گرینیڈ کی شکل والی مشتبہ ڈیوائس سیکس ٹوائے نکلا
،تصویر کا ذریعہPolizei Hauzenberg
جرمنی کی ریاست بویریا میں ایک مشتبہ ڈیوائس کی تحقیقات کے لیے جب دھماکہ خیز مواد کے ماہرین کو طلب کیا گیا تو معلوم ہوا کہ وہ ایک سیکس ٹوائے یا جنسی کھلونا تھا۔
حکام کا کہنا ہے کہ گرینیڈ کی شکل والی یہ ڈیوائس پیر کو ایک جنگل میں پلاسٹک کے بیگ میں پڑی ملی تھی جس کے ساتھ دیگر اشیا بھی تھیں۔
ایک خاتون کی جاگنگ کے دوران اس پر نظر پڑی اور انھوں نے پولیس کو اطلاع دی جس پر دھماکہ خیز مواد سے نمٹنے کے خصوصی یونٹ کو طلب کیا گیا۔
مقامی پولیس کے مطابق ماہرین کو جلد ہی اندازہ ہوگیا کہ یہ ایک ہنگامی صورتحال نہیں تھی۔
حکام نے ایک پریس ریلیز میں کہا ہے کہ ’بیگ میں موجود چیزوں کا معائنہ کرنے کے بعد آفسران نے جلد ہی یہ پتہ لگا لیا کہ یہ گرینیڈ کی شکل کی لیکن ربڑ کی ڈیوائس ہے۔‘
’بیگ کو خالی کیا گیا تو اس میں سے لُوبریکینٹ کی ایک ٹیوب، ایک ٹِن میں دو غیر استعمال شدہ کونڈوم اور ایک یو ایس بی کیبل ملی۔
یہ بھی پڑھیے
End of سب سے زیادہ پڑھی جانے والی
حکام کا کہنا ہے کہ آن لائن سرچ کرنے پر انھوں نے اس بات کی مزید تصدیق بھی کر لی کہ یہ ایک گرینیڈ کی شکل والا سیکس ٹوائے تھا۔
حکام کے مطابق یہ چیزیں اس مقام پر کچھ عرصے سے پڑی تھیں اور انھیں اب پھینک دیا گیا ہے۔
پولیس کے بیان میں کہا گیا ہے کہ ’یہ تو صرف تصور ہی کیا جا سکتا ہے کہ یہ چیزیں اس مقام تک کیسے پہنچی ہوں گی‘۔
جرمنی میں دوسری عالمی جنگ کے دوران نہ پھٹنے والا گولہ بارود آج بھی برآمد ہو جاتا ہے جسے ناکارہ بنانے کے لیے بڑے پیمانے پر انخلا کرنا پڑتا ہے۔
