آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
دنیا میں اس وقت کورونا وائرس سے متاثرہ افراد کی تعداد ایک کروڑ 31 لاکھ سے تجاوز کر چکی ہے جبکہ پاکستان میں متاثرین کی کل تعداد دو لاکھ 55 ہزار سے بڑھ گئی ہے۔ دوسری جانب حکومتِ پنجاب نے صوبے میں کورونا وائرس کے حوالے سے پابندیوں میں مزید 15 روز کی توسیع کر دی ہے۔
امریکہ کے بعد دنیا کا سب سے زیادہ متاثرہ ملک برازیل ہے اور وہاں کورونا وائرس سے تباہی مسلسل جاری ہے۔ گذشتہ 24 گھنٹوں میں ملک میں ایک بار پھر 40 ہزار سے زیادہ نئے متاثرین کی شناخت ہوئی ہے جبکہ 1300 افراد کی ہلاکتیں رپورٹ ہوئی ہیں۔
اب تک کے اعداد و شمار کے مطابق برازیل میں 19 لاکھ سے زیادہ متاثرین سامنے آ چکے ہیں جبکہ کُل اموات 74 ہزار سے بڑھ گئی ہیں۔
منگل کی شام کو انڈیا میں نئے اعداد و شمار سامنے آنے کے بعد ملک میں مجموعی طور پر اب نو لاکھ سے زیادہ مصدقہ متاثرین سامنے آ چکے ہیں اور ہلاک ہونے والوں کی تعداد 23 ہزار سے زیادہ ہے۔
انڈیا کی شمالی ریاست بہار، جہاں کی آبادی 12 کروڑ کے قریب ہے، میں حکام نے 15 روز پر مشتمل سخت لاک ڈاؤن نافذ کرنے کا اعلان کیا ہے ۔ بہار ایسا کرنے میں اکیلی ریاست نہیں ہے اور دنیا بھر میں کئی مقامات پر وائرس کے دوبارہ پھیلنے کے باعث لاک ڈاؤن کو دوبارہ لاگو کیا جا رہا ہے۔
امریکی صدر ڈونلڈ ٹرمپ نے اپنے ایک تازہ ترین انٹرویوں میں کہا ہے کہ سکولوں کو بند رکھنا ’ایک غلطی‘ ہے۔ وہ بات کر رہے تھے ریاست کیلیفورنیا کے حوالے سے جہاں لاس اینجیلس اور سان ڈیاگو کے شہروں میں سکولوں کو خزاں کے موسم میں بھی بند رکھنے کا اعلان کیا گیا ہے۔
صدر ٹرمپ کا مسلسل بیانیہ رہا ہے کہ سکولوں کو کھولا جائے حالانکہ امریکہ میں وائرس کے پھیلاؤ نے تیزی پکڑ لی پے اور سوالات پیدا ہو رہے ہیں کہ کیا سکولوں کے پاس بچوں کو کلاس روم میں مروجہ حفاظتی اقدامات کے ساتھ پڑھانے کی سہولیات ہیں یا نہیں۔
دنیا بھر میں اب تک کورونا وائرس کے مصدقہ تشخیص کیے جانے والے مریضوں کی کل تعداد ایک کروڑ 32 لاکھ ہو چکی ہے۔
سب سے زیادہ متاثرین والے پہلے پانچ ممالک میں:
امریکہ: 34 لاکھ سے زیادہ
برازیل: 19 لاکھ سے زیادہ
انڈیا:نولاکھ سے زیادہ
روس: سات لاکھ سے زیادہ
پیرو: تین لاکھ سے زیادہ
پاکستان بارہویں نمبر پر ہے اور اب تک ملک میں ڈھائی لاکھ سے زیادہ مصدقہ متاثرین سامنے آ چکے ہیں۔
اموات
امریکہ: 136000 سے زیادہ
برازیل: 74000 سے زیادہ
برطانیہ: 45000 سے زیادہ
میکسیکو: 36000 سے زیادہ
اٹلی: تقریباً 35000
حکومت پنجاب کے محکمہ صحت کی جانب سے جاری کیے گئے اعداد و شمار کے مطابق اب صوبے میں ہلاک ہونے والے کی تعداد 2043 ہو چکی ہے جب گذشتہ 24 گھنٹوں میں 17 مزید افراد ہلاک ہو گئے۔
