کورونا وائرس: ایرانی پارلیمان کے سپیکر علی لاریجانی میں وائرس کی تصدیق

لائیو کوریج

1. 2 اپريل 2020سعودی عرب: ’مکہ اور مدینہ میں 24 گھنٹوں کا کرفیو‘

   اطلاعات کے مطابق سعودی عرب کے شہروں مکہ اور مدینہ میں 24 گھنٹوں کے کرفیو کا اعلان کیا گیا ہے۔

   سرکاری نیوز ایجنسی ایس پی اے نے ایک سکیورٹی اہلکار کے حوالے سے بتایا ہے کہ یہ کرفیو 2 اپریل کو نافذ کیا جائے گا اور ’آئندہ احکامات تک نافذ رہے گا‘۔

   ذرائع کے مطابق مکہ اور مدینہ سے نہ کسی کو جانے اور نہ شہروں میں کسی کو آنے کی اجازت ہوگی اور صرف مخصوص حالات میں اس سے استثنیٰ حاصل ہوگی۔

   ایجنسی کے مطابق ان دونوں شہروں کے رہائشیوں کو فی الحال صرف گھر کی ضروری اشیا اور طبی سامان کے لیے باہر نکلنے کی اجازت ہے اور وہ بھی مقامی وقت کے مطابق صرف صبح 6 سے دوپہر 3 بجے کے درمیان۔

   خبررساں ایجنسی روئٹرز کے مطابق ریاض، مکہ، مدینہ اور جدہ میں آنے اور وہاں سے جانے پر سخت پابندیاں عائد ہیں۔ مکہ اور مدینہ میں بعض علاقے مکمل لاک ڈاؤن میں تھے لیکن ان دونوں شہروں کے بعض حصوں اب سے پہلے میں دوپہر 3 سے صبح 6 بجے تک کا کرفیو نافذ کیا جا رہا تھا۔

2. 2 اپريل 2020امریکہ کی تازہ ترین صورتحال کیا ہے؟

   

   ،تصویر کا ذریعہGetty Images

   امریکہ میں کورونا وائرس سے اموات کی تعداد 5000 سے تجاوز کر گئی ہے، جبکہ 24 گھنٹوں کے دوران ریکارڈ 884 افراد ہلاک ہوئے ہیں۔

   اطلاعات کے مطابق وفاقی حکومت کے پاس موجود طبی حفاظتی سامان تقریباً ختم ہوچکا ہے۔ مگر ٹرمپ انتظامیہ کا کہنا ہے کہ وہ فوری طور پر کافی سامان درآمد کر سکتی ہے اور اس کام کے لیے اس کے پاس 16 ارب ڈالر موجود ہیں۔

   بیروزگاری کے دعوے ریکارڈ 66 لاکھ تک پہنچ گئے ہیں۔ گذشتہ ہفتے ان دعووں کی تعداد 33 لاکھ تھی۔

   امریکہ کی وفاقی جیلوں میں قید ایک لاکھ 70 ہزار قیدیوں کو اپنے اپنے سیلوں اور وارڈز میں دو ہفتے کے لیے بند کر دیا گیا ہے تاکہ وائرس کو پھیلنے سے روکا جا سکے۔ درجنوں قیدیوں اور کم از کم 37 گارڈز میں کورونا وائرس کی تشخیص ہوچکی ہے۔

   نیویارک کے گورنر اینڈریو کیومو نے لوگوں پر زور دیا ہے کہ وہ سماجی دوری کے قواعد کی پاسداری کریں، اور کہا کہ پولیس ان کے نفاذ میں ‘مزید جارحانہ’ ہوگی۔ انھوں نے کھیل کے میدانوں اور باسکٹ بال کورٹس کو بند کر دیا ہے اور شہر میں 45 موبائل مردہ خانے قائم کر دیے ہیں۔

   ریاست کنیکٹیکٹ کے گورنر نے کورونا وائرس سے چھ ہفتے کے ایک شیرخوار بچے کی ہلاکت کا اعلان کیا ہے۔ خیال کیا جا رہا ہے کہ یہ سب سے کم عمر فرد ہے۔

