امریکہ: پیشاب کا سیمپل موصول ہونے پر سنیما خالی کروا لیا گیا

امریکہ کی ریاست واشنگٹن میں ایک سنیما گھر کو اس وقت لوگوں سے خالی کروانا پڑا جب اسے ایک پیکج میں انسانی پیشاب موصول ہوا۔

اس پیکج پر ’شدید متعدی انسانی مواد‘ تحریر تھا اور اسے غلطی سے نارتھ بینڈ شہر کے نارتھ بینڈ تھیٹر میں جمعے کی شام کو ڈیلیور کر دیا گیا۔

سی این این کے مطابق ایک گھنٹے کے بعد یہ معلوم ہوا کہ یہ مواد انسانی پیشاب تھا اور اس کے بعد اسے تلف کر دیا گیا۔

معلوم ہوا ہے کہ یہ پیکج درحقیقت ایک میڈیکل کلینک پہنچایا جانا تھا۔

یہ بھی پڑھیے

کیا اپنا پیشاب پینا صحت کے لیے مفید ہے؟

انسانی پیشاب کی مدد سے ماحول دوست اینٹوں کی تیاری

انڈیا: وزیر کی کھیت میں پیشاب کرتے ہوئے ویڈیو وائرل

سی این این سے ملحق ٹی وی چینل کومو نے بتایا کہ سینما کے مینیجر کو احتیاطی طور پر ہسپتال منتقل کر دیا گیا۔

فائر فائٹرز فوری طور پر جائے وقوعہ پر پہنچے اور انھوں نے ٹویٹ کیا کہ مذکورہ جگہ پر ضرر رساں مواد سے نمٹنے کے لیے عملہ بھیج دیا گیا ہے۔

سنیما کے اردگرد کی سڑکوں کو بند کروا دیا گی ا تھا۔

سنیچر کو تھیٹر نے اعلان کیا کہ ’سب ٹھیک ہے۔ کوئی خطرہ نہیں۔ سنیما معمول کے مطابق کھلا رہے گا‘ تاکہ فروزن 2 دکھائی جا سکے۔

جس کلینک کو یہ پیشاب موصول ہونا چاہیے تھا وہ جائے وقوعہ سے 50 میل (80 کلومیٹر) دور ٹاکوما میں ہے۔