آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
کرکٹ کے ٹی ٹوئنٹی ورلڈ کپ میں دن کے واحد اور اور ٹورنامنٹ کے 29ویں میچ میں گروپ ون کی سرفہرست ٹیم انگلینڈ نے 164 رنز کے دفاع میں سری لنکا کو 19 اوور میں 137 رنز پر آؤٹ کر دیا اور 26 رنز سے میچ جیت لیا۔ جوز بٹلر نے اپنے کرئیر کی پہلی ٹی ٹوئنٹی سنچری بنائی اور جیت میں مرکزی کردار ادا کیا۔
آج کے دن کے دونوں میچوں کی کوریج مکمل ہونے کے بعد اب یہ صفحہ مزید اپ ڈیٹ نہیں کیا جائے گا۔
ٹی ٹوئنٹی ورلڈ کپ کے حوالے سے بی بی سی اردو کی مزید کوریج، مضامین اور تجزیہ پڑھنے کے لیے قارئین ہمارے خصوصی سیکشن پر کلک کریں۔
اپنے پہلے چاروں میچ جیت کر انگلینڈ سیمی فائنل میں پہنچنے والی پہلی ٹیم بن گئی۔ ان کا نیٹ رن ریٹ بھی ٹورنامنٹ میں سب سے اچھا اور واضح طور پر یہ ورلڈ کپ جیتنے کی فیورٹ ٹیم ہیں۔
انگلینڈ کا آخری میچ چھ نومبر کو دوبارہ شارجہ میں ہوگا جہاں ان کا سامنا جنوبی افریقہ سے ہونا ہے۔
دوسری جانب منگل کے روز دو میچز کھیلے جائیں گے۔
دن کے پہلے میچ میں جنوبی افریقہ کا سامنا بنگلہ دیش سے ہوگا اور سیمی فائنل کا راستہ کھلا رکھنے کے لیے جنوبی افریقہ کو یہ میچ جیتنا ضروری ہوگا۔ وہ اس وقت گروپ میں دوسرے نمبر پر ہیں۔
سری لنکا کی شکست کے بعد بنگلہ دیش کی ٹیم بھی اب ٹورنامنٹ سے باہر ہو چکی ہے اور ان کے لیے ایک اور بڑا دھچکہ شکیب الحسن کی انجری تھا جو کہ ٹورنامنٹ نہیں کھیل سکتے۔
دن کا دوسرا میچ ابو ظہبی میں گروپ ٹو کا ہوگا جو پاکستان اور نمیبیا کے درمیان ہوگا۔
پاکستان ٹورنامنٹ کی دوسری ناقابل شکست ٹیم ہے اور اب تک انھوں نے اپنے تین میچوں میں انڈیا، نیوزی لینڈ اور افغنستان کو شکست دی ہے۔
نمیبیا نے اب تک دو میچ کھیلے ہیں اور سکاٹ لینڈ کے خلاف فتح حاصل کرنے کے بعد افغانستان کے ہاتھوں وہ ہار گئے۔
سری لنکا جنھوں نے ٹورنامنٹ کا آغاز جیت سے کیا تھا، اپنے اگلے تینوں میچ ہار کر اب سیمی فائنل کی دوڑ سے باہر ہو گیا ہے۔
ان کا آخری میچ ویسٹ انڈیز کے خلاف چار نومبر کو ابو ظہبی میں کھیلا جائے گا۔
انگلینڈ کی اننگز کے دس اوورز کے بعد کئی لوگوں کے ذہنوں میں سوال تھا کہ کیا سری لنکا اس میچ میں کوئی اپ سیٹ تو نہیں کر سکتا۔
لیکن اس کے بعد کھیلے گئے اگلے 29 اوورز میں اس بات کا واضح جواب مل گیا کہ انگلینڈ اس ورلڈ کپ کی نہ صرف اب تک کی ناقابل تسخیر ٹیم ہے، بلکہ سب سے مضبوط اور فیورٹ بھی۔
اور اس جواب دینے میں مرکزی کردار انگلینڈ کے جوز بٹلر کا تھا جنھوں نے گذشتہ میچ میں 72 رنز کے بعد اس بار 67 گیندوں پر ناقابل شکست 101 بنائے جو ٹی ٹوئنٹی انٹرنیشنل میں ان کی پہلی سنچری تھی۔
اس طرح وہ انگلینڈ کی جانب سے تینوں فارمیٹ میں سنچری بنانے والے پہلے مرد بن گئے ہیں۔