3. 2 اپريل 2020کورونا وائرس: لاک ڈاؤن کے بعد ٹھیلے پر دلی سے اپنے گاؤں 10 دن میں

4. 2 اپريل 2020کیا روس نے امریکہ کو حفاظتی سامان عطیہ کیا؟

   

   ،تصویر کا ذریعہGetty Images

   امریکہ کی جانب سے کورونا وائرس سے نمٹنے کے لیے روس سے حفاظتی سامان طلب کیا گیا ہے مگر یہ واضح نہیں ہے کہ یہ سامان ’تحفتاً‘ دیا گیا یا خریدا گیا ہے۔

   امریکی وزیرِ خارجہ مائیک پومپیو نے ٹویٹ کیا ہے کہ ان کے ملک نے نیویارک شہر میں صورتحال سے نمٹنے کے لیے ’فوری ضرورت کا ذاتی حفاظتی سامان خریدا ہے۔‘

   مگر روسی وزارتِ خارجہ نے کہا ہے کہ امریکہ نے نصف سامان کی ادائیگی کی جبکہ نصف سامان روس کی جانب سے عطیہ کیا گیا ہے۔

   روسی وزارتِ دفاع کے ٹی وی چینل پر طبی ماسکس اور ’خصوصی طبی سامان‘ کو طیارے میں لوڈ کیے جانے کے مناظر نشر کیے گئے اور کہا گیا کہ ‘امریکہ میں ان کی قلت ہے۔’

5. 2 اپريل 2020امریکہ: ریکارڈ 66 لاکھ افراد نے بیروزگاری کا دعویٰ کر دیا

   اب سے کچھ دیر قبل ہم نے آپ کو آگاہ کیا تھا کہ امریکہ میں بیروزگاری کے لیے الاؤنس کی درخواستیں ملکی تاریخ کی بلند ترین سطح پر پہنچ گئی ہیں۔

   تفصیلات کے مطابق بیروزگاری کے دوران حکومتی امداد کے حصول کے لیے درخواست دینے والے امریکیوں کی تعداد تقریباً 66 لاکھ 50 ہزار تک پہنچ گئی ہے۔

   کورونا وائرس کی وجہ سے امریکی معیشت شدید دباؤ کا شکار ہے۔

   خیال کیا جا رہا ہے کہ اصل تعداد اس سے کہیں زیادہ ہے کیونکہ کئی لوگوں نے آن لائن درخواست پُر کرنے میں دشواریوں کا تذکرہ کیا ہے۔

   یہ بات بھی قابلِ غور ہے کہ کچھ اقسام کی ملازمتیں بشمول جُز وقتی کام کرنے والے افراد اس امداد کے حصول کے اہل نہیں ہیں۔

   تازہ ترین اعداد و شمار گذشتہ ہفتے کے ریکارڈ 33 لاکھ سے کہیں زیادہ ہیں۔

   حالیہ امریکی تاریخ میں اس افراتفری کی مثال نہیں ملتی اور کئی ریاستوں کے دفاتر دعووں میں اضافے کی وجہ سے کام کی زیادتی کا شکار ہیں۔

   امریکہ میں گاڑیاں بنانے والی کمپنیوں نے اپنی پیداوار روک دی ہے اور فضائی سفر میں ڈرامائی کمی واقع ہوئی ہے۔ اقتصادی ماہرین کے مطابق کام کرنے والے امریکیوں کا 20 فیصد لاک ڈاؤن میں ہے۔

   

6. 2 اپريل 2020بریکنگ, برطانیہ میں اموات کی تعداد 2921 ہوگئی

   برطانیہ میں کورونا وائرس سے ہونے والی اموات کی تعداد 2921 ہو گئی ہے۔

   محمکہ صحت اور سوشل کیئر کے مطابق یہ تعداد یکم اپریل کو 1700 جی ایم ٹی تک کی ہے۔

   اس بات کی بھی تصدیق کی گئی ہے کہ دو اپریل صبح 9 جی ایم ٹی تک 163,194 لوگوں کے ٹیسٹ کیے جا چکے ہیں جن میں سے 33718 کے نتائج مثبت آئے ہیں۔

