Роналдуни Ўзбек қизлари 'қарғиши урди'ми ёки 'Ўзбекларнинг кўнглини қолдириш шунақа бўлади'?... – Ижтимоий тармоқларда гап
Сурат манбаси, Richard Sellers/Sportsphoto/Allstar via Getty Images
Ўзбекистонни футбол бўйича жаҳон чемпионатининг гуруҳ босқичидан пастга қулатган бирор бир миллий терма жамоа чорак финалга чиқа олмади. Юлдуз Роналду сардорлик қилган Португалиянинг биринчилик билан бунчалик эрта хайрлашиши эса ўзбекистонликлар орасида роса гап бўлди, ижтимоий тармоқларни қизитди.
Нима бўлди?
Ўзбекистоннинг жаҳон чемпионатидаги ҳар уч рақиби: Конго плей-офф, Португалия ва Колумбия эса нимчорак финалидан пастга қулади, аллақачон биринчилик билан хайрлашди.
Миллий терма жамоанинг Испаниядан мағлубияти эса Криштиану Роналдунинг илк ва сўнгги бор жаҳон чемпиони бўлиш орзусини ҳам чиппакка чиқарди, юлдуз футболчини стадионнинг ўзида йиғлатди.
Юлдуз Роналду сардорлик қилган Португалиянинг биринчилик билан бунчалик эрта хайрлашиши эса ўзбекистонликлар орасида роса гап бўлди, яна ижтимоий тармоқларни қизитган мавзулардан бирига айланди, аммо уларнинг қарама-қарши муносабатларига туртки берди.
Ижтимоий тармоқларда Португалия 0-1 Испания ўйини шарҳланган ўзбек тилидаги видеолар улар томонидан минглаб маротаба ёқтирилди.
Аммо улар остида қолдирилган коментларнинг сони ҳатто мингдан ортгани, бир неча юзга етгани кўрилди.
Акс-садолар
...sal kengroq o‘ylanglar, hamma o‘z Vatani uchun kurashadi, nima qilsin edi, yutqizib bersinmi...
Бунга ўхшаш коментлардан бирида ёзилишича, "Ўзбекларнинг кўнглини қолдириш шунақа бўлади".
Бошқасига кўра, "Роналдунинг ашаддий мухлиси бўлган".
"Аммо ўша ўйиндан кейин уни "ёмон кўриб қолган...".
Ижтимоий тармоқларда ўз муносабатлари, ҳис-туйғулари билан бўлишганлар орасида хотин-қизлар ҳам кўпчиликни ташкил этган.
Улардан бири ўзининг "Ўзбек қизларининг қарғиши урдиююююююю", деган коментига қаҳ-қаҳ уриб турган бир эмас, олтита эможини ҳам тиркаб қўйган.
Орада, "Ўзбекистоннинг аламлари чиқди, хафа бўлма, Роналду, бу қайтар дунё", - деган коментларнинг ҳам борлиги кўрилган.
Айримлар эса, "Бизнинг кунимиз бошларига тушди", - деб ёзган.
Яна бир коментда "Аввал қирқ йилда қайтса, ҳозир 40 кунга ҳам бормай қайтади, қайтар дунё", бошқасида "Ўзбекистонга гол уришнинг оқибати бу, баттар бўл", - дейилган.
Аммо бунга ўхшаган коментларга ўз муносабатларини билдирган ўзбекистонликларнинг ҳам борликлари кўрилган.
Улар айни мазмундаги шарҳларга жавобан, "...сал кенгроқ ўйланглар, ҳамма ўз Ватани учун курашади, нима қилсин эди, ютқизиб берсинми", - дея ўз фикру мулоҳазаларини ёзиб қолдиришган.
Буларнинг барчасига илова, "Роналду, сен афсонасан, ёшликдаги тарих учун сенга раҳмат, тўғриси йиғладим!", деганларининг ҳам борликлари кўрилган.