دوسری جان سات ہزار ٹیسٹس کے بعد گذشتہ 24 گھنٹوں میں 553 نئے متاثرین سامنے آئے۔
پاکستان کے زیر انتظام کشمیر میں محکمہ صحت کے فوکل پرسن برائے کووڈ 19 ڈاکٹر ندیم الرحمان کے مطابق گذشتہ چوبیس گھنٹوں کے دوران 320 مشتبہ افراد کے ٹیسٹ لیے گے جن میں 33 افراد میں کورونا وائرس کی تصدیق ہوئی ہے۔
حکام کا کہنا ہے کہ اب اس خطے میں کورونا وائرس سے متاثر ہونے والے افراد کی تعداد 1688 ہوگی ہے۔
24 گھنٹوں میں کورونا وائرس سے متاثر ایک مریض مظفرآباد میں ہلاک ہوا ہے جس کے بعد اب تک مجموعی ہلاکتوں کی تعداد 46 ہو گئی ہے۔
کورونا وائرس سے متاثر ہونے والوں میں ایک ڈاکٹر سمیت دو پیرا میڈیکس بھی شامل ہیں۔
ڈاکٹر ندیم الرحمان کے مطابق کورونا وائرس سے متاثر ہونے والی 2 خواتین کا تعلق مظفرآباد، ایک شخص کا رولاکوٹ ،3 خواتین کا باغ ، 3 خواتین سمیت 5 افراد کا میرپور، 10 خواتین سمیت 18 افراد کا تعلق بھمبر اور ایک خاتون سمیت 4 افراد کا تعلق کوٹلی سے ہے۔
انھوں نے بتایا کہ 20 مریض صحتیاب ہوئے ہیں جس کے بعد اب تک تک اس خطے میں صحتیاب ہونے والے افراد 1049 ہو گئی ہے۔ اب تک 20626 مشتبہ افراد کے ٹیسٹ لیے جا چکے ہیں۔
برطانیہ کے ڈیپارٹمنٹ آف ہیلتھ اینڈ سوشل کیئر کے مطابق ملک میں کورونا وائرس کے ٹیسٹ مثبت آنے والے افراد میں سے 138 کی موت ہو گئی ہے۔ اس طرح ہلاک ہونے والوں کی اب کل تعداد 44 ہزار 968 ہے۔
ہمیں تحقیق سے معلوم ہوا ہے کہ سارس (کورونا وائرس کی فیملی کا ایک اور مرض جس نے 2003 میں وبائی شکل اختیار کر لی تھی) کے آدھے متاثرین میں لبمے عرصے تک علامات اور سخت تھکاوٹ موجود رہی۔
تو اس کا مطلب ہے کہ سارس کوو 2 کے متاثرین کی بھی ایسی حالت ہوسکتی ہے۔
مریضوں اور ان کے ڈاکٹروں کی جانب سے ہمیں موصول ہونے والی ای میلز میں بڑا اضافہ ہوا ہے جو ہم سے مدد مانگ رہے ہیں۔
بعض افراد سینے میں درد اور سانس پھولنے جیسی علامات سے متاثر ہو رہے ہیں۔ کچھ افراد میں سر درد، یاداشت کھونا اور بینائی میں مسائل جیسی نئی علامات ظاہر ہو رہی ہیں۔
مارچ میں عالمی وبا کے آغاز کے بعد پہلی مرتبہ بیلجیئم میں گذشتہ 24 گھنٹوں میں کوئی ہلاکت ریکارڈ نہیں کی گئی ہے۔
ملک کی کل ہلاکتیں 9 ہزار 878 رہیں، جو کہ اب بھی دنیا میں چوتھے نمبر پر سب سے زیادہ ہلاکتیں ہیں۔
جان ہاپکنز یونیورسٹی کے مطابق بیلجیئم میں جس کی کل آبادی ایک کروڑ 15 لاکھ ہے، فی ایک لاکھ افراد کے حوالے سے موت کی شرح دنیا میں دوسرے نمبر پر سب سے زیادہ ہے۔
صحت کے حکام کے مطابق آخری مرتبہ 9 مارچ کو بیلجیئم نے کوئی ہلاکت رپورٹ نہیں کی تھی۔ اس کے بعد 14 مارچ کو ملک میں لاک ڈاؤن لگا دیا گیا تھا۔
مئی کے وسط سے سماجی دوری کی کچھ پابندیوں میں مرحلہ وار نرمیاں لائی گئی ہیں۔