7. 2 اپريل 2020بریکنگ, امریکہ: بیروزگاری الاؤنس کی درخواستوں میں ریکارڈ اضافہ

   امریکہ میں سرکاری اعداد و شمار کے مطابق گذشتہ ہفتے تک 66 لاکھ سے زیاہ افراد نے بیروزگاری کی وجہ سے الاؤنس کے لیے درخواستیں دی ہیں۔

   اس سے گذشتہ ہفتے یہ تعداد 33 لاکھ تھی۔

   اس سے بھی پہلے امریکہ میں ایسا 1982 میں ہوا تھا جب یہ تعداد 6 لاکھ 95 ہزار تھی۔

   ایسا اس لیے ہو رہا ہے کیوں کہ مختلف امریکی ریاستوں میں ریستوران، بازار، سنیما، ہوٹل اور جم بند ہیں۔

8. 2 اپريل 2020چین میں سخت پابندیوں سے غیر ملکی شہریوں میں تناؤ, کیری ایلن، بی بی سی مانیٹرنگ

   

   ،تصویر کا ذریعہGetty Images

   حالیہ دنوں میں چینی باشندوں اور وہاں مقیم غیر ملکی شہریوں کے درمیان کووِڈ-19 کے حوالے سے چینی حکومت کے کڑے اقدامات کی وجہ سے تناؤ پیدا ہو رہا ہے۔

   جمعرات کو چین کے مشرقی شہر چنگ ڈاؤ میں ایک ویڈیو وائرل ہوئی ہے جس میں تین غیر ملکی شہریوں کو ایک ہسپتال میں ٹیسٹ کروانے کے لیے قطار توڑتے ہوئے دیکھا جا سکتا ہے۔

   ویڈیو میں دیکھا جا سکتا ہے کہ لوگ دروازے سے باہر تک قطار لگائے کھڑے ہیں اور کہہ رہے ہیں کہ وہ ’بہت دیر سے‘ انتظار کر رہے ہیں۔

   جب ایک چینی شخص ان قطار توڑنے والے غیر ملکیوں سے بحث کرتا ہے تو ان میں سے ایک بندہ چینی شخص کے ہسپتال کے کاغذات چھین کر فرش پر پھینک دیتا ہے۔

   جمعرات کو ان میں سے ایک شخص کا تحریری معافی نامہ وائرل ہوا ہے جس میں انھوں نے کہا ہے کہ ان کا رویہ ‘نامناسب’ تھا۔ لیکن چین کی مشہور سوشل میڈیا ویب سائٹ ویبو پر لوگوں نے اس وائرل ویڈیو پر کافی ناراضی کا اظہار کیا ہے۔

   کچھ لوگوں کی جانب سے انھیں ملک بدر کرنے کا مطالبہ بھی کیا گیا۔

9. 2 اپريل 2020انڈیا: کووڈ 19 کو ٹریک کرنے کے لیے نئی ایپ, اینڈیو کلیرنس، بی بی سی نیوز، دلی

   اس ایپ کا نام آروگیا سیتو ہے جس کا سنسکرت میں مطلب ہے صحت کی جانب ایک پل۔ یہ ایپ بلو توتھ اور لوکیشٹ ڈیٹا کے استعمال سے یہ بتائے گی کہ آیا صارف کسی ایسے شخص کے قریب گیا تھا جس میں اس وائرس کی تشخیص ہوئی ہے۔

   یہ ایپ تصدیق شدہ کیسز کے اعداد و شمار کو سکین کرتی ہے اور پتا لگاتی ہے کہ آیا صارف مثبت ٹیسٹ آنے والے کسی شخص کے چھ فٹ کے فاصلے میں گیا تھا یا نہیں۔

