҳақида мишмишлар чиқиши ортидан 19 март куни одамлар норозилик намойишини уюштирганлар. Епископ Савва маҳаллий эҳромга намойишчилар билан бирга 1000 киши йиғилганини айтди ва бу жуда катта сонлигини урғулади.
Аммо, воқеа жойида бўлган MSK1.RU канали мухбирининг айтишича, одамлар сони епископ айтганидан икки баравар кам эди ва бир неча кишини полиция олиб кетди.
Сурат манбаси, Anadolu Agency/Getty Images
Епископ Савва ўз мақоласида бу масжид "чет элликлар" учун қурилишига эътироз билдиради.
"Вазиятни ўрганиш ортидан аён бўлаётгани шуки, гап чет эллик фуқаролар учун масжид қуриш ҳаракати ҳақида кетяпти. Улар Россияга қурилишларда (фақат қурилишларда эмас, лекин биринчи ўринда) ишлаш учун келишади. Биз бу одамларни биз учун ниманидир қуриш ва ўз оилалари учун пул ишлаб олишга таклиф қилмаганмидек? Бунинг ўрнига улар ўзлари учун нимадир қуряптими? Яна бир фикр: Меҳмонлар Марказий Осиёдан пул ишлаш учун келишадими ёки бизнинг юртимизни босиб олиш учун?" дея савол қўяди руҳоний.
Еписков сўнг мавзуга чуқурлашиб, рус ишчиларининг "импорт қилинган" ишчилардан нимаси ёмонлигини сўрайди. Унинг айтишича, "рус эркаги фақат ичишга қодир" деган гап афсона эканини телевизорда Россия президенти бориб кўраётган юқори технологияли заводларда кўриш мумкин.
Руҳонийнинг айтишича, масжиднинг айнан "Святое озеро" (Муқаддас кўл) бўйида қурилиши провокациядир. Унинг айтишича, рус татарлари, бошқирлар ва "Ватанимиздаги бошқа мусулмон биродар ва опа-сингиллар" Москвада ажойиб масжидларга эгалар.
"Москва эса - ким нима демасин - православ ва пойтахт шаҳар. Россиянининг авра-астарини чиқарманг ва бизнинг орамизга нифоқ солманг", - дейди у мақоласи сўнгида.
Telegram kanalimiz: https://t.me/bbcuzbek
BBC.COM/UZBEK
Telegramda bog'lanish raqami +44 7858860002
