آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
ٹی ٹوئنٹی کرکٹ ورلڈ کپ میں جمعے کے دوسرے میچ میں گروپ ٹو کی دونوں ناقابل شکست ٹیمیں، پاکستان اور افغانستان کا ٹاکرا ہوا جہاں پاکستان نے ایک نہایت دلچسپ مقابلے کے بعد میچ پانچ وکٹوں سے جیت لیا۔ پاکستان کی جانب سے آصف علی نے 19ویں اوور میں چار چھکوں کی مدد سے 148 کا ہدف پورا کر لیا۔
افغانستان کے کپتان محمد نبی نے اگلے اوور میں آتے ہی اپنی پہلی گیند پر فخر کو چکمہ دیا اور نہایت ہلکی گیند کرائی اور ایل بی ڈبلیو کی زوردار اپیل کی۔
لیکن راشد خان کی اپیل کے برعکس اس بار وہ کامیاب ہوئے اور پاکستان کو دوسری وکٹ کا نقصان اٹھانا پڑا۔
اس اوور میں محمد حفیظ نے ایک چوکا حاصل کیا اور کُل چھ رنز بنے۔
آج کے میچ میں حسن علی کی بولنگ کارکردگی پر کرکٹ شائقین کچھ مایوس سے ہیں۔ اریبہ خان نے لکھا کہ آخر ہم حسن علی کی جگہ شاہ نواز ڈاہانی کو کیوں نہیں کھلاتے۔
اسامہ نے لکھا کہ یہ حسن علی کی اس ٹورنامنٹ میں پانچویں نو بال ہے اور اس ٹورنامنٹ میں کسی موقع پر یہ کسی میچ تبدیل کرنے والی وکٹ سے محروم کر سکتی ہے۔
پاکستان شائقین کی کے دل حلق میں آ گئے تھے جب امپائر نے بابر اعظم کو راشد خان کے اوور کی آخری گیند پر آؤٹ قرار دے دیا۔
لیکن بابر نے اس ایل بی ڈبلیو پر ریویو لیا جس میں نظر آیا کہ گیند لیگ سٹمپس سے باہر جا رہی تھی۔
پاکستان کی جانب سے کپتان بابر اعظم نے محتاط انداز میں اننگز جاری رکھی لیکن پھر بھی اوور میں بغیر کوئی خطرہ مول لیے دس رنز حاصل کر لیے جس میں سلپ کے اوپر سے لگایا گیا ایک چوکا بھی شامل ہے۔
پاکستانی کپتان بابر اعظم نے اننگز کا اب تک کا سب سے سودمند اوور حاصل کیا جب نوین الحق کو انھوں نے دو چوکے لگائے اور مجموعی طور پر اس اوور میں 13 رنز حاصل کیے۔
افغانستان کی جانب سے کریم جنت نے آٹھواں اوور کرایا اور انھوں نے صرف پانچ رنز دیے۔
پاکستان کو اب 12 اوورز میں 100 رنز درکار ہیں۔
افغانستان کے خلاف جاری میچ میں اپنے سکور کی بدولت بابر اعظم بطور کپتان ٹی 20 انٹرنیشنلز میں ایک ہزار رنز سکور کرنے والے نوویں کھلاڑی بن گئے ہیں۔
مگر اپنے سے پہلے موجود تمام کھلاڑیوں کے مقابلے میں اُنھوں نے یہ سنگِ میل سب سے تیزی سے عبور کیا ہے، یعنی صرف 26 اننگز میں۔
انڈین کپتان ویرات کوہلی نے یہ ہدف 30 اننگز میں حاصل کیا تھا۔
افغانستان نے اپنے اوپننگ سپنر مجیب الرحمان سے ان کے چاروں اوور تسلسل سے کرا دیے جنھوں نے بہترین اکانومی ریٹ رکھا اور پاکستانی کھلاڑیوں کو زیادہ رنز حاصل کرنے کا بالکل موقع نہیں دیا۔
آخری اوور میں انھوں نے فخر کے خلاف ایک اپیل بھی کی اور مجموعی طور پر اوور میں چھ رنز دیے۔