بیٹنگ میں ان کا ساتھ کپتان مورگن نے دیا جن کے ساتھ انھوں نے 112 رنز کی شراکت قائم کی۔
سری لنکا نے 164 رنز کے تعاقب میں رن ریٹ کو سات کے قریب یا اوپر رکھا لیکن اس میں وہ وکٹیں کھوتے چلے گئے۔
البتہ جب سپنر ہسارانگا اور کپتان شناکا نے شراکت جوڑنی شروع کی تو کچھ لمحے کے لیے انگلینڈ کے لیے سوچ بچار کا وقت آ گیا تھا۔
اور جب بھاری اوس کے ساتھ ساتھ ٹائمل ملز بھی انجرڈ ہو گئے تو سری لنکا کے حامیوں نے کسی معجزے کا سوچنا شروع کر دیا ہوگا۔
مگر یہ خواب حقیقت میں نہ بدل سکے اور آخر میں سری لنکا کی پانچ وکٹیں محض 14 گیندوں پر گر گئیں اور وہ میچ 26 رنز سے ہار گئے۔
معین علی اننگز کا 19واں اوور کرانے آئے جہاں انھوں نے دو وکٹیں حاصل کر لے میچ ختم کر دیا اور اپنی ٹیم کو جیت سے ہمکنار کرا دیا۔
انگلینڈ کے میچ کے ہیرو جوز بٹلر کی شاندار کرکاردگی کا سلسلہ جاری رہا اور کرس جارڈن کے اوور میں جب سری لنکا کے کپتان نے گیند پیچھے کھیل کر رن لینے کی کوشش کی تو جوز بٹلر نے انھیں برق رفتاری سے رن آؤٹ کر دیا۔
اس اوور میں جارڈن نے بدقسمتی سے ایک چوکا کھایا جب گیند بیٹس مین کے بلے کا باہری کنارہ لیتے ہوئے باؤنڈری پار کر گئی۔
لیکن اوور کی آخری گیند پر جارڈن نے ایک اور وکٹ لے لی جب عین باؤنڈری پر چمیرا ملن کے ہاتھوں کیچ ہو گئے۔
گو کہ میدان پر اوس بہت پڑ رہی ہے اور بولرز کو بار بار گیند سکھانی پڑ رہی ہے، انگلینڈ میچ میں آگے ہے۔
ونندو ہسارانگا نے اپنی ٹیم کی امیدوں کا چراغ جلائے رکھنے کی کوشش کی لیکن ایک چوکا لگانے کے بعد جب وہ چھکا لگانے گئے تو عین باؤنڈری پر انگلینڈ کی فیلڈرز نے ریلے کیچ کی مدد سے انھیں آؤٹ کر دیا۔
وہ 34 رنز بنا کر آؤٹ ہو گئے اور اس اوور میں سری لنکا صرف سات رنز حاصل کر سکا۔
سری لنکا کی جانب سے مزاحمت کا سلسلہ جاری اور کرس جارڈن کے اوور میں ہسارانگا نے ان کو بھی ایک چوکا لگایا اور اوور میں کل نو رنز حاصل کیے۔
لیام لوونگ سٹون اپنے تیسرا اوور کرانے آئے جس کی پہلی چار گیندوں پر انھوں نے صرف تین رنز دیے لیکن اس کے بعد سری لنکا کے کپتان شناکا نے انھیں چھکا لگایا اور آخری بال پر ایک اور سنگل لے لیا۔
اب انھیں جیت کے لیے 51 رنز کی ضرورت ہے۔
سری لنکا کے لیگ سپنر ہسارانگا نے اپنی آل راؤنڈ صلاحیتوں سے دنیا کو اجاگر کیا اور ٹائمل ملز کو بہترین چھکا مارا۔
اس کے بعد کپتان شناکا نے بھی کیپر کے پیچھے سے کھیل کر ایک چوکا حاصل کیا۔ اس طرح 14ویں اوور میں سری لنکا نے اپنی اننگز کی سنچری مکمل کر لی۔
شناکا اور ہسارانگا کی جارحانہ بیٹنگ پر انگلش کپتان نے اوور کے دوران اپنے ساتھیوں سے صلاح مشورے بھی کیے۔
اسی اوور میں تیسری گیند کے بعد ٹائمل ملز انجرڈ ہو گئے اور انھوں نے اپنا اوور ادھورا چھوڑ دیا جس کے بعد کرس ووکس ان کا سپیل مکل کرنے کے لیے آئے۔
