آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
دنیا بھر میں کورونا کے مصدقہ مریضوں کی تعداد 32 لاکھ جبکہ اموات کی تعداد دو لاکھ 30 ہزار سے بڑھ گئی ہے۔ برطانیہ کے وزیر اعظم بورس جانسن کا کہنا ہے کہ برطانیہ ’وبا کے عروج سے گزر چکا ہے‘۔
جیسے جیسے کورونا وائرس کی وبا پھیل رہی ہے، ہمارا سرفیسز یعنی کسی بھی چیز کی سطح جیسے کہ ٹیبل یا دروازے کا خوف بڑھتا جا رہا ہے۔
اب عوامی مقامات پر بہت سے مناظر عام ہو گئے ہیں جیسے کہ لوگوں کا دروازے اپنی کہنیوں سے کھولنے کی کوشش کرنا، ٹرین کا سفر کرتے ہوئے کسی ہینڈل کو نہ پکڑنا، دفاتر میں ہر روز ملازمین کا اپنی میزوں کو صاف کرنا۔
نورین شمس صحافی ہیں اور ان دنوں امریکہ کی ریاست ایریزونا کے شہر فینیکس میں ہیں۔ وہاں لاک ڈاؤن کی کیا صورتحال ہے۔
وہ بتا رہی ہیں اس وی لاگ میں۔
کورونا وائرس کی عالمی وبا کے باعث کھیلوں کے براہ راست مقابلے تو تقریباً ناپید ہیں لیکن خبروں کا سلسلہ اب بھی جاری ہے۔
یورپی ملک سپین نے اعلان کیا ہے کہ وہ چار مرحلوں میں کورونا وائرس کے پھیلاؤ کو روکنے کے لیے کیے جانے والے لاک ڈاؤن کو ہٹا دے گا اور جون کے آخر تک وہاں زندگی ’معمول‘ پر آ جائے گی۔
سپین کے وزیرِ اعظم پیڈرو سانچیز کا کہنا ہے کہ ملک کے مختلف خطوں میں وائرس کے پھیلاؤ کی مناسبت سے پابندیاں مختلف انداز میں ختم کی جائیں گی۔
سپین کے چار جزیروں پر لاک ڈاؤن میں نرمی کا آغاز چار مئی سے ہو گا جس کے بعد ملک کے دیگر حصوں میں بھی ایسا ہی جائے گا۔
اب تک ملک میں کورونا وائرس سے تقریباً 24000 افراد ہلاک ہو چکے ہیں۔
ملک میں 14 مارچ کے بعد سے دنیا کی سب سے سخت پابدیاں لگائی گئی تھیں تاکہ لوگوں کو گھروں تک محدود کیا جا سکے۔ ان پابندیوں میں بچوں کے گھروں سے نکلنے پر چھ ہفتوں کی پابندی عائد کی گئی تھی۔
یہ اس بات کی نشاندہی ہے کہ سپین میں وائرس کا پھیلاؤ کم ہو رہا ہے تاہم منگل کے روز سپین کے محکمہ صحت کے مطابق ملک میں 301 اموات سامنے آئیں جو کہ گذشتہ ماہ کے اوائل میں 950 بھی ہوا کرتی تھیں۔
نئے مریضوں کی تعداد 1308 تپی جو کہ 14 مارچ کے بعد سے سب سے کم ہے۔
امریکی صدر ڈانلڈ ٹرمپ نے یہ دعویٰ کیا ہے ہے کہ امریکہ میں ٹیسٹنگ دنیا کے کسی بھی ملک سے زیادہ اور بہتر ہو رہی ہے۔
امریکہ میں ٹیسٹنگ کے تازہ ترین اعداد و شمار کے مطابق اب تک ملک میں 5593495 ٹیسٹ کیے جا چکے ہیں جو یقیناً مجموعی طور کسی بھی ملک سے زیادہ ہیں۔
تاہم امریکہ میں آبادی بھی دوسرے ممالک سے کہیں زیادہ ہے اس لیے آبادی کے تناسب کے اعتبار سے امریکہ میں اب بھی دیگر ممالک سے کم ٹیسٹ کیے جا رہے ہیں۔
اس حوالے سے یہ بات بھی اہم ہے کہ ٹیسٹنگ کے اعدادو شمار کا درست موازنہ کرنا بھی مشکل ہے۔ کچھ ممالک ٹیسٹ کیے گئے افراد کو گنتے ہیں جبکہ کچھ ٹیسٹوں کی تعداد یعنی کچھ افراد کو ایک سے زیادہ مرتبہ بھی ٹیسٹ کیا جا سکتا ہے۔
تازہ ترین اعداد و شمار کے مطابق امریکہ نے ہر 60 میں سے ایک فرد کا ٹیسٹ کیا جبکہ اٹلی میں یہ تعداد ہر 35 میں سے ایک فرد کی ہے۔ سپین میں ہر 45 افراد میں سے ایک جبکہ آسٹریلیا میں پچاس۔