اس کے بعد سے ملک میں کورونا وائرس انفیکشنز کا خم چپٹا ہونا شروع ہوا ہے، اور اب تک وہاں کل 62 ہزار 781 متاثرین رپورٹ ہوئے ہیں۔
پاکستان کے صوبہ بلوچستان کو کورونا وائرس کے مزید 47 متاثرین سامنے آنے کے بعد کل مریضوں کی تعداد 11239 ہو گئی ہے۔
حکومت کی جانب سے جاری تازہ رپورٹ کے مطابق ایک مریض ہلاک ہوا ہے۔
مجموعی متاثرین میں 8672 مرد اور 2567 حواتین شامل ہیں۔
پاکستان کے صوبہ خیبر پختونخوا میں کورونا وائرس کے نتیجے میں مزید آٹھ افراد ہلاک ہو گئے ہیں۔
حکام کی جانب سے منگل کو جاری کیے جانے والے اعداد و شمار کے مطابق مجموعی طور پر فعال مریضوں کی تعداد 8280 ہو گئی ہے۔
رپورٹ کے مطابق مجموعی طور پر ہلاکتوں کی تعداد 1114 ہے۔ اب تک صوبے میں 21607 افراد صحت یاب ہو چکے ہیں۔
گذشتہ 24 گھنٹوں میں 254 نئے کیسز سامنے آئے جبکہ 259 مریض صحت یاب ہوئے۔
میڈاگاسکر کے صدر اینڈری راجولینا نے، جو مئی میں کووڈ۔19 کے بظاہر علاج کا ایک اورگینک ڈرنک پیتے شہ سرخیوں میں نظر آئے تھے، کہا ہے کہ ان کے ملک میں کئی ہائی پروفائل افراد کورونا وائرس کی وجہ سے ہلاک ہو چکے ہیں۔ ان افراد میں دو ممبر پارلیمان، یونیسیف کے ایک نمائندے اور ایک عالمی ادارۂ صحت سے وابستہ ڈاکٹر بھی شامل ہیں۔
دارالحکومت انتانانارائیو میں انفیکشنز میں اضافے کے بعد 15 دن کا لاک ڈاؤن لگا دیا گیا ہے۔
تھائی لینڈ نے مصری فوجی وفد کے کچھ اراکین کی طرف سے قرنطینہ کی خلاف ورزی کے بعد تمام بین الاقوامی پروازیں منسوخ کر دی ہیں۔ بعد میں ایک فوجی کا کورونا ٹیسٹ مثبت بھی آیا ہے۔
ایک تھائی اہلکار کے مطابق 31 اراکین پر مبنی وفد نے ملک میں دو دن کے سٹاپ اوور کے دوران ریونگ صوبے میں ایک شاپنگ سینٹر کا دورہ کیا تھا۔ اہلکار کے مطابق تقریباً 1 ہزار 900 مقامی لوگوں کو بھی جو اس وقت شاپنگ سینٹر میں موجود تھے، گھروں پر قرنطینہ میں رہنے کا کہا گیا ہے۔
اخبار بینکاک پوسٹ کے مطابق تھائی لینڈ کی کووڈ۔19 کے ردِ عمل کی ٹیم کے ترجمان تاویسلپ ویسانویوتھن نے مصری سفارتخانے پر الزام لگایا ہے کہ انھوں نے فوجی وفد کو قرنطینہ میں رکھنے کے بجائے ان کے لیے ہوٹل میں رہنے کا بندوبست کیا۔
تھائی لینڈ میں ابھی تک کورونا وائرس سے 60 اموات اور 3 ہزار 200 انفیکشنز رپورٹ ہوئی ہیں۔
وسطی چین کا بڑا شہر ووہان سے کورونا کی وبا کا آغاز ہوا اور پھر شہر 76 دن تک لاک ڈاؤن میں رہا۔ لاک ڈاؤن ختم ہونے کے دو ماہ بعد وہاں زندگی کیسی ہے؟
پنجاب میں کورونا وائرس کے حوالے سے پابندیوں میں مزید 15 روز کی توسیع کر دی گئی ہے۔
اس حکمنامے کے تحت تعلیمی ادارے، شادی ہال، ریسٹورنٹ اور سینما ہال بدستور بند رہیں گے اور سماجی و مذہبی اجتماعات، کھیل کی سرگرمیوں کے لیے اکٹھ کی اجازت نہیں ہو گی۔