پاکستان کے فخر زمان نے پاور پلے کے آخری اوور میں بولر نوین الحق پر چوکا لگایا اور اس کے ساتھ اوور میں سات رنز حاصل کیے۔
افغانستان کے سپنر مجیب الرحمان نے اپنے تین اوور پھینک دیے جس میں انھوں نے ایک وکٹ حاصل کی اور صرف نو رنز دیے ہیں۔
افغانستان کے کپتان محمد نبی کی جانب سے اننگز کے چوتھے اوور میں فخر زمان نے پہلے ان کو پانچویں گیند پر چوکا لگایا اور آخری گیند پر 86 میٹر کا چھکا مارا جس کی مدد سے اوور میں 14 رنز حاصل کیے۔
سکاٹ لینڈ کے خلاف پانچ وکٹیں لینے والے نجیب نے پاکستان کے خلاف بھی عمدہ بولنگ جاری رکھی اور اپنے دوسرے اوور میں محمد رضوان کو لیگ سائیڈ پر پھنسایا اور لالچ دے کر شاٹ کھلایا۔
رضوان اس ٹریپ میں پھنس گئے اور کیچ آؤٹ ہو گئے۔
افغان کپتان محمد نبی نے اننگز کا دوسرا اوور کرایا جس میں پاکستان نے آٹھ رنز حاصل کیے۔
آخری گیند پر رضوان نے چوکا لگایا۔
پاکستان نے افغانستان کی جانب سے دیے گئے 148 رنز کا ہدف کا آغاز کر دیا ہے اور کریز پر کپتان بابر اعظم اور محمد رضوان آئے۔
افغانستان کی طرف سے پہلا اوور نجیب الرحمان نے پھینکا اور صرف تین رنز دیے۔
افغانستان کے خلاف اس میچ میں حسن علی مہنگے بولر ثابت ہوئے ہیں۔ ان کے چوتھے اوور میں افغان بلے بازوں نے 21 رنز حاصل کیے جن میں ایک چھکا، دو چوکے اور ایک نو بال شامل تھی۔
فہد کیہر کہتے ہیں کہ ’حسن علی نے اپنے چار اوورز میں 38 رنز دیے۔ مزیدار بات یہ ہے کہ ان میں سے ایک اوور میڈن تھا۔‘
جبکہ ناز نے اگلے میچ میں شاہنواز دھانی کو کھلانے کی تجویز دی ہے۔
افغانستان نے حسن علی کے 18ویں اور پھر حارث رؤف کے 19ویں اوور میں 36 رنز حاصل کیے اور اس کی مدد سے سکور کو اس قابل کر دیا ہے کہ ان کے بولرز پاکستانی بلے بازوں کو پریشانی سے دو چار کر سکتے ہیں۔
شاہین شاہ آفریدی کے 20ویں اوور میں صرف سات رنز بنے جس میں ایک نو بال بھی شامل تھی۔
کپتان محمد نبی نے 32 گیندوں پر 35 جبکہ گلبدین نائب نے 25 گیندوں پر 35 رنز بنائے۔
ان دونوں کے مابین صرف 43 گیندوں پر 71 رنز کی شراکت قائم ہوئی۔
پاکستان کی طرف سے پہلے 17 اوور بہت اچھے گئے اور اس موقع پر افغانستان کا سکور صرف 104 رنز تھا۔
مجموعی طور پر پاکستان کے پانچوں بولروں نے وکٹیں حاصل کیں۔
شاہین آفریدی کی ایک، عماد وسیم کی دو اور شاداب نے ایک وکٹ لی اور تینوں نے فی اوور سات سے بھی کم رنز دیے۔
البتہ حسن علی اور حارث رؤف مہنگے ثابت ہوئے اور بالترتیب 38 اور 37 رنز دیے۔
ٹوئٹر پر عاطف نواز کہتے ہیں کہ افغانستان کے دو سب سے تجربہ کار کھلاڑیوں محمد نبی اور گلبدین نائب نے شاندار شراکت قائم کی اور ٹیم کو اچھے مجموعی سکور پر لا کھڑا کیا۔
’ایک دلچسپ چیلنج پاکستانی ٹیم کا منتظر ہوگا جس نے آخر کے اوورز میں زیادہ رنز دیے۔‘