کورونا کے خلاف جاری جنگ میں سماجی دوری اور سیلف آئسولیشن واحد ہتھیار ہیں جنھیں نافذ کرنے کے لیے دنیا کے اکثر ملکوں میں لاک ڈاؤن کیا جا رہا ہے۔ لیکن لاک ڈاؤن ہماری ذہنی صحت پر کس طرح اثر انداز ہو سکتا ہے اور اس سے پیدا ہونے والے نفسیاتی مسائل سے کیسے نمٹا جائے۔
جانیے ماہرِ نفسیات عطیہ نقوی سے ہمارے ساتھی کریم الاسلام کی اس ڈیجیٹل ویڈیو میں۔
امریکی نائب صدر مائیک پینس نے منگل کے روز بین الاقوانمی شہرت یافتہ میو کلینک کا دورہ کیا لیکن وہاں موجود تمام افراد کے برعکس انھوں نے ماسک نہیں پہنا۔
تمام مریضوں، عملے اور ہسپتال آنے والوں کو ماسک پہننا لازم ہوتا ہے اور ایسا میو کلینک کی ویب سائٹ پر بھی درج ہے۔
نائب صدر کی ماسک کے بغیر فوٹیج کے سامنے آنے کے کچھ ہی دیر بعد میو کلینک نے ایک ٹویٹ میں کہا کہ مائیک پینس کو اس حوالے سے پہلے سے مطلع کر دیا گیا تھا تاہم اس ٹویٹ کو بعد میں ڈیلیٹ کر دیا گیا۔
بی بی سی کے شراکت دار ادارے سی بی ایس نے کلینک سے اس حوالے سے سوالات کیے ہیں تاہم تاحال جواب سامنے نہیں آیا۔
تین آسٹریلوی کوالا ہوں یا ایک مائیکل جورڈن یا پھر نصف واکس ویگن بیٹل، یہ وہ فاصلہ ہے جتنا آپ کو کسی بھی فرد سے کورونا کی وبا کے دوران سماجی دوری اختیار کرتے ہوئے رہنا چاہیے۔
اگر بات اب بھی سمجھ نہیں آئی تو یہ ویڈیو دیکھ کر سمجھ لیں۔
آج امریکہ میں کورونا وائرس سے متاثرہ افراد کی تعداد دس لاکھ سے تجاوز کر گئی ہے اور اس حوالے سے جب صدر ڈانلڈ ٹرمپ سے پوچھا گیا کہ انھوں نے فروری میں ایک بیان میں کہا تھا کہ اس وقت جو 15 مصدقہ متاثرین ہیں وہ چلد صفر کے قریب چلے جائیں گے تو انھوں نے کہا کہ یہ آخر کار صفر تک چلے جائیں گے۔
منگل کے روز میڈیا بریفنگ کےدوران انھوں نے کہا کہ ’آپ کو سمجھنے کی ضرورت ہے کہ جب آپ کیسز کی بات کرتے ہیں تو ہم کسی بھی ملک سے زیادہ ٹیسٹنگ بھی کرتے ہیں۔‘
ان کا مزید کہنا تھا کہ ’ہم کسی بھی ملک سے زیادہ ٹیسٹ کر رہے ہیں، بہت زیادہ، کسی بھی ملک سے دو گنا زیادہ۔ اور ایک وقت آئے گا کہ متاثرین کی تعداد صفر ہو جائے گی۔‘
برطانوی بحریہ رائل نیوی نے اپنی ایک آبدوز کے کپتان کو اپنے ماتحت افراد کو لاک ڈاؤن کے دوران پارٹی کرنے کی اجازت دینے پر ملازمت سے ہٹا دیا ہے۔
کمانڈر جان لیوئس جوہری آبدوز ایچ ایم ایس ٹرینچینٹ کے کپتان تھے اور انھوں نے پلائی ماؤتھ کی ڈیونپورٹ پر اس پارٹی کی اجازت دی تھی۔
یہ اقدام سوشل میڈیا پر شیئر کی جانے والی ایک ویڈیو کے بعد اٹھایا گیا جس میں آبدوز میں موجود افراد واپسی پر ناچ رہے ہیں اور قہقہے لگا رہے ہیں۔
کپتان کو اس عہدے سے برخواست کر دیا گیا ہے تاہم وہ رائل نیوی کا حصہ رہیں گے۔
کورونا وائرس کی عالمی وبا کے دوران گذشتہ ماہ چین کے سب سے رئیس شخص نے ٹوئٹر پر اپنا اکاوٴنٹ کھولا۔ تب سے لے کر اب تک ان کی ہر پوسٹ چین اور دنیا کے ہر ملک میں کورونا وائرس کے متاثرین کے لیے طبی امداد کے بارے میں ہے۔
جیک ما نے اپنے ایک ٹویٹ میں لکھا ’ایک دنیا، ایک جنگ!’ تو وہیں دوسرے میں وہ لکھتے ہیں ’ہم ساتھ مل کر اسے ممکن بنا سکتے ہیں۔‘
امریکی بحریہ اور فضائیہ کے طیاروں نے آج نیویارک نیو جرسی اور پینسلوینیا کی ریاستوں کے فضاؤں میں پرواز کی اور طبی، نیم طبی عملے اور کورونا وائرس کی عالمی وبا سے لڑنے والے دیگر ملازمین کو خراج تحسین پیش کیا۔
