امریکی فوج کا اسرائیل کی مدد کے لیے بحری جہاز اور جنگی طیارے بھیجنے کا اعلان
،تصویر کا ذریعہGetty Images
پینٹاگون کا کہنا ہے کہ امریکی فوج اسرائیل میں جاری لڑائی کے دوران ’علاقائی مزاحمت کو تقویت دینے‘ کے لیے بحری جہاز اور لڑاکا طیارے تعینات کر رہی ہے۔
یاد رہے کہ امریکہ نے اسرائیل کے لیے اضافی مدد کا وعدہ کیا ہے۔
امریکی وزیر دفاع لائیڈ آسٹن کا کہنا ہے کہ امریکی بحریہ کے طیارہ بردار بحری جہاز وں کے بیڑے کو مشرقی بحیرہ روم کی جانب روانہ کر دیا گیا ہے۔
اس تعیناتی میں کئی گائیڈڈ میزائل کروزر اور تباہ کن جہاز بھی شامل ہیں۔ اس کے علاوہ مشرق وسطیٰ میں امریکی فضائیہ کے اسکواڈرن میں بھی اضافہ کیا جا رہا ہے۔
آسٹن کا مزید کہنا تھا کہ ’ضرورت پڑنے پر امریکہ اس ڈیٹرنس پوزیشن کو مزید مضبوط بنانے کے لیے عالمی سطح پر اپنی افواج برقرار رکھے گا۔‘
گولہ بارود سمیت اضافی وسائل بھی اسرائیل بھیجے جا رہے ہیں اور توقع ہے کہ پہلی سکیورٹی امداد آنے والے دنوں میں پہنچ جائے گی۔
آسٹن کا کہنا ہے کہ یہ اقدام ’اسرائیل کی دفاعی افواج اور اسرائیلی عوام کے لیے امریکہ کی آہنی حمایت کی عکاسی کرتا ہے۔‘