"Йиғлама, йиғлама, Роналду. Сен Жаҳон Чемпионати кубогини олмаган бўлсанг ҳам, футбол қиролисан", деган коментлар ҳам учраган.
Роналдуни "футбол қироли"га қиёс берилган айрим постларда, "Биз учун сен энг зўрисан", ҳам деб ёзилган.
Шавкат Мирзиёев ваъдаси, Ўзбекистоннинг кучи ва Ўзбек халқи бошқачами?
Видеони кўриш учун илова қилинган линкни босинг:
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Гап нимада?
Сурат манбаси, Omar Vega/Getty Images
Португалия Ўзбекистон билан бирга "К" гуруҳига тушган. Гуруҳ фаворити ва бу йилги жаҳон чемпионлигига даъвогарлардан бири сифатида ҳам кўрилган.
Португалия Европа ва жаҳоннинг энг кўзга кўринган жамоалари сирасига киради.
Жорий пайтда ФИФА рейтингида юқори ўнликдан жой олиб турибди.
Футбол бўйича жаҳон чемпионатининг узоқ йиллик иштирокчиларидан бири.
Бу галгиси жамоанинг биринчиликдаги тўққизинчи иштироки бўлган.
Криштиану Роналду каби сафларида юлдуз футболчилари кам эмас.
Европанинг топ клубларида тўп сураётган ўйинчилари кўп.
Аммо Португалия ҳалича бирор марта жаҳон чемпионлигини қўлга кирита олмаган.
Португалия ва Ўзбекистон шу пайтгача ҳеч қачон бир-бирига қарши тўп сурмаган.
Бу учрашувни қандай ҳис-туйғулар билан кутаётганлигини Ўзбекистон президентининг шахсан ўзи ҳам яширмаган.
Португалия билан ўйин куни Наманганда сафарда эканига қарамай, Шавкат Мирзиёв, "нима бўлади, деб бугун ҳам уйқуси келмаётгани"ни ошкора эътироф этишгача борган.
Аммо худди ана шу Роналдунинг Португалияси Ўзбекистонни гуруҳ босқич беллашувларида энг йирик – 0:5 ҳисобида мағлубиятга учратган терма жамоага айланган.
Бешта тўпдан иккитасига эса айнан сардори Криштиану Роналду муаллифлик қилган.
Криштиану Роналду ҳатто Ўзбекистонга қарши ўйинда сўнгги дақиқаларгача Мессига тенглашиб, ҳатто хет-трик қилишга ҳам уринган.
Айнан Ўзбекистонга қарши тўплари билан Криштиану Роналду олти жаҳон чемпионатида гол урган тарихдаги биринчи футболчига айланган.
Ўзбекистоннинг ўзининг тарихида илк бор Португалиянинг дарвозасини забт этган тўпи эса инобатга олинмаган, ҳакам тўпни узатган футболчисини ўйин қоидасини бузди, деб топган.
VAR ёрдамида келинган бу қарор ўзбекистонлик футбол ишқибозлари томонидан бир хилда қарши олинмаган, бу уларнинг таажжуб ва эътирозларига сабаб бўлгани ҳам кўрилган.
Португалия-Ўзбекистон учрашуви Ўзбекистон қолиб, бутун минтақада катта қизиқишга сабаб бўлган, бу ўйинни томоша қилиш учун айримларининг пойтахтларида ҳатто катта экранлар ҳам ўрнатилган.
Минтақадаги айрим халқаро спорт журналистлари Ўзбекистоннинг Португалия билан бир гуруҳда ўйнашини "катта ютуқ"қа баҳо беришган.
Улар айнан Португалия сафаида Криштиану Роналду борлиги сабаб, у ўйнаган ўйинларни бутун дунё томоша қилишини айтишган.
Агар Ўзбекистон терма жамоаси Португалияни мағлуб этса ҳам, енгилса ҳам, демак ўзбек футболчилари жаҳон скаутлари, менежерлари ва футбол мутахассислари назарини ўзига қаратиши, бу эса нафақат ўзбек футболчиларига, балки бутун Марказий Осиё футболчиларига ҳам фойда келтиришини таъкидлашганди.