سائنسدانوں نے خبردار کیا ہے کہ برطانیہ میں کورونا وائرس کی دوسری لہر پہلی سے بھی زیادہ خطرناک ہو سکتی ہے۔
ماہرین کو تشویش ہے کہ این ایچ ایس انتہائی دباؤ میں آ سکتی ہے، نہ صرف کورونا وائرس کے دوبارہ سر اٹھانے سے بلکہ موسمی نزلہ زکام اور کورونا وائرس سے ہٹ کر دوسری بیماریوں سے۔
سکاٹ لینڈ کی فرسٹ منسٹر نکولا سٹرجن کہتی ہیں کہ سکاٹ لینڈ کی حکومت رپورٹ کی مجوزہ منصوبہ بندی کو بہت سنجیدگی سے لے رہی ہے۔
سکاٹ لینڈ کی وزیرِ صحت جین فریمین کہتی ہیں کہ ’این ایچ ایس سکاٹ لینڈ سوشل کیئر کے اپنے ساتھیوں سے مل کر خزاں اور موسم سرما کے لیے منصوبہ بندی کر رہی ہے۔
’ہمارے بورڈز کو مشورہ دیا گیا ہے کہ کووڈ۔19 کے کیسز میں اضافے سے نمٹنے کے لیے صلاحیت موجود ہونی چاہیئے، بستروں اور انتہائی نگہداشت کے یونٹوں کی شکل میں۔‘
دریں اثنا کمبریا کاؤنٹی کونسل نے بھی کہا ہے کہ وہ دوسری لہر سے نمٹنے کے منصوبے پر کیئر کے شعبے اور این ایچ ایس کے ساتھ مل کر کام کر رہی ہے۔
کونسل کے ڈائریکٹر آف پبلک ہیلتھ کولن کوکس نے کہا ہے کہ دوسری لہر کے خطرے نے انھیں واقعی پریشان کیا ہوا ہے۔
انھوں نے کہا کہ ’یہ بہت ضروری ہے کہ اگر دوسری لہر نظر آئے تو ہم اس کے لیے تیار ہوں۔‘
انگلینڈ میں دوکانوں کے اندر چہرہ ڈھانپنے کے متعلق نئے قوانین پر سوشل میڈیا پر گرما گرم بحث ہو رہی ہے۔
لوگ ایک دوسرے کی حوصلہ افزائی بھی کر رہے ہیں کہ وہ ماسک پہنیں، لیکن اس کے ساتھ ساتھ نئے قوانین کی مخالفت میں بھی کافی آوازیں آ رہی ہیں اور #NoMasks اور #muzzles برطانیہ میں ٹوئٹر پر ٹرینڈ کر رہے ہیں۔
ہم نے ایسے گمراہ کن دعوؤں پر نظر ڈالی ہے جن میں کہا گیا ہے کہ ماسک پہننا اصل میں پہننے والے کے لیے خطرناک ہے۔
سوشل میڈیا پر ایسی میمز گردش کر رہی ہیں جن میں دعویٰ کیا گیا ہے کہ ماسک پہننے سے آپ کو کم آکسیجن ملتی ہے یا اس سے آپ کے جسم کو بہت زیادہ کاربن ڈائی آکسائیڈ پہنچتی ہے۔ ایسی کوئی شہادت نہیں ہے کہ ایسا ہو گا۔
تجویز کردہ ماسک کو اگر مناسب طریقے سے پہنا جائے تو آپ کو کوئی نقصان نہیں پہنچے گا۔ عالمی ادارۂ صحت کے مطابق میڈیکل ماسک کے زیادہ لمبے عرصے تک استعمال سے کاربن ڈائی آکسائیڈ کا نشہ یا آکسیجن کی کمی نہیں ہوتی۔
ڈائریکٹوریٹ آف ہیلتھ سروسز ایم سی آئی اسلام آباد نے عوام کی سہولت کو مدِنظر رکھتے ہوئے اپنے تمام میڈیکل سینٹرز پر حفاظتی ٹیکوں کی سروس کا دوبارہ سے آغاز کر دیا ہے۔
یاد رہے کہ یہ سروس COVID-19 کی وبا کے پیشِ نظر کچھ عرصے کیلئے عارضی طور پر بند کر دی گئی تھی۔
ادارے کی جانب سے جاری نوٹیفکیشن میں بتایا گیا ہے کہ اس کے ساتھ ساتھ عوام کی سہولت کی خاطر اپنے تمام حفاظتی ٹیکوں کے مراکز پر فری COVID-19 سیمپلنگ کی اضافی سہولت بھی مہیا کر دی گئی ہے۔
