آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
کرکٹ کے ٹی ٹوئنٹی ورلڈ کپ کے 22ویں میچ میں آسٹریلیا نے سری لنکا کو سات وکٹوں سے شکست دی ہے۔ وارنر کے 65 رنز کی بدولت آسٹریلیا نے 155 رنز کا ہدف 17ویں اوور میں حاصل کر لیا۔
ورلڈ ٹی ٹوئنٹی کا 22واں میچ آسٹریلیا نے سری لنکا کے خلاف سات وکٹوں سے جیت لیا ہے۔ اس کے ساتھ اب اس لائیو پیج کو اب مزید اپ ڈیٹ نہیں کیا جائے گا۔
29 اکتوبر کو دو میچز کھیلے جائیں گے۔ گروپ ون کے پہلے میچ میں بنگلہ دیش اور ویسٹ انڈیز کی ٹیمیں مدِمقابل ہوں گی۔ جبکہ گروپ ٹو کے دوسرے میچ میں پاکستان کا مقابلہ افغانستان سے ہوگا۔
ورلڈ ٹی ٹوئنٹی سے متعلق خبروں اور تبصروں کے لیے آپ ہمارے خصوصی صفحے کا رُخ کر سکتے ہیں۔
ایک ٹویٹ میں مظہر ارشد کا کہنا ہے کہ آئی پی ایل میں ڈیوڈ وارنر کی کارکردگی شاید اتنی اچھی نہیں تھی مگر آسٹریلیا کے لیے ٹی ٹوئنٹی انٹرنیشنلز میں واپسی کے بعد سے انھوں نے بہترین کھیل پیش کیا ہے۔
’78.85 کی اوسط کے ساتھ انھوں نے 552 رنز بنائے ہیں اور ان کا سٹرائیک ریٹ 138.34 ہے۔‘
جبکہ ہرشا بھوگلے کا کہنا ہے کہ آئی سی سی ٹی ٹوئنٹی ورلڈ کپ میں آسٹریلیا کی پیشرفت کے لیے ’وارنر کی فارم اہم ہوگی۔‘
اس جیت کے ساتھ آسٹریلیا نے گروپ ون میں دوسری پوزیشن حاصل کر لی ہے۔ انگلینڈ اور آسٹریلیا نے اپنے دونوں میچز جیتے ہیں اور ان کے سیمی فائنل میں پہنچنے کے امکان سب سے زیادہ ہیں۔
پہلے میچ میں فتح کے بعد اب اس شکست سے سری لنکا چوتھے نمبر پر ہے۔
سری لنکا پر فتح کے بعد آسٹریلوی کپتان ایرون فنچ کا کہنا تھا کہ ’بطور بلے باز مجھے پسند ہے کہ بلے باز کو ہی میچ کا بہترین کھلاڑی قرار دیا جائے۔ مگر کارکردگی کے اعتبار سے زیمپا نے اس میچ میں بہترین بولنگ کی۔‘
’ایسا لگا جیسے ہدف کے تعاقب کے لیے یہ اچھی وکٹ تھی۔۔۔ ڈیوڈ وارنر نے بہترین اننگز کھیلی۔‘
اس موقع پر سری لنکا کے کپتان شناکا نے کہا کہ ’ہمارا آغاز اچھا تھا مگر میچ کے وسط میں ہم اس کا فائدہ نہیں اٹھا سکے۔۔۔ مجھے لگتا ہے کہ ہم نے اس وکٹ پر 20 سے 30 رنز کم بنائے۔‘
16 اوورز کے بعد آسٹریلیا کا سکور 140/3 ہے۔
سمتھ کے ساتھ کریز پر سٹوئنس کی آمد
کپتان شناکا نے اپنے پہلے اوور میں اوپنر وارنر کو باؤڈری پر کیچ آؤٹ کر دیا ہے۔ آسٹریلیا کی اب تین وکٹیں گِر چکی ہیں۔
ہسرنگا نے اپنے چار اوورز میں 22 رنز دیے اور دو وکٹیں حاصل کیں۔ اب تک وہ وکٹ حاصل کرنے والے واحد بولر ہیں۔
ڈیوڈ وارنر نے 31 گیندوں پر اپنی نصف سنچری مکمل کر لی ہے۔ انھوں نے اب تک اس باری میں آٹھ چوکے لگائے ہیں۔
وکٹ کیپر پریرا نے ان کا ایک کیچ ڈراپ کیا تھا۔