سپنر لیام لوونگ سٹون کو ان کے کپتان بولنگ کے لیے دوبارہ لائے انھوں نے اوور میں صرف سات رنز دیے۔
سری لنکا کو اب جیتنے کے لیے 75 رنز کی ضرورت ہے۔
لیگ سپنر عادل رشید جنھوں نے دس اوورز کے اندر تین اوور کرا دیے تھے، اپنے آخری اوور کرانے آئے اور اس میں صرف پانچ رنز دیے۔
اس طرح انھوں نے 19 رنز دے کر دو وکٹیں حاصل کیں اور سری لنکا کے لیے میچ جیتنے کی راہ کی دشواری میں مزید اضافہ کیا۔
سری لنکا کے لیے جارحانہ بیٹنگ کرنے والے بھنوکا راجاپکشے نے کرس ووکس کو نشانہ بنایا جن کے پہلے اوور میں 12 رنز بنے تھے۔
سپیل میں واپس آنے کے بعد ان کو راجاپکشے نے ایک چھکا اور چوکا لگایا اور کوشش تھی کہ ایک اور شاٹ کھیلیں لیکن اوور کی پانچویں گیند پر وہ جیسن رائے کے ہاتھوں کیچ ہو گئے۔
انگلینڈ کی جانب سے 10ویں اوور کرانے کے لیے ٹائمل ملز آئے جنھوں نے راجاپکشے کے خلاف ایک ایل بی ڈبلیو کی اپیل کی جسے امپائر نے رد کر دیا۔
اس کے بعد سری لنکا کے کپتان ڈاسن شناکا نے اپنا پہلا چوکا مارا اور اب آخری دس اوورز میں میں انطوں جیت کے لیے 98 رنز کی ضرورت ہے۔
سری لنکا کے لیے ان کے کپتان شناکا سات رنز پر اور راجاپکشے 16 رنز پر موجود ہیں۔
اپنے دوسرے اوور میں کرس جارڈن نے جب فرنانڈو کو گیند کرائی تو بلے باز نے خوبصورت کوور ڈرائیو کھیلا جو کہ اگر جیسن رائے کی بہترین فیلڈنگ نہ ہوتی تو یقینی طور پر چوکا ہوتا۔
لیکن اس کے بعد اگلی ہی گیند پر جارڈن نے فرنانڈو کو اندر آتی ہوئی گیند کی مدد سے ایل بی ڈبلیو کر ڈالا اور سری لنکا کی مشکلات میں مزید اضافہ ہو گیا۔
انگلینڈ کی جانب سے عادل رشید نے پہلے دس اوورز کے اندر ہی اپنا تیسرا اوور کرا دیا جو کہ عمومی طور پر نہیں ہوتا۔
کپتان مورگن کی حکمت عملی تو کامیاب تھی کیونکہ اسی اوور میں راجاپکشے نے لیگ سائیڈ پر ایک اونچا شاٹ کھیلا اور گیند باآسانی کرس ووکس کے ہاتھ میں گئی لیکن انگلینڈ کے بہترین فیلڈروں میں سے ایک ووکس نے اس کیچ کو گرا دیا۔
سری لنکا کی جانب سے راجاپکشے نے لیم لوونگ سٹون کے پہلے اوور میں ان کے سر کے اوپر سے ایک چھکا لگایا اور اوور میں سری لنکا نے دس رنز حاصل کر لیے۔
گو کہ ان کی تین وکٹیں گر گئیں ہیں لیکن ان کے رن بنانے کی اوسط مناسب ہے۔
پاور پلے کے آخری اوور میں سری لنکا کے بلے بازوں نے پوری کوشش کی کہ وہ زیادہ رنز حاصل کر سکیں لیکن کوشل پریرا کی عادل رشید کو چھکا مارنے کی کوشش لے ڈوبی اور وہ مورگن کے ہاتھوں آؤٹ ہو گئے۔
بھنوکا راجپکشے نے البتہ عادل کو کوورز پر سے ایک چوکا مارا اور اوور میں چھ رنز حاصل کیے۔
فاسٹ بولر کرس جارڈن اننگز کا پانچواں اوور کرانے آئے تو ٹیلنٹڈ بلے باز اویشکا فرنانڈو نے ان کو ایک چوکا لگایا اور اوور میں چھ رنز حاصل کیے۔