تاہم بغیر ماسک کے ان طبّی سینٹر میں داخلہ ممنوع ہے۔
آل پاکستان پرائیویٹ سکولز فیڈریشن نےتعلیمی ادارے14ستمبر تک بند رکھنے کے فیصلے و مسترد کر کے سکولز و تعلیمی ادارے فوری کھولے جانے کا مطالبہ کیا ہے۔
منگل کو آل پاکستان پرائیویٹ سکولز فیڈریشن کے ملک بھر سے200 سے زائد رجسٹرڈ پرائیویٹ سکولز ایسوسی ایشنز، مدارس، فنی تعلیمی اداروں و اکیڈمیز نے کاشف مرزا کی قیادت میں مشترکہ اعلامیہ جاری کیا گیا ہے۔
ان کا مطالبہ ہے کہ حکومت سکولز 3 اگست یا 15 اگست سے کھولے بصورت دیگر اتحادی تنظیموں کی مشاورت سے خود کھولنے کا اعلان کریں گے۔
بتایا گیا ہے کہ ملک بھر کے ادارے تعلیمی آئینی حقوق کے جائز مطالبات کے لیے پر امن احتجاج کا اعلان اورلائحہ عمل کے لیے CEC میٹینگ میں حتمی منظوری دی گئی۔
بیان میں کہا گیا ہے کہ مدارس کے ملک بھر میں کامیاب تجربہ میں 2 ہزار 166 امتحانی مراکز قائم کیے گئے ہیں۔ جن میں14 ہزار 809 افراد پر مشتمل نگران عملہ خدمات سرانجام دے رہا ہے جبکہ امتحانات میں 3 لاکھ 15 ہزار 889 طلبہ و طالبات مڈل تاعالمیہ یعنی ایم اے تک شرکت کررہےہیں۔
حکام سے آل پاکستان پرائیویٹ سکولز فیڈریشن نے 10 نکات پر مبنی اپیل کی ہے جس میں کچھ الزامات اور دعوے بھی کئے گئے ہیں۔
اس کی تفصیل کچھ یوں ہے۔
کووڈ۔19 کی کئی دوسری کہانیوں کی طرح یہ بھی خشک کھانسی سے شروع ہوئی۔
اس کے بعد مارچ کے اوائل میں سنجھے بھارت کو بخار ہوا، منہ کا ذائقہ جاتا رہا اور چھاتی میں درد شروع ہو گیا۔
بھارت جو جنوبی فلوریڈا کے ایک ہسپتال میں نرس ہیں، کہتے ہیں کہ انھیں وائرس ایک مریض سے ان دنوں لگا جب ہسپتال میں داخلے کے لیے کووڈ۔19 کی سکریننگ کا طریقہ اتنا سخت نہیں تھا۔ دو دن کے بعد انھیں کہا گیا کہ خود ساختہ تنہائی اختیار کر لیں۔
34 سال بھارت اس گروہ میں تو نہیں آتے جو وائرس سے غیر محفوظ ہے۔ لیکن پہلے رابطے کے 14 دن بعد ان کی کھانسی میں خون آیا اور وہ ہسپتال داخل ہو گئے۔
دو دن کے بعد ان کے گلے میں نالی لگ چکی تھی۔
گذشتہ ہفتے سے روزانہ کی بنیادوں پر فلوریڈا میں اوسطً 10 ہزار کے قریب نئے متاثرین رپورٹ ہو رہے ہیں۔ 12 جولائی کو ریاست نے 15 ہزار 300 متاثرین کے ساتھ انفیکشنز کا قومی ریکارڈ توڑا۔
ٹیکساس اور ایریزونا کے ساتھ، سن سائن سٹیٹ بھی تیزی سے ملک کی ان ریاستوں میں شامل ہو گئی ہے جہاں کووڈ۔19 کی انفیکشنز میں تیزی سے اضافہ ہو رہا ہے۔
جیسے ہی متاثرین میں اضافہ ہونا شروع ہوا، ریاست کے گورنر ڈی سینٹیز نے جون میں بارز کھولنے کا فیصلہ واپس لے لیا۔ لیکن انھوں نے ریاست میں ماسک پہننے کی پابندی نہیں لگائی، اگرچہ میامی جیسی جگہوں پر مقامی رہنماؤں نے ایسا کیا۔ گورنر نے صدر ٹرمپ کی تقلید کرتے ہوئے معیشت کے کھلنے کی اہمیت پر زور دیا۔