   یہ ایپ حکومت کے ساتھ بھی ڈیٹا شیئر کرتی ہے۔

   آپ کا نام یا نمبر پبلک نہیں کیا جائے گا لیکن یہ معلومات اکٹھی کی جائیں گی اور اس کے علاوہ آپ کی جنس، سفر کی معلومات اور یہ معلومات بھی حاصل کہ جائیں گی کہ آیا آپ تمباکو نوشی کرتے ہیں کہ نہیں۔

10. 2 اپريل 2020کورونا وائرس کے دوران روبوٹ ڈیوٹی پر

    

    ،تصویر کا ذریعہgetty

    مغربی جرمنی کے علاقے لِنڈلار میں ایڈکا نامی مارکیٹ میں ’پریپر‘ نامی روبوٹ کیش ڈیسک کے پاس کھڑا لوگوں کو احتیاطی تدابیر بتا رہا ہے اور آپس میں اتحاد کی تلقین کر رہا ہے۔

11. 2 اپريل 2020دنیا کی مصروف ترین جگہیں آج کل کیسی دکھائی دے رہی ہیں؟

    کورونا وائرس کی وجہ سے لاک ڈاؤن ہے اور دنیا کے مصروف ترین مقامات پر بھی آج کل ہُو کا عالم ہے اور اسی کی عکاسی خبر رساں ادارے روئٹرز کے فوٹوگرافرز نے کی ہے۔

    انھوں نے عین دوپہر کے وقت دنیا کی مختلف سڑکوں اور سٹیشنز کی تصاویر لیں جہاں عام طور پر ان اوقات میں تل دھرنے کو جگہ نہیں ہوتی۔

    تصاویر میں دیکھا جا سکتا ہے کہ کس طرح ٹرانسپورٹ اڈے اور کاوباری مراکز میں آج کل سناٹا چھایا ہوا ہے۔

    یہ تمام تصاویر 31 مارچ کو نصف النہار کے وقت لی گئیں اور ان میں کوئی نہ کوئی گھڑی ضرور موجود ہے جو وقت بتاتی ہے۔

    

    ،تصویر کا ذریعہANDREW KELLY / REUTERS

    

    ،تصویر کا ذریعہHANNIBAL HANSCHKE / REUTERS

    

    ،تصویر کا ذریعہALAA AL-MARJANI / REUTERS

    

    ،تصویر کا ذریعہTOBY MELVILLE / REUTERS

    

    ،تصویر کا ذریعہMOHAMED ABD EL GHANY / REUTERS

12. 2 اپريل 2020کن ممالک میں کووڈ 19 کے مصدقہ مریض نہیں

13. 2 اپريل 2020بریکنگ, بیلجیئم میں اموات 1000 سے زیادہ

    گذشتہ 24 گھنٹوں میں بیلجیئم میں وائرس سے 183 اموات ہوئی ہیں جس سے اموات کی کل تعداد 1011 ہوگئی ہے۔

    ملک کی آبادی 10 کروڑ 14 لاکھ ہے اور ایسے میں اسے اموات میں تیزی کے طور پر دیکھا جا رہا ہے۔

14. 2 اپريل 2020برطانیہ کی تازہ ترین صورتحال

    

    ،تصویر کا ذریعہGetty Images

    جانز ہاپکنز یونیورسٹی کے مطابق برطانیہ میں کورونا وائرس کے مصدقہ متاثرین کی تعداد 29,872 ہے جبکہ ملک میں 2,357 ہلاکتیں ہو چکی ہے۔ اب تک 179 متاثرین صحتیاب بھی ہو چکے ہیں۔

    برطانیہ میں تازہ ترین صورتحال کچھ اس طرح ہے:

    • برطانیہ میں صحت کے حکام کا کہنا ہے کہ ملک میں کورونا وائرس کی ٹیسٹنگ کا دائرہ وسیع کرنے پر ہونے والی سست پیش رفت کے باعث وہ ’مایوس‘ ہیں۔ برطانیہ میں روزانہ 25 ہزار ٹیسٹس کے ہدف کے مقابلے میں صرف 13 ہزار ٹیسٹ کیے جا رہے ہیں
    • اگرچہ وزیر اعظم بورس جانسن کو ملک میں ٹیسٹنگ کا دائرہ وسیع نہ ہونے پر شدید تنقید کا سامنا ہے مگر ان (وزیر اعظم) کا کہنا ہے کہ سکریننگ کو بڑھا کر ہی برطانیہ وائرس کو شکست دے سکتا ہے
    • کیمبرج میں واقع ایڈنبروک ہسپتال برطانیہ کا وہ پہلا ہسپتال بن گیا ہے جہاں مریضوں اور طبی عملے کی ٹیسٹنگ کے لیے تیز ترین ٹیسٹ کا طریقہ کار اپنایا گیا ہے۔ اس ٹیسٹ کو ’سامبا ٹو‘ کا نام دیا گیا ہے اور اس کے ذریعے ٹیسٹ کا نتیجہ صرف 90 منٹ میں موصول ہو جاتا ہے
    • برطانیہ میں معیشت کے نگراں ادارے کا کہنا ہے کہ قرض اور کریڈٹ کارڈ کی ادائیگیوں کو منجمد یا مؤخر کر دیا گیا ہے تاکہ وبا میں پھنسے افراد کی مدد کی جا سکے
    • اس بات کا اندیشہ ظاہر کیا جا رہا ہے کہ شاید برٹش ایئرویز اپنے 36 ہزار کے لگ بھگ عملے کو فضائی شعبے کو درپیش بحران کے پیشِ نظر معطل کر دے
    • کیمبرج شائر میں جیل میں ایک قیدی کورونا کے باعث ہلاک ہو گیا ہے۔ یہ ملک میں کورونا کے باعث تیسرے قیدی کی ہلاکت ہے

15. 2 اپريل 2020تھائی لینڈ میں کرفیو کا اعلان

    

    ،تصویر کا ذریعہJonathan Head

    تھائی لینڈ کے وزیر اعظم نے جمعے سے ملک میں کرفیو نافذ کرنے کا اعلان کیا ہے۔

    پرایوت چان اوچا کا کہنا ہے کہ کورونا وائرس کو پھیلنے سے روکنے کے لیے رات 10 بجے سے صبح 4 بجے تک کوئی شخص باہر نہیں نکلے گا۔

    ان احکامات کی خلاف ورزی کرنے والوں کو زیادہ دے زیادہ دو سال قید کی سزا ہو سکتی ہے۔

16. 2 اپريل 2020کورونا وائرس: ’یورپ کو ایک نئے مارشل پلان کی ضرورت ہے‘

    

    ،تصویر کا ذریعہGetty Images

    یورپی کمیشن کی صدر ارسلا وون ڈر لیئن نے کہا ہے کہ یورپ کو کورونا وائرس سے مچنے والی معاشی تباہی سے بچانے کے لیے یورپی یونین کا اگلا بجٹ ایک نئے ’مارشل پلان‘ کی مانند ہونا چاہیے۔

    ’مارشل پلان‘ وہ امدادی پروگرام تھا جس کے تحت یورپ میں دوسری عالمی جنگ کے بعد معاشی استحکام کو فروغ دینے کے لیے امریکہ نے یورپی ممالک کی مدد کی تھی۔

    ان کے مطابق اس بحران کا کوئی فوری حل نہیں تاہم یورپی یونین کے پاس اس صورتحال سے بچنے کا سب سے مناسب راستہ ایک موثر یورپی بجٹ ہی ہے۔

17. 2 اپريل 2020سپین میں بےروزگاری میں تیزی سے اضافہ، مزید نو لاکھ کی نوکری چلی گئی

    