Ўзбекистонликлар ва Криштиану
Сурат манбаси, Charlotte Wilson/Getty Images
Дунёнинг энг номдор ва совриндор футболчиларидан бири бўлган Португалия миллий терма жамоаси сардори Криштиану Роналду эса ўзбекистонлик футбол ишқибозларига бевосита таниш.
Юлдуз футболчи 2000 йилда Тошкентга келган, унинг ўшанда Ўзбекистон пойтахтида берган маҳорат дарслари ўзига минглаб одамни жалб қилгани, 8 минг кишилик "ЖАР" стадиони одамлар билан "тўлиб-тошиб" кетгани ҳам хабар берилган.
Криштиану Роналду Англиянинг "Манчестер Юнайтед", Испаниянинг "Реал"ида тўп сурган пайтларида ҳам Ўзбекистонда ўзига озмунча мухлис орттирмаган.
Юлдуз футбол ўзбекистонлик орасида ўзининг хайрия ишлари билан ҳам яхши ном қозонган.
Португалияга қарши илк ўйини эса шуниси билан ҳам Ўзбекистонда узоқ кутилган ва тарихийларидан бири сифатида баҳо топган.
Аксарият ўзбекистонлик футбол ишқибозлари бу учрашувда ғалаба ёки камида дурангга умид қилишган.
Бирлари бунинг сабабини Португалия Конга билан "зўрға" дуранг қайд этгани, бошқалари эса, Ўзбекистон Бош мураббийси Фабио Каннаваронинг ҳали футболчи эканида Италия миллий терма жамоаси билан бирга Португалияни уч бор мағлуб этгани омили билан изоҳлашган.
Аммо тўрт карра жаҳон чемпиони Италиянинг ўзи эса бу галги биринчиликка чиқа олмаган.
Буларнинг барчасига илова ўзбекистонлик футбол ишқибозлари яна ижтимоий тармоқлар орқали шахсан Криштиану Роналдунинг ўзидан ҳам Ўзбекистонга гол урмасликни илтимос қилишган. Ўз сўровларини футболчининг ижтимоий тармоқлардаги акаунтларида ёзиб қолдиришган.
Ўшанда уларнинг айни мазмундаги коментларидан нусха олинган видеолар ҳам ижтимоий тармоқларда айланган.
Аммо бу илтимосларига португалиялик юлдуз футболчининг жавоби ноаён қолган.
Ўзбекистон эса якунида Португалиядан йирик ҳисобда мағлубиятга учраган.
Бу ҳам ўшанда ўзбекистонликлар учун Криштиану Роналду акаунтларини "қизитган" мавзуга айланган.
Улар ўз таажжуб, тушунмовчилик ва аламларини юлдуз футболчи билан яна ижтимоий тармоқлар орқали бўлишишганди.
Бирваракайига АҚШ, Мексика ва Шимолий Америка мезбонлик қилган бу галги жаҳон чемпионати эса Криштиану Роналду учун энг сўнггиси бўлиши, у биринчиликдан кейин катта футболни тарк этиши кутилмоқда.
Илк бор кенг форматда ўтказилаётган жаҳон чемпионатининг чорак финалига чиқиш ва жаҳон чемпионлиги учун ўз курашларини давом эттириш ҳуқуқини эса:
Франция - Марокаш
Испания - Белгия
Норвегия - Англия
Аргентина - Швейцария
қўлга киритишган.
Ярим финалчиларнинг тақдири 10, 11 ва 12 июл кунлари маълум бўлади.
BBC Ўзбек хизматига ўз тахминлари билан бўлишган ўзбекистонлик айрим таниқли спорт шарҳловчилари бу галги биринчиликда Испания, Аргентина ва Францияда чемпион бўлиш имконияти юқори эканини айтишмоқда.
Футбол бўйича янги жаҳон чемпионининг номи эса 20 июл куни маълум бўлади.