کرونا وائرس کی وبا کے باعث کینیڈا کی مساجد میں نماز کے اجتماع پر پابندی ہے۔ مقامی حکومت نے کینیڈا کے شہروں ٹورنٹو، سکاربورو اور مارکھم کی مساجد میں صرف دوران رمضان اذان مغرب بذریعہ لاوڈ سپیکر دینے کی اجازت دی ہے۔ایسا کینیڈا کی تاریخ میں پہلی مرتبہ ہوا ہے۔
ان مساجد کے چاروں طرف لاوڈ سپیکر لگائے گئے ہیں جس سے اذان کی آواز دور دور تک سنی جا سکتی ہے۔
دیکھتے ہیں کینیڈا سے محسن عباس کی یہ رپورٹG
فرانس مییں 11 مئی سے دکانیں کھولنے کا فیصلہ کیا گیا ہے اور پرتگال آئندہ سنیچر کو ملک میں ہنگامی صورتحال ختم کر دے گا۔ یورپ کی دیگر اہم خبریں:
امریکی ریاست نیوریاک کے گورنر اینڈریو کومو نے کورونا کی وبا ے متعلق بروقت خبردار نہ کیے جانے پر امریکی میڈیا، امریکی ماہرین کے ساتھ ساتھ بین الاقوامی طبی برداری کو بھی آڑھے ہاتھوں لیا ہے۔
کومو کا کہنا تھا ’گورنرز کا کام عالمی وبا سے لڑنا نہیں ہے۔‘
’ماہرین کہاں تھے؟ نیوریاک ٹائمز کہاں تھا؟ وال سٹریٹ جرنل کہاں تھا؟ یہ خبردار کرنے والے کہاں تھے جنھیں کہنا چاہیے تھا کہ احتیاط کریں چین میں وائرس ہے جو امریکہ میں بھی آسکتا ہے۔‘
ان کا کہنا تھا ’یہ ریاستوں کی ذمہ داری نہیں ہے۔‘
امریکی اخباروں اور نیوز سائٹس نے بہت پہلے جنوری میں ڈبلیو ایچ او کے حوالے سے مقالے تحریر کیے تھے جن میں کورونا وائرس اور عالمی طبی ہنگامی حالت کے بارے میں بتایا گیا تھا۔
ان کا یہ بیان ایسے میں آیا ہے جو نیویارک کے رہنماؤں پر وائرس کے حوالےسےردعمل میں تاخیر پر تبصروں میں اضافہ ہوا ہے۔
امریکی ریاست نیوریاک کے گورنر اینڈریو کوؤمو نے کہا ہے کہ ریاست کے کچھ علاقوں میں لاک ڈاؤن 15 مئی تک نرم کر دیا جائے گا بشرطیکہ وہاں کچھ ضروری اہداف حاصل ہوں جن میں 14 دن کے دوران وائرس کے نئے کیسز میں کمی شامل ہے۔
گورنر کا کہنا تھا کہ ایسے مقامات پر لاک ڈاؤن ختم نہیں ہوگا جہاں ہسپتالوں میں 70 فیصد کورونا کے مریض ہیں یا وہاں منتقلی کی شرح 1.1 ہے۔ سب سے زیادہ متاثر ہونے والے شہر نیویارک سٹی کے بارے میں ان کا کہنا تھا کہ کہ شہر اپنی نہیں کھلے گا ’بصورت دیگر کوئی معجزہ ہوجائے‘۔
مصنوعات سازی اور تعمیراتی کام پہلے شروع ہوں گے۔ اگر وہ احتیاطی تدابیر اپناتے ہیں تو ہے ایسا کر سکتے ہیں۔
گذشتہ 24 گھنٹوں کے دوران 335 افراد نیویارک میں ہلاک ہوئے۔
گورنر کومو کا کہنا تھا کہ ’میں ہر روز یہ سوچتا ہوں یہ برا خواب شاید آج ختم ہو جائے گا لیکن ایسا نہیں ہوتا۔‘
جان ہاپکنز یونیورٹی کے مرتب کردہ اعداد و شمار کے مطابق امریکہ میں کورونا وائرس کے متاثرین کی تعداد دس لاکھ سے تجاوز کر گئی ہے۔
اس سے پہلے مارچ میں امریکہ سب سے زیادہ کورونا کے کیسز کے ساتھ چین سے بھی آگے نکل گیا تھا جہاں سے یہ وائرس شروع ہوا تھا۔
امریکہ میں ہلاکتوں کی تعداد 56749 تک پہنچ چکی ہے۔ یہ تعداد بھی دنیا میں سب سے زیادہ ہے
دنیا بھر سے کورونا وائرس سے متعلق تازہ ترین خبریں آپ بی بی سی اردو کے اس لائیو پیج پر ملاحظہ کر سکتے ہیں۔
منگل کو دنیا میں کیا کچھ ہوا، جاننے کے لیے یہاں کلک کریں