    ،تصویر کا ذریعہEPA

    سپین یورپ میں کورونا وائرس سے دوسرا سب سے متاثرہ ملک ہے اور ملک میں اس کا پھیلاؤ روکنے کے لیے کیا جانے والا لاک ڈاؤن اب تک تقریباً نو لاکھ افراد کو بےروزگار کرنے کا سبب بن چکا ہے۔

    سپین میں مارچ کے وسط میں لاک ڈاؤن کا نفاذ کرتے ہوئے عوام کے گھروں سے باہر نکلنے پر پابندی عائد کر دی گئی تپی۔

    مارچ کے مہینے کے اعدادوشمار کے مطابق ملک میں بیروزگاری کی شرح ریکارڈ سطح پر پہنچ گئی ہے۔

18. 2 اپريل 2020چڑیا گھر میں جانوروں کو کھانا کھلانے کے مناظر

    

    ،تصویر کا ذریعہGetty Images

    یوں تو دنیا بھر میں کورونا وائرس کی وبا کے پیش نظر سیروتفریح کے زیادہ تر مقامات بند ہیں لیکن اس کے باوجود کئی مقامات پر کام کرنے والے ملازمین اپنے فرائض سر انجام دے رہے ہیں۔

    چڑیا گھروں میں کام کرنے والے ملازمین باقاعدگی سے جانوروں کو کھانا کھلانے کا کام ابھی بھی جاری رکھے ہوئے ہیں۔

    ترکی کے ایک چڑیا گھر کی ان تصاویر میں کچھ ایسے ہی مناظر سامنے آئے ہیں۔

    

    ،تصویر کا ذریعہGetty Images

    

    ،تصویر کا ذریعہGetty Images

19. 2 اپريل 2020بورس جانسن: ٹیسٹنگ ہی کورونا وائرس کی ’گتھی سلجھانے‘ کا حل ہے

    برطانیہ کے وزیراعظم بورس جانسن نے کہا ہے کہ ٹیسٹنگ ہی کورونا وائرس کی ’گتھی سلجھانے‘ کا حل ہے۔

    بورس جانسن انگلینڈ میں صحت عامہ کے پانچ لاکھ ملازمین میں سے صرف دو ہزار کی ٹیسٹنگ کا انکشاف ہونے کے بعد بات کر رہے تھے۔

    انھوں نے کہا کہ حکومت کو ٹیسٹنگ میں ’بڑے پیمانے پر آگے بڑھنے‘ کی ضرورت ہے تاکہ وہ ملازمین جو بلا ضرورت خود کو الگ کیے ہوئے ہیں، کام پر واپس آ سکیں۔

    برطانیہ میں اب تک کورونا وائرس سے 2352 افراد ہلاک ہو چکے ہیں۔

    بدھ کے روز ٹوئٹر پر اپنے ویڈیو پیغام میں انھوں نے کہا: ’میں ٹیسٹنگ کے بارے میں ایک خاص لفظ کہنا چاہتا ہوں کیونکہ یہ بہت اہم ہے اور جو کہ میں ہفتوں سے کہتا رہا ہوں کہ یہی ایک راستہ ہے۔‘

    ’اسی طرح ہم کورونا وائرس کی گتھی کو سلجھا سکیں گے۔ یہی طریقہ ہے جس سے ہم اسے شکست دیں گے۔‘

    X پوسٹ نظرانداز کریں

    X کا مواد دکھانے کی اجازت دی جائے؟?

    اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔

    Accept and continue

    تنبیہ: بی بی سی دیگر ویب سائٹس کے مواد کی ذمہ دار نہیں ہے۔

    X پوسٹ کا اختتام

20. 2 اپريل 2020سپین میں ہلاکتوں کی تعداد دس ہزار سے بڑھ گئی

    سپین کے وزیر صحت نے کہا ہے کہ ایک ہی دن میں ہونے والی 950 اموات کے بعد ملک میں ہلاکتوں کی تعداد بڑھ گئی ہے۔

    سپین میں اب ہلاکتوں کی تعداد 10003 ہو گئی ہے جو اٹلی کے بعد سب سے زیادہ ہے۔