ریاست نیویارک کے گورنر اینڈریو کیومو نے اپنی نیوز کانفرنس میں بتایا ہے کہ ان کی ریاست میں اب بھی حفاظتی سامان اور وینٹیلیٹرز کی کمی ہے۔ انھوں نے کہا کہ اگر شرح یہی رہی تو ان کے پاس صرف چھ دن کا ہی سامان باقی بچا ہے۔
انھوں نے کہا، ‘ہمارے پاس مزید سامان نہیں ہے۔ بس۔’
انھور نے جمعے کو اعلان کیا کہ وہ انتظامی حکمنامے پر دستخط کریں گے جس کے ذریعے ریاست کسی بھی ادارے سے وینٹیلیٹر اور دیگر سامان لے کر انھیں ریاست کے کسی ایسے حصے میں بھیج سکتی ہے جہاں ان کی زیادہ ضرورت ہو۔
اداروں کو یا تو ان کے وینٹیلیٹر واپس کر دیے جائیں گے یا انھیں اس کی قیمت ادا کر دی جائے گی۔ سامان کے حصول اور تقسیم کے لیے نیشنل گارڈ کو تعینات کیا جائے گا۔
انھوں نے کہا: ‘میں ایسی پوزیشن میں نہیں رہوں گا کہ جہاں ہزاروں لوگ ہلاک ہو رہے ہوں اور ہمارے پاس سینکڑوں وینٹیلیٹر کسی دوسری جگہ پڑے ہوں۔’
-
گورنر کیومو نے ایک مرتبہ پھر کووِڈ-19 سے نمٹنے کے لیے قومی حکمتِ عملے پر زور دیا اور کہا کہ ایسے وقت میں جب بحران پورے ملک کو اپنی لپیٹ میں لے رہا ہے، تو ریاستوں کو ایک دوسرے کی مدد کرنی چاہیے
-
انھوں نے کہا کہ جب نیو یارک مشکل حالات سے نکل آئے گا تو یہ اپنے آلات اور عملے کو مدد کی طلبگار برادریوں کے لیے استعمال کرے گا
-
کیومو نے کہا کہ وہ وزیرِ دفاع سے امریکی بحریہ کے بحری ہسپتال یو ایس این ایس کمفرٹ کے بارے میں بات کریں گے جس پر اب تک نیویارک شہر کے ہسپتالوں سے صرف 20 مریضوں کو اپنے پاس منتقل کرنے پر تنقید کی جا رہی ہے
-
کیومو نے کہا کہ بحریہ کا کہنا ہے کہ جہاز کو کووِڈ-19 سے پاک کرنا ان کے لیے بہت مشکل ہوگا
