Доналд Трамп нега ва қаерга яширинди?
Сурат манбаси, Getty Images
АҚШ оммавий ахборот воситаларининг хабар қилишича, президент Доналд Трамп июл ойи бошида Туркияда бўлиб ўтган НАТО саммитидан қайтар экан, эҳтимолий Эрон таҳдиди туфайли пухта режалаштирилган махфий режа доирасида ортга қайтаётган вақти учоғини яширинча алмаштирган.
Washington Post газетасининг ёзишича, АҚШ президенти телевидение камералари кўз ўнгида Air Force One самолётига чиққан, кейин эса овқат етказиш ускунаси ёрдамида бошқа бир ҳарбий самолётга ўтказилган. Самолётдаги журналистлар ва Оқ уй ходимларининг бир қисми президентнинг бошқа йўл билан олиб кетилганидан бехабар бўлишган.
BBC нинг АҚШдаги ҳамкори CBS News манбаларига кўра, АҚШ расмийлари Эрон томонидан самолётга ракета отилиши мумкинлиги ҳақида ишончли таҳдидни аниқлашган. Оқ уй эса самолётнинг махфий алмаштирилганини тасдиқламаган.
Трамп бундан олдин Анқарадаги саммит давомида ўзини Эроннинг "биринчи рақамли нишон"и деб атаган эди.
Махфий режа АҚШ Вашингтон ва Теҳрон ўртасидаги урушни тугатиш бўйича музокаралар барбод бўлганидан кейин Эронга қарши ҳарбий зарбаларни қайта бошлаганининг эртаси куни амалга оширилган.
Трамп Туркияга Қатар томонидан ҳадя қилинган янги Boeing 747-8 самолётида келган эди. Бироқ у ватанга қайтишда "эски кунларни эслаш учун" аввалги Air Force One самолётидан фойдаланишини айтган.
8 июл куни тарқалган видеоларда Трампнинг Анқара аэропортида президент самолётига чиқаётганини кўриш мумкин. Аммо Washington Post маълумотига кўра, у кейинчалик яширинча кичикроқ C-32A ҳарбий самолётига ўтказилган.
Бу Boeing 757 самолётининг ўзгартирилган кўриниши бўлиб, одатда вице-президент томонидан ишлатилади.
Газетанинг ёзишича, Трамп овқат етказиш ускунаси орқали самолётнинг у чиққан томонига қарши тарафдан C-32A'га ўтказилган. Мудофаа вазири Пит Хегсет эса парвоз одатий кўринишда давом этаётгандек таассурот уйғотиш учун C-32A самолётига ташқи зинапоядан алоҳида чиққан.
Журналистлар ва Оқ уй ходимларининг бир қисми Air Force One'га чиқиб, дераза пардаларини тушириш ҳақида кўрсатма олган. Улар президент самолётда йўқлигини билишмаган.
Шундан кейин Трамп Буюк Британияга учиб борган ва АҚШга қайтишда яна эски Air Force One'га чиққан. RAF Mildenhall ҳарбий ҳаво базасига қўнгач, унинг мазкур самолётдан тушаётгани тасвирга туширилган. Унинг C-32A'дан эски президент самолётига қандай ўтгани маълум эмас.
Сурат манбаси, Reuters
Шундан сўнг президент Трамп Вашингтонга қайтиш учун яна Қатар ҳадя қилган янги Air Force One'га ўтирган.
Парвоз чоғида Трамп самолётдаги мухбирлар билан суҳбатлашиб, Эрондан келаётган таҳдидларни тилга олган, аммо самолёт алмаштириш амалиёти ҳақида гапирмаган.
Туркиядан учган самолётда нега журналистларга дераза пардаларини ёпиш айтилгани ҳақидаги саволга Трамп шундай жавоб берган:
"Чунки эҳтимол бу хавфли парвоз бўлган. Биз курашаётган пасткашлар сабаб шундай", дея жавоб берган.
Унинг айтишича, ҳаётига нисбатан таҳдид "доимий" бўлиб, Эроннинг рўйхатида "биринчи рақамли" шахс ҳисобланади.
"Аммо мен кетсам, сиз ҳам кетардингиз, тўғрими?" деган Трамп.
Сурат манбаси, Reuters
BBC News O‘zbek контенти энди Сизнинг WhatsApp да
Аъзо бўлиш учун бу ерга босинг
End of podcast promotion
Оқ уйнинг алоқалар бўйича расмийси Стивен Чунг мазкур хабарларни очиқчасига на тасдиқлади, на рад этди. У янги Air Force One'ни президент ва унинг ходимларини ҳимоя қилиш учун замонавий хавфсизлик тизимлари билан жиҳозланган "энг илғор самолёт", деб таърифлаган.
CBS News'нинг аввалги хабарларига кўра, АҚШ разведкаси Трампнинг ўзига ёки унинг самолётига нисбатан муайян ҳужум таҳдиди ҳақида олдиндан огоҳлантирган.
The New York Times газетаси аввалроқ Қатар томонидан тақдим этилган самолёт юзасидан хавфсизлик хавотирлари ҳақида ёзган эди. Унда Махфий хизмат (Secret Service) Трампга НАТО саммитидан қайтишда самолётни алмаштиришни тавсия қилгани айтилган.
Шундан кейин нашрнинг бир нечта журналистлари қасамёд остида кўрсатма бериш учун чақирилган. Кейинчалик АҚШ Адлия вазирлиги BBC га қонунга хилоф маълумотлар сиздирилиши бўйича тергов олиб борилаётганини маълум қилган.
АҚШ мазкур 400 миллион долларлик Boeing 747-8 самолётини президент фойдаланишига тайёрлаш учун бир неча ой давомида қайта жиҳозлаган. CBS News манбаларига кўра, аввалги Air Force One самолётларида яқинлашаётган ракеталарни ишдан чиқариш ёки чалғитиш учун лазер технологиялари мавжуд. Қатар ҳадя қилган самолётда қандай тизимлар борлиги эса маълум эмас.
Оқ уй матбуот котиби Кэролайн Ливитт CBS News'га берган баёнотида "Янги Air Force One президент сафарлари учун мутлақо хавфсиз. Бироқ куз фаслида унга қўшимча такомиллаштириш ва модернизация ишлари ўтказилади. Бу жараён тахминан бир ой давом этади", дея айтганди.
